دكتوراة في السفالة

السلام عليكم ورحمة الله وبركاته

أهلاً بحبيباتي على مصطبة العصاري

معلش والله ما قدرتش اجي اقعد على المصطبة الاسبوع اللي فات ,كنت مشغولة ,بس اديني جيت اهو عشان انا ما استغناش عن حبايبي

لولى حبيبتي ,مش حابة اسألك عن حالة الوفاة عشان ما اجددش احزانك  ,ربنا يرحم موتانا وموتاكم وموتي المسلمين حبيبتي اللهم آمين.

.خطوة جميلة انك قفلتي حسابك على الفيس انتِ واختك والله ,وكمان ام هالة قفلت حسابها ,عقبالي وعقبال كل الحبايب يارب لما نقفل حساباتنا على الفيس ههه رغم اني مش بستعمله من فترة طويلة ,يعني في حكم المقفول

ما علينا ,منورين والله ,الشاي اهو هصبه ,احلى شاي فلاحي لعيونكم ..الشاي الفلاحي بيتميز انه بيتعمل على الحطب والنار في براد صاج فبيكون طعمه مميز جدا ولا يقاوم ,يعني ولاء محرومة من الحاجات الحلوة دي ,المسكينة ما بتشربش الشاي ,فاتك كتير يا لولو هههه كلي درة مشوي يا ستي , اهو نضايفك وخلاص

ام عبد الرحمن اللي عايزاني اعمل جزء سادس لخلف هذه الجدران ,حرام عليكِ يا ام عبد الرحمن ههههه بعملك روايات جديدة يا ستي ما تقلقيش,وانتِ كمان وحشتيني يا ام عبد الرحمن والله حبيبتي

الدكتورة رشا طلعت بتحب الأمثال الشعبية وبتستعين بيها زيي ههه تعالي اقعدي جنبي يا دكتورة انا عندي امثال كتير قوي ههه منوراني حبيبتي

أم عبد الله ,ان شاء الله حبيبتي هحاول اخلي المصطبة يوم الخميس ,اعتقد هيكون انسب

اسماء حبيبتي الف هنا الشاي يا ستي أنا

أم هبة حبيبتي وميرو روح قلبي  ومشمشة حياتي وكل الحبيات اللي سألوا علية ربنا ما يحرميش منكم ابدا يا بنات الأصول

مريم فودة نورتينا يا مريومة ,ايه الخطوة العزيزة دي ,اقعدي اصبلك شاي

مريومة دودي القعدة ما تحلاش إلا بيكِ يا قمر والله

على ما نصب الشاي نصلي على الحبيب المصطفى عليه الصلاة والسلام عشان يحلى الكلام

اللهم صل وسلم وبارك عليك يا سيدي يا رسول الله

عمنا الشاعر قال ,إنما الأمم الأخلاق ما بقيت فإن هم ذهبت أخلاقهم ذهبوا

والمثل بيقول ,نهيتك ما انتهيت والطبع فيك غالب ,وديل الكلب ما ينعدل ولو علقوا فيه قالب

لما كنت في كلية الحقوق جامعة عين شمس أيام حياتي في القاهرة الساحرة كان ليا زميلة عزيزة وكنت حقيقي بحبها جداً لأنها كانت طيبة بجد ونيتها صافية وعلى سجيتها ,لكن للأسف كانت متحررة زيادة عن اللزوم ,فكان لبسها مفتوح وضيق جداً وكنت بنتقدها كتير,في مرة شفتها اتصدمت من لبسها وقلتلها ايه اللي انتِ لابساه ده ,اخوكي ازاي سمحلك تخرجي من البيت كدة ,راحت ضحكت وقالتلي ده هو اللي موصلني

في مرة قالتلي كلام في الحقيقة ما صدقتوش ,قالتلي الدكتور الفلاني بتاع القانون الدولي معجب بيا جدا وقالي انتِ حلوة قوي ,وحتى اخد رقم تليفوني وطلب مني اروحله البيت بس أنا رفضت ...في الحقيقة الكلام صدمني وما صدقتوش وقعدت اقول في نفسي الكلام ده مش ممكن يحصل ,هو الدكتور هيعرفها منين! ده المدرج فيه اعداد رهيبة ,وبعدين ازاي دكتور جامعي فاضل وبيعلم أجيال هيطلب منها كدة ! استحالة,اكيد استحالة ,,روحت قايلالها  وهو قالك الكلام ده فين؟ قالتلي أصل روحت مكتبه عشان كنت عايزاه في حاجة خاصة بالدراسة فراح قالي الكلام ده ..في الحقيقة برضو ما صدقتش ..لكن في مرة بقى كنا ماشيين جنب جراج العربيات وكان الدكتور ده بيركن عربيته ,راحت البنت قالتله ازيك يا دكتور ,راح قالها ازيك يا فلانة ..أنا بصراحة صعقت ,قلت ازاي هو عارف اسم طالبة رغم ان المدرج فيه الافات ,يبقى اكيد كلامها صح ..بعدها قالتلي انه لح عليها عشان تروحله البيت فهي ردت وقالتله طيب ما تيجي انت عندنا واعرفك على بابا وماما واخواتي ههههه في الحقيقة البنت كانت رافضة تماماً انها تفرط في نفسها رغم الاغراءات اللي عرضها عليها ,لكن هي كانت مرعوبة منه وقالتلي أنا خايفة يسقطني في المادة بتاعته انتقاماً مني ,قلتلها وايه يعني لما يسقطك! مش احسن ما تخسري نفسك للأبد!! لكن الحمدلله السنة عدت وما سقطهاش في المادة

بعد ما اتخرجنا بقى لقيت خبر في الجرايد ,القبض على دكتور في كلية الحقوق جامعة عين شمس في شقة للدعارة ومعه طالبات ....الباشا كان عامل لنفسه شقة وبيهتك أعراض الطالبات ,اللي كانوا بيوافقوه طبعاً وما عندهومش مانع للسفالة والانحطاط ..وتم فصله من الجامعة بعد الفضيحة دي

والحمدلله ان ربنا نجا زميلتي منه لانها بالفعل كان جواها طيب جداً وربنا أكرمها بالحجاب والالتزام

نعمل دور شاي تاني بقى عشان اقول حكاية الدكتور اللي بعده ..بس على ما نعمل الشاي ونصبه نصلي على الحبيب عليه الصلاة والسلام ,اللهم صل وسلم وبارك عليك يا سيدي يا رسول الله

لما كنا في سنة أولى وكنا بندرس القانون الجنائي ,كنا بالطبع لازم ندرس عقوبات التحرش والاغتصاب وما شابه من ضمن دراستنا لكافة الجرائم والعقوبات الملازمة ليها ,,ده عادي ,لكن اللي مش عادي ان الدكتور يكتب بالتفصيل الممل كيفية التحرش ويستخدم في كتابه عبارات خادشة للحياء ..اظن كان من الأفضل انه يكتفي بالتلميح وليس التصريح بالطريقة الفجة دي ..وده برضو ممكن يكون عادي ويعدي وزي بعضه واهو الواحد ما يدققش في المكتوب ..لكن بصراحة الدكتور تجاوز كل الخطوط الحمراء وبدأ يشرح في المحاضرة  قدام الطلبة والطالبات وهو قدامه المايك والصوت مجلجل في القاعة ,كيفية التحرش بالأنثى وانه يفعل بها كذا وكذا,الكلام ده أثار حفيظة بعض الطلبة من الشباب المحترمين ,قاموا وقفوا وبعلو صوتهم قالوله ,يا دكتور من فضلك ما يصحش كدة ,معانا بنات ,,راح الدكتور قايل بكل برود ,اللي مش عاجبه المحاضرة يطلع برا ..راحوا الشباب دول وكانوا مجموعة كبيرة طلعوا لأخر المدرج في صف طويل وفتحوا الباب الخلفي واحنا وراهم وسيبنا المحاضرة احنا وكل الطلبة والطالبات اللي ما عجبهومش القرف ده ,والراجل ده ما حضرتلوش ولا محاضرة لحد ما اتخرجت من الجامعة ..في حين ان كان فيه طلبة من الأسافل كانوا بيقولوا احنا بنحب نحضر للدكتور ده عشان قليل الأدب ويقعدوا يضحكوا ..طبعاً كان بيشبع فضولهم ورغباتهم المتدنية

عايزة اقول إن الجامعة مجمتع صغير ,فيه كل شيء,الناس أصحاب الأخلاقيات والقيم وبرضو موجود الرمم ,زي ما فيه دكتور بالأخلاقيات الوضيعة دي برضو كان عندنا دكاترة أفاضل ونماذج رائعة , وزي ما فيه طلبة أسافل ,برضو كان فيه محترمين وبيعاملوا البنات زي اخواتهم وما بيقبلوش عليهم ان مجرد حد يخدش حيائهم ,زي الطلبة الأفاضل اللي اعترضوا على الدكتور الوضيع

ربنا يكثر من الصالحيين ويرزقنا صحبة الأخيار اللهم آمين

يلا كفاية كدة النهاردة واقابلكو يوم الحد الجاي إن شاء الله على المصطبة ..يلا كل واحدة بالسلامة على بيتها تشوف اللي وراها ,وما تنسوش ذكر الله والصلاة على رسول الله عليه الصلاة والسلام

سبحان الله ,الحمدلله ,لا إله إلا الله ,الله أكبر