مهند
الست ذكية قاعدة بتتفرج على مهند ونور
وجالها جوزها الغلبان الشقيان عبد الصمد
وقعدت تبحلق فى وشه تعالوا نشوف ايه اللى حصل
*********************************************
حقوق النشر محفوظة للكاتبة هبة عبد العظيم نور
حقوق النشر محفوظة للكاتبة هبة عبد العظيم نور
مالك يا ذكية بتبوصيلى كده ليه
بتفرج على عجائب خلق الله
لا إلا إلا الله مالك يا ست
قولى يا عبد الصمد انت بتحبنى
طبعا اومال عايش معاكى ومستحملك ليه
اومال ليه مش بتعيط وبتشحتف علشانى
واشحتف علشانك ليه !هو انا محروم منك! ما انت فى وشى ليل ونهار
وبعدين الحاجه الوحيده اللى بتخلينى اعيط لما بفتكر اليوم اللى خطبتك فيه
طيب وليه مش بتبصلى بحنيه
تعالى يا ست لما أبصلك بحنية
ايه ده يا عبد الصمد مال عنيك
مالها عنيه
مش عارفة فيها حاجه غريبة
غريبة أزاى
انت عندك عين أوسع من عين يا عبد الصمد
لا حول ولا قوة إلا بالله
وحواجبك مالهم مقفولين وكتير كده ليه يا اخويا
معلش استحملينى
وليه بقك كبير كده
وايه تانى مش عاجبك
بصراحة مش عارفه يا عبد الصمد فى حاجه فى وشك مش
مريحانى بس مش عارفه ايه هي , يمكن
مناخيرك بقى
طيب أنا هدخل انام يا ذكية علشان اريحك منى شوية
لاء خليك ادينا بندردش
هى دى دردشه يا ذكية,ده كلام تقوليه لجوزك!
اصلك انت ما شفتش مهند يا عبد الصمد
مين مهند ده يا ست هانمممممممم
طيب وطى صوتك .. ده الجدع الممثل التركى اللى
بيجى فى التليفزيون,اصل
انا نفسى تبقى شبهه
يا سلام وابقى شبهه ازاى يا فالحة
أولا تروح الجيم
أروح الجيم ليه
بصراحة يا عبد الصمد مش عايزه اقولك ان كرشك فاضحنى فى كل حته,دى حتى امى شافت واحد شبهك وكانت هتسلم عليه لكن
قالتلى لما قربت عرفت انه مش جوزك لانى معلماه بكرشه
يا سلام عليك وعلى امك يا ذكية ونعم الناس
بقولك ايه با عبد الصمد انت تروح مركز تجميل يشفطولك
كرشك ويركبولك لينزز خضره
وماله يا ذكيه اروح اركب لينزز خضره واصبغ شعرى
واسمى نفسى عفاف
بطل تتريق عليا يا عبد الصمد الموضوع كبير قوى
قوى يا اخويا وما ينفعش السكات عليه
يا هانم الست لازم تقدر جوزها وتحترمه اما سى
مهند ده شغلته التمثيل
ودى مهنته اللى بياكل منها عيش يعنى يسبل ويقبض
لكن الراجل اللى زى حالاتى مطحون فى شغله ومستنى
مراته الكاملة العاقلة اللى تقدره وتشيله على راسها
ومهند ده لو بتحترمى جوزك ما تشفهوش تانى
وعلى فكره ليكى عندى مفاجأة
ايه يا اخويا
لمى هدومك ومع السلامة على ابوكى
ايه
ليه كده يا اخويا
خلى مهند ينفعك
مهند مين وبتاع مين يا نور عينى انت
بقيت نور عينك دلوقتى
سامحنى يا عبد الصمد
لاء أنا مصمم تسيبى البيت
اه يانا يا مظلومة يانا اهئ اهئ ,يقطع التمثيليات
التركي واللى بلانا بيها
*********************************************
حقوق النشر محفوظة للكاتبة هبة عبد العظيم نور
حقوق النشر محفوظة للكاتبة هبة عبد العظيم نور
*******************************
الست ذكية
أول عمل ليا اتعرف بين قرائي
تاريخ النشر الأول 28 يناير عام 2012
ههههههههههههه
ردحذفعارفة يا هوبة... أنا من أول ما شفت المسلسل ده ﻻ تابعته و ﻻ حبيت قصته و ﻻ حبيت الممثل ده...
سبحان الله أنا مش بحب الراجل يكون أشقر و عنيه ملونة نهائي... لكن للأسف فعلاً التلفزيون خرب بيوت ناس كتير... رجالة عايزة ستاتها تقلب زي الفنانات و الستات بقت عايزة رجالتها مجرد أشكال... و كلهم نسيوا أو تناسوا الرضا و القناعة.... مش شايفين نعم ربنا اللي عايشين فيها...
ﻻ حول و ﻻ قوة إﻻ بالله العلي العظيم
انا كمان عمري ماشفت المسلسل ده. رغم انه هبل ناس كتير وخلاهم يقارنوه بازواجهم والعياذ بالله.. ربنا يهدينا جميعا
ردحذفانا كمان عمري ما اتفرجت على مهند ده ولا عارفه الناس او الستات بالذات مشدودين قوي ليه كده ربنا يهدي
ردحذفههههههههههه انا كمان ماشفتوش
ردحذفهههه الست ذكية ملهاش حل
ردحذفانا كمان سبحان الله ماحبيت المسلسل ولا بطله 😒مش عارفة ايه اللي عجبهم فيه
وانا كمان مشفتهوش .. وبنات كتير كانوا بيتابعوه وسموا ولادهم علي اسمه.. ربنا يعافينا
ردحذف