الخامسة والثلاثين( حارة الموعودين)

 

 

كانت نهى ابنة بائعة الخضار في دكان والدتها، تبيع للزبائن، حين تفاجأت بالمعلم عدوي وجمع من رجاله يتجهون صوب الدكان، زفرت ولم تعبأ به، وأكملت الكيل لأحد الزبائن، فأشار إليها بهراوته، وسألها بازدراء:

 

امك فين يا بت

 

احتدم صدرها غيظاً وصاحت به:

 

ايه بت دي! ما تتكلم كويس

 

قهقه وقال بتهكم:

 

معلش، هبقى اروح لسكولا  والمس تعلمني اتكلم مع بنت بياعة الخضار ازاي

 

زفرت وسألته باحتداد

 

انت جاي هنا عايز ايه؟

 

جاي اتملى في حسنك وحسن الست الوالدة واقولكو انتو ما خليتوش البيت لحد دلوقتي ليه؟؟

 

ومش هنخليه، ده بيت ابويا ومش هنسيبه

 

ابوكِ مين يا بت! هي بلطجة يا بنت البلطجي!

 

انت اللي بلطجي وستين بلطجي، وواخد البيت والوكالة بتوع ابويا بالغصب

 

ومين اللي قالك كدة! امك ام قلب اسود اللي بتحقد على سيادها!!

 

احترم نفسك وما تتكلمش عن ماما كدة. حارة الموعودين كلها عارفة إن البيت ده بيت ابويا وانت خدته بالغصب من امي، والوكالة اللي انت قاعد فيها وعامل معلم، برضو وكالة ابويا

 

قهقه وقال:

 

ماشي يا حلوة، وكالة ابوكِ وبيت ابوكِ وهطلعك منه انت وامك، وههد البيت عشان ارضه لزماني

 

خرجت من الدكان ووقفت أمامه وقالت بتحد:

 

مش هيحصل، وأنا اللي هقف قصادك انت ورجالتك، عشان الحاج خضر خلف بنت بمليون راجل

 

ههههه طب اجري يا شاطرة خلي امك تحضرلك الرضعة عشان معادها جه

 

طب هتشوف يا عدوي اني هقدر امنعك، البيت ده مش هتقدر تهد فيه طوبة واحدة، وابقى وريني هتعمل ايه يا عدوي

 

عدوي كدة من غير انكل! هي دي التربية يا بنت فردوس!!

 

جأرت الفتاة:

 

اسمي نهى بنت الحاج خضر سيد الحارة دي كلها وعين أعيانها، واذا كنت بجبروتك زمان قدرت عليه، فخليك متأكد ان سابلك بنت نابها ازرق وهتطلع القديم والجديد على جتتك

 

 

قهقه وقال لرجاله:

 

ده النمل طلعله سنان يا رجالة

 

قهقه الرجال بتهكم، فقالت نهى بتحدي:

 

لا وانت الصادق، ده طلعله مخالب وأنياب وهيفترس أي حد يقرب منه بأذى

 

جاءت أم نهى من مشوارها، وسمعت عبارة ابنتها من بعيد، فانتشت وقالت بصوت مدوي جعل عدوي ورجاله ينظرون إلى مصدر الصوت خلفهم:

 

عشان تعرف يا عدوي اننا مش ولاية مكسورين الجناح

 

نزلت أم محمود على صوت الشجار، ووقفت ترقب ما يحدث، ككثير من أهل الحارة اللذين تجمعوا من كل حدب وصوب يمارسون هواية الفضول المتأصل في نفوسهم دونما حراك، سمعت أم محمود ،عدوي يتوعد أم نهى:

 

اوعي تكوني فاكرة انك هتخوفيني ببنتك المسترجلة دي، ولا تكوني متحامية في صوتك العالي وعينك القوية اللي يندب فيها رصاصة، ولا يمكن فاكرة ان الألاضيش اللي أوياهم في بيتك عشان تستقوي بيهم عليا، هما اللي هيحموا ضهرك ويقفوا قصادي، كلكو كدة على بعض واغش، ما تسووش، صوت عالي عالفاضي، ووقت الجد كلكو هتجروا عشان طوفان عدوي ما ياخدكوش في وشه.. اعقلي كدة يا دوسا انتِ والمحروسة بنتك عشان لحد دلوقتي مش عايز أأذيكِ. وعشان غلاوتك هاديكِ مهلة تانية.. قدامك شهر عشان تخلي البيت وتشوفيلك متوى تانى، ولا خرابة تلمك انتِ وبنتك.. سلام يا دوسا ههه

 

شهقت أم محمود وصعدت إلى المنزل لتخبر بنتيها بماحدث، بينما هرع المهندس طارق الذي عاد للتو من عمله،  إلى نهى ووالدتها، وسألها بتلهف:

 

في ايه يا نهى؟ هو عدوي عايز منكو ايه؟

 

ردت بتهكم:

 

لا ما تاخدش في بالك يا باشمهندس،  عدوي عايز يهد البيت على دماغنا،  روح اقف وسط الناس اللي واقفين واتفرج علينا من بعيد

 

شعر بالخزي وخفض بصره، فقالت لوالدتها:

 

أنا طالعة يا ماما اشوف مذاكرتي، الإيراد عندك في الدرج وأيدتلك كل اللي اتباع في الدفاتر

 

اطلعي يا حبيبتي، كتر خيرك

 

رفع طارق بصره وقال لام نهى:

 

قوليلي ايه المطلوب مني يا خالتي ام نهى، وانا اعمله:

 

بدت بسمة منهكة على وجهها وقالت:

 

كتر خيرك يا ابني، الوجع وجعنا، مش وجع حد تاني، عشان كدة احنا اللي حاسين بيه.. بعد اذنك اشوف الزباين

 

انهمكت وسط زبائنها، فمضى إلى بيته متلفعاً بخزيه

 

*************************

خلصت أم محمود وبنتيها نجيّا، وقصت عليهم ما حدث، واستطردت:

 

يعني بالمختصر المفيد كدة يا بنات، أم نهى مقعدانا عندها وعمالة تعلف فينا زي العجول في الزريبة، عشان نقف في وش المعلم عدوي بدالها، قال وانا اللي من طيبة قلبي وسلامة نيتي كنت مفكراها مقعدانا عندها لوجه الله وعشان ما نترميش في الشارع

 

لم يرق ابنتاها ما قالت، فردت منى مدافعة عن ام نهى:

 

يا ماما، طنط ام نهى مافيش أطيب من قلبها، وفعلاً عملت فينا جميل كتر خيرها، يوم ما جت تجري علينا يوم الزلزال وصممت اننا ما نباتش في الشارع

 

يا بت قولتلك مش لوجه الله، ما تبقيش بهيمة وافهمي بقى، قال وانا اللي عمالة اقول هي لحد دلوقتي مستحملانا ليه، اتاريها مخليانا عشان تستقوى بينا قدام المعلم عدوي. اومال، عايزة ترمينا في النار وتنجى هي وبنتها، الست اللي ما بتخافش من ر بنا

 

طقطقت الإبنة الأخرى صفاء، شفتيها وقالت بضيق:

 

يا ماما ما يصحش كدة، يا ريت تفكري في الكلام قبل ما تقوليه، احنا لما طنط ام نهى خدتنا عندها، ما كانش لسة جه قرار ازالة للبيت ولا تعرف حاجة عن الحكاية دي.. قرار الإزالة جه تاني يوم الزلزال، وهي اتفاجأت زي ما كلنا اتفاجئنا

 

أشاحت أم محمود بيدها ووبخت ابنتها:

 

بس يا بت يا صفاء بلاش عبط، هي أكيد كانت عارفة بحكاية قرار الإزالة اللي جابهولها المعلم عدوي من قبل االزلزال، وما كانتش عارفة تعمل ايه ولا تسوي ايه، والزلزال ده زي ما يكون جالها في وقته، عشان نتشرد ونترمي في الشارع، وهي بقى شيطانها وزها انها ما تضيعش الفرصة وتاخدنا عندها وتأكلنا وتشربنا عشان تكسر عنينا ونقف في وش عدوي بدالها، لكن ده بعدها، قوموا يا بنات لموا هدومكوا

 

ردت منى باندهاش:

 

نلم هدومنا ونروح فين يا ماما؟

 

نروح نغلس على أي حد من قرايبنا ونقعد عندهم، على الأقل هناك مش هنلاقي حد يقولنا اقفوا في وش عدوي.. قوموا يا بنات قوموا ده الحكاية بين عدوي وام نهى هتكبر وتولع واحنا اللي هنروح في الرجلين، يلا فزوا قوموا، قاعدين متنحينلي كدة ليه!!

 

قالت صفاء باستياء:

 

والله يا ماما ما يصح اللي بتعمليه ده، بقى ده جزاء طنط ام نهى بعد كل اللي عملته معانا! انك تمشي من هنا وانتِ عارفة انها داخلة على معركة كبيرة!

 

ربنا معاها يا حبيبتي، احنا مافيناش حيل نحارب ولا ندخل في معارك. أنا هنزل اقول لابوكِ يلم حاجته وحاجة محمود ويتصل بيه في الشغل يقوله حصلنا على بيت عمة ابوك الحاجة ام ناصر في عطفة القناديلي، اهي عيالها اتجوزوا وعايشة لوحدها في شقة شرحة وبرحة، واحنا اولى بيها

 

هبت منى واقفة وقالت:

 

يا ماما الحاجة ام ناصر دي ست بخيلة ومش بتحب حد يروح عندها

 

حبها برص، هو بمزاجها ولا ايه! واذا كان على بخلها احنا مش هنكلفها حاجة، اللي هتاكل منه احنا هناكل منه، ان شالله لو كل يوم فول وطعمية وعدس، وممكن احنا نساهم معاها ونشتري مخلل فاتح للشهية، اومال، احنا مش عوالة على حد

 

تنهدت صفاء وقالت:

 

طب والإيجار يا ماما، مين هيدفعه؟

 

هي تدفعه زي ما بتدفعه كل شهر، ما هي على قلبها قد كدة

 

قهقهت منى وقالت:

 

ده كدة يبقى احتلال يا ماما

 

يلا يا بت بلا احتلال بلا طين، الناس لبعضيها

 

أصرت أم محمود أن تصطحب بنتيها ويغادرن بيت أم نهى التي أكرمت نزلهن، دونما ذكر أسباب، ودون كلمة شكر منها لصنيع المرأة.... أهكذا يا أم محمود! فهل جزاء الإحسان إلا الإحسان!!

 

هكذا بعض الناس، حين استشعار الخطر يحوم حول من أكرمهم، يولون الدبر فارين .. يعرفون الناس في الرخاء، فإن ادلهمت الخطوب واشتدت الكروب، يطلقون سيقانهم لرياح الهروب

 

*********************************

عاد طارق إلى المنزل بملامح يتخللها الحزن، فسألته والدته:

 

مالك يا طارق؟

 

مافيش يا ماما؟

 

مافيش ده ايه! في حاجة حصلت في الشغل زعلتك؟

 

يا ماما قلت مافيش

 

هزت كتفيها وقالت:

 

مافيش مافيش يا خويا. روح غير هدومك على ما اسخنلك الأكل

 

لا.. ماليش نفس.. أنا هغير هدومي وانام عشان اهرب

 

تهرب من مين! هو حد كان بيجري وراك برا يا ضنايا؟

 

أهرب من ضعفي.. أهرب من قلة حيلتي.. أهرب من جبني

 

هرع إلى غرفته وصفع الباب، فأشاحت والدته بيدها وقالت:

 

انت هتمثلي فيلم عربي انت راخر! أهرب من حيلتي واهرب من خالتي

 

خرجت أم هشام من غرفتها، وسألتها:

 

ماله ابنك، مش طايق نفسه ليه؟

 

تلاقيه متخانق مع المدير واداله جزا، هيكون ماله يعني..هروح اسخن الأكل عشان نتغدا انا وانتِ

 

يا ولية ما احنا لسة متغديين

 

نتغدا تاني يختي ورانا ايه!

 

ارحميني يا لطيفة، انا زايدة يجي خمسة كيلو من ساعة ما جيت قعدت عندك، طول النهار ما ورناش غير الأكل والشرب

يختي يا سمحية، دنيا غرورة، مش واخدين منها إلا الأكلة الحلوة

 

زفرت أم هشام وجلست تضع يدها على خدها مغمغمة بضيق، بينما اتجهت أختها إلى المطبخ وهي تنادي ابنتها:

 

يا سلمى، سيبك من الحبس الانفرادي اللي عاملاه في اوضتك انت وموبايل الهم وتعالي اعملي شوية سلطة ناكلهم جنب الأكل

 

أتاها صوت ابنتها:

 

هشوف المقطع اللي على التيك توك  ده واجيلك يا ماما

 

يقطع التيك توك عالفيس بوك، الناس نسيت شكل بعض من كتر قعدتهم عليهم

 

 

*****************************

في مكتبه بالمستشفى، التقى الدكتور هشام بصديقه الدكتور علاء، فقال الدكتور علاء:

 

على فكرة يا هشام، أنا خدت قرار مصيري وخطير

 

خير؟

 

قررت اتجوز بنت خالتك اسمها ايه دي.. والله نسيت اسمها

 

هههه يا اخي انت انسان غريب، عايز تخطب واحدة وانت ناسي اسمها!

 

الاسامي مش مهم، المهم الجوهر

 

ممم يعني انت مقتنع بالجوهر؟

 

لا والله، أنا أصلاً ما اعرفش هي تصلح زوجة ولا لأ.

 

هههه اومال عايز تخطبها ليه؟

 

عشان بنت خالتك، وانا واثق فيك، اكيد برضو بنات عيلتكو هيكونوا كويسين وأخلاقهم مش بطالة

 

هههه والله انت اغرب عريس شوفته في حياتي

 

مش اغرب منك، انت خطبت واحدة كل الناس بتحذرك انها وش نحس

 

استاء الدكتور هشام وقال:

 

يا اخي انتقي ألفاظك مش كدة، وبعدين أنا ما اسمحش لحد يتكلم عن خطيبتي بالشكل ده

 

انت انسان شهم يا هشام، عشان كدة انا عايز اناسبك واتجوز بنت خالتك.. لو سمحت قولهم اني هجيب أهلي وازورهم يوم الجمعة ان شاء الله

 

ههه يا اخي مش لما نشوف هتوافق عليك ولا لا

 

ما توافقش ليه يا اخويا! هما البنات لاقين عرسان!!

 

قهقه الدكتور هشام وقال:

 

يا سيدي برضو حقها نسألها، يمكن يكون عندها اعتراض. والحاجة الوحيدة اللي من وجهة نظري ممكن سلمى تعترض عليها، هي طولة لسانك

 

هي اسمها سلمى! افتكرت .. يارب ما انساش تاني .. على العموم هروح اتصل بماما في الجمعية واقولها تفضي نفسها يوم الجمعة ان شاء الله

 

جمعية ايه؟

 

يا اخي ما قولتلك قبل كدة ان ماما من ساعة ما اتطلقت من بابا وانا عندي سبع سنين وهي أنشئت جمعية اسمها نساء بلا قيود، ومتزعمة حركات نسوية ضد الجواز

 

قهقه هشام وقال:

 

وامك دي بقى اللي ضد الجواز من ساعة ما اتطلقت، هترضى تيجي تخطبلك؟

 

هحاول معاها، وان شاء الله تقتنع، وان ما اقتنعتش هجيب بابا لوحده، بس يارب يكون فاضي وما يقوليش بدرس قضية مهمة. ما هو محامي جنايات ما انت عارف

 

ايوة عارف، وعارف انه اتجوز بعد والدتك مرتين وطلق

 

مش عارف ابويا وامي كارهين الاستقرار الأسري ليه

 

اوعى تكون زيهم يا علاء، وبنت خالتي تتدبس

 

لالا ما تخافش. أنا بقى تعبت من عدم الاستقرار من يوم ما اتولدت، اتربت على ايد المربيات اكتر ما اتربيت على ايد امي.. بس نفسي اعمل بيت مستقر واعيش مستقر مع زوجة تعينني على الاستقرار

 

ان شاء الله يا علاء.. على العموم أنا هخلص شغل النهاردة واروح على بيت خالتي وافاتحها في الموضوع، وان شاء الله خير.. بس انت حسن ألفاظك ههه

 

هحاول والله، بس ما اوعدكش... لكن انت ما قولتليش هتتجوز امتى يا هشام؟

 

اتجوز ازاي بس دلوقتي! أنا حاسس إن الظروف كلها ضدي ومش عارف اعمل ايه! أنا لحد دلوقتي ما لقيتش شقة للإيجار، وحتى لو لقيتها مش عارف هفرشها ازاي، ووجودي في بيت اخويا مضايقني جداً، ومش عارف أوفر لابويا وامي سكن مناسب

 

زفر وأكمل:

 

حقيقي مش عارف اعمل ايه في الظروف اللي معانداني دي

 

طب بقولك ايه يا هشام، شقة جدتي لوالدتي فاضية ومقفولة، الشقة فخمة وجميلة جداً، وأمي مهتمة بيها ودايماً تبعت الشغالة تنضفها كل أسبوع.. الموبيليا اللي فيها كلها جاية من فرنسا، ذوق قديم كلاسيكي رائع ماتلقيش منه دلوقتي.. ايه رأيك لو تتجوز فيها، ولو حابب تجيب والدك ووالدتك كمان يقعدوا معاك مافيش مشكلة. وممكن تدفع ايجار بسيط

 

غمرت السعادة روح الدكتور هشام وقال:

 

انت بتتكلم جد يا علاء؟

 

وههزر معاك ليه! شايفني تافه!

 

يعني معقول شقة بالفخامة دي تديهالي اتجوز فيها بإيجار بسيط كمان؟

 

يا أخي ايه المشكلة! انت صاحبي ولازم اقف جنبك، اومال ايه فايدة الصحوبية!

 

أنا مش عارف أقولك ايه ولا أشكرك ازاي يا علاء... ممم بس يمكن والدتك ما توافقش، وخصوصاً انت بتقول انها مهتمة بالشقة دي جدا

 

لا هي مهتمة بالشقة عشان دي وصية جدتي، لكن ماما أصلاً مش فارق معاها

 

لا برضو لازم تقولها

 

طيب استنى هتصل بيها وانت معايا

 

دق رقم والدته عدة مرات متتالية حتى ينتهي الاتصال دونما رد، وفي المرة الأخيرة ردت بضيق:

 

ايه، في ايه، عايز ايه، مليون اتصال عشان ايه يا مستفز!!

 

ههه ازيك يا ماما

 

أهلاً، نعم

 

مالك متعصبة ليه؟

 

عندي اجتماع نسائي مغلق يا بني أدم، وانت مافيش ريحة الدم، مصر إني أرد، اديني رديت، خير يا سي علاء

 

ماما، انت عارفة الدكتور هشام صاحبي؟

 

هعرفه من انهي مصيبة!!

 

يا ماما، الدكتور هشام صاحبي اللي رجع من امريكا من كام شهر

 

ماله، ماله، ماله، انجز مش فاضيالك

 

يا ماما بالراحة يا ماما, اديني فرصة اتكلم بهدوء واقولك أنا متصل ليه

 

يا اخي قول وخلصني قبل ما افقد اعصابي وارزع الخط في خلقتك

 

اصل يا ماما صاحبي الدكتور هشام مش لاقي شقة يتجوز فيها

 

ويتجوز ليه! يتجوز ليه يا اخويا! من فلاحتكو قوي في إدارة البيوت هتتجوزوا! دانتو مجموعة فشلة

 

معلش يا ماما اديله فرصة يمكن ينجح

 

وانا المطلوب مني ايه يعني؟

 

بصراحة أنا قولتله على شقة تيتة زهيرة، اللي حضرتك قافلاها، قلت يأجرها ولو بمبلغ بسيط ويتجوز فيها

 

اعمل اللي انت عايزه، بس شرط يحافظ على رونق الشقة، وإياك فاز ولا انتيك يتكسر، هكسر رقبتك ورقبته. سامع؟؟

 

حاضر يا ماما

 

في أي هبل تاني ولا اروح اشوف الاجتماع

 

روحي يا ماما للاجتماع، متشكر على وقتك

 

قهقه الدكتور هشام وقال:

 

انت مؤدب مع والدتك قوي

 

اصل بخاف منها، انت ما تعرفش هي بتتكلم ازاي، في الحقيقة أنا عاذر ابويا انه طلقها

 

هههه طيب يا سيدي قالتك ايه؟

 

قالت يتفضل ياخد الشقة ويتجوز فيها، ده زي ابني وانا واثقة انه هيحافظ على رونق الشقة ومحتوياتها

 

طبعاً طبعاً يا علاء، من الناحية دي طمنها واتطمن انت كمان

 

*******************

ذهب الدكتور هشام بعد انتهاء عمله في المستشفى إلى هناء ووالدتها، وزف إليهما البشرى على أعتاب بيت أم نهى، أطل القلق من عيني هناء وبدا الارتباك على ملامحها، بينما ابتهجت والدتها وقالت:

 

صحيح يا دكتور هشام! يعني خلاص لقيت شقة للإيجار ومفروشة كمان؟

 

ايوة الحمدلله، انا جيت افرحك وأفرح هناء، وبكدة بقى يبقى إن شاء الله الجواز بعد أسبوعين من دلوقتي، الخميس الجاي لأ، الخميس اللي بعده إن شاء الله

 

يا ألف نهار ابيض، يا ألف نهار ابيض

 

احتضنت ابنتها وقالت:

 

والله وهتلبسي الفستان الابيض والطرحة يا هناء يا حبيبتي، عيشت وهشوفك عروسة ان شاء الله

 

جاهدت هناء في رسم ابتسامة، فبدت كئيبة.. لحظ هشام تلك الوجوم على وجهها ، فسألها:

 

ايه يا هناء! مش فرحانة ولا ايه؟

 

ردت بتلعثم:

 

آآ لا، لا، ف..فرحانة، فرحانة قوي

 

ممم على العموم استعدي وجهزي نفسك، واعزمي صاحباتك وكل اللي تحبيهم.. احنا هنعمل فرح على الضيق كدة، يعني عشان المصاريف

 

هزت رأسها بابتسامتها الباهتة وقالت:

 

أنا مقدرة الظروف

 

أنا حبيت افرحكو أول ناس، ودلوقتي هروح أفرح أمي . عن إذنكو

 

مع السلامة يا هشام

 

استدار ينزل الدرج، فزفرت والدتها وقالت:

 

ايه اللي عملتيه مع خطيبك ده! الراجل جاي يفرحنا وانتِ وشك ما بان عليه ضحكة ولا فرحة

 

افرح ازاي بس يا ماما وانا مش عارفة ايه هيجرا من ورا الجوازة دي!

 

هيجرى كل خير يا هناء، هيجرى كل خير إن شاء الله

 

جاءتهما نهى من الداخل، فوجدتهما تقفان عند الباب فقالت؟

 

ايه يا جماعة واقفين كدة ليه؟

 

قالت ام هناء بفرحة عارمة:

 

أصل الدكتور هشام خطيب هناء، اتصل وقال استنوني عند باب الشقة هقولكو على خبر حلو، وجه كلمنا عند باب الشقة،  ما انتِ عارفة انه ابن اصول وعارف ان ما ينفعش يدخل عشان كلنا حريم جوا، وقال انه أجر شقة مفروشة حلوة قوة ، وهيتجوز هو وهناء الخميس اللي بعد جاي إن شاء الله

 

لمعت عينا نهى بالسعادة وقالت:

 

اللهم بارك، ايه الأخبار الحلوة دي، ألف مبروك يا هناء

 

احتضنت هناء بودٍ خالص، فتبسمت هناء وقالت:

 

الله يبارك فيكِ يا نهى، عقبالك

 

************************************

 

ذهب الدكتور هشام إلى  بيت خالته، التي فتحت له الباب واستقبلته استقبالاً حاراً:

 

يا أهلاً وسهلاً يا هشام يا حبيبي، وحشتني قوي قوي

 

يا حبيبتي يا خالتي، والله انتِ اللي وحشاني قوي

 

ادخل يا حبيبي، ادخل

 

اومال طارق فين؟

 

نايم عشان بيهرب من حيلته وقلة خيبته

 

هههه ايه اللي بتقوليه ده يا خالتي؟

 

والله يا ابني ما اعرف، اهو رجع مقريف من الشغل ودخل نام.. هدخل اصحيهولك

 

لالا سيبيه، أنا هبقى ادخل اصحيه، بس اما اسلم على امي الأول

 

هرع إلى والدته التي أشاحت بوجهها عنه، وعادت تضع يدها على خدها، تبسم وجلس إلى جوارها على الأريكة وقبل يدها وقال:

 

وحشتيني يا أمي

 

لوت شفتها يمنة ويسرة وقالت بامتعاض:

 

ما تشوفش وحش يا قلب امك

 

ايه بس يا جميل، زعلان ليه؟

 

يعني مش عارف زعلانة ليه!

 

مالك بس يا امي!

 

ملت ومال حالي بعيد عنك، حاطط ايدك في المية الباردة انت وابوك، وراميني عند اللي يسوا واللي مايسواش

 

ردت اختها:

 

كتر خيرك يا سميحة

 

بقولك ايه يا لطيفة، الكلام مش عليكِ، وبعدين ما تتحشريش في كلامي مع ابني

 

على فكرة يا أمي، أنا أجرت شقة كويسة عشان اتجوز فيها أنا وهناء، وحددنا الفرح إن شاء الله الخميس اللي بعد الجاي

 

امتعضت خالته، وزفرت مشيحة بوجهها، وقالت والدته:

 

خلاص، نويت على قضا امك المستعجل!!

 

يا أمي انسي بقى الكلام الفارغ ده، أدينا اتخطبنا وما جرالكيش أي حاجة بفضل الله

 

ما جراليش أي حاجة ازاي يا ابني! يا ابني ده حصل زلزال وقع نص بيوت الحارة بما فيهم بيتنا الآيل للسقوط أول بس ما لبست الشبكة، اومال لما تكتب عليها هيجرالنا ايه!!

 

أمي من فضلك، كفاية كلام بالطريقة دي

 

لا بالطريقة دي ولا غيرها، أنا كدة كدة مستعدة للموت وصالحت كل الناس اللي غلطت في حقهم ورجعت الحقوق لاصحابها وهسيبهالكو مخضرة، الدور والباقي عليكو انتو اللي هتتوحلوا وحلة سودة مع هناء لحد ما تحصلوني

 

نظر إلى خالته لطيفة التي كأبها الخبر، وقال يزف لها بشرى السعادة:

 

خالتي، ليكِ عندي خبر حلو قوي

 

سألته بتلهف:

 

خبر ايه يا حبيبي؟

 

جايبلك عريس لسلمى

 

انتفضت عن مقعدها وقالت بعينين متسعتين من فرط السعادة:

 

والله العظيم؟ احلف بالله يا هشام؟

 

ههه والله يا خالتي جايبلك عريس كويس جداً لسلمى

 

لا بقى دانا لازم ازغرت

 

أخذت تزغرد، فقالت أم هشام:

 

شوف الولية المجنونة اللي ما صدقت، مش تعرفي الأول مين العريس؟

 

ههه هو يعني هشام هيجيب أي حد والسلام! .. مين العريس يا هشام؟

 

الدكتور علاء إبراهيم

 

أطرقت خالته رأسها تتذكره، ثم قالت:

 

مش ده اللي شتمنا وبهدلنا في المستشفى؟

 

ههه ايوة هو يا خالتي

 

اتاهم صوت سلمى من داخل غرفتها:

 

مرفوووض، بني أدم جلياط وعديم الذوق

 

صاحت والدتها:

 

يا شيخة اتنيلي على عينك، هو احنا لاقين! .. ما قولتليش يا هشام، هيجي يخطبها امتى؟

 

يوم الجمعة ان شاء الله يا خالتي هيجيب أهله ويجي يخطب سلمى، جهزوا البيت بقى واعملوا حاجة حلوة

 

هههه دانا هجيبله الحلويات والجاتوهات من أكبر حلواني ومش هستخسر، يأنس وينورهو وأهله الطيبين ولاد الأصول

 

*****************************************************

انتهت الحلقة

 

نلتقي يوم الإثنين القادم إن شاء الله

 

أكثروا من التهليل والتحميد والتكبير ., إنها العشر الأوائل من ذي الحجة

 

لا إله إلا الله

 

الله أكبر

 

الحمدلله

 

لا إله إلا الله ولا حول ولا قوة إلا بالله