31حارة الموعودين

 

 

 

جباير ضرغام يا باشا

 

أومأ برأسه أن أدخلها، دخلت إلى مكتبه متعالية، تحييه بعينين ثابتتين:

 

سا الخير يا سعادة الباشا

 

تبسم وقال لصيده الثمين بسخرية:

 

يا مرحب

 

الله يرحب بيك

 

اتفضلي اقعدي

 

تنهدت وجلست تقول:

 

خير يا سعادة الباشا؟

 

أطال نظرة إليها أربكتها، ثم أمسك بعلبة سجائره الكائنة على مكتبه، أخرج سيجارة وأشعلها بقداحته، ومد العلبة إليها وقال:

 

سيجارة؟

 

نظرت بازدراء إلى علبة السجائر وقالت:

 

ما بشربش غير أجنبي

 

قهقه الضابط جاسر وقال:

 

معلش بقى، على قدنا

 

ما قولتليش يا باشا، جنابك عايزني في ايه

 

أخذ نفساً من سيجارته، ونفث أواره وقال:

 

كل خير إن شاء الله .. حبيت اتعرف عليكِ

 

غضنت حاجبيها اندهاشاً وقالت:

 

تتعرف عليا!!

 

ايوة. مش بيقولوا معرفة الناس كنوز

 

انت بتتمألس عليا يا باشا!! بقى جايبني لحد هنا عشان تتعرف عليا!! الكلام ده ما يدخلش ذمتي بربع جنيه، أكيد حد ابن حرام مسلطك عليا ومقدم فيا بلاغ كاذب

 

وهيقدموا فيكِ بلاغ كاذب ليه!!

 

عدويني كتير يا باشا، كيد نسا بعيد عنك

 

ههه كيد نسا!! أؤكدلك يا مدام إن مافيش حد مقدم فيكِ بلاغ ولا أي حاجة

 

اومال باعتلي رجالتك وجايبني لحد هنا ليه يا باشا؟

 

أخذ نفساً آخر من سيجارته ونفثه وقال وهو يهز كتفه:

 

مافيش أكتر من السبب اللي قولتلك عليه، تقدري تعتبريها قعدة تعارف

 

قعدة تعارف ده ايه! انت هتخطبني!

 

برق لها عينيه زاجراً، فتنحنحت وابتلعت ريقها وقالت بلطف:

 

لا مؤاخذة يا باشا، اصل السبب بصراحة مش داخل دماغي

 

بتشتغلي ايه يا جباير؟

 

نظرت إليه باندهاش هنيهة، ثم قالت:

 

بشتغل ايه! لا مؤاخذة حضرتك جبتني من محل الجزارة بتاعي، ابقى بشتغل ايه غير جزارة

 

قال ناظراً في عينيها:

 

جزارة!

 

شغلتي وشغلة ابويا الله يرحمه

 

مم ابوكِ المعلم ضرغام

 

انت تعرف ابويا يا باشا؟

 

هو في حد ما يعرفش ابوكِ المعلم ضرغام أشهر جزار في حارة الموعودين!!

 

ألف رحمة ونور عليك يا ابا

 

أردفت تقول:

 

طيب يعني حضرتك عارف شغلانتي ايه من قبل ما تبعت وتجيبني هنا، اومال بتسألني بشتغل ايه ليه؟

 

 

يعني انتِ مصدر دخلك الوحيد هو الجزارة

 

قبلت يدها ظهراً لقلب وقالت:

 

نحمده ونشكر فضله

 

قهقه وقال:

 

يعني عايزة تفهميني إن إليغمة إللي إنتِ عإيشة فيه إنتِ وجوزك وولادك دي من الجزارة!

اومال يا بيه! انت مستهون بالبهايم!!

 

استشاط غضباً وضرب على مكتبه:

 

بهايم ايه يا ست انتِ!

يوه! بالراحة علينا يا باشا، أنا قصدي عالبهايم الليي بندبحها.. انت عارف العجل يساوي كام دلوقتي!

 

نفث اوار سيجارته وحدجها بنظرة حادة، ثم سالها بنبرة هادئة:

المخازن فين يا جباير؟

 

مخازن ايه يا باشا، هي لا مؤاخذة اللحمة بتتحط في مخازن!!

 

اعاد سؤاله بهدءة اكبر:

 

المخازن فين يا جباير؟؟

 

يوه! مخازن ايه يا باشا! انا واحدة جزارة بتاجر في اللحمة، مخازن ايه اللي بتسأل عليها!!

 

تبسم بهدوء وقال:

 

انتِ متخيلة مثلاً اننا ما نعرفش إنك اكبر تاجرة مخدرات في حارة الموعودين!

 

تبسمت بمكر واخرجت علبة سجائرها من حقيبتها، خرجت سيجارة واشعلتها بقداحة ذهبية

 

سحبت نفساً و زفرته بتؤدة، ثم قالت بنظرة متحدية:

 

اثبت يا باشا

 

اتسعت ابتسامته وقال:

 

عن قريب قوي، هوصل للمخازن بتاعتك، وهثبت يا جباير

 

نظرت في عينيه بثبات وحسرت وشاحها عن بعض شعرها،.. وامسكت بخصلة وقالت بتحدٍ كبير:

 

 

ما يبقاش ده على مرة لو وصلت لأصغر مخزن فيهم

 

قهقه وقال:

 

ده اللعب هيبقى على المكشوف بقى

 

ما فيش احسن ولا اجدع من اللعب عالمكشوف يا سعادة الباشا

 

وانا قبلت التحدي يا جباير

 

هه شد حيلك وورينا جنابك.. عايزني في حاجة تاني، ولا اقوم اشوف حالي؟

 

لا كدة كفاية.. بس اكيد هنتقابل تاني، بس المرة الجاية وانتِ مترحلة عالسجن

 

قامت عن مقعدها وقالت ببتسامة ماكرة

 

فوتك بعافية يا جناب الباشا

 

 

غادرت مكتب الضابط وصدرها يحتدم غيظاً، فتحت باب سيارتها بعنف، وما ان ادارتها،حتى جاءها اتصال من ولدها، فردت باهتياج:

 

عايز ايه يا زفت؟

 

زفت! ايه يا ماما في ايه!

 

جاك مو اما يفرفرك، دلوقتي افتكرت ان لك ام، بقالك كام شهر مرزوع في الهبابة فرنسا زي ما تكون بلد اللي خلفوك، وسايبني هنا غرقانة ومافيش حد يساعدني، والإسم عندي ابن طول بعرض زي التور

 

تور!! هو في ايه!ا كلم بابا يزعقلي، واكلمك تبهدليني، انا عايز اعرف في ايه

 

عايز ايه يا رضوان الساعة دي عشان انا العفاريت الزرق بيتنططوا قدامي دلوقتي

 

خلاص يا ماما، واضح ان مزاجك مش رايق، هكلمك وقت تاني

 

لا تاني ولا تالت، خلص قول عايز ايه

 

بصراحة يا ماما، انا عايز اتجوز

 

يااخي جاز عليك الهم من بدري، جواز ايه ونيلة ايه في الغرقة اللي احنا فيها دي!

 

يا ماما لو سمحتي دي مش طريقة تفاهم، انا عايز اتجوز جينا بنت جميل بيه، ولما كلمت بابا قالي بلاش الجوازة دي، ممكن اعرف ايه السبب

 

تنهدت وقالت ببعض الهدءة

 

بلاش البت بنت جميل

 

والسبب؟

 

ابوك واقع وقعة سودة مع جميل ومش هقول اكتر من كدة

لا بقى من فضك فهميني

 

شوف غيرها وما تكترش الكلام، البنات ما خلصوش يا حيلة امك عشان تستمسك بالبت دي

 

يا ماما انا ماليش دعوة بالمشاكل اللي بين بابا وبين جميل بيه، ان هتجوز جينا

 

اسمع الكلام واتقي غضب ابوك عشان تسلم من شره , وده اخر الكلام ، واقفل عشان مش فاضية لروقان دماغك يا ابن الرايقة

 

زفرت وانهت المكالمة

 

*******************************************

 

وفي خفية المساء، ذهبت جباير الى وقرها كعادتها تباشر اعمالها، جلست إلى مكتبها تقرقر بنرجيلتها، بعد ن حاولت الوصول إلى كبير رجالها عبر هاتفها، وباءت محاولاتها بالفشل ، امسكت بهاتفها مرة اخرى وضغطت الزر، فلم يجب ايضاً فاستشاطت غضباً، ووضعت هاتفها وسبته:

 

راح فين الهلف ده! طيب يا نويشي،اما اشوفك قدامي

 

عادت لارجيلتها متجهمة،لم تمر خمس دقائق حتى اقتحم كبير رجالها مضطرباً، وقال لاهثًاً قبل ن تهم بتوبيخه:

 

شوفتِ اللي حصل يا معلمة! الحكومة عرفت طريق مخزن من المخازن

 

القت بلي نارجيلتها وانتفضت عن مقعدها متسعة الحدقتين:

 

يا وقعة سودة! وخدوا البضاعة؟؟

 

لا، حبايبنا بلغونا إن الحكومة جاية، بعت الرجالة بسرعة البرق وخدوا البضاعة وطلعوا بيها على مخزن جديد، الجن الزرق مش هيعرف طريقه

 

 

اشاحت بيدها وجلست تدمدم سباباً:

 

يا شيخ اتنيل بلا نيلة, طالما وصلوا للمخزن ده، هيوصلوا لاي مخزن تاني، شكلك كدة كبرت وخرفت يا نويشي والمريسة ما بقتش على مقاسك

 

 

رد بحتداد:

 

يا معلمة العيب مش عندي، ان ياما قولتلك فوقي يا معلمة، الحكومة مفتحة عنيها وبتشمشم ورانا، لكن انتِ بقى يا معلمة كنتِ مشغولة بسلايفك ومقضياها كيد نسا وسايبة مصالحك

 

اخذت تبرق وترعد:

 

نويشي، لم نفسك واتكلم عدل، المعلمة جباير طول عمرها واقفة زي الجبل وشايلة تجارة ما يقدرش عليها عشر رجالة، انا مشغلاك بإشارة من صباعي انت والشنبات اللي تحت ايدك، فوق لروحك يا نطع واعرف بتكلم مين

 

بكلم ست المعلمين كلهم وعين اعيان حارة الموعودين

 

تعاظمت في جلستها، وامسكت بلي ارجيلتها وعادت تقرقر، فقال مبتهجاً:

 

ليكِ عندي خبر ما يتقدرش بتمن

 

وما قولتهوش من الاول ليه! ولا يعني لازم تسم بدني بكلمتين فارغين !!

 

يا معلمة انا قلبي عليكِ، بخاف عليكِ من الهوا الطاير يا بنت معلمي

 

 

قول الخبر اللي عندك

 

قال جذلا:

 

الجنتل خرج من السجن

 

نزعت مبسم النارجيلة وهبت واقفة وقالت فرحة:

 

عباس الجنتل؟

 

ايوة يا معلمة

 

يااااه! يا طولة الصبر يا جنتل يا مجدع يا بو المرجلة

 

عشر سنين عدوا هوا يا معلمة

 

لا هوا ولا حاجة، سنين تقيلة عالقلب زي الجبل

 

هزت رأسها وقالت بشوق:

 

ولا يوم من ايامك يا عباس يا جنتل

 

وجهت حديثها لكبير رجالها:

 

بكرة الصبح هاخدك انت وكام راجل من رجالتنا، ونروح نسلم عليه ونقوم بالواجب

 

وماله يا معلمة، هجهز الرجالة ونعدي عليكِ الصبح

 

ما تجوش قبل عشرة، عشان اكون عملت الاصطباحة وفوقت

 

*********************************

وفي منزل عباس الجنت، اجتمع في اجواء تسودها الفرحة مع زوجته، وولده الشاب، وابنته الشابة، ربتت زوجته عى كتفه وقالت بنبرة نسجت من السعادة:

 

الف حمد الله عالسلامة يا سيد الرجالة

 

الله يسلمك يا ست الستات

 

قال ولده فرحاً

 

حمد الله عالسلامة يا بابا

 

الله يسلمك يا سامح يا ابني

 

قبلته ابنته وقالت بشوق:

 

وحشتني قوي يا بابا، لدرجة اني كل يوم كنت بحلم بيك واشوفك معانا

 

هه وادي الحلم اتحقق يا بسمة يا حبيبتي ومش هسيبكو ابداً إن شاء الله

 

هه ان شاء الله يا بابا.

 

نظرت زوجته إلى ابنته وقالت تمتدحها:

 

شوفت بسمة كبرت وبقت زي القمر ازاي ربنا يبارك؟

 

قهقه وقال:

 

طالعة لامها، هو التفاح الامريكاني، هيجيب ايه غير تفاح امريكاني

 

ههه يخليك ليا ولا اتحرم من كلامك الحلو ابداً

 

قالت ابنته بابتسامة ودودة:

 

 هروح اعملك كوباية شاي مظبوطة من ايدي بعد الاكلة العسل اللي ماما عملتهالنا دي

 

ردت والدتها باسمة:

 

 

الف هنا وشفا يا حتة من قب امك، اعمليلي شاي انا وسامح كمان

 

ايوة ما انا هعملكوا كلكو حاضر

 

رمق عباس البصر إلى ابنته وابنه باسماً وقال لزوجته مثنياً عليها:

 

وربنا انتِ صيلة وجدعة وبمية راجل، حافظتي عالبيت والعيال..كنت شايل همك قوي وقولت هتربي العيال ازاي في غيابي، وخصوصاً انك قولتيلي لما كنتِ بتزوريني في السجن انك رفضتِ تاخدي ولا مليم من المعلمة جباير وفتحتي كشك حلويات

 

ربك ما بينساش حد، وعشان نيتي كانت صافية وما كنتش عايزة ادخل قرش حرام على عيالي، ربنا جبرني وولاد الحلال وقفوا جنبي وفتحولي كشك الحلويات وملوهولي بضاعة، ووقفت فيه وعرقت وشقيت وكسبت بالحلال، عشان كدة ربنا كرمني في العيلين، واهو الواد دخل كلية التجارة والبت دخلت التربية

 

سدد إيها نظرة إكبار وقال:

 

يا سلام! ونعم الستات يا سعدة

 

مسكت بيده وقالت راجية:

 

عباس، ابوس ايدك يا اخويا بلاش سكة جباير السودة تاني، وابعد عن الحرام وكفاية اللي جرالنا منه

 

توبة يا بت، توبة نصوحة إن شاء الله ، كفاية اتحرمت من عيالي السنين دي كلها، يغور الحرام وايامه

 

شعرت بارتياح يسري في دوخلها ورتسمت ابتسامة متفائلة على محياها.. اتت الفتاة تحمل صينية الشاي وبعض الكعك

 

 

انا جيت، شوف يا بابا عملتلك ايه! دي كيكة شيكولاتة، دوقتها عند واحدة صاحبتي عجبتني قوي، خدت الطريقة من مامتها عشان اعملهالك لما عرفت انك جاي تنور حياتنا من جديد، دوق بقى وقولي رأيك

 

ههه دوقيني كدة

 

قضم الكعكة فاستلذها، وقال:

 

الله، تسلم ايدك يا حبيبة ابوكِ

 

قال اخوها:

 

طب وانا، ولا هي الكيكة لبابا وبس ههه

 

ايوة لبابا بس ها

ضحك والده وقال:

 

اختك بتهزر معاك، خد يا حبيبي، الف هنا وشفا

 

ربنا يخليك لينا يا بابا، والله البيت نور بوجودك، ولحد دلوقتي مش مصدق انك معانا

 

ربنا يخليك يا حبيبي... وانت عامل ايه في دراستك، فالح كدة وبتطلع من الأوائل ولا خيبان؟

 

هه لا مش خيبان ولا حاجة، هو يعني مش بجيب امتياز، بس مش بقل عن جيد

 

قالت والدته بفخر:

 

لا وكمان اسم الله عليه بيشتغل في الأجازة، بقوله يابني تشتغل وتتعب نفسك ليه، يقولي ما اقعدش في البيت زي البنات، اهو جيب مصاريفي واخفف عنك الحمل شوية

 

سدد إليه والده نظرة فخار، وقال:

 

بسم الله ما شاء الله ، جدع يا سامح. وبتشتغل ايه بقى يا حبيبي؟

 

في ورشة للنقش على النحاس

 

واتعلمته كدة وبقيت تتقنه؟

 

يوة يا بابا الحمد لله، بصرحة حبيت الحرفة دي جداً

 

قالت والدته:

لا وايه، الأسطى بتاعه مبسوط منه قوي، وبيديله زيادة فوق اجرته

 

الحمد لله، ربنا يبارك فيك وفي اختك يا ابني

 

نظر إلى اسرته الصغيرة وتنفس الصعداء وقال بارتياح

 

يا سلام!! مافيش حاجة تساوي قعدة الواحد وسط مراته وعياله، ربنا يديمها نعمة

 

 

فجأة دق جرس الباب، فقال بضيق:

 

ييي! وده مين اللي جاي ينغص علينا القعدة الحلوة دي!!

 

قالت زوجته:

 

يمكن حد من حبايبك علم انك خرجت بالسلامة، وجاي يسلم عليك

 

نهض ولده وهم بالاتجاه إلى الباب، فأثناه عن ذلك قائلاً:

 

خليك انت يا ابني، انا اللي هفتح. ادخلي جوا يا سعدة انتِ والبت

 

اتجه إلى الباب، وفتحه ليتفاجأ بالضابط جاسر يقف أمامه، يحيه باسماً:

 

حمدا لله علىى السلامة يا عباس يا جنتل

 

ضيق عباس عينيه وسأله:

 

انت مين؟

 

 

********************

انتهت الحلقة

 

 

 

 

*****************************