اللي بلا أم حاله يغم

السلام عليكم ورحمة الله وبركاته

ازيكم حبيباتي وكل متابعين مصطبة العصاري ,منورين المصطبة والقعدة ما تحلاش إلا بيكم ,على ما نولع الحطب عشان نتدفا ونحط عليه براد الشاي الصاج الأزرق الجميل ده,نذكر الله ونحمده على نعمه الكتير علينا ونصلي على محمد نبينا خير المرسلين

سبحان الله ,الحمدلله ,لا إله إلا الله ,الله أكبر ,لا حول ولا قوة إلا بالله العزيز الحكيم

اللهم صل على محمد وآل محمد كما صليت على إبراهيم في العالمين إنك حميد مجيد

يلا اتفضلوا الشاي عشان نبدأ حكاوينا النهاردة

قال على رأي المثل (اللي بلا أم حاله يغم) في الحقيقة أنا مش بحب المثل ده,لكن للأسف الواحد شاف في الدنيا مآسي لناس كتير اتحرموا من أمهاتهم وللأسف الأشد إنهم اصطدموا بواقع مخيف وعاشوا مع ناس في قمة الوحشية وفي الحالة دي لازم نقول اللي بلا أم حاله يغم ....أكثر قصة مؤلمة قابلتها ومأثرة فيا جداً هي لولد صغير من الطلبة بتوعي .,عشان تعرفوا أنا اتعرفت عليه ازاي لازم اقول الأول أنا اشتغلت مدرسة لغة انجليزية ازاي ..في الحقيقة أنا بيتوتية جداً ومابحبش الخروج إلا نادراً,ولإني بحب اللغة الإنجليزية جداً وكنت متفوقة فيها طول عمري حبيت أكمل دراستها عن طريق كورسات,ولأني بفضل الله لما دخلت امتحان تحديد مستوى دخلت على المستوى المتقدم على طول وحصلت بعد اتمامه على جيد جداً,أنا أخدت الكورسات حب للغة مش اكتر مش عشان اشتغل,لكن سبحان الله كان قدر الله إن واحدة صاحبتي (اللي هي اتكلمت عنها في أول تجمع لينا على المصطبة وقلت عنها إنها ست راضية بقليلها وفضلت ورا زوجها تزن عليه  لحد ما رجع من الخليج وعاشوا مع بعض  على حسب رغبتها ههه) بصراحة هو ده طبعها مع الكل,اللي في دماغها لازم تنفذه وعندها قدرة على الزن رهيبة تخلي الواحد في الآخر يقول حاضر يا ستي وارحمينا من زنك,الله يمسيها ويصبحها بكل خير حبيبة قلبي كانت من أروع الناس اللي عرفتهم في حياتي ..المهم بقى إنها في يوم اتصلت بيا وقالتلي عايزاكِ تدي دروس خصوصية لاولاد اخواتي ,قلتلها لا والله اسفة ,لا دروس ولا وجع دماغ سيبني في حالي,قالتلي والله دول شاطرين واذكيا وهيفتحوا نفسك ع الآخر,قلت يا ستي أنا ما بحبش الخروج,قالتلي طيب اهون عليكِ تكسفيني! وبعدين قالتلي انا عارفة انتِ مش موافقة ليه,عارفة انك مش بتحبي تروحي بيوت ناس ما تعرفيهاش وكمان انتِ مش واخدة على اخواتي,قلتلها طب الحمدلله انك عارفة كدة,اقفلي السكة بقى ههه قالتلي أنا عندي حل للحكاية دي,إنتِ هتدي الدورس عندي في شقتي,واهم اخواتي واحدة منهم ساكنة تحت شقتي بدورين وتبقى تطلع عيالها فوق عندي,واخواتي التانين في الشارع اللي ورايا,واهو الكل يجي عندي ,واهو يا ستي تنوري الصالون اللي مقفول على طول ده,انا مسكينة وماحدش بيزورني ههه المهم قلتلها خلاص حاضر حاضر,حدديلي معاد شوفي اجي امتى هههه

المهم فعلاً بقيت اروح عندها وادي للولاد الدروس هناك, ابن اختها اللي تحتيها وابن اختها  وبنت اخوها اللي في الشارع اللي وراها,وكل الولاد دول امهاتهم كانوا مدرسات للمرحلة الابتدائية تخصصات مختلفة ماعدا الانجليزي, ولإني بفضل الله كنت ماشية معاهم نظام كورسات مكثفة فالولاد في فترة قياسية بقى عندهم مهارات كتير زي المحادثات والترجمة وتأليف القصص بالإنجليزي كمان هههه كنت اقول اي جملة تنفع بداية لقصة واقول كل واحد يكملها بطريقته,وده خلاهم يبحثوا كتير ويدوروا على مزيد من الكلمات عشان يكتبوا القصة وكل واحد وخياله..مستوى الولاد خلى زمايلهم في المدرسة يقولوهم عايزين ناخد عند المس اللي بتديكم ,طبعاً كنت برفض لاني مش بروح بيوت ناس ما اعرفهومش,حتى لدرجة ان واحد زميل الولاد دول فرض نفسه عليا بشكل هلكني من الضحك,أنا روحت مرة الدرس لقيت ولد غريب وسطهم,قلتله انت مين,قالي انا جاي اخد الدرس معاهم يا مس هههه قلت له انت اسمك ايه.قالي فلان ,وقالي هاتي رقم تليفونك عشان ماما عايزة تكلمك هههههه قلت له حاضر (ده ماشاء الله عليه حالياً اتخرج من كلية التجارة) مرت السنة بخير والولاد كانت درجاتهم ممتازة والحمدلله ..,وللأمانة كنت مدرسة عصبية جدا مع الولاد وما عنديش تهاون ومش بقبل تقصير ,ما كنتش بضرب ولا بمد ايدي على حد لكن صوتي عالي ونظراتي حادة ( امنا الغولا ) ههه عشان كدة الولاد كانوا بيتقوا شري ويذاكروا ويعملوا واجباتهم من غير تقصير ,لكن برضو الولاد كانوا بيحبوني جدا ومتعلقين بيا لان برضو ليا جانب آخر لطيف وهو اني بهزر معاهم  وادلعهم واجيبلهم هدايا نظير اجتهادهم ,لكن هما عارفين اني مش بقلب على الوش التاني إلا في حالة تقصيرهم ,والمعادلة دي لازم تكون موجودة ,او نظرية الثواب والعقاب ,وكله من غير مبالغة عشان تتحقق الغاية المطلوبة ..المهم  السنة اللي بعدها لقيت واحدة من اخوات صاحبتي اللي بدي ولادهم دروس قالتلي  ,مس هبة أنا هطلب منك طلب وارجو ما ترديش طلبي,أنا عارفة انك مش بتروحي بيوت ناس ما تعرفيهاش لكن في ولد لو عرفتي حكايته بجد هيصعب عليكِ قوي ومش هتتخلي عنه ,قلتلها ايه حكايته الولد ده؟ قالتلي ده يبقى ابن خال مدرسة زميلة ليا في المدرسة ,الولد ده باباه في الأول كان متزوج من ست عاش معاها عشرين سنة وما خلفتش واضطر يتجوز,ولما اتجوز ربنا رزقه بالولد ده ولكن للأسف أمه ماتت بعد ما ولدته على طول,وبعدها باباه أخده لمراته القديمة عشان تربيه وكمان تحقق أمنيتها في ان يكون عندها طفل,الولد لما كبر وأدرك فهموه إن دي أمه مش مرات ابوه,ما يعرفش ان كان له أم وماتت,وللأسف الست دي بتعامله أسوأ معاملة وما فيش حد بيحن عليه .ودلوقتي هما محتاجين مدرسة لغة انجليزية فأنا رشحتك,ايه رأيك؟..بصراحة أنا لما سمعت حكاية الولد فعلا حنيت قوي وكان نفسي اساعده,عشان كدة قبلت إني اروح ,هما كانوا ناس وضعهم المادي كويس جدا و مرات ابوه بجد كانت ست شرسة وصوتها عالي ودايما تخوف وترهب الولد ..لدرجة اني ساعات اكون بسأله سؤال وهو ما يعرفوش تقوم جاية زي الغولا وتقوله انططططق,جااااااوب,وتفضل تشتم فيه وتقولي الطشيه الم على وشه ده ما بيجيش غير بكدة,والولد يا حبيب قلبي يفضل يعيط وأنا قلبي يتقطع عليه واقولها يا مدام معلش من فضلك بالراحة عليه ,الشدة مش هتنفع معاه,هو كويس والله بس خوفه منك مش مخليه يركز,طبعاً كلامي لها مش بيعجبها,بس انا كنت صابرة عشان الولد اللي هو كمان حبني واتعلق بيا جدا. في مرة كنت اتصلت عشان اعدل معاد الدرس والست دي ردت عليا ,راح الولد رفع السماعة التانية وقعد يقولي وهو فرحان ازيك يا مس وحشتيني,هي طبعاً اتعصبت وقالته اقفل السماعة من عندك يا ولد..الست دي ادركت ان الولد اتعلق بيا عشان كدة بلغتني عن طريق اخت صاحبتي انها مش عايزاني ادي الولد دروس تاني لاني مش شديدة معاه وهي عايزة واحدة شديدة ههه طبعاً عايزة واحدة تلطشه على وشه زي هي ما بتعمل معاه,اخت صاحبتي ردت على زميلتها اللي هي قريبة الولد وقالتلها مس هبة شديدة جدا وما عندهاش تهاون وهناديلك ابني يقولك بنفسه قد ايه هي حازمة وصارمة معاهم وبيعملولها الف حساب,لكن هي عشان ظروف الولد ده مش قادرة تقسى عليه ..الموضوع عدا واتقفل ومر عليه سنة ,وفي مرة وانا رايحة الدرس في معادي اتفاجئت بالولد ده نازل من باص مدرسته و ماشي في الشارع بلبس المدرسة اللي كان غير مهندم على الإطلاق ومعلق على ضهره شنطة قديمة جدا ومقطعة والله ,الطفل ده كان ماشي بخطوات متثاقلة سرحان ومهموم والحزن مالي وشه وكأنه راجل كبير وعنده مشاكل الدنيا وهمومها على راسه,أي طفل مكانه لما بيجي معاد رجعوه من المدرسة بيجري على البيت بكل نشاط,لكن ده مفهوم البيت بالنسبة له شيء مرعب ومش عايز يروحله ..اتخضيت لما شفته بالشكل ده وناديت عليه لكن هو كان ناسيني خالص وبصلي باستغراب,قلتله انت مش فاكرني يا حبيبي؟ أنا مس هبة اللي كنت بديك درس الانجليزي,قالي  وهو مهموم اه افتكرت,ومشي وهو موطي راسه وحزين وفضلت اتابعه لحد ما اختفي عن عنيا وقلت حسبنا الله ونعم الوكيل فيها الست مرات ابوه وفي ابوه نفسه,ازاي يرضى كدة لابنه الوحيد وهو راجل عنده فلوس ويقدر يشتريله احسن حاجة! لكن طبعاً مظهر المزري هو جزء من الحياة البائسة اللي هو عايشها ,مظهره الخارجي علامة واضحة على الحياة اللي عايشها مع الست المتوحشة دي حسبنا الله ونعم الوكيل ...الله أعلم الولد ده وصل لحد فين في حياته ,اكيد عرف ان الست دي مش أمه وإن امه ماتت الله يرحمها ..يا ريت نرحم وما نقساش على الضعيف وقليل الحيلة عشان ربنا يرحمنا..لكن زي ما بيقولوا (الرحمة لا بيبيعوها ولا بيشتروها)

حقيقي المثل اللي بيقول اللي يعيش ياما يشوف واللي يمشي يشوف اكتر,وبالفعل الفترة اللي اشتغلت فيها مدرسة سواء للأطفال دول أو لغيرهم شفت فيها عجايب كتير قوي ومآسي و غرايب ,واتعلمت كتير من الدنيا ومن تلاميذي كمان ههه أكيد الحكايات هيجي وقتها إن شاء الله ,كله بأوانه

صلوا على النبي عليه الصلاة والسلام عشان نحكي الحكاية التانية ودي حكاية من أغرب ما يكون

اللهم صل وسلم وبارك عليك يا سيدي يا رسول الله

الست اللي هتكلم عنها دي حكايتها مستفزة جدا ,ورغم اني كمؤلفة مش بكتب قصص من الواقع اطلاقاً ,لكن كتبت عنها قصة قصيرة من كتر ما حكايتها استفزتني ..هي مش قريبتنا,بس تقرب لناس قرايبي

زمان وانا صغيرة كانت الست دي مطلقة وعندها بنت من سني,كنا احنا الاتنين في اولى ابتدائي وقتها ,جابت بنتها دي عندنا مرة,انا مش فاكرة ملامح البنت  خالص لان ماشفتهاش غير مرة ,فاكرة اننا لعبنا مع بعض وقضينا يوم لطيف,أنا ناسية حاجات كتير من طفولتي بالطبع لكن في حكايات ما تتنسيش لانها غريبة وعلقت في ذاكرتي.. الست مامة البنت دي جالها عريس وكانت عايزة تتجوزه,وعرضت على ابو البنت ياخدها لكنه رفض,وكمان اخوات الست دي رفضوا ياخدوا بنتها,قامت عملت ايه يا ترى !!! سابتها لحيرانها المسيحيين ,اه والله سابتها للمسيحيين وما همهاش مصير البنت وإن ممكن تتنصر,المهم هي تتجوز وتعيش حياتها ..بس سبحان الله ,الناس المسيحين دول طلعوا ناس كويسين جدا وربوا البنت وسط ولادهم وما اتدخلوش في عقيدتها إطلاقاً,بل على العكس لما البنت بلغت مبلغ النساء لبسوها الحجاب وكمان كانوا جايبينلها مصحف وسجادة صلاة ,ربوا البنت وصرفوا عليها من مالهم من غير ما امها تدفع ولا مليم ,ولا عمرهم بعتوا يقولوا خدي بنتك ولا هي قالتلهم هاتوها ..فضلوا محاوطين البنت برعايتهم ومحتضيننها لحد ما اتخرجت من كلية تجارة انجليزي,بعدها واحد زميل البنت اتقدملهم عشان يتجوزها ,راحوا جوزوهاله بعد ما جهزوها احسن جهاز زي ما تكون بنتهم بالظبط..البنت اشترطت عليهم انهم ما يقولوش لامها عنوانها لو جت في يوم وطلبته لانها مش عايزة تعرفها (طبعاً عندها مليون حق) وبالفعل بعد ما البنت اتجوزت راحت الست امها تسأل عليها قاموا قالولها متأسفين مش هنقدر نديكِ عنوانها بناء على رغبتها ,راحت الست جريت على قسم الشرطة وقدمت في الناس دول بلاغ وقالت دول جوزوها لواحد مسيحي زيهم (شفتوا سفالة اكتر من كدة ؟) هههه طبعاً الشرطة استدعت الناس دول والبنت وجوزها واتضح ان امها كدابة ,لان اللي اتجوز بنتها مسلم زيها ..بصراحة الست دي ما كنتش بطيقها ابداااا والغريبة انها كانت بتجيلي كتير بعد وفاة ماما عشان تسأل عليا هههههههه كنت في سري دايما اقول,يختي روحي اسألي على بنتك اللي رمياها وما تعرفيش عنها حاجة ,عالم متناقضة هههه

الست دي ما حرمتش على فكرة وعملت نفس الموقف مع بنتها اللي خلفتها من زوج من ازواجها الكتير اللي اتجوزتهم ورا بعض,تطلق من واحد وتتجوز واحد وقضت حياتها كدة,لما بنتها التانية دي كانت في الاعدادية وكانت برضو متطلقة من ابو البنت ,قام جالها عريس راحت ودت البنت لابوها واهله,بس البنت دي أبوها وأهله جوزوها على طول وما قعدتش عندهم ,اخوات الست هما اللي حكوا لبابا الله يرحمه على عمايلها وقالوا راحت اتجوزت عريس جديد ورمت البنت لابوها ..الحمدلله انها ما خلفتش غير البنتين دول وإلا كنا سمعنا عجايب اكتر واكتر من عمايل الست دي ,الله أعلم هي عايشة ولا ماتت ولا راحت فين ,ربنا يعامل كل واحد بما يستحق اللهم آمين

صلوا على النبي عليه الصلاة والسلام عشان احكي اخر حكاية النهاردة في دنيا العجايب (ربنا يطلعنا منها على خير اللهم آمين )

اللهم صل وسلم وبارك عليك يا سيدي يا رسول الله

كانوا بيقولوا زمان (الخالة والدة ) ده طبعاً لان الخالة حنيتها من حنية الأم ..بس مش دايماً,الناس في الدنيا دي مالهموش قاعدة ولا لهم كتالوج ولا حد حكايته شبه حكاية حد,ممكن يتشابهوا في بعض التفاصيل لكن مش كل التفاصيل ولا نفس المصير ...واحد مراته ماتت وسابتله ولدين ,طبعاً قال في نفسه مش هيلاقي احن من خالتهم عشان تحتويهم وتحن عليهم ,اومال ايه ! دول ولاد اختها الغالية اللي ماتت ,بس الحقيقة حصل العكس,اوعى تفتكروا انها اسائت معاملة الولاد ! لالا دي عملت حاجة غير كدة خالص,قالت لابوهم انا مش عايزة العيال دول هنا نهائي هههه قالها ازاي ! طب اوديهم فين؟اوديهم لامك ؟ قالته وديهم مؤقتاً لحد ما تسفرهم على الصعيد عند أمك لاني مش عايزاهم هنا خالص ,بس ما تجيبش سيرة لماما عن نيتنا دي وإلا هتقلب الدنيا على دماغنا ومش هترضى تخلينا نسفرهم ..طبعاً الراجل او اللي عامل راجل انصاع لأوامر الست وودى الولاد عند جدتهم لامهم اللي هي حماته ..,جدتهم دي كانت ست طيبة قوي قوي الله يرحمها..طبعاً غضبت على بنتها اللي مش عايزة تربي وتحن على ولاد اختها اللي ماتت,الجدة حزنت جدا وحاولت تعوض الولاد دول عن أمهم بكل حنانها ..وفي يوم جه جوز بنتها عشان ينفذ الخطة ,راح اخد الولاد وقال لجدتهم أنا هاخدهم اشتريلهم هدوم جديدة او حاجة زي كدة ,المهم اخدهم وسافر بيهم على الصعيد ولما الجدة عرفت فضلت تدعي على بنتها بكل حرقة وتبكي على بنتها اللي ماتت ومصير ولادها ...الجدة هي اللي حكت كل الكلام ده لما جت تزورنا في مرة ,وقالت كمان الجدة إن كل ما بنتها المفترية دي تحمل الحمل بيكون خارج الرحم وكملت الجدة كلامها وقالت,هي عايزة ضناها يدخل الرحم ازاي وهي ما رحمتش اليتامى!!

والله ما انا عارفة احنا لو مخلدين في الدنيا كنا عملنا ايه في بعض ! لما احنا يادوب بنعيش كام سنة وبنرتكب كل الفظائع دي !! الحمدلله انها مش دار خلود ,ربنا يحسن ختامنا جميعاً اللهم آمين

معلش الحكايات النهاردة فيها كتير من الألم ,لكن أكيد فيها شيء من العبر

اوعدكم المرة الجاية تكون الحكاوي خفيفة وفيها مواقف طريفة إن شاء الله وبرضو فيها عبرة

يلا بقى كل واحدة بالسلامة على بيتها تشوف اللي وراها ,وما تنسوش ذكر الله ,واكثروا من الصلاة على رسول الله عليه الصلاة والسلام عشان النهاردة ليلة الجمعة

اللهم صل على محمد وعلى آل محمد كما صليت على إبراهيم وآل إبراهيم في العالمين إنك حميد مجيد