الحلقة العاشرة(ف2)

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

اهلا يا مازن .... يا باشمهندس خيري  روحت عاينت شقة العميل الجديدددددد ؟

هروح حالا يا استاذ نبيل

اهلا يا مازن

اهلا بيك يا بابا , أنا ...........

يا باشمهندس علي , باشمهندس علييييييي

افندم يا استاذ نبيل

من فضلك خد معاك المهندس كريم وروحوا قابلوا المقاول بتاع عمارة مدينة نصر وشوفوا ايه الديكورات المطلوبة في العمارة

حاضر يا فندم

اهلا يا مازن

اهلا يا بابا , في الحقيقة أنا .............

يا فتحيييييييي , انت يا فتحي , بقالي ساعة طالب فنجان قهوووووة

معلش يا استاذ نبيل , اصل مالقيتش بن وبعت البواب يجيبببببب

طيب , اهلا يا مازن

اهلا يا بابااااااا من فضلك اديني فرصة اتكلم واقول لحضرتك أنا جاي ليه

ما تتكلم يا ابني , هو حد حاشك !!!! يا باشمهند............

باباااااااا من فضلك , اجل الكلام مع الباشمهندسين  والأوامر بعد ما اخلص الكلمتين اللي جاي اقولهممممم

ما تتكلم يا ابني , أنا سامعك

بصراحة يا بابا

تن تن القهوة يا نبيل بيه

ييييييييييييييي

متشكر يا فتحي , قبل ما يخلص البن تبقى تخلي بالك وتجيب غيررررره حاجة تجنن

حاضر يا استاذ نبيل

اهلا يا مازن , خير يا حبيبي

لحظة واحدة يا بابا هقفل الباب بالترباس

ايه ده ! الولد ده اتجنن ولا ايه

هههههه كدة اطمنت ان ما حدش هيدخل , بابااااااااا أنا عايز اتجوززززززززز

هههههه ماشاء الله , الف مبروك يا ابني , وان شاء الله الفرح امتى ؟

فرح مين يا بابااااا ! مش لما حضرتك تخطبلي الأول !!

أي والله صحيح , اصل يا ابني من ساعة ما اتجوزت امك وانا نسيت الحاجات دي , اهلا يا مازن

اهلا بيك يا باباااااا , أنا عايز اتجوز ياسمين

مين ياسمين دي ؟

بنت الاستاذ حسين جارنا مدرس الجغرافيا

ايوة ايوة ههه رجل فاضل ومحترم , اختيار هايل . الف مبروك يا ابني , فرحتلك والله

يا بابا فرحتلي ايه بس !!! عايز حضرتك تحدد معاد مع الاستاذ حسين

وانا ماااااالي احدد معاه معاد لييييييه ! هو أنا اللي هتجوززززززز !!!! وبعدين انت ازاي تيجي تكلمني في المواضيع العائلية دي في الشغغغغغغغغغغغغل ! شايفني قاعد على مصطبة بمص قصب وجاي تربّع وتقعد جنبي عشان تحكيلي على جوازك من بنت العمددددددة

عمدة !!عمدة مييييييييين ! أنا عايز اتجوز ياسمين مش بهاااااااانة

اتفضل يا دكتور حدد معاد مع الاستاذ حسين وبلغني بيه, اتفضل أنا عندي شغغغغغغغل افتح الباب ده وناديلي ع الباشمهندس ساااااااااامح

حاضر حاضر يا بابا , أنا ايه اللي جابني هنا اصلا !!!!! باشمهندس سامححححح كلم باباااااااااا

حاضررررر

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

                              

بقى مازن اخويا عايز يتجوز ياسمين بنت طنط بهيرة يا ماما ؟ ههههه

ايوة يا هديل , وراح عند باباكِ دلوقتي يفاتحه , الموضوع ده سرررر ,اوعى حد يعرف يا حبيبتي , احنا لا كلمنا اهل البنت ولا لسة الموضوع اتضحت معالمه

يعني طنط بهيرة ما تعرفش ؟

هتعرف منين يا حبيبتي اذا كان مازن لسة قايلي من شوية !!!

طب عن اذنك هطلع اسلم على تيتة وجدو واجي على طول قبل ما جو يعدي ياخدني

ولادك فين يا بنتي ما جبتيهومش معاكِ ليييييه !

سايباهم عند طنط زوزو, دول عيال خنقة والله

والله انتِ اللي خنقة

ههههه جايالك على طول يا ماماااااااا باي باي

باي باي وسلمي على تيتة وجدوووو

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ترررررررررررررررررررررررررررررررررن ترررررررررررررررررررررررررررررررررن

خليك انت يا ياسين لمذاكرتك أنا اللي هروح افتح يا ابني

ماشي يا ماما

تررررررررررررررررررررررررررررررررررررررررررررررررررن

مييييييييين

افتحي يا طنط بهيرة أنا هديل

هديررررر هههههههه اهلا يا حبيبتي , اتفضلي

ميرسي يا طنط , عايزة ارفع النقاب , عندك رجالة ؟

ههههه ايوة عندي بس مش هيجوا هنا , ارفعي براحتك

ازيك يا طنط وازي ياسميييييييين هههه

أنا وردة وياسمين فلة الحمدلله , ازيك انتِ وازي ولادك الاتنين  ؟

كويسين يا طنط هههه أنا جاية افرحك ؟

فرحيني يا حبيبي , حامل في التالت ؟

تالت ايه يا طنط ! كفاية عليا القرد والقردة اللي عندي ههههه أنا كنت جاية اقولك على سر بس ما تقوليهوش لماماااااا

خير يا حبيبتي ؟

مازن اخويا عايز يتجوز ياسمين هههه

يتجوز ياسمين ! من ورا امممممه ؟؟؟؟؟؟

من ورا امه ازاي ! ماما عارفة

مش انتِ يا بنتي اللي بتقولي هقولك على سر وما تقوليش لماما !!!

ههه لا ما اقصدش , اصل ماما قالتلي ما تقوليش لحد عشان لسة ما كلمناش اهل ياسمين , بس أنا بقى جيت اقولك ,بس اوعي تقولي لحد يا طنطططط

ههههه لا يا حبيبتي ما تخافيش , سرك في بير يللي ما بتعشلكيش اسرار هههههه اما اقوم اجيبلك عصير من التلاجة

لالالا أنا لازم امشي على طول عشان اطلع لتيتة , ماقولتيش يا طنط رأيك ايه ؟

ههههههه رأيي في ايه يا حبيبتي ؟

رأيك في جواز ياسمين من الدكتور مازن اخويا ؟

أنا يا حبيبتي ما اعرفش حاجة عن الموضوع ده ولا سمعت منك حاجة

مممممم يعني مش هتقوليلي رأيك ؟

لما امك تكلمني هتبقي تعرفي رأيي هههه نورتي يا حبيبتي , استني اما اعملك شاي

لالالا خلاص أنا ماشية ممممم بس زعلانة عشان كنت عايزة اعرف رأيك يا طنط وانتِ ما رضتيش تقوليلي

هو أنا مجنونة اقولك رأيي عشان الاقيه تاني يوم في الجرايددددددد !!! اتوكلي على الله يا حبيبتي ومتشكرين قوي

مين هنا يا ماما

تعالي يا ياسمين , دي هدير بنت طنطك ناهد 

هه اهلا ازيك يا هدير

اهلا اهلا اهلا يا ياسمين ههههههه شكلنا خلاص هنبقى عيلة واحدة

ايه !!!

بسسسسسسس خلاااااااااص ايوة طبعا احنا عيلة واحدة من زمااااااااان , طول عمرنا جيران وحبايب , بالسلامة يا بنت ناااااااااااهد ,ابقي ركبي للسانك جلدة عشان بينقططططططط

هههههه باي باي يا طنط , باي يا ياسمين يا عرووووووووسة

بالسلاااااااااامة وبعدين في لسانها البت دي

هي قصدها ايه يا ماما بالكلام اللي بتقوله ده !!! عروسة !!!

ايوة طبعا عروسة وست العرايس يا حبيبتي , كل اللي في سنك بيتسموا عرايس ومستنين في مطار الجواز وكل واحد مستنية عريسها ينزل بطيارته عشان ياخدهااااااا ,روحي يا حبيبتي شوفي مذاكرتك

حاضر يا ماما

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

اهلا اهلا يا ناهد يا حبيبتي منورة , اشربي العصير , ده فريش ولسة عاملاه

ههه تسلم ايدك يا بهيرة , أنا كنت جايالك في موضوع بقى مفاجآآآآآآآآآآآآة

خير يا حبيبتي فاجأيني عشان نفسي اتفاجئ

هههه الدكتور مازن ابني عايز يتجوز ياسمين بنتك

والله !!! بس انتِ فاجئتيني يا ناهد ههههه

هههه ايه رأيك في المفاجأة بقى ؟ عريس يجنن وما يترفضش

هههههههههههههههه كل واحدة بتقول على ابنها كدة , حتى حماتي لما جت تخطبني قالت نفس الجملة بس بأسلوب آخر هههههه قالت لماما الله يرحمها ابني حسين الف عروسة تتمناه بس البخت رمانا عليكو هههههههههه

ههههههههههههههه هي حماتك عاملة ايه صحيح ؟

عاملة زي مصارعين الوحوش الحمدلله هههههه صحتها زي الفل ربنا يزيدها آمين

طب ما قولتليش رأيك ايه ؟

وانا مالي ومال الحاجات دي !

اومال مال مين يا بهيرة . دانتِ امها ؟

امها ايوة , لكن الحل والربط في ايد ابوها  , خلي ابنك يقابله

وماله , يجيله امتى ؟

والله يا حبيبتي حسين بيخرج سبعة الصبح يرجع اتناشر بالليل ويادوب ينام يا عيني وهو مش شايف قدامه

الله يعينه , طبعا ما ينفعش مازن يقابله في وقت زي ده

ايوة طبعا , عايزين تجولنا بعد اتناشر بالليل عشان نقول عليكو قلالات الذوق ونرفضكو !!! هههههه

هههه طب خلاص خلينا يوم الجمعة

والله يوم الجمعة حسين بيروح لامه وبيجي بالليل متأخر برضو

الله ! طب ايه الحل ؟

خلي ابنك يروحله المدرسة

خلاص , بكرة هخلي مازن يروحله المدرسة ان شاء الله

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

لو سمحت والله ألاقي الاستاذ حسين فين ؟

الاستاذ حسين اسماعيل مدرس الجغرافيا ؟

ايوة

هو عنده حصة دلوقتي

ممممممم طيب مش ممكن اقابله خمس دقايق بس ؟ اصل عايزه في موضوع ضروري جدا

طيب , حضرتك استناه في الاوضة بتاعة المدرسين  دي  وانا هروح ابلغه , اقوله مين ؟

دكتور مازن نبيل

طيب , لحظات يا دكتور

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

مين يا ولاد يقدر يحدد مكان مصر على خريطة العالم

أنا يا استاااااذ

أنا يا استااااااااااااذ

أنا يا استاذ حسسسسسسسسسين

طب بس بس , أنا هختار , تعالى انت يا حبيبي حدد مكان مصر على خريطة العالم

اهيه يا استاذ

برافو عليك , طيب والبحر ده اسمه ايه ؟

بحر النيل

يا ابني يا حبيبي في حاجة اسمها بحر النيل في الدنيااااااا ! اسمه نهر النيييييل ,  اولا نهر النيل هناك اهو , لكن ده البحر الأبيض المتوسط

ابيض ! بس ده لونه ازرق يا استاذ

اللهم لا حول ولا قوة إلا بالله , يا ابني هو اسمه كددددة

تن تن استاذ حسييييييين

افندم يا استاذ محمود

واحد عايزك

واحد مين ده ؟

اسمه الدكتور مازن نبيل

مين مازن نبيل ده !!! ما اعرفش حد بالإسم ده , متأكد انه عايزني أنا ؟

ايوة , قالي عايز الاستاذ حسين اسماعيل مدرس الجغرافيا

بس أنا عندي حصة دلووووقتي

طب روح انت شوفه عايز ايه , وانا هخلي بالي من الفصل على ما ترجع

ماشي يا استاذ محمود , مع اني ما بحبش اسيب الحصة اثناء الشرح , يا ولااااااد أنا راجع كمان خمس دقايق إن شاء الله , خليكو مؤدبين  وما تتعبوش استاذ محموووووود

حاضر يا استااااااااااذ

استاذ محموووووود هي مصر فين ؟

مصر فين ايه يا ابني ! ما احنا في مصررررر

لااااااا مصر فين ع الخريطة ؟

راحت مشوار وزمانها راجعة إن شاء الله , اتكتموا بقىىىىىى حطوا راسكو ع الديسك لحد ما الاستاذ حسين يجيييييي

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ههههه اهو عمي الاستاذ حسين جه اهووو

السلام عليكم

عليكم السلام يا عمي ههههه

عمك !!!!! عمك مين ؟ انت مين يا ابنيييييي ؟

أنا الدكتور مازن نبيل , حضرتك مش عارفني ؟

مش واخد بالي والله

أنا ابن الاستاذ نبيل جااااااارك وجدي يبقى الاستاذ لطفي جارك برضوووو

ايوة ايوة , لا مؤاخذة يا ابني , اصل مش متواجد كتير في البيت وما اعرفش معظم اولاد الجيران

الله يكون في عونك يا عمي , أنا مقدر مشاغل حضرتك

خير يا دكتور سمير

سمير مين ؟ يا فندم اسمي دكتور ماااااازن , مازن نبيل

ايوة ايوة , خير يا ابني

ههههه خير يا عمي إن شاء الله  , أنا جاي لحضرتك في موضوع  خير جدا إن شاء الله

يا ابني انجر من فضلك أنا عندي حصصصصصة

حاضر يا عمي احم احمممم اصل الحقيقية الموضوع محرَح جدا

الموضوع محرَج !!!!!! الموضوع هو اللي محرَج ولا حضرتك ؟

ههه لالالا أنا اللي محرَج , الموضوع محرِج وانا محرَج

دكتور ومش عارف تتكلم ! يا للعاااار , تعليم ايه دددده !

لالالا والله أنا عارف الفرق بين مُحرِج ومُحرَج والله يا عمي , بس أنا مرتبكككك

يووووو يا ابني قول عايز ايه وخلصني وإلا هضطر اسيبك وامشي

احم احمممممم في الحقيقة يا عمي أنا عايز اخطب الأنسة ياسمين بنت حضرتك

ايييييييييييه !!! انت اتجننتتتتتتتتتتت , اكيد انت مجنون ومعتوه كمااااااااااااان

ليه بس يا عمييييييي ! ايه وجه اعتراض حضرتك علياااااا

بقى جايلي المدرسة ومعطلني عن الحصة عشان تقولي عايز اخطب بنتكككككك !! هي المدرسة مكان مناسب لمناقشة المواضيع الإجتماعية يا أستااااااااذ !!! مش قادر تحدد معاد في البيتتتتتتتتت !!!

يا عمي والله كنت عايز احدد معاد في البيت بس طنط بهيرة قالت لماما تبلغني اني اجيلك المدرسة

بهيرررة !!!! ممممم طيب , حسابها معايا بعدين , مع السلامة انت يا ابني

مع السلامة ايييييييه !!! يا عمي حددلي معااااااد

خلاص , هات جدك الاستاذ نبيل ووالدك الأستاذ لطفي  واتفضلوا شرفونا يوم الجمعة بعد الصلاة مباشرة

جدي نبيل مين  ! لطفي هو اللي  جدددددي ابويا يبقى  نبيل اللي هيجي معايا

يا ابني هات اللي تجيبه  , عن اذنككككك

اتفضل يا عمي , اخيرا حددت معااااااااااد ايه ده ! حرب عشان احدد معاد مع ابو ياسمين !!! بس ياسمين تستاهل هههه

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

يعني حددتله معاد يوم الجمعة بعد الصلاة يا سونسون ؟

ايوة يا ستي , لكن انتِ ازاي يا بهيرة تقولي للولد يجيلي المدرسة يكلمني في موضوع حساس زي دددددده !!!

يا حبيبي اعمل ايه بس !!! زنقوني وما عرفتش ارد عليهم , قولتيلهم مواعيدك كلها كومبليت من سبعة الصبح لاتناشر باللييييييل , والولد مستعجل وعايز يحدد معاد

ايوة يا بهيرة , بس مش في المدرسة وسط الأستاذة والطلاب

اومال يعني كنت اقوله يعدي عليك في السوبر ماركت وسط الجبنة والزيتون ؟ هههه

على العموم حصل خير , ادي ياسمين خبر بالموضوع

حاضر يا حبيبي

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ياسميتني يا عروستي الحلوة ههههه

نعم يا ياماما

ههه جالك عريسسسسس

عريسسسس ! لو كان حسام ابن عمتو سامية يبقى مرفووووض

أنا عارفة يا حبيبتي انك رافضة ابن سامية , المرة دي ربنا عوض عليكِ وبعتلك ابن ناهد ههههههه

هااااا ! ممممم مين ؟ الدكتور مازن ؟

ايوة هو , ماشاء الله على نباهتك , طالعة لماما ههههههههههه ايه رأيك يا حبيبتي ؟

مممممم في ايه يا ماما ؟

بقولك ايه يا بت انتِ بطلي تناااااااااحة , مش وقت استهبال يا ياسمين ,موافقة على مازن ولا لأ ؟

ممممم هه اللي حضرتك تشوفيه انتِ وبابا يا ماما

تبقي مش موافقة ههههههه خلاص خيرها في غيرها , عن اذنك

مامااااااااا رايحة فين , أنا موافققققققققة

هههههههههههههههههههههههههههههه ايوة كدة , بحب الاجابات الصريحة , مش اللي تشوفيه انتِ وبابا !!!!! هو أنا وبابا اللي هنتجوزه !!!!

ماما , سكوت البكر في الشرع معناه رضاها

اللهم صل ع النبي ههههههه ادب واخلاق ودين  وعليهم جمال هدية , والله الواد ده محظوظ بالأخلاق العالية النادِرة في الأسواق  دي هههههههههه

هه تربيتك يا ماما 

ونعم التربية يا روح مامااااااااا امووووه يختي ع العسل يختييييي مبروك مقدمااااااا

ههه الله يبارك فيكِ يا ماما

ايه ده يا مامااااااا بتباركي لياسمين على ايه ؟

جالها عريس يا ياسر يا حبيبي عقبال ما يجيلك عدلك وافرح بيككككك هههه

وده مين بقى يا ماما ؟؟؟؟

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ترررررررررررررررررررررررررررررررن ترررررررررررررررررررررررررررررن

شوف مين ع الباب يا لطفي عشان ايدي مش فاااااااااضية

طيب يا هدددددى

**********************

ميييييييين

أنا ناهد يا بابا

هه أهلاً يا ناهد,اتفضلي يا حبيبتي

متشكرة يا بابا,عامل ايه يا حبيبي وازي صحتك؟

والله يا بنتي الضغط والسكر ملخبطين ع الآخر ومش عايزين يتظبطوا

سلامتك يا بابا ألف سلامة,بتاخد الدوا في مواعيده؟

آه والله يا بنتي باخده,الشفا من عند ربنا

ربنا يديك الصحة والعافية يا بابا,أما انا بقى جيبالك حتة خبر هيظبطلك الضغط والسكر على طول من الفرحة ههههه

ههه آه,لازم خطوبة مازن من ياسمين بنت الأستاذ حسين

مممم مين قالك يا بابا؟

ههه هيكون مين غير هديل بنتك! هي قالتلي ده سر يا جدو وما تقولوش حتى لتيتة

يعني ماما ما تعرفش؟

هتعرف منين! هديل قالتلي انا بس وانا ما قلتلهاش,مبروك يا ناهد

ههه الله يبارك فيك يا بابا,ايه رأيك بقى في الخبر ده؟

خبر هايل يا بنتي طبعاً,الولد مازن ده له عندي هدية حلوة إن شاء الله

ههه ربنا يباركلنا فيك يا بابا,اومال ماما فين؟

أنا جيت اهو,اهلا يا ام العريس

ايه ده ! انتِ عرفتي ؟

طبعا عرفتتتتتتتت

من مين ؟

هيكون من مين غير اذاعة البي بي سي اللي انتِ مخلفاها !!!

طيب يا هديرررر والله لوريها

ايه ! ما كنتيش ناوية تعرفيني أنا وابوكِ ولا ايه يا ست ناهد ؟

ازاي بس يا ماما !! أنا كنت ناوية اقولك طبعا , بس كنت مستنية نحدد معاد مع جوز بهيرة

اه يختي , وحددتوا المعاد ؟

ايوة , يوم الجمعة ان شاء الله نبيل هياخد مازن وينزلوا يطلبوا البنت رسمي من باباها ....اومال بابا فين ؟

 تلاقيه دخل التراس , وهان عليكِ يا ناهد تخطبي بنت بهيرة اللي استخسرت اخوها في اختك سلوووووووى !!!

يا ماما ده كلام برضو ! وبهيرة مالها بس بالحكاية دي !

يا سلاااااااام ! استخسرت اخوها في اختك وجوزته للمدرسة بتاعة العيااااااال , وانتِ بدل ما تشيلي في قلبك منها بسبب اللي عملته , رايحة بسلامتك تخطبي بنتها لابنكككككك , يكون في علمك يا ناهد , أنا مش موافقققققققة

يا ماما الله يهديكِ , مازن هو اللي اختار البنت بنفسه , وكمان البنت واهلها ما يتعيبوش , واذا كان على سلوى فاتجوزت الحمدلله ومعاها ولدين زي القمر ماشاء الله

الحمدلله انهم طلعوا ولدين , بركة دعايااااااا , قولت يارب ما تديها بنات عشان ما يعملوش فيها اللي عملتوا فياااااا

طب ادعيلنا دعوتين حلوين لمازن , اصل لسة الاستاذ حسبن ما وافقش وما نعرفش هيقول ايه

هيقول ايه يعني ! الدكتور مازن حفيدي ما يترفضشششش , وكمان البت ياسمين طيبة ومؤدبة وانا بحبها

هههههه والله انتِ عسل وقلبك ابيض يا ماما اموووه

انتِ ايه اللي مطلعك عندددددي ! النهاردة الخميسسسسسس ؟

لا , الأربع

ولما هو الاربع ايه اللي جابكككككككك ؟

الله ! يا ماما جيت اقولك اننا هنخطب لمازن

واديكي قولتي , يلا بالسلامة على شقتكككككككك

ههه حاضر يا ماما , سلميلي على بابا لما يصحى

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

اهلا وسهلا يا استاذ نبيل , شرفتنا والله

الشرف ليا يا استاذ حسين

اهلا يا مازن يا ابني

اهلا بيك يا عمي

بقالي فترة ما شوفتكش يا استاذ حسين

المشاغل وظروف الحياة يا استاذ نبيل , والله بنزل من سبعة صباحا ما برجعش قبل اتناشر بالليل وساعات واحدة كمان , اخلص المدرسة واروح من برا برا على السوبر ماركت , ادينا بنتعب عشان خاطر الولاد يرتاحوا

كان الله في العون يا استاذ حسين

اعتقد انت عندك ولد تاني غير الدكتور مازن

ايوة , معتز الكبير , مهندس اتصالات , مجرد ما خلص دراسته سافر امريكا عند عمه , وخطب بنت عمه وهيتجوزوا قريب

عال عال , شيء عظيم

بابا , ادخل في الموضوع بقى

الصبر الصبررر , يعني عايزني اول ما ادخل اقوله طالبين ايد بنتك !!!

يا بابا بقالنا نص ساعة قاعدين , هتتكلم امتىىىى ؟

طيب طيب , مستعجل على ايه يا خويا !!! بكرة تقول يا ريت اللي جرا ما كاااااان

طب اتكلم بقى عشان عمي حسين بيبص علينا , شكلنا بقى وحش قوي

في الحقيقة يا استاذ حسين أنا يسعدني ويشرفني اخطب بنتك الأنسة مها لابني مازن

مهاااااا !

مها مين يا بابااااااا ! اسمها ياسمين

ههه اسف والله , اسف جدااااا , اقصد الانسة ياسمين , الحقيقة الذاكرة في الاسماء بقت وحشة قوي يا استاذ حسين لدرجة الواحد قرب ينسى اسمه ههه

ههههه كان الله في العون يا استاذ نبيل

طيب على العموم ابني مازن دكتور في كلية العلوم  زي ما حضرتك عارف وشاب مستقيم , مالوش غير شغله وابحاثه

بارك الله فيه .... لكن يا ترى عندك شقة يا إبني ؟

ايوة يا عمي ,بابا اداني شقتنا اللي في مصر الجديدة , مساحتها حوالي 150 متر , وموقعها كويس قوي

طيب , خير إن شاء الله , بالنسبة لموضوع الشبكة أنا ما بدقش في الحاجات دي , ما بحبش المغالاة , المعقول بس

مش هنختلف يا استاذ حسين ,  احنا مستعدين لكل طلباتك وطلبات العروسة ان شاء الله

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ياسرررررر يا ياسررررررر

نعم يا ماما , لسة مخلص لبس وداخل اسلم ع العريس اهو

كل ده بتلبس !!!

يا ماما لازم اتشيك على الآخر عشان يعرفوا هما جايين يناسبوا ميييييييين

ههههه جايين يناسبوا ياسر باشا ابو شراب مقطوع هههه خد يا حبيبي صينية الحاجة الساقعة والجاتوه دخلها

ايه ده يا ماما ! مش المفروض ياسمين هي اللي تدخلها ؟

ليه يعني ! هو أنا هديهم شغااااالة !!! أنا بنتي تدخل عليهم زي الملكة ورافعة راسهاااااااا , مش تدخل موطية وشايلة صنييييييية !

ههههههههههههه يا عيني يا ماما , دانتِ متعقدة

من اللي شوفته من عيلة ابووووووك , شيل الصنية دخلها على ما اجيب الملككككككككة

ههههههه ماشي يا ماما , هي الملكة واحنا الرعية

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

تن تن السلام عليكم , منورين يا جماعة ههه

عليكم السلام , ده ياسر ابني , كلية العلوم  سنة اولى

اهلا يا ياسر يا ابني ههه

اهلا بيك يا عمي , ازيك يا دكتور مازن

هه اهلا ياسر , اخبارك ايه واخبار دراستك ؟

كويس الحمد لله , اتفضلوا الحاجة الساقعة والجاتوه

 متشكرين يا ابني , يعني نفهم من كدة يا استاذ حسين انك موافق ؟

ايوة موافق , مش هلاقي لبنتي عريس افضل من ابنك الدكتور مازن

ههه متشكر قوي يا عمي , ان شاء الله اكون عند حسن ظن حضرتك وحسن ظن الأنسة ياسمين

تن تن السلام عليكم

ههه ياسمين بنتي , عليكم السلام يا بنتي اتفضلي

ياسمين اهيه يا بابا ههه

بسم الله ماشاء الله , ازيك يا ياسمين يا بنتي

الله يسلمك يا عمي هه

ازيك يا انسة ياسمين

الحمدلله يا دكتور

اقعدي يا ياسمين يا حبيبتي

حاضر يا بابا , اتاخر يا ياسر

يعني هي الكراسي قليلة وجاية تتحشري جنبي !!!

يوو يا اخي , وطي صوتك

ماشي يختي , دانتي لما تتجوزي هنرتاح منك

طيب يا ياسررررر والله لوريك بعد ما يمشوا

بابا قولهم أنا عايز اكتب الكتاب يوم الخطووووبة

استنى يا خويا , اهمد شووووية , ايه رأيك يا استاذ حسين نعمل الخطوبة وكتب الكتاب مع بعض الاسبوع الجاي ؟

مممممم عن اذنكو

اتفضلي يا ياسمين , مش شايف ان كدة كل حاجة جاية بسرعة يا استاذ نبيل ؟

وايه اللي هيخلينا نبطأ يا استاذ حسين ! لا هنسأل عليكو ولا هتسألوا علينا , احنا جيران من سنين وعارفين بعض كويس , والولد جاهز ومافيش حاجة ناقصاه

ايوة بس الزفاق مش قبل ما ياسمين تتخرج

مافيش مشاكل , نكتب الكتاب ونستنى لحد ما تتخرج

كدة نبقى متفقين يا استاذ نبيل , مبروك

ههه الله يبارك فيك يا استاذ حسين , مبروك يا دكتور

ههه الله يبارك فيك يا بابااااا

مبروك يا دكتور مازن يا خطيب اختي  ههه والله بنديك هدية

ههه الله يبارك فيك يا ياسر , عقباااااااالك

يارب هههه طب عن اذنكو

اتفضل يا ياسر

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ماماااااااا يا ام العرووووووسة هههههه

ههههه ايه يا ياسر , ابوك وافق ؟

وما يوافقش ليه ! العريس غني وأكيد عنده شقة يا ماماااااااا

طب الحمدلله هههه ياسيييييييين خد طبق الفاكهة ده دخله للضيوووووف

حاضر يا ماما

استنى يا ياسين هات موززززززززة

خد اهيه

شكرا , هات دي كماااااان , ماما بقولك ايه , أنا عايز شقة

نعم يا خويا عايز اييييييه !

عايز شقة يا ماما , اومال هتجوز ازاااااااي !

تتجوزززززز! يا حبيبي خلص كليتك وبعدين اشتغل واتعب واشقى قد عشرة عشرين سنة وبعدين هات الشققققققة

نعمممممممم ! ده كدة تكون اجمل سنين عمري ضاعت

اجمل سنين عمرك ! ايه يا ابني الكلام الشاعري ده !!! خليك واقعي يا ياسر حتى لا تصطدم بالواااااقع , عن اذنك ايها الشاب المناضل , هروح ابارك لياسمين , ياسمييييييييين ههههههه العروسة الحلوة حبيبة مامااااااااا

مناضل !!! شكلي هناضل لحد ما سناني تقع

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

هتصل بامي عشان اعرفها ان ياسمين اتخطبت يا بهيرة

واجب يا حسين

تررررررررررررررررررررررررررررررررن

الوووووو

السلام عليكم يا أمي

عليكم السلام يا حسين يا حبيبي , كدة برضو ما تجيش النهاردة وتقولي عندي ضيوف ! بقى الضيوف أهم من مجيتك لامك !!!

لا والله ابداً , مافيش حد في الدنيا أهم منك يا أمي , بس اصل الضيوف دول كانوا جايين بخصوص ياسمين , ههه جالها عريس واتخطبت

صحيحححح ؟ ههه ماشاء الله , ما البت حلوة وبيضة وطالعة لستها والعرسان ماكانوش هيسيبوها في حالها , الف بركة يا حبيبي

الله يبارك فيكي يا امي

بس سألت ع الواد العريس يا ابني ؟ ليكون حرامي ولا سوابق ولا هربان من حكم , لازم تسأل لتتدبس , الولية ام مروة جارتنا جالها عريس لبنتها وما سألوش عليه , طلع بتاع مخدرات والحكومة قبضت عليه في الفرح والعروسة اغم عليها وأم مروة قعدت تصوت والجوازة باظت بعيد عنك

لالالا يا امي ما تخافيش , دول جيراننا من زمان وناس مضمومنين , عيلة محترمة جداً

والواد صنعته ايه ؟

معيد في الجامعة

لا حول ولا قوة إلا بالله , ربنا ينجحه يا ابني , لو بيذاكر ماكانش عمره يعيد ابداً , ايه اللي وقّعك في الخيبان اللي مش عارف يطلع من الجامعة ده !!!!

ههههه والله انتِ بركتنا يا امي

وانت وردتنا ومراتك ريحة نتنة

ايييه !

ريحانتناااااا ريحانتناااا , جاية من الريحان يعني ,  انت سمعتها ايه ! انا عمري لساني ما يعرف الغلط ولو مع عدوّيني

ههه طبعاً يا أمي طبعاً , على العموم حبيت افرحك

يفرح قلبك يا حبيبي ويبعد عنك كل وحشششش , بالسلامة يا ابو العروسة

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ياسميييييييينة انا هاخد شوية شيكولاتة وحلويات من اللي العريس جابهم امبارح واروح لطنطك اشجان افرحها بخطوبتكككككك هههه

ههه طيب يا ماما

مش هتأخر ما تخافيش , بس روحي انتِ ابدأي في تجهيز الغدا على ما اجيلك

حاضر يا ماما

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

ترررررررررررررررررررررررررررررررررن

مييييييين ؟

أنا بهيرررة افتحي يا أختي ههههه

اهلاً يا بهيررررررة يا صباح الهنا , ايه الحاجات الحلوة دي !

هههههه دي الشيكولاتة والحلويات اللي جابهم عريس ياسمين , قولت اجي ادوقك وافرحكككك

وربنااااا ! هههه ياسمين اتخطبتتتتتتتتتت ؟

ايوة يا اختي هههه شوفتي السنين جريت ازاااااااااي !

ومين العريس بقى ؟

الدكتور مازن ابن ناهد

وربناااااا ؟ هههه والله محظوظ  وامه دعياله وعَرَف ينقي

ايوة طبعاً , هو يلاقي احسن من ياسمينتي ! ههههه عقبال ما تفرحي برحمة ياااااااارب

يارب يا حبيبتي يااااااارب , والجواز امتى ؟

بصي يا حبيبتي احنا هنعمل خطوبة وكتب كتاب الخميس الجاي في شقتنا , وبعد ما تتخرج ياسمين هنعمل الدخلة

 يختي يا ألف نهار ابيضضضض يا ريتني بنعرف نزغرت كنت زغرررررت ههههه

كإنك زغرتي والله , أنا عارفة ان قلبك بيزغرت من جوا يا أختي هههه

اه والله يا حبيبتي فَرَحت لياسمين يااااما , وربنا لننزلوا نجيبولها هدية حلووووة الف مبروووووك

الله يبارك فيكِ يا اشجان يا أختي , كلي الشيكولاتة بقى وأكلي رحمة

طنط بهيررررة ههه صباح الخيررررر

صباح العسل والأفراح والشيكولاتة يا حبيبتي هههه

تعالي باركي لطنط بهيرررة, ياسمين اتخطبت للدكتور مازن جارناااااا ههه

بجد ! هههه الف مبروك يا طنططططط

الله يبارك فيكِ يا حبيبتي هههه عقبالك يا رحووووومة والله ليومها افرق الشيكولاتة والشربات بإدياااااا

مممم ميرسي يا طنط ههه

عقبال ما تفرحي بياسر يا بهيرة هههه

نفرح بشهادته الأول , انما الجواز بقى بعد عمر طويل هههه على ما يكون كون نفسه وقدر يشتري شقة ويجهزها

الله يكون في عون الشباب والله يا بهيرة

اه والله يا أختي

اوووووف عن اذنكو , كل كلامهم يعقد الواحد في عيشتتتتته ,بقى ياسر هيتجوز بعد عمر طويييل !!! , بتقرا الغيب طنط بهيرة !!!

طب انا ماشية بقى يا أختي عشان سايبة العروسة في المطبخ لوحدها

روحيلها يا حبيبتي ههه واحنا هننزلوا نجيبوا هدية ونيجوا نباركولها بنفسي

ما تتعبيش نفسك يا اشجااااان

لا والله أبداً , دي ياسمين بنتي واحنا كنا بنستنوا اليوم ده وربنااااا هههه

الله يخليكِ يا أختي ههه هنستنوكِ هههه , سلام

الله يسلمك يا أم العروسة ههه ايّووووووه دي الفرحة حلوة يا ولاااااااد , رحمممممممة , هي البت دي راحت فين !

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

انتِ برضو قاعدالي ع الكمبيوتر !!!

اومال عايزاني اعمل ايه يا ماما !!! ماعنديش محاضرات وقاعدة في البيت , عادي يعنييييي

طب ما تمسكي كتاب ينفعك يختييييي

يوووووو يا ماما انا عارفة مصلحتي , وبعدين انا بذاكر كويس قوي , المذاكرة مش في كل وقت يعني ! هي الإمتحانات حرب وبستعدلها !!!

براحتك يختي اعملي اللي تعمليه , وانا مالي انا ! نجاحك ولا سقوطك لروحك , احنا هنلبسوا ونازلين مشوار طياري كدة , هنتصلوا بابوكي الأول نستأذنوه , ما نقدروش نخرجوا من غير إذنه 

رايحة فين يا ماما ؟

رايحين نجيب  هدية حلوة لياسمين  من محل الأدوات المنزلية ههه عقبال ما نجهزوكي يا روح ماماااااا هههه

بعد عمر طويل ان شاء الله

ايّووووووووه الله اكبررر فال الله ولا فاااااالك , عمر طويل ليه ! دانتِ قمر يا بتتتتت

مش بالجمال يا ماما

اومال بإيه يختي !

بالبخت يا مامااااااا بالبخت

وانتِ بختك ماله ! هو في حد عايش عيشتك ولا عنده المال اللي عند ابوكي !!! دانتِ بنت الحاج عادل سليم وحش المينااااااااا

اوووووووف والله ما انتِ فاهمة حاجة يا ماما , اتصلي ببابا وانزلي يا ماما وسيبني عشان بعمل تشاتينج مع كنزي

ربنا يخليكو لبعض يختي , كنزي ومنزي , اسامي ما يعلم بيها إلا ربنا

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

يلا يا هديل عشان ننزل نبارك لياسمين وبهيرة ونوديلهم الهدايا , مش حلو مفرش الاوراجانزا اللي انا جبته لياسمين ؟

يا ماما يا حبيبتي سألتيني ألف مرة ع المفرش وقلتلك تحفة جميييييل يجنننننننن

معلش برضو بحب اتأكد , ولا عايزاهم يقولوا ذوق مامتك وحش !

ههه مش ممكن يا ماما حد يقدر يقول كدة , ذوقك زي ذوقي بالظبططططط

ربنا يستر , يلا يا حبيبتي , اوعي تكوني نسيتي البيجامات اللي جبتيها لياسمين

اومال ايه الشنطة اللي انا ماسكاها دي ! كيس زبالة مثلا ! هههه

اعوذ بالله عليكِ وعلى لساااانك , مش عارفة جوزك مستحملك ازاي

هههههه جو بيمووووت في كلامي , بيقولي احلى حاجة فيكِ تلقائيتك يا دودي

تلقائيتك ! هو الطوب اللي بتحدفيه من لسانك ده جوزك بيسميه تلقائية ! القردة في عين جوزها غزال صحيح

ههههه كدة ! طب مش نازلة معاكِ عند ياسمييييين

يلا يا بنت يلاااااااا

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

تررررررررررررررررررررررررررن

افتح الباب يا ياسييييييين

حاضر يا مامااااا

**************

اهلاً , ازيك يا طنط ناهد

اهلاً يا ياسين ههه ازيك يا حبيبي عامل ايه واخبار مذاكرتك ؟

الحمدلله تمام يا طنط , اتفضلوا في الصالون على ما ابلغ ماما

ميرسي يا حبيبي , مؤدب قوي الولد ده يا هديل

اه فعلاً , كل ولاد طنط بهيرة مؤدبين وخصوصااااا ياسمينة ههه

ههه هو انا اخترتها لاخوكِ من شوية !

ياسلام ! اذا كان مازن هو اللي مختارها بنفسسسسه , اختارتيها امتى انتِ بقى !

بس بسسسس وطي الجعورة بتاعتك دي هتفضحينااااا

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

خدي يا ياسمين قشري البصل ده

حاضر يا ماما

مامااااا

ايوة يا ياسين , مين كان بيرن الجرس ؟

دي طنط ناهد وبنتها , دخلتهم الصالون

والله ! ههه طب روح انت وانا هخرجلهم حالاً

طيب انا هلبس عشان رايح الدرس

طيب يا حبيبي , ياسمييييين ,هتعملي ايييييييه ؟ ارمي البصلة دي من ايدكككك

ليه يا ماما ! هخرطّها

اوعي تلمسيها ولا تيجي ناحيتهاااااا , حماتك جاية تباركلك على الخطوبة , مش معقول تقابليها وانتِ ريحتك بصل وإلا هتكتب فيكِ تقرير ريحته وحشة قوي وتسلمه لخطيبك هههه

ههه طيب حاضر يا ماما , يلا عشان نخرج نسلم عليهم

تخرجي فيييييين ! هو انتِ هتخرجي بالبيجاما ددددي !

مالها يا ماما !

مالها ايه بسسس ! هو انتِ خارجة تشحتي ! اجري البسي بنطلون حلو كدة على بلوزة ترد الروح ووضبي شعرك وحصليني , لازم حماتك تشوفك متألققققة

حاضر يا ماما

ياسمييييييين البسي التوكة اللي جبتهالك في العيدددددد

حاضر يا ماماااااا

***********************

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخذ سكرين شوت

***********************

يا أهلاً يا أهلاً يا نااااااهد هههه ده ايه النور ده يا حبيبتي !

هههه نورك يا أم العروسة , الف مبروك يا بهيرة امووه اموووه

الله يبارك فيكِ يا اختي ههه ازيك يا هديرررر

ازيك يا طنط , الف مبروك خطوبة ياسمين على مازن اخويا ههه اموووه امووووووووه

الله يبارك فيكِ يا حبيبتي ههه اتفضلي اقعدي واقفة ليه ! يا أهلاً وسهلاً نورتونا يا نسايب الهنا

ربنا يخليكِ يا بهيرة ههه انا بقى ما رضيتش اجي قبل ما اجيب هدية حلوة لياسمين

صاحبة واجب يا ناهد والله , تعيشي وتجيبي يا اختي ههه

وانا كمان يا طنط جبت بيجامات حلوة قوي لياسمين , غالين قوي ودفعت فيهم كتير

نعم ! هههه تعيشي يا حبيبتي ويسلم لسانك

يا بنتي انتِ عبيطة ولا شكلك كددددة ! حد في الدنيا يقول انا جايبلكو هدية غالية ودفعت فيها كتيرر !

يا ماما مش عشان يعرفوا اننا مقديرينهم ودافعين دم قلبنا ! هههه

طب بس اسكتي عشان انتِ هتنقطينيييي , اومال فين ياسمين يا بهيرة ؟

جاية حالاً يا اختي , بتبهدل نفسها عشان تشوفيها على حقيقتها هههههههه

ههههههه حقيقتها قمر والله , بصراحة مازن عرف ينقي

ربنا يخليكِ يارب يا ناهد , اهي بنتك برضو وانتِ اللي مربياها

طبعاً طبعاً

ماما انا نازل رايح الدرس

مع السلامة يا ياسين , ركز في الدرس كويس يا حبيبيييي , ربنا يجعله بفايدة , اهو يا عيني ياسين يجي من المدرسة يادوب ياكل لقمة ويجري ع الدروس , من درس لدرس وفي الآخر يرجع ينام مش دريان بالدنيا

ربنا يجعله بفايدة , اهو كل الطلبة بقوا كدة

على رأيك , مع ان على ايامنا ماكانش فيه غزو الدروس الخصوصية دي,ماما الله يرحمها كانت دايماً تقولي انا ومحمود اللي عايز يذاكر ويفلح يذاكر,واللي مش عايز عنه ما نجح ولا فلح هههههه

هههه الله يرحمها,كل وقت وله أدانه بقى , اومال العروسة فين ؟

حاضر هنادي عليها , يا ياسميييييين , كفاية يا حبيبي لملامحك تتغير وما يعرفوكيشششش ههه , اهي جت اهيه , قمر يا روح ماما قمرررر

السلام عليكم يا طنط هه

اهلاً اهلاً اهلاً يا روحي ههه عليكم السلام يا ياسمينة , بسم الله ماشاء الله , ايه الجمال ده يا بنت ! انتِ ناوية تاكلي عقل مازن وتسحريه ولا ايه !

هه

جرا ايه يا ناهد ! ههه بنتي بتتكسف يا اختي , سلمي على عمتك يا ياسمين

عمتي !

ايوة , اخت الجوز كان بيتقال  عليها عمة في القرون الوسطى هههه

ههه كان زمان يا بهيرة

ازيك يا هديل , نورتينا ههه

ههه ده نورك انتِ يا عروسة اخويا يا قمر اموووه اموووه , خدي يا سمين البيجامات دي ليكِ , الوانهم واووووو , روز وتريكواز وباستاج واروانج , واستايلاتهم خرافييييييية , هيعجبوكي مووووووت

ههه ميرسي قوي يا هديل , كلك ذوق والله

ههه ما انا عارفة , ماما بقى جيالك .......

وانت ماااااالك , انا هقولها جايبالها ايه , ده بقى ياياسمين مفرش اورجانزا شوفته في كتالوج وحجزتهولك ولسة واصلني النهاردة , افتحيه العلبة وفرجي ماما

ههه ميرسي قوي يا طنط ناهد , ........... الله ! شوفي يا ماما ؟

الله , بسم الله ماشاء الله , طول عمر ذوقك جميل يا ناهد

تسلميلي يا بهيرة ههه

طب عن اذنكو هجيبلكو حاجة ساقعة , خليكِ مع طنط وهديل يا ياسمين

حاضر يا ماما , شرفتينا يا طنط

ههه يا روح قلبي ! قوليلي يا ياسمين , ابتديتي تجيبي الجهاز يا حبيبتي ولا لسة ؟

هبتدي انزل انا وماما ان شاء الله من بكرة , هننزل نجيب طقم الصيني وكام طقم كدة

اوعي تجيبي ميلامين يا ياسمين , موضته بطلت خالص يا روحي , مافيش مطبخ شيك بيتحط فيه ميلامين دلوقتي

ممم ان شاء الله يا طنط

وبالنسبة بقى للصيني , فيه شوية اطقم نازلة جديد انما ايه ! تجنن , بنت عم مازن اتجوزت من شهرين كدة , روحنا زورناها وشوفنا طقم الصيني بتاعها ذوقه غير عااااادي , جايبة طقم بفاريا , فاكرة يا هديل الطقم بتاع يارا بنت عمك ؟

اه يا ماما هو ده يتنسي ! ده عقدني من طقم الصيني بتاعي

ههه اهي هديل قالتلك , بجد طقم بفاريا تحفة , وتخيلي يا ياسمين , بخمستاشر الف جنيه بس

كاااااااام ! مممم رخيص قوي

ايوة طبعاً يا حبيتي , هي الخمستاشر الف جنيه عادت فلوس ولا تجيب حاجة !

الحاجة الساقعة يا جمااااااعة, منوريييييين

بنورك يا بهيرة , لسة كنت بكلم ياسمين على الجهاز واطقم الصيني , اهتمي قوي يا بهيرة بطقم الصيني عشان ده الواجهة بتاعة الارجنتيرا

ال ايه يا أختي ؟

ههه الارجنتيرا , نيش بس صغير , النيش الكبير مابقاش موضة خااااالص , وما تنسيش تجيبي كونصول ومعاه الكراسي عشان يتحط جنب الباب

اجيب مين يا اختي ؟

كونصول , كونصول يا بهيرة زي اللي عندي جنب الباب ومعاه كرسيين

اااه قصدك المرايا ام رجلين دي ؟

ههه اسمها كنصول يا بهيرة , مرايا ام رجلين ايه بس ! وياسلام بقى لو جبتو بايو و ..........

انتِ بتجيبي الأسامي دي منين يا اختي ! هههه اصل انا معلوماتي عن الجهاز وقفت لحد الطقم الاسيوطي اللي ابويا جابهولي من دمياط والسفرة واوضة النوم , وعشان ابويا يحسسني ان احنا من الأعيان جابلي طرابيزة مكوى ههههه غير كدة ما اعرفش

ههههه يقطع شيطانك يا بهيرة , خلاص , على العموم لما تنقوا العفش هاجي معاكو عشان اعرفك كل الحاجات دي

والله يا اختي لا بالكنصول ولا الاراشنتيرا اللي بتقولي عليها دي ههه الجواز بالوافاق بين الراجل ومراته  , سيبك من الهري والنكت اللي بتنكتيه ده هههه

هههه ربنا يسعدهم يارب , بس ما يمنعش ان بيتهم يكون شيك

اللي ربنا يقدرنا عليه هنجيبه يا ناهد يا اختي , ابو العروسة يا حبيبتي من متوسطي الدخل , لو عايزة الحاجات اللي بتقولي عليها دي استنوه لما يورث عمه اللي في كوستاريكا ههههههه

ههههه لا وعلى ايه ! اللي ما تقدروش عليه هنجيبه احنا

شكرا على تعاونكم معنا يا اختي هههه اشربي الحاجة الساقعة قبل ما تعليلي ضغطي بكلامك يا مدام كونصول ههههههه

ههههههههه

****************************

ولحد هنا وانتهت حلقات النهاردة


*****

بالنسبة لقارئتي العزيزة أم طلحة اللي طلبت رابط رواية (مراتي في السبعينات)

ها هو الرابط على مدونتي الثانية
https://hebanoor.wordpress.com/2015/06/30/%D9%85%D8%B1%D8%A7%D8%AA%D9%8A-%D9%81%D9%8A-%D8%A7%D9%84%D8%B3%D8%A8%D8%B9%D9%8A%D9%86%D8%A7%D8%AA-%D9%85%D9%82%D8%AF%D9%85%D8%A9/


وان شاء الله هحاول اضع روابط قصص مناسبة للأطفال لابنتك الصغرى ,فهناك أعمال رائعة قرائتها وبها الكثبر من الحكم والعبر تناسب طفلتك وسنها الصغير...حين أفرغ من نشر الرواية على الأمازون سأتفرغ للبحث عن قصص مناسبة  للأطفال ان شاء الله لكتّاب محترمين

أما عن رواية خلف هذه الجدران فلا مانع من أن تقرأها ابنتك الكبرى ان شاء الله

*****

القارئة العزيزة هدى البليسي

أما عن وضع روابط لكتب أو مقالات أو ما شابه تتحدث عن سعد زغلول وغيره,سأضع ان شاء الله حين أتفرغ لذلك ..تحياتي لكِ

شكراً للجميع والتقيكم يوم الأثنين القادم بمشيئة الله