الحلقة الثامنة عشر(ف2)

الجزء الخامس خلف هذه الجدران

بقلم هبة عبد العظيم نور

ممنوع النسخ أو أخد اسكرين شوت

************************************************

تررررررررررررررررررررررررررررررررررررن

مين ؟

انا فهيمة يا حاجة ام عصام

اهلا يا فهيمة

اهلا بيكِ , عواد جابلك الطلبات

متشكرة قوي , هاتي يا فهيمة

هو صحيح الاستاذ ماجد ومراته وولاده جايين يعيشوا في العمارة على طول ؟

ههه ايوة يا فهيمة , هيجو النهاردة المغرب إن شاء الله

ايوة ايوة , عشان كدة بقى كانوا بيوضبوا شقتهم اللي في الدور التاني اليومين اللي فاتو ودهنوها , اومال ماجابوش العفش ليه ؟

عربية العفش هتيجي معاهم ان شاء الله

والله فرحت قوي يا حاجة ان الست منال هتعيش هنا على طول , اصلها طيبة وانا بحبها

ربنا يباركلك يا فهيمة , لو عندك وقت يا ريت تيجي تساعديني , اصل هحضر غدا عشان ماجد ومراته وولاده

عندي وقت ونص يا حاجة , ولو ما عنديش افضيلك نفسي , هنزل اقول لعواد واطلعلك على طول

متشكرة قوي يا فهيمة

*******************************

ترررررررررررررررررررررررررررررن ترررررررررررررررررررررررررررررررررن

افتحي يا فهيمة , ده اكيد ماجد ومنال هههه

عنيا يا حاجة , ايوة ياسي الاستاذ ماجددددددد جاااااااية يا ست مناااااال

*************

اهلا يا ست منال نورتي العمارة

هه ازيك يا فهيمة عاملة ايه ؟

الحمدلله بخير ربنا يكرمك , ازيك يا ست مريم

الله يسلمك يا دادة فهيمة , سهير عاملة ايه ؟

سهير كويسة , سألت عليكِ العافية يارب

منااااااال ههه

ماماااااا هههه ازيك يا حبيبتي امووووه امووووووه وحشتيني قوي

انتِ وحشتيني اكتر , ازيك يا مريومة

تيتة حبيبتي امووووه اموووووووه انا فرحانة قوي عشان بقينا جنبك وهنشوفك كل يوووووم هههه

هههه يا حبيبتي !!! انا فرحانة اكتر والله , اومال فين ماجد ومعاذ يا منال ؟

واقفين على ايد العمال اللي بيطلعوا العفش , قلت اسبق انا ومريم ونطلعلك

اهلا بيكِ يا حبيبتي , انا حضرتلكو الغدا انا وفهيمة عشان ناكل مع بعض

ليه بس كدة يا ماما ! تعبتي نفسك والله , انا كنت هحضّر

لا يا حبيبتي ولا تعب ولا حاجة , انا قلت اكيد منال النهاردة مش هتقدر تحضر غدا وهتبقى مشغولة في ترتيب البيت

ربنا يخليكي لينا يا ماما , دايما شايلة همنا

هم ايه بس ! دانا فرحانة بشكل مش قادرة اوصفه انكو اخيرا هتعيشوا جنبي يا بنتي

ربنا ما يحرمناش منك يا ماما

انا طفيت ع الطبيخ يا حاجة , عايزة مني حاجة تاني ؟

استني بس يا فهيمة , احنا عاملين حسابك في الغدا , ادخلي خدي اللي يكفيكي , الأكل ماشاء الله كتير

مالوش لزوم يا حاجة

لا يا بنتي , ما تتحرجيش يا فهيمة , انتِ واحدة مننا

هههه الله يجبر بخاطرك يا حاجة

طيب ادخلي خدي اللي انتِ عايزاه

ماشي يا حاجة , الله يسترك يا رب

***************************

ازيك يا فهيمة يا مرات عواد باع ارضه ههه

ازيك يا ست بهيرة يا عسل , اسكتي , مش الأستاذ ماجد ابن الحاجة ام عصام جاب مراته وعياله وعزاله وجم يعيشوا في العمارة

مراته وعياله وعزاله !!! هههه ماشاء الله , خير والله , دي مدام منال دي زي السكر

ما تتخيرش عنك يا ست بهيرة

تعيشي يا فهيمة , لما ارجع من السوق واعمل للعيال لقمة ياكلوها هبقى انزل ارحب بيها

صاحبة واجب طول عمرك يا ست بهيرة وبتحبي جيرانك

اومال يا فهيمة , طول عمري اقول جنة من غير ناس ما تنداس , بس مش أي ناااااااس ,لازم يكونوا طيبين ومحترمين , عن اذنك بقى عشان اتأخرت ع السوق

اتفضلي يا مدام بهيرة

**********************

يااااااااه يا ماجد يا ابني يا حبيبي , نورت العمارة والله , كنت بحلم باليوم اللي تكون فيه جنبي انت ومنال والولاد من زمان

ههه تسلميلي يا أمي , انتِ اللي وجودك منور الدنيا كلها

ربنا ما يحرمنيش منك يا حبيبي ..... على فكرة هاني وعصام هيجوا مخصوص يسلموا عليك كمان شوية

انتِ اتصلتي بيهم ؟

ايوة , ما كانوش يعرفوا انك جاي النهاردة بالتحديد , هاني قال كلها نص ساعة واجي وما تشربوش الشاي من غيري ههه

ههه كلنا بنحب الشاي من ايدك يا أمي

ربنا ما يحرمنيش منكو يا حبيبي , وعصام قال رغم ان عنده حالة مهمة بيشرف عليها لكن هيسيبها لحد من زمايله ويجي عشان خاطرك

طيب الحمدلله , فعلاً كنت محتاج اتجمع انا واخواتي

ربنا يجمعكو ما يفرقكوش ابداً يا حبيبي

تررررررررررررررررررررررررررررررررررررررررررررررن

تيييييييتة افتحي يا تيتة انا منة

قوم يا ماجد افتح , دي منة بنت هاني , تلاقيها جاية عشان تسلم على مريم

حاضر يا أمي

********

أهلاً منة ههه

اهلاً بيك يا عمو ههه نورت العمارة , فين مريم .. يا مريووووومة انا جيت

ههههه ايه يا بنت الدوشة اللي انتِ عملاها دي !

فرحانة بيكو يا عمو هههه يا مريووووووومة

منننننننة حبيبتي وحشتيني

مريووووومة اخيراً بقينا جيرااااااان اموووه اموووه

ههه احلى جيران والله يا منة

ازيك يا تييييتة

اهلاً يا حبيبتي , ازيك يا منة , يعني لولا مريم ما كنتش شوفتك يا بنت !

انتِ حبيبتي يا تيتة ههه والله ما اقدر استغنى عنك , هاتي بوسة بقى اموووه

هه متشكرة يا حبيبتي

اومال فين طنط منال ؟

انا جيت اهو يا روح طنط منال ههه ازيك يا منة يا حبيبتي

انتِ اللي حبيبتي يا طنط ونورتينا والله , لو كان معايا فلوس كنت جبتلكو تورتة عشان أرحب بيكو , بس والله مصروفي متدمر على طول ومش بيبات منه ولا جنيه هههه

هههه عسل يا منة , اقعدي يا حبيبتي واقفة ليه !

ميرسي يا طنط , على فكرة عبد الرحمن كان نايم وصحيته وقلتله انكو هنا وهينزل يسلم عليكو حالاً يا عمو ماجد

يآنس وينور يا حبيبتي .... مريم , خدي منة وادخلي أوضة الصالون عشان تقعدوا على راحتكو

حاضر يا أبي , تعالي يا منة

صالون ايه ! انتِ رتبتي اوضتك تحت ؟

لا لسة , الشنط مقفولة زي ما هي

طب تعالي ننزل نرتب دولايبك وحاجتك بدل ما تدبّسي فيها لوحدك ههه

ههه ماما , انا هنزل انا ومنة نرتب اوضتي

طيب يا حبيبتي , متشكرين يا منة

بتشكريني على ايه يا طنط ! دي منة اختي وحبيبتي

هه طبعاً يا حبيبتي

*****************

حمدالله ع السلامة يا هاني , اتأخرت ليه يا سيادة العميد ؟؟

كنت قاعد مع اخويا ماجد وعصام جه يسلم عليه والقعدة كانت حلوة والوقت سرقنا

مممم وعبد الرحمن ومنة ما طلعوش معاك ليه ؟

منة نزلت مع مريم تساعدها في ترتيب حاجتها , وعبد الرحمن خد معاذ وخرجوا عشان يحتفل بابن عمه

هههه هو في ايه !!! انت والولاد محسسني ان اخوك ومراته وولاده راجعين بعد سنين غربة وعمالين تحتفلوا بيهم , ما انتو كدة كدة بتشوفوا بعض كل اسبوع عند مامتك

احساسي ان اخويا بقى جار ليا في نفس العمارة مختلف , والولاد فرحانين بولاد عمهم , واعتقد يا مدام كان من الذوق انك تنزلي ترحبي بمرات ماجد وتباركيلها على الشقة الجديدة , نسرين مرات عصام رغم كل تحفظاتنا عليها ,ما فاتهاش واجب زي ده

ايه يا حبيبي ده كله !! الموضوع مش مستاهل , انت بس اللي عاطفي مع الناس زيادة عن اللزوم

عندك حق , واحدة زيك ما بتسألش على اختها المتغربة وبقالها عُمر تاني ما شفتهاش , عادي جداً تكون دي طريقة كلامها

كدة يا هاني ! قصدك ان انا ما عنديش مشاعر !!!

والله مش فاضي أحلل شخصية حضرتك , عن اذنك داخل انام عشان اعرف اصحى لصلاة الفجر

اووووووف يعني هو قعادك معايا هو اللي هيعطلك عن صلاة الفجر وقعادك مع اخواتك ومامتك هو اللي ما كانش هيعطلك !!!

تصبحي على خير يا رشا

اووووووووف وانت من أهله يا سيادة العميد ....حنين قووووي على أهله

*************************************************

ممممممم اكيد هو ده معهد السعادة اللي داد دخلهولي ..... مش عارف في باركينج جوا عشان اركن العربية  ولا لأ, اسأل بتاع الأمن ده , بليززززز من فضلك

نعم

في باركينج جوا عشان اركن العربية ؟

انت طالب هنا ؟

لا , لقيت نفسي فاضي قلت اجي اصيف عندكو ههههه ايوة طالب هنا , شفت المأساة ؟

وريني الكارنيه بتاعك

اتفضل

مممم طيب ادخل بعربيتك

اوك , ثانك يو

*****************

في مجموعة بشرية قاعدين ع الأرض , طلبة دول ولا شحاتين ! هههههههههههههههههههه هااااااااااي

ايه الواد ده ! الحق يا منصور , واد داخل بعربية جامدة وبيقولنا هاي

وماله , مش عيب , هاي يا شقيق

ههههههههه شقيق !!! نايس , انا رامي , على فكرة انا ابن ناس قوي, داد دكتور ومام من عيلة كبيرة وباباها دكتور كبير ,بس الحظ المقندل والمجموع الزبالة هو اللي رماني عليكو هههههههه

هههههههه لا دا انت ابن ناس صحيح , ماجبتش بابا بالسماعة ليه  ؟

ههههههههههه معلش , خليها مرة تانية اجيبهولكو بالسماعة وبجهاز الضغط عشان تتفرجوا عليه .... انت اسمك ايه ؟

منصور       

هههه ده اسم ولا خناقة هههه

انت هتلبخ يلاااااااااااااا !!!

نو نو نوووو انا بهزر , عادي يعني , اسمك حلو , منصور , صو  نايس نيم ههههه

ههه انت قولتلي اسمك ايه ؟

اسمي رااااااامي , رامي عصام زاهر

انت ساكن فين يا رامي ؟

في حدايق القبة , وانت يا منصور ؟

في الباطنية

وااااااااات ! عبارة عن ايه دي ؟

ههههههه عبارة عن منطقة كلها رجالة جدعان واخر حلاوووووة

هههه نايس , باباك بيشتغل ايه ؟

دكتور زي ابوك , بس دكتور تعمير دماغ ههههههههه

هههههه ازاي ؟

زي الناس , انت في سنة اولى ؟

ايوة

طب تعالى خد جدول المحاضرات

اوك, شكلك متعاون يا منصور

طبعاااااااا اتعلمت المرجلة من ابويااااااااا

ههه تعرف انك شخصية لطيفة قوي

ههههه انت ألطف يا شقيق , تعالى اسقيك حاجة ساقعة

تسقيني ! نو , مش عطشان

والله ابداااااااا , لازم اسقيك حاجة ساقعة على حسابي عشان يبقى عربون صداقة

ههههههههههههه انت عندك الصداقة بيتدفعلها عربون !

هههههه ايوة , تعالى بقى , عن اذنكو يا شقايق الخيرررررر

اتفضل يا منصوررررر

 ******************************

ترررررررررررررررن ترررررررررررررررررررن

هاي دادة . عارفة انك متصلة تسأليني وصلت اليونفرستي ولا لسة 

لا يا ايتن يا حبيبتي , انا متصلة اسألك وصلتي الجامعة بالسلامة ولا لسة ؟

ههههه اليونفرستي هي الجامعة يا دادة , اني هاو خلاص وصلت وهدخل اركن العربية في الباركينج , باي دادة

مع السلامة يا ايتن

*****

مودمازييييل

بتكلمني ؟

ايوة , انتِ معانا هنا في الجامعة ؟

يس

في سنة كام ؟

اولى بيزنس ادمينستريشن , ادارة أعمال

انا بقى في رابعة فلسفة

نايس

لو احتاجتي أي حاجة تحت امرك

هههه هحتاج منك ايه ! انت بتدرس فلسفة وانا بدرس ادارة اعمال

الفلسفة اساس كل حاجة في حياتنا

ازاي ؟

مش مهم تعرفي دلوقتي , اكيد هنتقابل تاني , انا اسمي امجد , وانتِ ؟

ايتن

نايس تو ميت يو ايتن , سعيد اني قابلتك

مي تو , وانا كمان ,  ثانك يو , باي

باي باي

**************************************

بقولك ايه يا مروان,اتوكل على الله انت على محطة الأتوبيس

انت مش مروح ولا ايه يا ياسر؟

لا , هروح اتغدا عند ياسمين اختي

هي عزمتك ؟

لا , انا اللي عازم روحي ههه سلام بقى

ماشي يا سيدي,بالهنا والشفا مقدماً

***********************

تررررررررررررررررررررررررررررررررررررررن

مين

أنا ياسر افتحي يا ياسمين

أهلاً يا ياسر ههه,ايه المفاجأة الحلوة دي!

أصل عرفت انك امبارح كنتِ عازمة أهل جوزك ع الغدا,فقلت أكيد باقي عندك ما لذ وطاب لاخوكِ الغلبان

هههه من عنيا يا ياسر,جيت في وقتك والله,عندي أكل كتير قوي ماشاء الله ,لدرجة اني عمالة اقول لنفسي مين هياكل الأكل ده كله!

أنااااا,قوليلي عندك أكل ايه؟

شوف يا سيدي,كباب حلة ومكرونة بالبشاميل

يا عيني,وايه كمان

بامية باللحمة الضاني وجلاش باللحمة المفرومة

يا رووووحي ,وايه كمان؟

فراخ مشوية في الفرن

يا سيددددي

وكمان..

انتِ لسة هتقوووولي,روحي هاتي اللي عندك كله

ههه عشر دقايق وأجهزلك أجمل سفرة يا ياسر

ربنا ما يحرمنيش منك يا أختي يا حبيبتي,يا سلاااام,أمي التانية والله

ههه رجعالك على طول إن شاء الله

بسرعة يا ياسميييين..هتصل بماما اقولها ان انا عنددددك

سلملي عليهاااااا

تررررررررررررررررررررررررررررن

ايوة يا ياسر,اتأخرت ليييه؟

أنا عند ياسمين يا ماما

وايه اللي وداك عند ياسمين؟

أختي حبيبتي ,فيها ايه دي!

مافهاش حاجة يا حبيبي,ربنا يخليكو لبعض,بس ما تتأخرش,عملالك حلة عدس تستاهل بقك

لا كليها انتِ وياسين وبابا بالهنا والشفا,أنا هتغدا ما لذ وطاب عند ياسمين

ههههه آه قول كدة بقى,طب سلملي على ياسمين عشان وحشتني من ساعة مكالمة الصبح

الله يسلمك يا ماما ,مع السلامة,ماما بتسلم عليكِ يا ياسميييين

الله يسلمها يااااااااارب

تررررررررررررررررررررررن

دي البت رحمة ع التليفون ,ايوة يا رحمة

ايوة يا ياسر,انت فين؟

بتغدا عند ياسمين,اقفلي بقى ولما ارجع هبقى اكلمك,مش عايزين ياسمين تلاحظ حاجة

طيب يا ياسر ,باااااي

مممم ياسر,الأكل قرب يسخن

وانا مستني على أحر من الجمر

...مين اللي اتصلت بيك يا ياسر وقلتلها اقفلي عشان ياسمين ما تلاحظش؟

......انتِ سمعتي!

رحمة ..مش كدة ؟

ياسمين ما تفهميناش غلط,أنا بحب رحمة وعايز اتجوزها

طيب وليه ما قلتش لبابا يخطبهالك عشان الموضوع يبقى في النور؟

ياسمين,بابا عمره ما هيرضى يخطبلي رحمة وانا لسة بدرس

يبقى خلاص,مافيش داعي لكلامكو مع بعض يا ياسر,دي بنت ولازم تخاف على سمعتها لو بتحبها حقيقي

ياسمين انتِ بتقولي ايه! أنا فعلاً بخاف على رحمة وعلى سمعتها

يبقى بالفعل يا ياسر مش بالكلام..انت دلوقتي مالاكش أي حق عليها طالما مافيش بينكو حاجة رسمي,وكلامكو مع بعض محرم عليكو

.........................................................

ما تزعلش مني يا ياسر..انت أخويا وبحبك ومش عايزاك تغلط,شوف انت مازن لما اختارني ,خلى الموضوع يمشي رسمي ودخل البيت من بابه وطلبني من بابا وادينا اتجوزنا في النور وقدام الناس كلها ,وده اللي عايزاك تعمله مع رحمة,ولحد ده ما يحصل وتقدر تتقدملها,ياريت تبعدوا عن بعض

عندك حق يا ياسمين...بس اللي عايزك تكوني متأكدة منه ان ما حصلش بيني وبين رحمة حاجة تخجلنا

وانا متأكدة من أخلاقك وأخلاق رحمة

ياسمين..حكاية رحمة بيني وبينك ,مش عايز حد يعرف

اطمن يا ياسر ,عن اذنك هروح اجيب الأكل

بسرعة يا ياسمييين,ريحة الأكل دوختنيييي

هههه

************************************

*******************************************

ترررررررررررررررررررررررررررررررررررررررررررررررررررررررررررن

مين اللي ع الباب

اني ربيع يا ست توحا

ربيعععععععع هههههه,اهلا يا ربيععععع ايه النور ددددده اتفضل

يزيد فضلك يا ست توحا , ما تأخذنيش اني جايلك من غير معاد

ده بيتك يا ربيعععع انت تيجي في أي وقت يعجبكككككك

متشكر يا ست توحا

اتفضل اقعد على ما نعملوا الشيّ

لالالا اني مش عايز حاجة , اني ....... اني مخنوق ومش طايق نفسي وعايز نفضفض مع حد بللي جوايا , لقيت رجلي جايباني لحد هنا مش عارف ازاي

ههههه على كدة اني غالية عليك وبتعزني عشان كدة حسيت انك هترتاح لما تتكلم معايا

............ ايوة يا ست توحا , بصراحة اني بنرتاح للكلام معاكِ قوي

تعيش يا ربيع , فضفض بكل اللي جواك واني سمعاك بقلبي قبل وداني , مالك يا ربيع ؟

................ اني فسخت خطوبتي يا ست توحا

هههه ايّوووووووووووه بجد يا ربيع ؟؟؟

ايوة , ما تستاهلنيش , بت طماعة ما يهمهاش إلا نفسهااااا , لا عايزة تصبر عليا لحد ما الحال يتحسن ولا حتى بتسمعني كلمة حلوة تصبرني على حالي , على طول تحسسني بعجزي وقلة حيلتي

فشررررررر , قطع لسانهاااااااااا , اهي غارت في ستين داااااااااااهية , دي ما تستاهلكش يا ربيع , وكويس انها بانت على حقيقتها قبل تتدبس وتتجوزها , ولا انت بقى ....... بتحبها ؟

لالالا اني لا بنحبها ولا عايز نرجعلها حتى , اني بس ندمان ع السنتين اللي ضاعوا مني معاها

ولا يهمك يا ربيع , اللي فات يتعوض واللي جاي احلىىىىىىى

ياااااه ياست توحا .. كلامك بلسم , ريحتيني

هههه تعيش يا ربيع , يبقى نشربوا الشيّ سوا بقى ونكملوا كلامنا

معلش يا ست توحا , خليها مرة تانية

هنشوفوك امتى تاني يا ربيع ؟

ههه عايزة تشوفيني تاني ؟

ايّووووووووووه كل ساعة , لالالا كل ثانية , بصراحة اني عايزاك معايا على طوووووول

مش فاهم يا ست توحا

مممممم تتجوزني يا ربيع ؟

ههه نتجوزك !

ايه ! ما ننفعش ؟

لالالا ازاي تقولي كدة ! اني بس اللي مش قد المقااااااااام

اخص عليك يا ربيععععع اوعى تقول كدة , طب دانت مقامك عالي عندي قوي

تعيشي يا ست توحا , بس يعني ................

بس ايه يا ربيع ؟؟؟؟

يعني يا ست توحا متهيألي الناس مش هيسيبونا في حالنا

ايّووووووووووه والناس مالهم ومالناااااااااااا , هما هيتحكموا فينا ولا اييييييه !

طب بنقولولك ايه يا ست توحا , اني ليا عندك طلب

انت ما تطلبش يا ربيع , انت تؤمر واني ننفذ

ربنا يخليكِ يا ست توحا , اني بس كنت عايز اننا نبعدوا عن كلام الناس , وعشان نبعدوا عنهم لازم نسيبوا المنطقة كلها , تبيعي العمارة دي وناخدوا شقة في حتة تانية ونبعدوا عن وجع الدماغ والناس اللي هتقول ليه وازاي

ممممممم وربنا عندك حق يا ربيع , لازم نبعدوا عن كل عين يندب فيها رصاصة

هههه كدة تمام يا ست توحا , اني هنسأل المعلم صاحب القهوة عن زبون جاهز بفلوسه يشتري العمارة

ههههه تعجبني يا ربيع , ايوة كدة خلي كل حاجة تتم في حموتها ,اعرضها بتلاتة مليون جنيي,مع انها تساوى اكتر من بكدة بياما,لكن احنا عايزين نخلصوا منها بسرعة

ههه ماشي يا ست توحا

مابلاش ست توحا دددددي , قولي يا توحااااااااا

هههههه ماشي يا توحا يا عسسسسسسل , سلاااااااام

ههههههه الله يسلمكككككككك , ايّووووووووووووه اني بنحلموا ولا نكونوا بنحلمواااااااا

**************************************

هو الولا ربيع راح فين يا ولا يا حسونة؟

قال رايح للست صاحبة العمارة اللي قصاد القهوة في حاجة ضروري , اهو جاي هناك اهو

ههه مساء الفل يا سيد المعلمين

ايه حكايتك يا ولا يا ربيععععععع , كل يوم والتاني عند الست صاحبة العمارة !!!! هي ايه العباااااااارة ؟

ههه ولا حاجة يا حاج , اصلها كانت عايزاني نشوفولها بيعة للعمارة وقالتلي يعني نهتموا بالموضوع وهي هتشوفني بقرشين , ما تعرفش حد يا معلم يشتري العمارة دي خلال اسبوع بالكتير ؟

هههههههههه ايه يا ولا , سيبت كار القهوجي وهتشتغل في السمسرة !

ههه واني نطولوا نبقوا سمسار يا معلم ! دعواتك انت بس وهي تعمر إن شاء الله , ها يا معلم , ما تعرفش زبون جاهز بفلوسه ياخد العمارة ؟

هي طالبة كام يا ولا ؟

ممممممم يعني , تلاتة مليون جنيي

ايييييييييييييييييه ! ليه يعنيييييي ! هي كانت برج ! دي حتة عمارة تسع تدوار زي قلتها واسانسيرها عدمان

لا بقى يا معلم , دي عمارة حلوة , وحلوة قوي كمان , طب دي كفاية انها بتطل على إمّتين وسلالمها رخام وتشطيبها لوكس اللوكس

هههههههههههه هتتشطر علينا يا ولا ولا ايه !

هو انت اللي عايزها ولا ايه يا معلم ؟

ايوة , بس ماناخدوهاش بالسعر ده

اومال عايزها بكام ؟

كفاية اتنين مليون ونص

شوية يا معلم , الست توحا مش هترضى , دي رابطة دماغها على تلاتة مليون جنيي

يا ولا ما تلين دماغها يا ولااااااا , تلاتة مليون جنيي يامَااااا

طب خلاص يا معلم , خليهم تلاتة مليون إلا خمسين ألف

شوف يا ولا يا ربيع , احنا هندفعوا اتنين مليون ونص وده آخر كلام

يا معلم الست توحا مش هترضى وربنااااااا

يا ولا وانت مااااااالك , اعرض عليها الكلااااااام

خلاص يا معلم , هنحددولك معاها معاد وانت ابقى خد وادي معاها في الكلام وشوف الحكاية هترسى على ايه

خلاص , استبينا

**********************************************

خلصي لبس بقى يا ست توحا , المعلم زمانه جاااااي

اني خلصت اهو يا ربيع

ايّووووووووووووه يا قوة الله , ايه القمر اللي اني شايفه قدامي ددددده

هههههه عجبتك ؟

انتِ تعجبي السلطان يا ست توحاااااااا

لالالا اني لا عايزة سلطان ولا غير سلطان , اني عايزاك انت وبس

هههههههههههه ايّوووووووووووووه داني امي دعيالي وربناااااااااا

هههههههههههههههههه يو جتك ايه يا ربيع

بس بنقولولك ايه يا ست توحا , اني عايزك تربطي كلامك على اتنين مليون جنيي وسبعمومية وخمسين الف , اوعي ترضي بأقل من كددددددددة , ما تخليش حد يضحك عليكككككككِ

ههه للدرجة دي قلبك عليا وعلى مصلحتي يا ربيع ؟

اومااااااال يا ست الكل , اومال يعني قلبي على مصلحة مين !!!!

مممممم بتحبني يا ربيع ؟

ايّوووووووووه بنحبوووووكِ بنحبوكِ قوي يا ست توحاااااا اومال اني بنعملوا كل ده ليه !

ههههه تسلملي من كل ردي يا ربيع

تن تن تن يا جماعة يللي هنااااااا

المعلم وصل يا ست توحا , اتفضل يا معلممممممم

يا مساء الأنوار يا ست توحا

يسعد مساك يا معلم , اتفضل

يزيد فضلك يا ست توحا

تشرب ايه يا معلم

لا معلش , احنا جايين نتفقوا ونمشوا على طول

ودي تيجي برضو ! لازم تاخد واجبك

يبقى نتفقوا الأول وبعدين ناخدوا واجبنا

وماله يا معلم

بقى ربيع قالي انك طالبة في العمارة  اتنين مليون ونص

اني طالبة تلاتة مليون  يا معلم

بس دول يامَا قوي يا ست توحا

اللي قادر ع الشيلة يشيل يا معلم واللي مش قادر يوسع مكان لغيره

مش كدة يا ست توحا , الكلام اخد وعطى واني جاي نشتري

هو اني يعني اللي مش عايزة نبيع !!!!

طب يبقى قولي كلمة معقولة خلي البيعة تمشي يا ست توحا

شوف يا معلم , عشان خاطر الجيرة اني هناخدوا اتنين مليون وسبعومية وخمسين الف

ايّوووووووووه دول ياما قوووي , ما تقول حاجة يا ربيع وخليك في صف معلمككككك

يا معلم العمارة تسوى يامَا , والقول قول الست توحا , هي صاحبة المال , اني هنا وسيط وبس

خليهم اتنين مليون وستوميت ألف  يا ست توحا واحنا فلوسنا جاهزة وهنشيلوا البيعة

مممممم طب عشان خاطرك اتنين مليون وسبعوميت الف ومش هنقولوا كلام تاني , لو لازمك يا معلم بالسعر ده يبقى انت اولى من الغريب

ماشي يا ست توحا , واني شاري

مبروك عليك مقدما يا معلم

يبارك فيكِ , اديني بس اسبوع ندبروا حالي ونجمعوا المبلغ , ويوم الخميس الجاي زي النهاردة هنجيبوا المحامي بتاعي ونتمموا العقد

تمام كدة يا معلم , عن اذنكو نعملوا الشي بقى

اتفضلي يا ست توحا , مبروك عليك يا معلم هههه

بقى يا ولا يا قليل الأصل ما تقولش كلمة تنصفني وترسي البيعة على سعر اقل من ددددده !

معلش يا معلم , اصل زي ما تقول كدة ده حق ولية , واحنا ما نحبوش نيجوا على حق الولايا

ههههه لا راجل يلا

ههه تعيش يا معلم

****************************************************************

تمام الفلوس كدة يا ست توحا ؟

تمام التمام يا معلم هههه مبروك عليك العمارة

الله يبارك فيكِ يا ست توحا , احنا هنفضوها من السكان وندوا كل واحد قرشين يشوف حاله برا , عشان اني ناوي نهدوها ونطلعوا ببرج خمسة وعشرين دور ونبيعوه تمليك

وماله يا معلم , احسنلك من الإيجارات ووجع القلب مع العالم دددددي , ولا ايه يا ربيع

ههه عندك حق يا ست توحا , الف مبروك يا  معلم

الله يبارك فيك , نستأذن اني يا ست توحا عشان عندي مصالح متعطلة

إذنك معاك يا معلم

مش هتنزل معايا يا ربيع ؟

سيب ربيع اني عايزاه عشان هنراضوه

طول عمرك حقانية يا ست توحا وما تاكليش حق حد , سلام

سلام يا معلم هههههه ربيعععععع بيعنا العمارة يا ربيععععع اتباعت زي الصاروووخ ما كنتش فاكرة انها هتتباع بالسرعة دي ! وشك حلو عليااااا

ههههه وربنا وشك انتِ احلىىىىىى , واني كمان مش مصدق انها اتباعت بالسرعة دي , ده اكيد عشان حظي حلو والجوازة هنتمموها بسرعة

بس اني ليا شرط يا ربيع

هااا !! شرط ؟

ايوة

ايه هو الشرط ده ؟

انك تخطبني من اهلي

اهلك ! هو انتِ ليكِ اهل ؟

نعمممممممممممممممم ! اومال فاكرني مقطوعة ولا ايييييييه ! ما تتعدل في كلامك يا رييعععععععععع

لالالالا وربنا ما نقصدووووووا , اني بس نقصد انك متطلقة ومقاطعة ابنك وعايشة في حالك

مقاطعة ابني لكن مش مقاطعة اختي وجوزهااااا

ممممم يعني انتِ كدة عايزاني نخطبوكِ من اختك وجوزها ؟

ايوة , هنتصلوا بيها ونحددولك معاد مع جوزها عشان تقابله

حاضر يا ست توحا , اني مستعد مش بس نقابلوا جوز اختك , مستعد نقابلوا الجن الازرق عشان نفوزوا بيكِ هههه

هههههههه هيحصل يا ربيع

*********************

ترررررررررررررررررررررررررررررررررررررررررررررررررن ترررررررررررررررررررررررررررررررررررررررررررررررررررررن

ناوليني الموبايل يا شوقية

اتفضلي يا ست سعاد

ترررررررررررررررررررررررن  دي توحا اختي , ايوة يا توحا

ههههه صباح   الفل يا سعاد

يا صباح  الهنا يا توحا ههه مفرفشة يعني

وما نفرفشوش ليييييييه هههه اني خلااااااص هنتجوز اني وربيع يا بت يا سعاد

اييييييييه ! انتي برضو هتمشي الكلام للي في دماغك ده يا توحا !

ما بقاش كلام يا سعاااااد بقى فعل وفعل الفعل كماااااان اني بيعت العمارة بتاعة الانفوشي وهناخدوا شقة في حتة حلوة كدة تليق بيا وبربيع

بيعتي العماااااارة ! امتى حصل الكلام ده ؟

بيعتها امبارح

ما قولتيش يعني انك ناوية ع البيع

هههه كنتي هتشتري ؟

مش حكاية هنشتروا ولا نبيعوا , اني قصدي يعني انك ما شاورتيش حد

مااني اتشاورت اني وربيع واتفقنا على كل حاجة وهو اللي جابلي المشتري كمان عشان نخلصوا بسرعة وناخدوا شقة في مكان تاني

مممم ده باين عليه مستعجل ياما , ماله واخد كل حاجة ع الحامي كدة ! يبيعك العمارة ويجيبلك مشتري وكمان هيخليكي تجيبيله شقة بالشيء الفيلاني عشان يتهنى فيهاااااا , دي طاقة السعد اتفتحتله

تقصدي ايه يا سعااااااد ! ان كنتي تقصدي ان ربيع طمعان فيا تبقي غلطانة يا سعااااااد ربيع بيحبنيييييي

بيحبك !!!

ايوة بيحبني من قلبببببببه , انتِ عايزة مني ايه يا سعااااااد ! اني طول عمري محرومة من الحب وراضية وساكتة , يقوم لما يجيلي الراجل اللي يحبني ونحبه ونقولوا خلاص يا بت يا توحا هتعشيلك يومين تقومي انتِ يختي الوحيدة يللي ماليش غيرك تستكتري عليا النعمة وتكرهيني في الجدع !!!!!! بقى ده اللي نستاهلوه منك يا سعاااااااد !

يا توحا يختي اني ما نقصدش وربناااااا اني بس كل الحكاية اني عايزة نطمنوا عليكِ ونتأكدوا ان الجدع ده عايزك لنفسك مش لفلوووووسك

اطمني يا سعاد , ربيع ده حاجة تانية , ايّووووووووه ايّوه يا بت يا سعاد , ما تعرفيش يا بت لما بنشوفوه قدامي بنحسوا بإيه , بنحسوا إني بت صغيرة ما كملتش سبعتاشر سنة , بضافير حلوة وطويلة وماشية ع البحر بنتغندروا ههههه ونتخيلوا  ربيع جاي يجري عليا وفارد درعاته  ايّوووووووه الدنيا حلوة معاه اوي يا بت يا سعاد

ربنا يسعدك يختي , المهم يكون يستاهلك

يستاهلني يا بت , يستاهلني اووووي , بنقولك ايه يا سعاد , اني عايزاكِ تكلمي عادل جوزك وتحدديلنا معاد معاه عشان ربيع يجي يخطبني منه

عادل ! طب وعادل دخله ايه يا توحا !

ايّوووووووووه مش جوز اختي والراجل اللي بنتحاموا فييييييه ! ولا عايزاني نتجوزوه مني لنفسي كدة زي ما نكونوا  بت  قادرة  وما لهاش أهل يلموها !!!!

ههههه لا يختي ما يرضنيش مممم هنكلموا عادل ونردوا عليكِ

بس بسرعة يا سعاد الله يخليكِ عشان ربيع مستعجل

ماشي يا توحا

هههه نقولولك سلام بقى يا سعاد ومستنية تليفونك

سلام يا توحا , شوقييييييييية

نعم يا ست سعاد

خدي يا بت حطي التليفون ع الشاحن

من عنيا , مالك يا ست سعاد , الست توحا قالتلك حاجة زعلتك ؟

توحا اختي جالها عريس

جالها ايه ! ههههههههههه  وربنا دمك عسل يا ست سعااااااااد , بقالي يامَا ما ضحكتش , اهو اني نحبوكِ كدة وانتِ رايقة وبتقولي نكت هههههههههههه

نكت ايه يا بت ! اني مش بنهزر , توحا اختي جالها عريس وهيجي يقابل عادل

هااااا ! بتتكلمي جد يا ست سعاد

ايوة يا بت يا شوقية , بس بصراحة مش مرتاحة للجدع اللي جالها ده

ليه يعني يا ست سعاد ! يمكن يكون راجل طيب ويحط وحدته على وحدتها ويونسوا بعض في اواخر ايامهم

مش فايقة نتكلموا معاكِ في حاجة يا شوقية , اما نشوفوا عادل هيقول ايه الأول , توحا محكمة رأيها ان الجدع يجي يقابل عادل ويخطبها منه

طبعا يا ست سعاد , ما هي الست توحا بنت مؤدبة ومتربية وفاهمة الأصول , ربنا يتمم بخير …..هههه إلا الست توحا اللي هتتخطب وتتجوز دي ,  ال بعد ما شاب ودوه الكتّاب

********************************

هههههههههههههههههههههههههههههههه بقى اختك جالها عريس يا سعاد !!!! ده الصبايا اللي لسة ماشافوش الدنيا ما بيجيلهومش عرسان , يقوم اختك اللي حفيدتها بقت عروسة يجيلها عريس !!!! هههههههههههههههههههههههههههه

بتضحك على ايه يا عاااااااادل ! كل ده عشان بنقولوك اختي جالها عدلها !

هههههههههههه عدلها ! هي اختك لسة فيها حيل للجواز يا سعاد !

قصدك اييييييييييه ! اختي صغيرة يا عااااااادل , ايه يعني تسعة وخمسين سنة,دي ما كملتش ستين سنة يا جددددع

هههههههههههههههههههههههه على رأيك , ده اللي قدها لسة بيعلبوا في الشارع , وبعدين مين بقى سعيد الحظ ده ؟

مممممم جدع بتقول انه طيب وابن حلال وبيحبها

ههههههههههههههههههههههههههههههه بيحبها ! جرا ايه يا سعاد ! حب ايه اللي بتتكلمي عنه ! اني اللي نعرفه يعني ان لو واحدة في سن اختك حبت تتجوز وده من حقها يبقى عشان الونس مش عشان الحب ههههههههه خلي الحب للشباب الحلوة اللي طالعة للدنيا , مش للشايبين يا سعاااااااااااد

اهو انت كدة يا عاااااادل , لا تعرف تقول كلمة حلوة ولا تدي حد امل في الدنيااااااا

مبروك على اختك يا ستي

الله يبارك فيك , توحا عايزاك تحدد معاد عشان تقابل الراجل

واحنا مالنا ! عندها ابنها راجل طول بعرض

ايّووووووه يا عادل ما انت عارف ان توحا مقاطعة سامي

حاجة ما تخصناش , احنا ما نتدخلوش لاختك في حاجة , نعرفوا منين الجدع اللي جايلها عشان نحطوا ايدنا في ايده

ما انت هتتعرف عليه لما يجي

مممممممم وده بيشتغل ايه ؟

أأأأ بيتشغل ممممم بيشتغل في قهوة

في قهوة ! صاحب قهوة يعني ؟

لا , مممم صبي قهوجي

اييييييييه ! واختك اتلمت عليه فين ده ؟؟؟؟؟؟

ابدا يا عادل , القهوة اللي شغال فيها قصاد عمارة توحا

ايوة ايوة ايوة احنا كدة فهَمناحكاية اخينا ده , هو بقى مامعهوش فلوس وملطشة معاه , وشاف واحدة ست كبيرة عندها عمارة وفلوس وعايشة لوحدها راح قالها بنحبوكِ يا حلوة وما نقدروش نستغنوا عنك , مش كدة يا سعااااااد ؟

ايّوووووووووه ما تظلموش يا عادل , ده روحه في توحاااااا دايب فيها دوووووووب

انتِ بتقولي ايه يا سعاااااااد ! ياك فاكرة ان اختك لسة في عزها وجمالها اللي وقعت بيه مرشدي على بوزه , اختك كبرت يا سعااااااااد

مافيش حد كبير ع الحب يا عادل , الحب سلطان وزي ما قَدَر على قلبها  قَدَر على قلب الجدع اللي هيموت ويتجوزها

هه عجايب , دانتي مصدقة بقى

وما نصدقوش ليه ! ها يا عادل , الراجل يجيلك امتى ؟

اوووووووووووووووووووف والله ما عارف نقولولك اييييييه مالي انا ومال شبكة اختك السودة ددددددي !

معلش , عشان خاطري انا يا عادل

خليه يجي يوم الحد الساعة ستة

هههه ماشي يا عادل , تعيشلي ويخليك ليا يااااااااارب

************************************************

ايه يا ربيعععععع بقالي يامَا مستنياك في الشارع وبقيت فورجة للرايح والجااااااي

معلش يا سماسم , اتأخرت غصب عني

طب حصل خير , طمني عملت ايه مع الولية ؟؟؟؟؟

ههه عايراني نروح نخطبها من اهلها

هههههههههههههههههههههههههههههههههه ايّوه عليها , يختي يا نوغّا ,  دي فاكرة روحها صغيرة وعايشة الدور يا ولا

ايوة يختي , اني بصراحة خايف من المشوار ده , وبنقول نصرفوا نظر

اييييييييييه ! جرا ايه يا ربيععععععععع حد يرفس النعمة برججججججججله ! داحنا ما صدقنا ان الست معاك ع الخط وما تعبتنااااااااش , اوعى تتجنن يا ربيع وتقل عقلك وتقولي نصرفوا نظررررر , يا ربيع عايزين نتجوز يا ربيععععععع

اوووووووووف يا بت اني خايف من اهلها دول , اني سَمَعت ان جوز اختها ده راجل تقيل قوي ومعارفه يامَا في اسكندرية

طب واحنا مالنا ! هو انت رايح تسرقه ولا تمد ايدك في جيبه ! انت رايح تتجوز وطالب حلال ربنا , احنا لا رايحين ننصب ولا رايحين نرموا بلانا على حد , الست رايداك بالحلال

انتِ مش غيرانة عليا يا بت يا سماسم ؟؟؟؟؟؟؟

ههههه يا حبيبي هنغيروا عليك من ست كُهنة اكبر من امي !

مهما كان , لو بتحبيني صحيح ما كنتيش ترضي اني نكون لواحدة غيرك حتى لو كانت محنطة

ههههههه وربنا بنحبوك يا ولا وندوبوا فيك , بس نعملوا ايه , لازم نضحوا عشان مصلحتنا , احنا فاتنا يامَا قوي يا ربيع , واني بصراحة مش قادرة نصبروا اكتر من كدة , ولو اني صَبَرت ابويا مش هيصبر , اني مش عايزة نقولك ان ابويا عمال يلمحلي على ابن عمي اللي مسافر الخليج وعمال يقولي يا بت ابن عمك راجع وعلى قلبه الفلوس يامَا وعايز بنت الحلال , ياريتك كنتي خالية يا بت يا سمية

ايّووووووه ! بقى ابوكِ قال كدددددة ! بقى عايز يجوزك لابن اخوووووه ! طب ابقي خلي ابن عمك ده يفكر يقرب منك واحنا نقتلوه ونروحوا فيه في مصيببببببببة

هههه بتحبني يا ولا ؟

اومال بنعلموا ده كله ليه يا سماسم ! مش عشان بنحبوكِ يا بت ؟ اني مستعد نضحي بروحي بس نكونوا لبعض

تسلملي يا ربيع , يبقى خلاص , ننفذوا اتفاقنا ونمشوا في مشوارنا , اني قلبي حاسس ان كل العقد هتتفك يا ولا على ايد الست دي

ايوة يا سمية طب افرضي يعني قَدَرنا ناخدوا منها قرشين وجينا نتمموا الجواز , ابوكِ هيقولي جبت الفلوس دي منين , هنقولوله ايه .؟

ههه هتقوله اشتغلت وشقيت بيهم يامَا , في كار المعمار , في كار التجارة , نبقوا نقولوا أي حاجة يا ولا مممم ولا اسمع يا ولا يا ربيع , انت تيجي لابويا وتقوله انك لقيت سفرية لليبيا  وهتشتغل في كار النقاشة والدهانات مع واحد قريبك , وتقطع عننا مدة سبع تمن شهور كدة وتيجي بقى شايل ومحمل وساعتها الكل هيعرف انك كسبت من السفرية دي ونتمموا الجوازة ونعيشوا احلى عيشة ههههه

يا بت انتِ شايفة كل حاجة ساهلة كدة !

هههه اسهل من شكة الدبوس وربنا , امشي ورايا وانت تكسب والخير يجري وراك بالمشوار , دانا دماغي توزن دهب يا ولاااااا

ماشي , بعد ما نقابلوا اهل توحا ونتَفَقوا معاهم على كل حاجة هنيجوا نقابلوا ابوكي ونقولوله اني مسافر , وربنا يسترها معانا بقى

********************************************

عريس توحا جاي النهاردة يا شوقية

يا اهلا وسهلا , جايب حد معاه يسنده ويتعكز عليه ولا هيقدر يمشي لوحده ؟

ايّوووووووه يعني لو ما كانش فيه حيل يا مخبلة انت كان قال يا جواز !!!

لا , كان قال يلا حسن الختام , ربنا يقدم ما فيه الخير

طب روحي انتِ والبت الللي اسمها عطا اعملوا شوية حلويات كدة واحنا هنشيعوا نجيبوا فاكهة

ما احنا عندنا فاكهة يامَا يا ست سعاد

برضو نجيبوا تاني ما يجراش حاجة , يلا شهلي شوية عشان توحا زمانها جاية

هتيجي من بدري كدة ! دي الساعة ما جاتش تسعة الصبح

ايّووه ! لازم تيجي بدري عشان توضب نفسها قبل العريس ما يجي , هنشيّعوا نجيبوا البت الكوافيرة اللي على إمة الشارع

كوافيرة كمان !!!! عوض عليا عوض الصابرين يا رب , اومال لو بت صغيرة كانت عملت ايه !!! وانا مالي , عيلة ما يعلم بيها إلا ربنا , بت يا عطااااااااااا

اني في المطبخ يا خالتي شوقييييييية

جيالك يا بتتتتتتتتتتتت

*********

بت يا عطا

عيوني يا خالتي شوقية

تسلم عنيكِ يا بت , النهاردة في عريس جاي

هههه ماشاء الله , الست نورهان كَبَرت والخطّاب هيجولهااااااااا

لا يا بت , العريس مش لنورهان

اومال لمين ؟

لستها ام ابوها

ميييييييييييين !

بلا مين بلا مش مين , هنا ما تسأليش عن حاجة عشان ما تتعبيش , يلا يا بنتي عشان نجهزوا صواني الحلويات عشان ليلة الأنس دي

حاضر يا خالتي شوقية , بس اصل الكلام ده غريب قوي , انا شوفت الست توحا كذا مرة , هي صحيح لسة في عزها والكبر مش باين عليها قوي يعني , بس برضو كبيرة وابنها تاجر من التجار زي ما بنسمع منك وكمان عنده بنت بتقولها يا ستي , تبقى ازاي هتتجوز بس ! الناس تقول عليها ايه !

أيّوووووه يا بت هو احنا مش بنقولولك ما تسأليش ولا ليكِ دعوة !!! احنا هنا بنخدموهم وناخدوا اجرة وخلاص , لا نتدخلوا في خصوصياتهم ولا لينا دعوة بيها

على رأيك يا خالتي شوقية , طب هنعملوا حلويات ايه بقى ؟

نقولك يا بت , صنية كيك ياكلوه جنب الشيّ وصنية هريسة يحلّوا بيها عشان الكلام يحلو , طلعيلي صنيتين من الدولاب ده

حاضر يا خالتي شوقية

تررررررررررررررررررررررررررررررررن تررررررررررررررررررررررررررررن

طب روحي افتحي يا بت يا عطا , دي تلاقيها الست توحا , افتحيلها وتعاليلي على طول عشان ورانا حاجات يامَا

عنيا يا خالتي شوقية

*****************

ترررررررررررررررررررررررررررررررررررررررن ايّووووووووه ما تفتحوا يللي جواااااااااا

ايوة ايوة يا ست توحا , انا جاية اهوووووو اهلا يا ست توحاااا ههه نورتينا

بنورك يا ...... نسيت اسمك يا بت

خدامتك عطا

ايوة ايوة عطا , اومال فين سعاد يا بت ؟

الست سعاد مستنياكِ في اوضة الانتريه

طيب , , اهيه جت اهيه

يا مرحب بالعروسة ههههه صباح الفل يا توحا

صباح الورد على عيونك يا سعاد , اتصلتي بالبت الكوافيرة ؟

هنتصلوا بيها على طول نجيبوها , تعالي اطلعي معايا وما تشيليش هم حاجة

هنطلعوا , اومال جوزك فين ؟

نَزَل راح المينا لاحمد

ايّووووووه هو مش عارف ان ربيع جاي يخطبني منه النهااااااردة !

يا بت ما تخافيش , هيكون هنا قبل المعاد

تيتة توحاااااااااااااا هههههههه انا ناااااااازلة

ايّوووووووه هي نورهان هنا ! دانا نَسيت البت دي وربنا

ازيك يا تييييييتة اموووه اموووه

اهلا يا نورهان , ازيك يا حبيبتي وازي امك

ماما كويسة

ازيك يا خاااااااالتي

اهلا يا اوسااااااا , هل هلالك يا بنت اختي , بقالي يامَا ما شوفتكيش

ههه نازلالك يا خالتي

***

ازيك يا خالتي , ولا نقولوا يا عروسة هيهيييييي

ايوة عروسة يا بنت اختي وعريسي جماله وما وصفششششش

وماله يا خالتي , ما انتِ ما تقعيش إلا واقفة , باركي لتيتة يا نورهااااان هههه هتتجوز

ايييه ! انتِ هتتجوزي يا تيتة ؟

ايوة يختي هنتجوز عقباااااااالك , وعقبالك انتِ كمان يا اوسااااا

مافيش راجل يستاهل يا خالتي وكفاية اللي جرالي من ابنك اللي كلني لحم ورماني عضمممممم

سامعة بنتك اللي عايزة تنكد عليا يا سعاد!

اوساااااا مش وقته , خالتك فرحانة واحنا فرحانين لفرحها

هههه وماله يا ماما , ربنا يتمم بخير , عجايب والله , خالتي هتتجوز

تيتة هو عريسك اسمه اييييه ؟

اسمه ربيع , ويا ريت ما تنزليش ولا نشوفوا خيالك وهو هنا يا بتتتتت مش ناقص كمان إلا تقوليلي يا تيتة وهو قاعد

اطمني يا خالتي , لا نورهان هتنزل ولا انا هننزل , الموضوع على بعضه ما يخصناااااااش , بت يا عطاااااااااااا

عيوني يا ست اوسااااااا

حضريلي فطاري انا ونورهان وهاتيه على اوضتي

حاضر يا ست اوسااااا

يلا يا نورهان نطلعوا فوق

عايزة نقعد مع تيتة توحا شوية يا ماما , انا ما شوفتهاش بقالي يامَا

بنقولولك اطلعي قدااااااااااااامي

حاضر يا مامااااااا , باي باي يا تيتة توحاااااااااا

امشي يا بت اطلعي مع امككككك بلا تيتة بلا هباب , البت عايزة تكبرني وانا لسة  هندخلوا دنيا يا سعااااااد

هههههه طب تعالي نطلعوا على اوضتي فوق ونتصلوا بالبت الكوافيرة

يلا يختي

************************************

دي بوابة السرايا اللي قالتلي عليها توحا , ايوة هي ,مكتوب عليها فيلا عادل سليم , .....عيني ع العز وناسه , اما نروحوا نسألوا الراجل البواب ده

 مساء الخير يا عم الحاج

****************************************

ولحد هنا وانتهت حلقات هذا الأسبوع

بالنسبة للقراء اللي ناسيين شخصية ألطاف,ألطاف هي التاجرة اللي اتجوزت سلامة جوز اخت بدور بعد ما سجنتها بسبب الوصولات اللي كانت واخداها عليها

******************

لولي.)luli).الللهجة الاسكندراني طالعة منك زي العسل ههه تحية لكِ ولكل أهلنا في سوريا الحبيبة

عايزة اقول ان لفظة (أني) كانوا بيستخدموها زمان الاسكندرانية ,ودلوقتي اندثرت تقريباً والبعض احل محلها لفظة(احنا)

في الحالنين بنحبوا اللهجة الاسكندراني الأصيلة اللي ما بيعتز بيها إلا كل سكندري أصيل ,تحية لكل أهل اسكندرية ,ايووووووه بنموتوا فيكو وربنا هههه

شكراً على ردودكم الجميلة التي تحثني على الاستمرار وتحفزني لأجل المزيد

تحية من القلب لكم قرائي الأعزاء

القاكم الإثنين القادم بمشيئة الرحمن


اذكركم ونفسي بذكر الله الدائم

سبحان الله,الحمدلله,لا إله إلا الله,الله أكبر,لا حول ولا قوة الا بالله

ولا تنسوا ان اعجبكم شيء عند غيركم من المحيطين بكم ان تقولوا

(ماشاء الله لا قوة إلا بالله)

لا تنسوا الصلاة على الرسول عليه الصلاة والسلام بالصيغة الإبراهيمية ..فبها من الخير الكثير

اللهم صل على محمد وأل محمد كما صليت على إبراهيم وآل إبراهيم في العالمين إنك حميد مجيد

وبارك على محمد وعلى آل محمد كما باركت على إبراهيم وعلى ال إبراهيم في العالمين إنك حميد مجيد