32 حارة الموعودين

 

 

 

حمدا لله علىى السلامة يا عباس يا جنتل

 

ضيق عباس عينيه وسأله:

 

انت مين؟

 

 

 

 

الرائد جاسر ابو الفدا.. مباحث

 

زفر عباس وقال بضيق:

 

يا باشا في ايه يا باشا! أنا لسة خارج من السجن النهاردة

 

هه ماهو انا جاي أهنيك

 

تهنيني!!

 

ممكن ادخل؟

 

...... اتفضل يا باشا

 

دخل الى المنزل، فوجد ابن عباس في الردهة، فحياه:

 

السلام عليكم

 

رد مستغرباً:

 

عليكم السلام ورحمة الله

 

قدم عباس الضابط لولده

 

سعادة جاسر باشا، مباحث

 

اهلاً وسهلاً

رد الضابط التحية بلطف:

 

اهلاً بيك يا سامح، أخبار الكلية ايه؟ وعامل ايه في ورشة النحاس؟

 

اتسعت حدقاتيهما ذهولاً، ونظرا إلى بعضهما ، ثم قال عباس للضابط:

 

سعادتك تعرف ابني؟

 

هه انا أعرف كل حاجة عنك وعن حياتك يا عباس

التفت الضابط إلى ابن عباس وقال بنبرة مهذبة:

 

ممكن تسيبنا لوحدنا شوية؟

 

حاضر

 

انصرف الشاب فبدأ الضابط يسرد ما جمعه من معلومات عنه:

 

 ..عباس محمود السيد، الشهير بعباس الجنتل، السن تمانية واربعين سنة، خرجت من التعليم من ساتة ابتدائي ، بعدها تولاك المعلم ضرغام وضمك لصبيانه مقابل الإنفاق عليك وعلى والدتك واخواتك.وبعد وفاته التحقت بخدمة بنته جباير. بالمناسبة عرفت ان اخواتك الاتنين علي وحسين سابوا مصر بعد ما خلصوا تعليمهم المتوسط هروبا من سمعتك السيئة وشغلك في ترويج المخدرات.. كفاية كدة ولا اقول كمان؟

 

كفاية يا باشا ، كفاية.. أنا توبت توبة نصوحة ومش هرجع للسكة دي تاني

 

بس احنا عايزينك ترجع للشغل مع جباير

 

ايه!!! ياباشا اذا كنت حضرتك بتمتحني يعني عشان تتأكد إني مش ناوي ارجع، فحضرتك ممكن تراقبني. ومش صعب عليك يعني انك تعرف عني كل حاجة هعملها، زي ما عرفت عني كل حاجة من يوم ما اتولدت

 

اطلاقاً يا عباس، مش امتحان ولا حاجة، احنا فعلاً عايزينك ترجع الشغل مع جباير عشان محتاجين نعرف كتير عن نشاطاتها الخفية

 

تبسم عباس ونظر إلى الأرض هنيهة ثم قال:

 

حضرتك عارف أنا اتسجنت عشر سنين ليه؟

 

تبسم الضابط وقال:

 

اتسجنت بدل جباير. رفضت انك تعترف عليها وشيلت القضية لوحدك

 

عارف ليه يا باشا! عشان أرد الجميل للمعلم ضرغام اللي رباني وعاملني زي ابنه وصرف على امي واخواتي لحد ما خلصوا علامهم.. شوف حد غيري يا باشا ، عشان اللي ضحى بعمره عشان يرد الجميل، عمره ما هيكون خاين

 

رد الضابط ببعض الحدة:

 

مش عايز تكون خاين لمين! لست مجرمة بتدمر الشباب اللي زي ابنك وبنتك!! ولا انتو المهم عندكو سلامة ولادكو ومش مهم ولاد الناس!! يا عباس انت بترتكب أكبر خيانة في حياتك للناس كلها بتعاونك مع الست المجرمة دي

 

شعر بالخزي وطأطأ رأسه قليلاً، ثم قال بنبرة كسيرة:

 

يا باشا والله انا عاهدت ربنا سبحانه وتعالى اني هتوب عن السكة دي ومش هأذي حد من الشباب اللي زي عيالي تاني ولا هحزن قلوب اهاليهم عليهم، عشان ربنا يكفر عني ذنوبي

 

 

مش كفاية يا عباس.. لإن انت لو سبتها، ففي ألف غيرك بيخدمها، عشان كدة لازم نقطع راس الحية

 

قال عباس باضطراب:

 

يا باشا شوف حد غيري، الله يخليك

 

مافيش غيرك يقدر يتعاون معانا

 

اشمعنى انا!!

 

عشان انت بتحظى بثقة كبيرة لدى جباير.. انت الوحيد اللي تقدر تخترق العالم الخفي بتاعها من تجارة مخدرات و آثار وسلاح وكل تجارة مشبوهة بتقوم بيها

 

بدا الرعب على ملامح عباس وأمسك برقبته وقال:

 

 

سيادتك عارف جزاء الخيانة عند المعمة جباير ايه!!

 

ابتسم الضابط بوقار وقال:

 

ما تخافش، احنا حواليك ومش هنسيبك تقع إن شاء الله.. ودلوقتي بقى يا ريت تخليني اقابل المدام وبسمة بنتك عشان هنحتاجهم لتنفيذ خطتنا

 

ايه!!.. مراتي وبنتي!! ابوس ايدك يا باشا ما تدخلش مراتي وبنتي في الحكاية دي

 

قلتلك ما تخافش يا عباس. الأمر كله تحت سيطرتنا

 

بعد نقاش طال بينهما، رضخ عباس الجنتل على مضض ، والتقى  الضابط بزوجته وابنته، وشرح أمام ثلاثتهم خطته لإحكام الشرك حول جباير

 

*************************************

 

 

أعطى رضا سائقه الخاص، عشرة آلاف من الجنيهات في ظرف مغلق وقال:

 

خد يا اسطى علي، القرشين ضول  توديهم لامي، تسلمهوملها في ايديها، لو ما قيتهاش اوعى تضي الظرف  لحد من الجيران

 

 

اومال اعمل  ايه؟

 

تسأل على امي وتشوفها فين وتروحلها، يإما تستناها لحد ما ترجع، حتى لو رجعت وش الفجر، واوعى تقولها إن ان في مصر، تقولها إن انا بعت الفلوس دي من بلاد برا

 

حاضر يا رضا باشا

 

وفي مشوار تاني عايزك تعمله

 

أوامرك

 

تروح لهند في العلوان  اللي هقولهولك ضه ، وقولها رضا زعلان منك، عشان ما جيتيش في المعاض، وتقولها إن رقمها ضاع من الطلافون، وخده منها عشان هموط واكلمها، صوتها وحشني وعايظ اصمعه، وقولها الشوق عدا السبع بحور وغرقني يا هند

 

ههه ربنا يقرب البعيد يا باشا, اي خدمة تانية؟

 

لا ، توشكر

 

قاد السائق السيارة إلى خارج القصر، وتوقف بها على مقربة منه، وهاتف سوكا ليطلعها على الأمر، فلحقت به على الفور، فتحت باب السيارة وركبت إلى جواره، وسألته بتلهف:

 

اداك كام عشان تبعتهم لامه يا اسطى علي:

 

اداني الظرف ده

 

جبذته من يده وفتحته، وأخرجت المبلغ اللذي حواه، فوجدته عشر آلاف من الجنيهات، فاحتدم صدرها غيظاً ودمدمت سباباً:

 

عايز تبعت لامك الجعانة عشر تلاف جنيه بحالهم ياا بن ال...

 

أعادت المبلغ إلى الظرف، وأخفته في صدرها، ثم استدارت للسائق تسأله:

 

قالك على حاجة تاني؟

 

اداني عنوان هند، وقالي اجيب رقمها واقولها انه مشتاق

 

بلا مشتاق بلا متينل. عاملي فيها حبّيب بغل السرجة ده

 

أستطردت تقول:

 

بص يا سطى علي، انت تغيب قد تلات اربع ساعات كدة، وبعدين ترجع تقوله الكلام اللي هقولهولك ده

*****************************************

 

 

غاب السائق ما يزيد عن اربعة ساعات، وعاد، فالتقاه رضا بلهفة:

 

اديت الفلوس لامي يا اسطى علي؟

 

قال بعينين تلتجان كذباً:

 

ايوة اديتهوملها يداً بيد

 

سأله بشوق:

 

وامي عاملة ايه؟

 

كويسة، فرحت بالفلوس قوي وبتدعيلك

 

اوعى تكون عرفتها اني في مصر؟

 

لالا، قولتلها انك في بلاد برا

 

وهند عملت معاها ايه؟

 

لا، هند ما لقيتهاش

 

وخز الحزن قلبه وقال:

 

ما قيتهاش ازي! اوعى تكون روحت علوان غلط

 

لالا، روحت نفس العنوان اللي اديتهولي، بس ما لقيتهاش، امها قالتلي انها خرجت مع صاحبتها ومش عارفة هترجع امتى

 

زفر رضا وقال:

 

ماشي، هبقى ابعطك ليها مرة طانية

 

تحت امرك يا رضا باشا

 

مضى السائق، فقال رضا بنبرة حزنى:

 

يا ترى انتِ فين يا بت يا هند، قلبك قسي عليا ولا ايه حكايتك!

****************************

اعتذر عن قصر الحلقة ، انتظروني يوم السبت إن شاء الله للتعويض ههه 

اكثروا من الذكر

لا اله الا الله ولا حول ولا قوة الا بالله

***

 

*****************************************