الثامنة والعشرين( حارة الموعودين)

 

فجأة سمعت نعمة صوت دقات جرس الباب، فارتعدت وتعالت دقات قلبها، وانتابها الارتباك، فقالت والدتها:

 

ادخلي انتِ أوضتك يا نعمة، ما يصحش يدخلوا يلاقوكِ في استقبالهم. الأصول كدة

 

حاضر يا ماما

 

فتحت والدتها الباب، فألفت خالة عمر أمامها، تختال بشعرها المخضب بالأحمر الناري وعلى محياها بسمة فاترة مترفعة، ، وخلفها عمر يرفل في أناقته، يحمل باقة الزهر والحلوى،ورائحة عطره قد فجت في الأرجاء، فأطفأت سحر عبق خالته المضمخة بالعطر.. فقالت والدة نعمة بابتسامة من رهبة:

 

يا أهلاً وسهلاً, اتفضلوا

 

قدم عمر خالته لوالدة نعمة:

 

أستاذة كريمان، خالتي

 

بسم الله ما شاء الله، خالتك أخت أمك لزم؟؟

 

هه ايوة

 

عانقتها أم نعمة ورحبت بها بحرارة:

 

أهلاً وسهلاً يا ست هانم، نورتينا والله، يا ألف خطوة عزيزة، يا ألف مرحب

 

هه ميرسي، أنتِ لطيفة قوي

 

والله انت ألطف يا حبيبتي

 

استدارت أم نعمة تنادي ابنتها ندى:

 

تعالي يا ندى سلمي على خالتك

 

امتعضت كاريمان، وكاتم عمر الضحك

 

 

خرج الحاج صادق وخلفه الدكتور هشام، ليرحبا بالخاطب الذي أخذ طريقه إلى الداخل:

 

يا أهلاً وسهلاً يا ابني . نورت يا عريس

 

متشكر يا حاج صادق

 

قدم الحاج صادق ابنه باعتزاز وفخار:

 

الدكتور هشام ابني، لسة راجع من امريكا ما بقالوش كام شهر

 

مد عمر يده للدكتور هشام للمصافحة:

 

أهلاً دكتور هشام

 

أهلاً بك يا أستاذ عمر

 

قال الحاج صادق، مشيراً بيده إلى غرفة الأضياف:

 

اتفضل يا أستاذ، اتفضلي يا ست هانم

 

قدم عمر باقة الزهر وعلبة الحلوة إلى والدة نعمة قبل اتجاهه إلى غرفة الأضياف:

 

اتفضلي يا فندم

 

متشكرين يا أستاذ

 

أخذت باقة الزهر والحلوى ووضعتهم على المائدة الكائن عليها فازة الورد البلاستيكي، وتبعتهم إلى غرفة الأضياف

 

فور جلوسهم في مقاعدهم، جاء عاطف يهرول، لمصافحة العريس، وقدم نفسه متهللاً وهو يصافحه بقوة:

 

أنا عاطف

 

ضحك عمر وقال مداعباً:

 

طيب بالراحة عليا يا عاطف، أنا مش قدك

 

كانت عينا خالة عمر تدور في أنحاء الغرفة البسيطة، موارية الازدراء في دواخلها، غير أن عيناها تفصح عن بعضه. سرعان ما دخلت نعمة بوجه خال من الزينة، مخالفة لتوقعات عمر، فأكبرها في نفسه.. فقد بدت كزهرة طبيعية، لا ينقصها بهرجة الألوان..ألقت السلام:

السلام عليكم

 

 فوقف يرد التحية باسماً:

 

عليكم السلام ورحمة الله.. ازيك يا أنسة نعمة

 

الله يسلمك يا أستاذ عمر

 

اتجهت إلى خالته، التي كانت تنقل بصرها بينها وبين عمر بابتسامة ماكرة.. حيتها نعمة ومدت يدها لمصافحتها في مقعدها:

 

ازي حضرتك يا مدام كريمان، نورتينا

 

اتسعت ابتسامتها وصافحتها قائلة:

 

ميرسي. ما كنتش اتوقع إني هشوفك تاني، بعد ما انهيت عملك في المدرسة

 

بيقولوا اللقا نصيب

 

غضنت حاجبيها وقالت باندهاش:

 

هما مين دول اللي بيقولوا؟

 

هه أهل الحارة

 

هه لطاف قوي، تري جونتيه

 

شكراً لحضرتك

 

همست لها نعمة بلطف:

 

ممكن حضرتك تيجي تقعدي معانا في الأوضة التانية ونسيب الرجالة برحاتهم؟

 

واحنا قالين راحتهم في ايه!!

 

لا ما اقصدش، بس المفروض الرجالة يقعدوا لوحدهم والستات لوحدهم

 

ومين فرضه؟

 

قامت والدة نعمة عن مقعدها وأشارت إلى الخارج وقالت بلطف:

 

اتفضلي معانا يا ست هانم، يا ألف أهلاً وسهلاً

 

قامت ممتعضة و سددت نظرات ضائقة إلى عمر، فتجاهل الأمر واستدار إلى الحاج صادق ليتجاذب أطراف الحديث:

 

ازي حضرتك يا حاج صادق

 

الحمدلله يا ابني

 

وجه حديثه إلى الدكتور هشام:

 

ويا ترى تخصص حضرتك ايه يا دكتور هشام؟

 

جراحة قلب

 

هايل. ويا ترى بتشتغل في أي مستشفى؟

 

مستشفى استثمارية خاصة

 

وعيادتك فين؟

 

رد والرضا يفيض من حنايا قلبه:

 

العمارة اللي كان فيها العيادة بتاعتي، وقعت في الزلزال

 

شعر عمر بلأسى وواساه:

 

شيء محزن، إن شاء الله يكون عندك غيرها في المستقبل

 

إن شاء الله

 

تنهد عمر وقال:

 

أنا بالفعل لاحظت إن في بيوت كتير آيلة للسقوط في الحارة

 

رد الحاج صادق:

من ضمنهم بيتنا

 

ياااه!! اومال مقيمين فين؟

 

أنا وهشام، عند ابني سمير، والحاجة ام هشام، عند اختها

 

ايوة طب وبعدين!! أكيد الوضع ده مؤقت ولازم يكون في حل

 

قال الحاج صادق ضاحكاً:

 

جرا ايه يا عريس! مالك انت ومال البيوت الآيلة للسقوط ولا اللي سقطت. خلينا في عروستنا. بصراحة يا ابني، نعمة دي بنت حلال مصفي. جوهرة، وربنا أكرمك بيها

 

أكيد طبعاً يا حاج صادق، هي فعلاً إنسانة أخلاقها ممتازة، وأنا محظوظ بيها

 

ربنا يتمم لكم على خير يا ابني. اتفضل اشرب العصير وكل الكيك

 

***************************

رحبت والدة نعمة بالضيفة التي اصطفت أمامها الحلوى والعصائر:

 

يا ألف أهلاً وسهلاً يا ست هانم، دا اللية كأنها عيد بوجودك والله، اتفضلي العصير والجاتوه

 

ميرسي مدام

 

أطلقت والدة نعمة سراح سؤالاً كانت تكاتمه:

 

اومال الست والدة الأستاذ عمر ما جاتش ليه؟

 

لفتت نعمة نظرها لسخافة السؤال ببعض الضيق:

 

ماما!!!

 

يوه! هو انا غلطت في حاجة يا بنتي!!

 

تبسمت السيدة وقالت بلطف:

 

ماما، ما غلطتش يا مودمازيل نعمة

 

استدارت إلى والدة نعمة تجيبها:

 

ميريهان أختي سافرت عند بنتها شذى أخت عمر, في لندن

 

تهللت والدة نعمة، مستشعرة فخار النسب وقالت:

 

بسم الله ما شاء الله.. واسم عليها أخت الأستاذ عمر بقالها كتير هناك؟

 

قهقهت السيدة وقالت تحاكِ اسلوب والدة نعمة:

 

اسم الله عليها من وقت ما اتجوزت وهي في لندن، جوزها مهندس الكترونيات وهي دكتورة في الجامعة

 

شهقت فرحاً وقالت:

 

اللهم صل على النبي. بصراحة يا حبيبتي انتو نسبكو يشرف ويطول الرقبة

 

تبسمت السيدة واستدارت تتحدث إلى ندى شقيقة نعمة:

 

وانتِ بقى اسمك ايه، باردونيه مواه، أصل نسيت

 

اسمي ندى

 

اسم لطيف، وبتدرسي ايه يا ندى؟

 

أنا في الثانوية العامة السنة دي

 

ردت والدتها وهي تهز رأسها بأسى:

 

كبدي يا بنتي.. طاحنة نفسها في المذاكرة ليل ونهار يا ست هانم، أصل نفسها تدخل الطب

 

هه حقيقي يا ندى؟

 

ايوة إن شاء الله

 

امتعضت السيدة الملحدة وقالت بصلف:

 

المشيئة مشيئتك انتِ

 

شهق الجميع، واستغفرت والدة نعمة

 

استغفر الله العظيم من كل ذنب عظيم. هو في بعد مشيئة ربنا مشيئة يا ست هانم؟

 

بدت بسمة باهتة على محياها وقالت لوالدة نعمة؟

 

أنا بكلم ندى.. شوفي يا ندى.. مش انتِ بتذاكري كويس قوي عشان توصلي لهدفك؟

 

ايوة طبعاً

 

طيب.. تبقى انتِ اللي بتفرضي مشيئتك على الكون وبتحققي رغبتك

 

زفرت والدة نعمة، وبدى القلق على وجه نعمة، وردت ندى بيقين:

 

الإرادة والمشيئة بتاعة ربنا وحده اللي بيسير الكون وفق الإرادة والمشيئة دي. صحيح احنا مخيرين في اختيار العقائد وفعل الخير أو الشر، لكن نواميس الكون بتسير وفق إرادة ربنا ومشيئته.. يعني بالفعل أنا بذاكر كويس، وأقدر بمجهودي أدخل الكلية اللي اختارتها، لكن لو ربنا ما أرادش مش هيحصل

 

قالت السيدة باستنكار:

 

ازاي بقى!! معاكِ العلم اللي حصلتيه في عقلك، والامتحان له وقت متحدد. وانتِ هتحضري الامتحان وتجيبي المجموع المتوافق مع مجهودك وتدخلي الكلية اللي انتِ اختارتيها

 

هه وايه الوضع بقى لو يوم الامتحان جالي مرض شديد، أو حتى كنت سليمة ونزلت الشارع وعربية صدمتني . او بلاش ده وده، روحت الامتحان ونسيت كل حاجة ولا لخبطت في الأجابات وكانت النتيجة صفر!!

 

بهتت المرأة فأردفت ندى:

 

اللي عايزة اقوله لحضرتك إن مافيش حاجة بتحصل في الكون إلا بإرادة ربنا، واحنا ما نملكش غيراننا ندعي ربنا يوفقنا ويكلل وجهوداتنا بالنجاج

 

رمقت البصر إلى الفتاة بضيق لإيمانها الراسخ، فسددت نعمة نظرة فخار لشقيقتها الصغرى، وقدمت والدة نعمة طبق الحلوى للضيفة وقالت:

 

اتفضلي الجاتوه يا ست هانم، انتِ ما بتاكليش ليه!

 

ميرسي، عاملة دايت

 

يختي حتة جاتوه مش هتعمل حاجة، كلي، كلي

 

جاء عاطف يهرول وقال للسيدة:

أستاذ عمر بيقول لحضرتك يلا عشان نمشي

 

أوه! جيت في وقتك يا اسمك ايه، كنت لسة هرن عليه

 

 

خرجت نعمة وأهلها لوداعهم.. فألفت عمر بانتظارها.. أخرج علبة مخملية صغيرة من جيبه، وقدمها إليها قائلاً:

 

اتفضلي يا أنسة نعمة

 

نظرت إلى العلبة، ثم نظرت إليه وسألته:

 

ايه دي؟

 

قال باسماً:

دا خاتم سوليتير، هدية خطوبتنا

 

نظرت إلى العلبة ولم تتجرأ على أخذها، فقال بحسم:

 

قلت خدي الخاتم السولتير

 

تنهدت ومدت يدها المترددة وأخذته، نظرت والدة نعمة إلى العلبة المخملية وقالت بتلهف:

 

وريني يا نعمة، وريني

 

فتحت نعمة العلبة، فظهر الخاتم المتلألئ، فزغردت والدتها فرحاً، فتبسم عمر واتجه إلى المنضدة الكائن عليها باقة الزهر التي جلبها، والمزهرية التي تحوي الورد البلاستيكي، فأخرج الورد البلاستيكي من المزهرية، ووضعه جانباً، ثم وضع الزهر الطبيعي في المزهرية، وسط صمت ومراقبة الجميع ودقات قلب نعمة المدوية.. انتهى من الأمر واستدار يحيي الحاج صادق وولده  اللذان تبعاه حتى الباب:

 

شكراً يا حاج صادق، شكراً يا دكتور هشام على وجودكم في الليلة السعيدة دي

 

نورتنا يا ابني

 

مع السلامة يا أستاذ عمر

 

داعب وجنة عاطف وقال:

 

اتشرفت بيك يا أستاذ عاطف

 

طب كف جامد بقى

 

ههه ماشي يا سيدي

 

مضى، وانفض الجمع، وبقت نعمة بحيرتها

 

**********************************************

 

وبعد مماطالات كثيرة، استجاب الاسطى حودة لإلحاح والده، لاسترضاء زوجته التي مضت بها شهورثقيلة  في بيت أهلها . فاصطحبه والده ليصلح بينهما،كانت والدتها تسمع الحوار ويدها على خدها مهمومة، وبين الفينة والفينة تنظر إلى حودة بنظرات حانقة، فقال والد  حودة لنجوى:

 

حودة جاي يصالحك ويرجعك لبيتك يا نجوى يا بنتي

 

ردت بروح جريحة:

 

وأنا مش قابلة منه صلح، وما يلزمنيش بيته

 

احتدم صدر حودة غيظاً، وهم أن يثور، فقبض والده على يده، وتحدث بدلاً عنه:

 

يا نجوى يا بنتي، ما تسعيش لخراب بيتك

 

الكلام ده تقوله لابنك يا عم الحاج. ابنك رماني أنا وعيالي شهور في بيت ابويا، وما سألش فينا، ولا بعتلنا جنيه، وابويا بيصرف عليا وعلى ولاده، في الوقت اللي هو داير فيه ورا جوازة تانية، وعنده استعداد يدفع من ماله ومال عياله اللي حارمهم، في شبكة ومهر وشقة للننوسة .. يا عم الحاج ابنك ما جاش هنا إلا لما ابويا راحله لحد عنده في الورشة، وكمان بعد انت ما ضغطت عليه. يعني ابنك بايع، وجاي مغصوب، وأنا اللي يبيعني ما اشتريهوش

 

قام حودة عن مقعده وقال منهياً جلسة الصلح:

 

أنا كدة عملت اللي عليا يا عم محمد، وجيت لحد عندك عشان بعمل احترام للكبير، بنتك بقى ما قدرتش حد، ولا عاملة اعتبار لحد، يلا يا ابا

 

تنهد والده، وهز رأسه بأسى وسألها:

 

ده أخر كلام عندك يا نجوى يا بنتي؟

 

ايوة يا عم الحاج

 

قام والد حودة عن مقعده، وتبع حودة الذي سبقه إلى الخارج، وكأن عبئاً أزيح عن صدره .. بعد مغادرتهما، لامها والدها برفق:

 

 

ليه كدة يا بنتي! الراجل مهما كان جاي لحد عندك، كنتِ لميتِ الموضوع ورجعتِ معاه، عشان خاطر عيالك

 

ذرفت عبراتها وقالت بنشيج:

 

طب وخاطري انا يا ابا!!.. أنا ماليش خاطر!! يعني عشان خاطر عيالي، أعيش مقهورة مع واحد بايعني! أعيش معاه بحسرتي وقهرة قلبي، عشان المرض ينهش جسمي، واموت بحزني على عيشة الذل اللي ارتضيتها مع راجل ما قدرنيش ولا قدر وقفتي جنبه ولا صان عشرتي الغالية!! يا ابا العيشة مش كدة، العيشة لو ماكانتش مع قلب شاري وصاين العشرة تغور

 

انخرطت في بكاء مرير، فبكت والدتها عليها، وقامت إليها تحتضنها وقلبها ينفطر

 

***************************************************

 

وصلت إلى المعلمة جباير في مكتبها الخاص، الفيديوهات المسجلة لخيانة ميسون وصديقها جميل، وبعدما شاهدت بعض منها، أخذت تتراقص في مقعدها، وتغني ساخرة:

 

يا جميل يا جميل يا جميييل

 

على حبك بانلي دليييل

 

يا جميل يا جميل يا جميييل

 

طفقت تنادي على كبير رجالها نويشي:

 

يا نويشي، يا شوشو ههههه

 

سيدخل مقهقهاً:

 

يا صباح المزاج العالي

 

وما يعلاش ليه طالما العجل وقع!

 

عجل مين؟

 

وضعت الفلاشة في علبتها، وأغلقتها بإحكام، ومدت يدها بها إليه قائلة:

 

بقولك ايه يا نويشي، الأمانة دي عايزاها توصل للمعلم أبو القرون

 

مين المعلم ابو القرون ده؟

 

قهقهت وقالت:

 

دودي، المعلم دودي على سن ورمح

 

بدا الاندهاش على ملامحه وقال:

 

المعلم عدوي!!.. هي ايه الحكاية يا معلمة؟

 

لا حكاية ولا رواية يا نويشي. الأمانة دي عايزاها توصل لعدوي من غير ما يعرف اننا احنا اللي باعتينها

 

أوامرك يا معلمة... لكن مش بس افهم ايه الحكاية؟ يعني هي ايه الأمانة دي وتخص المعلم في ايه، ووصلتك ازاي؟

 

وصلتني زي ما وصلتني، مالكش فيه، لكن هقولك تخص المعلم في ايه

 

 

***************************************

 

اقتاد رجال المعلم عدوي هذا الرجل المرتعد خوفاً،  وألقوه تحت أقدامه، إنه همام قريب عنتر:

 

الواد اللي اسمه همام اهو يا معلم

 

ههه يا مرحب بالجدعان. قوم اقف ياض

 

أنهضوه بقوة، فوقف على أقدام مرتجفة ونبضاته تتسارع، وسأل بعينين مرتعبتين:

 

آنا عملت ايه يا معلم؟

 

هه ما تخافش ياض، أنا جايبك هنا عشان عايزك في خدمة

 

وآنا رجبتي ليك يا معلم

 

نظر إليه بحدة زادت رجفته وارتعابه، ثم قال وهو يخرج شيئاً من جيبه:

 

بالعربي كدة وعشان ما بحبش الرغي الكتير، كنت عايزك تحط حتة الحشيش دي، في جيب الواد اللي اسمه عنتر ، عشان قضاه جه، وهيقضي زهرة شبابه في السجن

 

اتسعت حدقتا همام ذهولاً وفغر فاه، فقال المعلم:

 

اتخضيت كدة ليه ياض!!

 

انكب همام على قدم المعلم عدوي يقبلها راجيا:

 

احب على رجلك يا معلم، لاه، لاه، آنا عمري ما كنت ندل ولا جبان، آنا ما اعملش في واد عمي كديه، الموت أهون عندي من الخيانة

 

ركله المعلم وصاح به:

 

ايه ياض الأخلاق الحميدة دي!! ياض أنا اللي يشتغل عندي لازم يكون واطي وزبالة

 

نهض همام مسرعاً وقبل يد المعلم عدوي:

 

يا معلم أحب على يدك ما تغضبش على عنتر كديه. عنتر ديه واد غلبان، ما يغركش صوته العالي وجعجعته، ولا تزعل منيه عشان مد يده على رجالتك، ده واد غشيم ومتعافي، وربنا ديه جاي من بلده عشان ياكل عيش ويصرف على بوه العيان، وامه المرة الكابيرة، ودول مالهومش غيره، وانت جلبك كابير وابو الكل هنيه, كلنا عيالك يا معلم، وعنتر ديه اعتبره ولدك

 

ولدي اللي ما اترباش

 

ربيه يا معلم، اضربه، كسره، لكن بلاش منيها الأذية الله يرضى عنيك

 

وكزه المعلم في صدره وزأر:

 

يبقى خليه في حاله، وصوته ما يطلعش، ولا يعملي فيها فتوة، وإلا المرة الجاية هخلي الدبان الازرق ما يعرفلوش طريق جرة

 

حاضر يا معلم، أوامرك يا كابيرنا, آنا هجصلك لسانه جص، واخليه ما يتدخلش في اللي مالوش فيه

 

وإن حصل منه حاجة؟؟

 

وجتها اعمل فيه ما بدالك وماحدش يلوم عليك

 

تبسم المعلم عدوي وضرب على كتفه بقوة وقال:

 

ماشي يا همام .. مش هضره المرة دي.. عارف ليه؟ عشان قدّرت مرجلتك ياض.. يا ريت كان ليا حد يخاف عليا زي ما بتخاف على صاحبك. إنما كل اللي حوالية رمم وأولهم رضوان ابني

 

دق هاتف المعلم عدوي، فوجده ولده رضوان، فرد على الفور:

 

ايوة يا رضوان، لسة كنت في سيرتك

 

ههه مع مين يا بابا؟

 

لا ما تاخدش في بالك، انت لسة في فرنسا يا ولا؟

 

ايوة

 

مش ناوي ترجع ولا ايه؟

 

هه بصراحة مش دلوقتي خالص، بابا كنت متصل بيك أخد رأيك في موضوع مهم

 

مش وقته، معايا ناس، ساعة كدة وكلمني اكون فوقتلك

 

ماشي يا بابا

 

أغلق الهاتف وقال:

 

مشش في ركبك، واد طري واللي مسنود عليه مسنود على عفاف

 

قال همام بأدب بالغ:

 

عايزني في حاجة تاني يا معلم؟

 

لأ, إتكل انت، وما تنساش تعقل صاحبك

 

أمرك يا معلم، أمرك

 

ما أن خرج همام، حتى دخل المرسال ومعه الأمانة التي أرسلتها جباير

 

الأمانة دي عشانك يا معلم عدوي

 

أمانة ايه ياض! ومين اللي باعتك؟

 

الأمانة دي بعتينهالك ناس حبايبك وبيقولولك فيها فيلم صغير كدة لناس يخصوك ولازم تشوفه

 

فيلم لمين يعني؟ اسماعيل ياسين ولا شكوكو؟

 

لا ده فيلم لحملة عملها البوليس وقبض فيها على تجار مخدرات تقال، واللي بعتنهولك بيقولولك لازم تشوفه وتشوف الحيل اللي عملتها الشرطة عشان ما تقعش نفس الوقعة انت ورجالتك، عشان كدة بيقولولك لازم تتفرج عليه انت والرجالة

 

لازم حد من حبايبي هو اللي عامل معايا الواجب ده.. انت ياض من طرف المعلم الدوكش ولا المعلم ابو سند؟

 

لا ده ولا ده، ده فاعل خير مش عايز يظهر في الصورة

 

غضن حاجبيه وهمس باندهش:

 

هي ايه الحكاية!!

 

ثم أمر المرسال مشيراً برأسه إلى المكتب:

 

حطها عندك واتكل

 

وضعها الرجل على المكتب وغادر على الفور .. فاتجه المعلم إلى الأمانة يفتحها، وأخرج الفلاشة ،  وأمر أحدهم بإدارتها، وجلس وقال لرجاله:

 اقعدوا يا ولاد أما نشوف ايه الحكاية، باين عليه فيلم بوليسي معتبر

 

تم إدارة  القرص على شاشة العرض الكبيرة ، فظهرت فضائح الخيانة ، فانتفض عدوي و رجاله عن مقاعدهم، واحتدم صدره  غضباً ، وأخذ يسب مايسون:

 

آه يا بنت ال...

 

أمسك بمطفأة السجائر الزجاجية وقذف بها الشاشة فتهشمت وصاح برجاله:

 

غوروا من وشي

 

خرجوا يتدافعون، فصاح بكبير رجاله الذي هم بالخروج:

 

استنى انت يا شردي

 

انفرد به ليعد العدة للانتقام  من زوجته الخائنة.. فأي ويل مقبلة عليه أنتِ يا مايسون جزاء خيانتك!!

 

*********************

انتهت الحلقة بحمدالله

 

وحشتوووني ههه

 

يارب كلكو تكونوا بخير

 

نلتقي الخميس القادم إن شاء الله

 

لا تنسوا ذكر الله والصلاة على الحبيب عليه الصلاة والسلام