الرابعة والثلاثين(حارة الموعودين)

 

 

 

مساء الخير يا معلمة:

 

طالعت الفتاة بإعجاب وردت التحية:

يا مساء النور. ايش ايش، دانتِ كبرتِ واحلويتِ قوي اهو

 

تبسمت الفتاة خجلاً، وصمتت، فقالت والدتها تمتدح جمالها:

 

بقى حد يستنى عاالحلويات دي من غير جواز، ويرد الجدع اللي مستني منها نظرة رضا!

 

زفرت الفتاة وقالت لوالدتها باحتداد:

 

ماما من فضلك ما تجبيش السيرة دي تاني، أنا مش هتجوز البني أدم الحقير ده

 

لوت والدتها شفتها وقالت:

 

حكير!! اسم الله يا بنت العُمَد واصحاب الاطيان. طب ايه رأيك بقى طلعتِ ولا نزلتِ ولا اتنطتِ مش هتتجوزي غيره. وانا مش هخسر اختي عشان دماغك اللي عايزة كسرها

 

اهتاجت الفتاة:

 

يوووه يا مامااا، والله أنا زهقت من عيشتي

 

انتِ يا بت بتعلي صوتك عليا!! طب ايه رأيك بقى...

 

قاطعتها المعلمة جباير وقالت للمرأة:

 

بالراحة عالبت يا سعدة، الكلام ما يبقاش كدة

 

قال عباس باحتداد:

 

قوليلها يا معلمة، عشان الولية دي مسممة عيشة العيال بعمايلها، أنا مش عايزة اقولك عاملة ايه مع الواد كمان، لدرجة انه قالي انه كان ناوي يطفش من خلقتها ويسافر على أي مركب طالعة على ايطاليا

 

ثارت زوجته وقالت بتهكم:

 

ايوة ما انا مش امهم، انا مرات ابوهم

صاح بها زوجها:

 

وربنا مرات الأب ما تعمل عمايلك

 

صاحت بهما المعلمة:

 

وبعدهالك انت ومراتك يا جنتل، هو انا جاية عشان تقلبولي دماغي ببلاويكو!

 

تعذر لها عباس:

 

لا مؤاخذة يا معلمة، دخلناكِ في اللي مالكيش فيه

 

ما تقولش كدة يا جنتل، اللي يخصك يخصني، بس انت ومراتك مش مديني فرصة اتكلم مع البت واعرف اللي في دماغها

 

البت قدامك اهيه، قولي للمعلمة يا بسمة على عريس الغفلة اللي امك عايزة ترازيكِ بيه

 

 

سددت زوجته نظرة متهكمة وطقطقت شفتها وأشاحت بوجهها، فقالت الفتاة:

 

انا بصراحة مش عايزة ابن خالتي يا معلمة

 

ليه يا حلوة؟

 

واد شمام وصايع كدة وبتاع مشاكل، وكل يوم مستنيني على ناصية الحارة، يسمعني كلام فارغ ويحلف انه مش هيتجوز غيري ولو مين وقف قصاده، لدرجة انه كل ما يسمع إن في واحد عايز يتقدملي، يروح يتخانق معاه ويضربه ويهدده بالقتل لو ما بعدش عني

 

قهقهت المعلمة وقالت:

 

ده مغرم صبابة بقى

 

ردت والدتها:

 

الواد يتمنى لو اتقلعله عين بس يتجوزها يا معلمة، بس هي اللي شايفة روحها وسايقة العوج. بس دماغها دي مسيري اكسرهالها

 

هاج هائج الفتاة:

 

مش هتجوزه يا ماما، مش هتجوزه، سمعتيني!!

 

غادرت الفتاة مجلسهم غاضبة، ووعيد والدتها يلاحقها:

 

هتتجوزيه يا بسمة، وبكرة تشوفي كلام مين اللي هيمشي، اوعي تكوني فاكرة انك هتتحامي في ابوكِ

 

حدجها عباس بنظرة ضيق وقال للمعلمة:

 

سامعة الولية قليلة الرباية بتقول ايه يا معلمة!

 

أنا قليلة الرباية يا عباس! ده جزائي اني حافظتلك على بيتك وعيالك في غيابك! أخرتها بقيت قليلة الرباية!! عشر سنين شايلة البيت كنت فيهم أم وأب وشايلة هموم ماحد داري بيها، وفي الآخر بقيت قليلة الرباية يا سي عباس يا جنتل

 

وضعت المعلمة يدها على فمها وغمغمت:

 

يقطعك ويقطعه يا بعيدة، دي كانت شورة سودة لما اتهفيت في نفوخي وجيتلكو

 

رفعت المعلمة رأسها وقالت:

 

سك عالموضوع يا عباس انت ومراتك عشان ده مش وقته. أنا جيالك النهاردة عشان اباركلك على خروجك من السجن

 

قامت عن مقعدها استعدادا للمغادرة وقالت:

 

كفارة يا عباس يا جنتل، نورت الدنيا بحالها.. ما تنساش تعدي عليا بكرة في الوكالة عشان نتكلم في الشغل

 

قام عن مقعده وقال لها:

 

ما بدري يا معلمة

 

بدري من عمرك يا جنتل... وانتِ يا سعدة، خفي عالراجل يختي، خفي عالراجل ليطفش مننا، واحنا ما صدقنا لقيناه

 

من عنيا يا معلمة، دا سيدي وسيد البيت، غيرش دماغه الناشفة وانه مش عارف مصلحة بنته

 

 

راعي الراجل يختي، بلا بنته بلا خيبته، هي بنته هتعمله ايه يعني لما تتجوز! هتكبش من العز وتديله! دي هتزود على همه زكايب هموم...سلام

 

مع السلامة يا معلمة، نورتينا يا ست الكل

 

***************************************

رأت أم عوض، صاحب عربة نقل صغيرة وهو يصيح وسط المارة كالملتاث:

 

الحقوني يا ناس، اتسرقت يا عالم، كراتين البضاعة اللي فيها زيت وسكر، والفلوس اللي في التابلوه اتسرقوا، الحقوني يا ناس

 

نادته أم عوض:

 

اسطى رزق، أنا شوفت الحرامي اللي سرق العربية يجي الساعة اتنين بالليل والحارة هس هس

 

هرع إلى نافذتها بتلهف يسألها:

 

هو مين الحرامي ده؟

 

لا هو مش حرامي واحد، دول في وش العدو يجي خمسة

 

هما مين من سكان الحارة يا خالتي ام عوض؟

 

لا يا اخويا دول باين عليهم غُرب مش من الحارة. يا ريتهم كانوا من الحارة، كانوا استفادوا بالزيت والسكر اللي غليوا وما حدش عارف يشتريهم

 

طب ما صرختيش ليه وناديتِ عليا ! دانا في البلكونة اللي فوقيكِ يا خالتي ام عوض

 

يا سلام يا اخويا! اصرخ عشان يضربوني بسكينة ولا مطوة واضيع عمري عشان اشكالكو! والله ما تسووا ولا تستاهلوا . انا استخبيت ورا الستارة وشوفتهم

 

طيب فاكرة أشكالهم؟

 

ايوة

 

شكلهم ايه؟

 

شكلهم عيال صيّع كدة

 

ما العيال الصيع كتيررر

 

أهم شبههم كدة. روح دور عليهم

 

يبقى عليه العوض ومنه العوض يا خالتي ام عوض

 

أشاحت بيدها وعادت ترقب الرائح والغادي

 

********************************************

 

 

خالتي ام رضا، افتحي يا خالتي

 

جاية يا هند

 

فتحت الباب، فألفت هند بوجه باهت، تحمل صحناً من طعام مغطى وفوق الغطاء، علبة بلاستيكية صغيرة و رغيفين من الخبز وحيت والدة رضا:

 

ازيك يا خالتي ام رضا

 

أهلاً يا هند، ادخلي يا بنتي، ايه اللي شايلاه ده؟

 

دلفت إلى البيت تقول بنبرة حزنى:

 

دا طبق بصارة، اصل امي عملت بصارة النهاردة، قولت ادوقك يا خالتي، وجبتلك حتتين بتنجان مخللين يفتحوا نفسك، وعديت عالفرن جبتلك رغفين عيش سخنين

 

يا بنتي وتاعبة نفسك ليه بس! كل يوم والتاني جايبالي أكل وشايلة همي زي ما اكون امك

 

بدت بسمة كسيرة على وجهها وقالت:

 

ما انتِ امي يا خالتي

 

سددت إليها والدة رضا نظرة شفيقة وقالت:

 

مال وشك دبلان كدة يا بت؟

 

ابداً يا خالتي، سلامتك مافيش حاجة.... ... خالتي.. مافيش أخبار عن رضا؟؟

 

يا بت ما قولتلك لا حس ولا خبر، حتى قالي يا امّا هبعتلك خمستلاف جنيه كل أول شهر، وادي شهر جر في ديله شهر وما شوفتش منه حاجة. واديني اتحوجت للناس ومستنية اللي يحن عليا بلقمة

 

ما تقوليش كدة يا خالتي، انتِ امنا وكلنا ولادك، وده حقك علينا

 

أصيلة يا هند، كتر خيرك يا بنتي ... الله يسامحك يا رضا يا ابني، عطلت حال البنية معاك

أردفت والدة رضا بنصيحة:

 

هند، لو جالك عريس اتجوزي يا هند وما تستنيش رضا ابني

 

ابتئست الفتاة وكاتمت عبراتها وقالت:

 

ليه كدة يا خالتي! يكونش رضا اتجوز وانتِ مخبية علية؟ عشان كدة رقمه مقفول ولا ما اعرف غيره! قوليلي الحقيقة يا خالتي الله يخليكِ

 

يا بنتي وربنا ما اعرف عنه حاجة. لكن خديها كلمة من واحدة زي امك، ما تستنيش راجل مش عارفاله طريق ولا سكة.. والعمر بيجري يا بنتي

 

انهمرت عبراتها وقالت:

 

بس رضا بيحبني يا خالتي

 

وهو فين رضا! حد عارفله طريق ولا فكر يسأل على امه!! واللي مالوش خير في امه مالوش خير في حد

 

..... الغايب حجته معاه يا خالتي

 

بصراحة بقى يا هند، امك كانت عندي امبارح، وقالتلي عالعريس اللي جالك وقالت انك رافضاه، وهي وابوكِ زعلانين أخر زعل

 

استشاطت  هند غضباً وقالت:

 

عشان كدة سلطتك عليا عشان تسمعيني الكلمتين دول!!

 

تبسمت وربتت على كتفها وقالت:

 

امك يا بنتي، امك يا حبيبتي وقلبها عليكِ

 

تنهدت هند وقالت:

 

وانا مش هتجوز غير رضا يا خالتي.. فوتك بعافية

 

الله يعافيكِ يا حبيبتي

 

غادرت هند المنزل وأغلقت الباب خلفها، فهزت والدة رضا رأسها متحسرة وقالت:

 

يا ترى انت فين يا رضا، البت نشفت وبقت جلد على عضم وانت ولا داري يا خلفة الندامة

 

ذهبت إلى النافذة ورفعت رأسها إلى السماء وقالت:

 

اعمل ايه يا رب؟ لا عندي فلوس ولا حد يصرف عليا، أشحت ولا اروح فين؟ رضا مشي وماسابش إلا التوكتوك

 

خفضت بصرها وقالت متفكرة:

 

التوكتوك!! أسوق التوكتوك بدل رضا!! بس انا ما بعرفش اسوق.... نظرت إلى التكتوك المغطى بغطاء قماشي بال وقالت:

 

الله يسامحك يا رضا، لو كنت اعرف انك هتستندل مع امك وتختفي زي فص الملح اللي داب، كنت خليتك علمتني سواقة التكتوك قبل ما تمشي.... يا ترى مين يعلمك يا ام رضا! يا دي الوقعة السودة

 

************************************************

 

 

 انتهت الحلقة

انتظروني يوم الخميس ان شاء الله

 

لا إله إلا الله ولا حول ولا قوة إلا بالله

 

اللهم  صل وسلم وبارك على نبينا محمد