مصطبة العصاري(1)

يا أهلاَ بكل حبيباتي  اللي جايين يقعدوا جنبي على المصطبة ساعة العصاري ,يا سلام ,هي القعدة تحلى من غير لمة الحبايب ونسمة العصاري بتهفهف علينا! منورين والله يا ستات يا عسلات ويا بنات يا قمرات  ..واحدة فيكو بقى تقوم تتناول مني براد الشاي الصاج الأزرق الجميل ده بتاع زمان اللي بيفكرنا بأيام زمان الحلوة وواحدة تجهز الكوبيات وتحطهم ع الصينية وتعالوا جنبي هنا عشان اصبلكو الشاي ونبدأ حكاوينا ....وأول ما نبدأ  نسمي بسم الله الرحمن الرحيم ونحمد ربنا على نعمه ونقول الحمدلله رب العالمين ونصلي على نبينا عليه الصلاة والسلام ,عشان الكلام يبقى كله بركة ونسمع ونعتبر من حكاوي البشر اللي فيها من العبر والحكم ألوان

قالوا زمان في المثل ,خد الأصيلة ولو على حصيرة

وده معناه ان الراجل لما يجي يختار ,يهتم بالأصل الطيب ومش مهم المال والجاه ,المهم الأصيلة اللي هتعمر بيته وتكمل السكة معاه ,السكة طويلة,فيها الحلو وفيها المر ,الأصيلة بتزيد الأيام الحلوة حلاوة وبتحلى طعم الأيام المرة بصبرها وبالكلمة الطيبة ,لا عمرها تدي ودانها لابوها ولا لامها عشان هي عارفة ان كتر الكلام هيميل بختها .عشان ما يجيش يوم تبقى زي اللي هنحكي حكايتها دلوقتي ,حكاية ايه ؟ ما انا هحكيهالكو اهو ههه ايوة بصولي كويس وادوني ودانكو واسمعوا واعتبروا من اللي حصل

كانت معايا في كلية الحقوق جامعة عين شمس,كنا أصحاب قوي قوي وقريبين من بعض جدا وكل حاجة بنحكيها لبعض ,صاحبتي  كانت  من أرق وأجمل البنات ,ماشاء الله لا قوة إلا بالله كانت جميلة جداً ,جمال طبيعي من عند ربنا ,مش جمال مصطنع من بتاع اليومين دول ,وكمان كانت من عيلة كبيرة وميسورة الحال ,ده خلى طبعاً خطاب كبير يتهافتوا عليها ,اللي عايزينها كتير بس النصيب غلاب ..في مرة  لما كنا في سنة تانية واحدة زميلة أختها جت عندهم البيت وشافتها وانبهرت بيها وقالت لاختها اختك دي حلوة قوي وانا عندي اخويا مهندس وبيدور على عروسة ....المهندس ده كان من أسرة بسيطة وفقيرة ,لكن رغم كدة قدر يشتري شقة في مدينة من المدن الجديدة ويحوش مبلغ كويس عشان يجهزها.. لما راح هو وأهله عشان يخطبوها ,طبعاً هو انبهر بيها وأهله انبهروا بمستوى أهلها ,وابوه قال كلمة كانت هي الوبال عليه ,قال لأبوها ,انا ما كنتش أحلم ان ابني يتجوز بنت راجل عظيم زيك ولا اناسب نسب كبير زي نسبكم ,طبعا ده خلى ابوها يتعالى عليهم بعد كدة وحصل اللي هتسمعوه ده

بعد كتب الكتاب اللي تم بسرعة ,ابوها قاله انا عايز شقة غير دي لبنتي ,قاله ازاي يا عمي! دي الشقة اللي وافقتوا عليها اول ما اتقدمت لبنتكم ,قاله لا , دي في حتة مقطوعة وانا اخاف على بنتي تسكن هناك ,يمكن يطلع عليها حرامي يدبحها  وانت في شغلك ,قاله وايه المطلوب مني دلوقتي ؟ قاله بيع الشقة دي وكمل عليها بالفلوس اللي انت شايلها في البنك وهات شقة قريبة ,قاله يا عمي دي الفلوس اللي هفرش بيها الشقة ومش معايا غيرها ,قاله انا هساعدك في فرش وتجهيز الشقة ...فعلا الشاب ده دبر أموره وجاب شقة يرضى عنها حماه وحماته ..لكن للأسف حماه ما وفاش بوعده ولا ساعده في تجهيز الشقة ,ومع ذلك المهندس الشاب ما اعترضش لانه شاري البنت ,اشتغل واجتهد وجهز شقته من حر ماله ,وطول فترة الخطوبة اللي استمرت تلات سنوات لحد ما البنت خلصت كليتها ,كان فرصة كويسة ساعدته  على تجهيز الشقة بمستوى لائق بالعيلة الكبيرة اللي مناسبها ..الشاب ده لا كان بخيل ولا كان سيء الطباع ,بالعكس ,كان بيجي كتير الجامعة وياخدها بعد المحاضرات يغديها برا في مطاعم شيك وغالية وكنت بشوف ده بنفسي وازاي كان حريص يجي الجامعة ياخدها ,وكانت دايما تشيد برقيه وتحضره وأسلوب كلامه الراقي ..وكمان كان انسان قلبه كبير وطيب وكتوم ,وده اتعرف من موقف حصل بينه وبين اختها الكبيرة اللي راحتله مكان عمله  وطلبت منه مبلغ كبير على شرط ما يقولش لحد لغاية ما ترجعهوله ,وهو فعلا اداها المبلغ وما جابش سيرة عشان ما يحرجهاش ولا ينتقص من قدر اختها قدامها ,لكن هي كانت دايما تعمل بنصيحة أبوها في انها تتعالى عليه وتنتقص من قدره ,لدرجة ان مرة حصل بينهم مشكلة وراحت والدته معاه عشان تصلح بينهم وبتقولها يا حبيبتي انتِ مالكيش إلا هو ,راحت ردت بغطرسة وقالت ,ماليش إلا هو يعني ايه! ربنا يخليلي بابا وماما ,طبعاً الرد كان قاس جدا,والموضوع كبر والبنت صوتها علي وقلعت الدبلة ورميتها في وشه في موقف مهين جدا...الغريبة ان رغم كل ده اتحمل وكمل الجوازة

صاحبتي كان لها اختين ,واحدة أكبر وواحدة اصغر ,الكبيرة كانت متجوزة في بيت عيلة وحصل مشاكل كتير ,فما كان من ابوها إلا انه اشترالها شقة بإسمها بعيد عن اهل زوجها ...طبعا الموقف ده ضايق المهندس الشاب ,وعاتب مراته وقالها ,ازاي والدك يشتري شقة بالبساطة دي لاختك وما ياخدش من جوزها ولا مليم ,وانا يعمل معايا اللي عمله ده ويخليني ابيع شقتي وكمان اكمل بفلوس العفش عشان اجيبلك شقة وما ساعدنيش في الفرش زي ما وعدني ,ودلوقتي بيقدم شقة على طبق من دهب لجوز اختك!!! طبعا صاحبتي نقلت الكلام ده لابوها وامها ,راحت أمها ردت رد صعب قوي ,وقالتلها قوليله احنا حريين وما تتحشرش ...طبعا ده مش رد من أم عاقلة خايفة على بيت بنتها ..وفعلا الرد ده مع المواقف السابقة للبنت وأهلها خلاه يتغير ويتعامل بعدائية معاها ومعاهم..ربنا رزقهم بالبنت الكبيرة ,وسماها اسم معين ,واتضح انه اسم لزميلة له في الدراسات العليا واضح ان قلبه ابتدا يميل لها ,رغم تأكيده لزوجته ان اختيار الإسم كان صدفة مش أكتر ..وبعدها ربنا رزقهم ببنت تانية عدت عليهم السنين في علاقة باردة وجافة وفي يوم كنت بتصل بيها ,قالتلي انا بدورله على سفرية برا في الجورنال ..سألتها باستغراب ! ليه ؟ هو انتو مش عايشين كويس ؟ قالتلي بالعكس , مرتبه كبير جدا وعنده عربيته الخاصة وعايشين على مستوى عالي ,استغربت اكتر ,قلتلها ,طب انتِ عايزاه يسافر ليه ! قالتلي وهعمل ايه بقعدته جنبي! يسافر احسن ويجيب فلوس اكتر ونعيش في مستوى أعلى ...فعلا فضلت تدور لحد ما لقت اعلان بيطلب مهندسين مدنيين في دولة من دول الخليج ...والحقيقة دي القشة اللي قصمت ظهر البعير ..لانه اتأكد انها بايعاه ومش عايزة منه غير المال الوفير .... الراجل سافر وانقطعت اخباره ,لقيتها في يوم بتتصل بيا وبتقولي ,يا هبة ده سافر من خمستاشر يوم ومن ساعتها ما اتصلش ولا اعرف عنه اي حاجة ,وبشوف كوابيس وأحلام مزعجة انه جراله حاجة ,انتِ عندك نت أنا مش عندي ,هديكِ اللإيميل بتاعه ابعتيله رسالة قوليله اني عايزة اطمن عليه .. طبعا انا بعت الإيميل وقلتله يا باشمهندس فلان انا صديقة مدام فلانة وهي عايزة تطمن على حضرتك ...بصراحة بعت الإيميل وكنت شبه متيقنة انه مش هيوصله ,لكن الغريب انه رد في الحال بجملة واحدة (قوليلها انا بخير بس موجود في مكان مافهوش وسائل اتصال) طبعا انا في اللحظة دي تيقنت انه شطبها من سجل حياته ..بلغتها الرسالة وانا حاسة بغصة وحسرة على الحالة اللي هي وصلت نفسها ليها

في الفترة دي والدها اشترى شقة  لاختها الصغيرة اللي كانت لسة ما اتجوزتش ..وعشان الأب يعدل بين بناته اشترالها هي كمان شقة في الدور اللي تحتيها ,هي أجرت الشقة عشان تستفيد بإيجارها ...لما جوزها رجع في الأجازة ,كان بيتعامل بطريقة غريبة ,كان بيعاملها كزوجة عادية له حقوق شرعية عليها لكن من ناحية تانية مش عايز يديها ولا مليم من فلوسه اللي شقي بيها برا ...ربنا رزقها بالحمل للمرة الثالثة , وفي مرة في خناقة من الخناقات قالتله انت لازم تصرف على البيت والولاد ,قالها اصرفي من ايجار الشقة اللي ابوكي مشتريهالك ..لما طلبت الطلاق قالها عبارة مهينة وكأنه بيرد اعتباره ,لو جبتي ولد مش هطلقك ولو بنت هطلقك ,وفي الحقيقة هو لا فارق معاه ولد ولا بنت ,اظهر لها ولأهلها وجه بشع لوحش من غير قلب ولا رحمة ..لدرجة الخناقات والمشاكل بينهم كانت بصوت عالي وفضايح قدام الجيران ولما والدها يجي يتدخل كان المهندس يهينه قدام الناس وكأنه بينتقم وبيرد اعتباره ...خلى حياتها جحيم ,وقالها في مرة (لو الزمن رجع بيا مش هختارك) طبعا دي كلمة تقتل أي ست ...بعدها بدأت سكك المحاكم والقضايا ,وقتها كانت أم لبنتين وولد ,رجعت بيت أهلها بولادها ,وهو سافر والقضايا كانت منظورة أمام المحاكم ..في الفترة دي قررت انها تشتغل عشان خاطر ولادها ,لانها قالت بابا وماما مش دايمين ليا ولازم يكون عندي دخل اعتمد عليه جنب ايجار الشقة ,ولانها ست جميلة كانت مطمع ,اشتكتلي اكتر من مرة انها كل ما تنزل شغل تلاقي رجالة طمعانين ,مرة مدير وفي مكان تاني زميل ,واللي زاد الطينة بلة بالنسبة لها ,ان قضية الطلاق اترفضت في المحكمة ,انهارت نفسيا وبكت كتير ...هي في قرارة نفسها شايفة انها الذبيحة وانه وحش وسفاك دماء ...لكن أنا عشان شاهدة على الحكاية من أولها عارفة مين الظالم ومين المظلوم .....الحقيقة العلاقة اتقطعت بينا لانها اعتزلت الناس بسبب حالتها النفسية  ورقمها اتغير وما اعرفش عنها اي  حاجة , هو ده الوضع اللي سيبتها عليه ,حطام امرأة ,للأسف تفننت هي وأهلها في خراب بيتها والغريب انهم معتقدين انهم صح والراجل هو اللي أخطأ في حقهم

ربنا يعافينا ويكفينا شر أنفسنا وشر كل ذي شر يارب آمين

بس مالكو اكتئبتوا كدة من الحكاية دي ! ههه خدوا منها العبر وارموها البحر ,او احكوها لحد تاني عشان يعتبر ..طب تعالوا اقولكو على حكاية تانية حصلت في نفس توقيت الحكاية دي ,وسبحان الله كأنها النقيض للحكاية الأولى ,الاتنين حصلوا في نفس الوقت لدرجة اني كنت مستغربة من التزامن العجيب والتناقض الغريب ..برضو حكاية لواحدة صاحبتي كانت زي حتة السكر ,ما كانتش في جمال صاحبتنا في الحكاية اللي فاتت ,لكن البيوت بتتفتح وبتعمر بحلاوة الطبع وحلاوة اللسان مش بحلاوة الوش ..بقولكو ايه ,.عجبكو الشاي ؟ طب ايه رأيكو في دور شاي تاني ؟ خلاص ماشي , نعمل تاني عشان نشربه مع الحكاية الجديدة .,وعلى ما نجهز براد الشاي ونصبه تعالوا نصلي على سيدنا النبي عليه الصلاة والسلام شوية ,عشر مرات ,عشرين ,تلاتين ,ولو حتى مية , ما هو كله بركة لينا ولحياتنا

************************************************

اللهم صل على محمد وعلى آل محمد كما صليت على إبراهيم وعلى آل إبراهيم في العالمين إنك حميد مجيد ,وبارك على محمد وعلى آل محمد كما باركت على إبراهيم وعلى آل إبراهيم في العالمين إنك حميد مجيد

***********************************************************

تعالوا بقى نشرب الشاي ونكمل حكايتنا

.صاحبتي دي برضو كانت معايا في الكلية ,اتجوزت مهندس كمبيوتر بيشتغل في الخليج من قبل ما يتجوزها ,وبعد الجواز طلبت منه بإصرار وبإلحاح غريب انه يسيب شغله ويرجع مصر ,طبعا هو رفض بشكل قاطع .وبعد الجواز بحوالي شهر رجع الخليح وكانت هي حامل ,فضلت تلح عليه في الرجوع وما يأستش ,لحد ما ربنا رزقها بطفلتها الأولى ,وكانت مسمياها هبة ,كان زوجها وقتها مسافر وما شافش المولودة ,وفي مرة بتداعبه في صورة الحاح لطيف وبتقوله (هبة طول الليل بتعيط وتقول عايزة بابا ) طبعا هو ضحك وقالها ,على فكرة انا لو رجعت هنتعب وهنعيش حياة صعبة ,قالتله مش مهم ,حتى لو هنغمس العيش بالملح هيكون اهون من بعدك عننا ,اهم حاجة نكون مع بعض وانا هتحمل العيشة مهما كانت صعبة ...سبحان الله ربنا أكرمها كرم يليق بجلاله ووسع رزق زوجها جزاء رضاها وحبها له ولبيتها وحرصها على لمة العيلة ,وعزلت من الشقة الإيجار اللي كانت في حي بسيط وسكنت في شقة تمليك في حي راق ودخلت ولادها مدارس راقية

عايزة اقول ان من أكتر الحاجات اللي بتقوي العلاقة الزوجية هو ان كل طرف يحسس التاني انه ما يقدرش يستغنى عنه وان حياته ما تحلاش غير بيه ..لكن لو الزوج حس ان الزوجة مش فارق معاها وجوده ,هي كمان مش هتفرق معاه ,وبرضو نفس الكلام بالنسبة للزوجة ,لو حست انها مش فارقة مع زوجها ,بتتكسر جواها احاسيس جميلة قوي وأهمها احساس الأمان ,اللي هو اكتر احساس الست بتدور عليه عند الراجل ,وده بالتأكيد هينعكس بالسلب على علاقتهم وممكن يأدي لانيهار البيت لاقدر الله

والاحترام المتبادل مهم جدا ,بلاش نغلط في بعض ,ولا اللي شايف نفسه من أصل أعلى انه يتعالى على اللي في نظره أقل منه ..والله لو شايف او شايفة ان الطرف الآخر اقل وان جوازك منه منة وتفضل ,بلاش من الجوازة احسن وبلاش نزود البيوت الخربانة بيت ...اللي شايف ان الطرف الآخر أقل ,فبنقوله ماحدش اجبرك على النزول من برجك العاجي والزواج منه ..يا إما تحترم شريك حياتك اللي اخترته بكامل إرادتك يا إما مافيش داعي للجوازة دي يا ولاد الحلال

***

وخصلت حكايات مصطبتنا النهاردة ,نتلم الأسبوع الجاي  ساعة عصاري على براد شاي ونسمة حلوة ولمة أحلى

مع كل حبايبنا مع حكاوي كتير كتير,وياما في الجراب يا حاوي من عبر وحكاوي

يلا بقى كل واحدة على بيتها تشوف مصالحها هههه مستنياكو المرة الجاية ,يلا مع السلامة ,خلوا بالكو من السكة وانتو مروحين ,وما تنسوش ذكر الله يا حلوين

سبحان الله ,الحمدلله ,لا إله إلا الله ,الله أكبر ,لا حول ولا قوة إلا بالله