الحلقة الخامسة والعشرين

*****************************************

الكتاب: خلف هذه الجدران  

الجزء الخامس

بقلم: هبة عبد العظيم نور           

الناشر: المؤلف

رقــــم الإيداع: 00000/2017م

*****************************

قولت ايه يا عادل في حتة الأرض اللي في سابا باشا دي ؟

على راحتك يا سعاد , لو عجبتك خديها

اهي داليا هتعدي عليا بكرة ونشوفوها

مممم وايه اللي جاب داليا بنت الكيلاني عندك يا سعاد ؟

ايّوووووه البت جاية تزورني يا عادل , نقولولها جاية ليه !!! كبدي عليها بقت وحدانية لا أم ولا أب

هههه يا حنينة انتِ يا أم قلب حنين

بس اللي يقدّر يا سي عادل مممم البت يا عيني صعبت عليا , تقولي بقيت وحدانية من غير راجل , ودي شابة حلوة وصغيرة ومالها يامَا والف من هيطمع فيها يا عادل

هي اللي بتكتّر العداوات حواليهاااااا , تدي اعمامها حقوقهم وبلاش تعاديهم 

حقوقهم ده اييييييه ! كانوا تعبوا ولا كانوا عرقوا في المال لحد ما جمعووووه !!!

ده شرع ربنا يا سعااااااد , لكن انتو مش عاجبكو شرعه ولا عايزين حد ياخد حقه بما يرضي الله , والحمدلله اني امنت بنتي على حياة عيني عشان عارف اللي هيحصل من الغيلان اللي حواليهااااااااا

غيلاااااااان ! بتقول عليا وعلى عيالي غيلاااااااااان ! شوفت مننا ايه وحشششش !!!!

ههههههههه يا ولية شوفي كلامك عن عمام داليا الكيلاني وانتِ تعرفي انتِ من الغيلان ولا لأ

طب ع العموم تُشكر , بنقولولك ايه يا عادل , ايه رأيك لو نكلموا احمد في موضوع داليا ؟

موضوع ايه اللي بين احمد وداليا يا سعااااااد ؟

يا عادل البت وحدانية ومحتاجة راجل

مالكيش دعوة باحمد يا سعاااااااد

ايّووووووووه هو انت مش كان نفسك تجوزه عشان يخلف !!! ما هي داليا اهيه مخلفة ولا ماشاء الله عليها , واللي تخلف ولا تخلف عشررررررة

اني لو هنجوزوا ابني مش هنجوزوه لبنت رمزي الكيلااااااااني , احنا مش ناقصين قلالات أصللللل

تقصد مين بقى بقلالات الأصل يا عااااااادل ؟؟؟؟؟؟

نقصدوا اللي نقصدوووووه , يوم ما نجوزوا ابني تاني يبقى نجوزوه لواحدة طيبة وبنت حلال زي هيام مراته , لكن واحدة باخلاق داليا الكيلاني يبقى لاااااااااااا , أنا نازل نقعد في الجنينة

انزل يا سيدي , عايز يمشي الدنيا على مزاجه ابن زبيددددددة

*************************************************************

داد , كنت عايز خمسوميت جنيه عشان خارج مع اصحابي

مافيش ولا مليممممممم

واااااات !!! هااااااو , ازاي داااااااد !

لما تبقى تتأدب تبقى تاخد فلوس , ده عقاب ليك على اللي عملته مع بنت عمككككك , ولا كنت فاكرني هعديلك الموقف ددددده !!!

يييييييي انا مش عارف عملت ايه أنا داد ! شوفت حاجة خوفتني واتخضيت , فيها ايه دي !!!

اتخضيت ! قصدك استظرفت , انت عارف كويس اوي انها بنت عمك , بس بسفالتك وانحطاط اخلاقك حبيت تبينلها ان شكلها مقيت

مقيت ! ايه مقيت دي ! انتو بتجيبوا الكلام ده منين ! هههههه

اخررررررس للأسف جاهل وهتفضل طول عمرك جاااااااااااهل

ثانكس داد , فين الفلوس بقى عايز انزل

قولتلك مافيش فلوووووووس , اديك فلوس على ايه ! مشرفني ! دانت وصمة عار ملحقاني في كل مكان , دايماً مثار شكوى من الجمييييييييع

طب يعني اعمل ايه ! انتحر يعني ولا اسيب البلد ههههههه

امشي من وشي دلووووووقتي انا داخل البس عشان رايح المستشفىىىىىىىى

يا دادددددد ايه المعاملة دي بقى ! والست مام مش هنا عشان اخد منها فلوس اوووووووف اعمل ايه دلوقتي ! مممم جدووووو هههه اروح لجدو اخد اللي انا عايزه

تررررررررررررررررررررررررررررررررن

ارد على كارما الأول , هاي كارما

هاي رامي , اتأخرت لييييييه ! لابسة ومستنياك بقالي اكتر من نص ساعة

سوري كارما , هعدي عليكِ بالعربية بعد ربع ساعة ميكسمم , بس هنعدي على جدو الأول قبل ما نروح للشلة

اوكيه , نو بروبليم , مستنياك , باي

*************************

خليكِ في العربية , هروح اخد قرشين كدة من جدو واجيلك هههه

هو ده جدك اللي قاعد في الجنينة وماسك كتاب ؟

ايوة هو

***********************

جدووووو

رااااااااامي ! ههه أهلاً أهلاً أهلاً حبيبي , ازيك يا راااااااامي

ازيك انت يا جدو , واحشني جامد جدااااااااً

هههه ربنا يخليك يا حبيبي , ازي مامي وايتن ؟

نايس نايس كله نايس , بس انا مش نايس

ليه يا حبيبي ؟ في حاجة مزعلاك ؟

داد قطع عني المصروووووف , طب اصرف على صاحباتي الغلابة منين ! ههه يعني يرضيك يا جدو اخرج مع البنت الحلوة الكيوت اللي في العربية دي من غير فلوس واخليها هي اللي تدفع الحساب ! بقى رامي حفيد الدكتور هاااااااااااشم الحسيني ياخد فلوس من بنت !!!

هي فين البنت دي يا شقي هههه

اهيه يا جدو في العربية

ههههههههه حلوة , ذوقك هايل يا ولد , طالع لجدك

ثانكس جدو هههه

ههه ما تعرفني عليها يا ولد

هههههههههههه يا جدووووو ما تبطل شقاوة بقى

ههههههه هي اسمها ايه ؟

كارما

 ازيك يا كارماااااااا هههه

هاي جدووووووو هههه

دي صوتها حلو اوي يا ولد هههه  ..واخدها ورايح على فين بقى يا خلبوص ؟ قول قول ما تتكسفش , ما تخبيش على جدك , انا ستر وغطا عليك هههه

ههههه ايه يا جدو ! دي صاحبة زي أي صاحبة , خارجين نتفسح شوية وكل واحد يروح بيته

يعني مافيش علاقة حب لطيفة كدة بينكو ؟ ههه

لالالا حب ايه يا جدو !!! هحب مين ولا مين ! دول البنات كتير اوووووووي

هههههههه يا بختك يا رامي , عيشلك يومين واتمتع بشبابك قبل مشاغل الحياة ما تاخدك في دوامتها , عايز كام يا سيدي ؟؟؟

اللي تجيبه يا جدو

الف جنيه كويس ؟

كويس اوووووي هههه

خد يا سيدي , اخرج واستمتع مع صاحبتك

هههههه ثانكس جدو ثانكسسسس بيس يا ماااااااااان

هههههههه بيس يا مان !!! ماشي يا مان , شاب جميل وحبوب

********************************************

يا ياسررررررر , اصحى يا ياسرررررر , يلا يا حبيبي الساعة داخلة على تسعة , يا ياسرررررر

ايوة يا ماماااااا ايوة يا حبيبتي بتصحيني لييييييه !

بصحيك ليه ازاي يعني ! مش عندك محاضرة الساعة عشرة ؟

ايوة , كان عندي واتلغت

اتلغت ! مين اللي لغاهااااااا ؟؟؟؟؟؟

انا اللي لغيتهااااا , اصلها محاضرة مش مهمة يا ماما , سيبيني انام بقى الله يخليككككككِ

تنام ايه ! طب طالما مش رايح الكلية قوم روح معايا السوق

نعمممممممممم ! ايه يا مامااااااا ! سوق ايه اللي هروحه معاااااااكِ !!!!!!! انا اسمى ياسر مش يسررررررية

هههههههه هما الستات بس اللي بيروحوا السوق يا يسرية ! يوووه قصدي يا ياسر , لخبطيني يا اختي ههههههههههههههههه

ماما الله يخليكِ سيبيني انام يا حبيبتيييييييي اناااااااااام الله يخليكِ سيبيني انام

قوم يا ياسرررررر قوم يلا , قوم بلاش دلععععع , ياسمين اللي كانت بتنفعني في المهام الشاقة دي اتجوزت وحامل ربنا يقومها بالسلامة, وياسين في المدرسة وانا هجيب حاجات كتير ولازم حد يشيل معايااااااا

يا ماما ارحمي نفسك وارحمييييني , خلي فهيمة مرات البواب تجيبلك طلبات البيت زي باقي السكاااااااان

فهيمة بتشتري الخضار بايت والطماطم مفعصصصصة , انت عارف ان مامتك شاطرة وبتحب تجيب الخضار الطازززة

حاضر يا مامااااااااا حاضر , انا استاااااااااهل , بفوت المحاضرة لييييييييه !!!!!!

*************************************

تعالى يا ياسر نشتري الطماطم من بتاع الطماطم اللي هناك ده

تعالي يا ست ماما

الطماطم بكام يا عممممم

الكيلو باتنين جنيه ونص

اتنين جنيه ونص ليييييه ! اول امبارح كانت بجنيه واحدددددد

الحاجة بتغلى يا مداااااااام , وبعدين انتِ عارفة ان الطماطم مجنووووونة

والله احنا اللي هنتجنن من الاسعار دي , نقي يا ياسر

انقي ايه يا ماماااااا

نقي الطماطم الجامدددددة , اياك تنقيها مفعصصصة , اتعلم يا حبيبي عشان لما تتجوز وتنزل تشتري الطماطم مراتك تنبسط منك وتقول اني مديالها راجل بيت شاطرررر

********************************

مع السلامة يا شقايق الخير , اشوفكو بكرة بقى

منصور خرج من المعهد اهو , منصوووووور , يا منصورررررررر

ايه ده ! أبو الرووووووم ! ههههههههههه ايه المفاجأة الحلوة دي يا شقيق

جيت عشان اشوفك , اصلك وحشتني

والله أنت أصيل يا رامي وبيتمر فيك العيش والملح هههه تعالى أما اعزمك على حاجة ساقعة في الكشك اللي هناك ده

نو نو , مش عايز , انا مخنوق وكنت عايز اخرج شوية , وبصراحة زهقت من الشلة بتاعتي وقولت مافيش غير منصور اللي هيغيرلي المود الكئيب بتاعي ويفرفشني

ههههههههههه شايفني رقاصة في شارع الهرم وجاي تسهر عندي في الكباريه !!!

ههههههههههههههههه لا مش للدرجة دي , اصل أنا بحبك عشان واخد الحياة ايزي ومش معقد

تعيش يا شقيق , انت الاحسن , طب تعالى معايا الباطنية نضرب طبقين فول بالزيت الحار وندش جنبهم بصلة ونتكلم على رواقة

فول بإيه ؟؟؟ اول مرة اسمع اسم الزيت الغريب ده

هههههههه تعالى وانا ادوقهولك ع الفول عشان تنسى الدنيا

هههه اوك , مع اني واكل توست بجبنة ومش جعان

******************************************

عجبتك أكلة الفول المتينة دي ؟

حلوة ههه حلوة اوي , اكتبلي اسم الزيت ده في ورقة عشان اديه لداد يجيبلنا منه ههههه

ولا تتعب ابوك ولا تغلبه معاك . انا هديك ازازة وانت مروح , لكن انت ايه اللي مزعلك ومشيلك الهم وخلاك تجيني ؟ اتكلم  يا رامي , ارمي همومك على اخوك , اخوك شيال همووووم

لا مش درجة هموم يعني , أصل كان في حاجة شغلاني شوية وما قدرتش اتكلم فيها مع حد حتى مانو

مين مانو دي ؟

هههههه قصدك مين مانو ده , ده عبد الرحمن ابن عمي , بس انا من صغري بقوله يا مانو رغم ان عمي بيتخنق لما بيسمعني بناديله بيها هههه

له حق عمك , من عبد الرحمن لمانو !!! خلينا في موضوعنا , احكي وفضفض لاخوك

مممم بنت عمي

اخت مانو ؟

لالالا , دي بنت عم تاني

مالها ؟

مش عارف ليه مشغول بيها ونفسي اشوف وشها

ههههههه وهي لابسة طاقية الاخفا ! ماتشوف وشها زي ما انت عايز

لا , اصلها لابسة اسمه ايه ده , البتاع اللي بيلبسوه على وشهم  عشان ماحدش يشوفهم

ايوة ايوة النكاب

يا عم اسمه نقااااااب , نكاب ايه بس !

طب وانت عايز تشوفها ليه ؟

فضول مش اكتر , هتجنن هي ليه لابسة النقاب دددددده , يعني ايه تبقى قدامي وما اعرفش اشوف وشهااااا

يمكن وحشة عشان كدة متدارية

لالالا , دي حلوة , وشكلها جميل كمان

الله ! مش بتقول مغطية وشهاااااا !!

ايوة , بس شوفتها كتير واحنا صغيرين , كانت حلوة قوي , وعندها غمازات تجنن لما بتبتسم , اكيد دلوقتي شكلها بقى احلى بكتير

طب ما تقولها وريني وشك عشان عايز اخطبك

هههه اخطبها ازاي ! دي ما تنفعش اصلاً , دي انسانة معقدة ولابسة اسود في اسود واكيد تفكيرها كله اسود زي هدومها هههه

الله ! حيرتني معاك يا ابو الروم , اومال انت عايز منها ايييييييه !

مش عايز حاجة , عايز اشوفها وبسسسس , انا النهاردة هشوف وشها يعني هشوووووفه ولو غصب عنهاااااا

هتعمل ايييييييه ؟

مش عارف

طب هقولك على فكرة , كنت شفت فيلم امريكاني بتاع عصابات ومافيا والحاجات دي , شوفت الواد البطل راح شد النقاب من على وش البطلة وهو بيطاردها , لكن طلعت بت ايه , جمال امريكاني من اللي هوووو

نقاب ايه يا عم انت اللي كانت لابساه بطلة في فيلم امريكاني ! هما الأمريكان عندهم نقااااااب !

يا ابني فتح مخك ما تبقاش قِفل كدة , كانت مغطية وشها ببتاع اسود جلد, اهو زي النقاب يعني , انت بقى هتعمل زي البطل , واهو ده بقى اللي بيسموه الجماعة بتوع السيما , اقتباس ههههههههه

 ههههههه ما كنتش اعرف ان تفكيرك سينيمائي كدة يا منصور , عندك حق هشد النقاب ده من على وشها واللي يحصل يحصل

هههههههههههههه طول عمرك رجولة ياض يا رامي , بس على الله البت تطلع شبه البت الامريكانية

**************************************************

انا هستناها جنب الأسانسير في الدور بتاعهم , مافيش حد بيطلع ولا بينزل من على السلالم , النهاردة هكتشفك أيتها الملثمة الغامضة ههههه

ايوة يا أمي  يا حبيبتي , انا في الاسانسير والله , معلش اتأخرت شوية غصب عني عشان مدرسة الرياضة كانت بتراجع معانا شوية مسائل , طيب يا أمي السلام عليكم ……ايه ده ! بسم الله الرحمن الرحيم , انت واقف هنا ليه ؟

ههه اتخضيتي ؟

اوعى خليني اعدي

مش هتعدي غير لما اشوف وشك

اابعد عني يا بني ادم انت وإلا مش هيحصلك طيب

ههه هتعملي ايه ! هتصرخي ؟ وايه يعني , ما بيهمنيش , انا هشد النقاب من على وشك كدة

اوووووووعى قطع ايدكككككككككككك

اااااااااااااااه بتضربيني بالبوكس في بطني يا مفترررررية ! يلا يا ارهابيييييييييييية اااااااااااه

***********************

تررررررررررررررررررررررررن تررررررررررررررررررررررررررن امي افتحي يا اميييييييي افتحييييييييييييييي

ايه يا حبيبتي مالك يا مريووووومة

اهئ اهئئئئئئئئئئئ يا امي احنا لازم نمشي من هناااااااااا يلا نرجع بيتنا القديمممممممممم

الله ! في ايه يا حبيبتي ؟؟؟؟؟؟

الولد اللي اسمه راااااااااامي

رامي تااااااااني ! عمل ايييييييييه ؟

تخيلي يا امي خرجت من الأسانسير لقيته واقف جنب الباب ومعترض طريقي ولما حاولت امنعه قالي انه مش هيمشي إلا لما يكشف وشي اهئ اهئئئئئئئئئئ

يا خبر اسوووووود ! هو اتجنن الولد ده ولا ايييييييه ! وكشف وشك يا مريممممممم ؟

نطرت ايده بعيد وضربته بالبوكس في بطنه اهئ اهئئئئئئئئئئئئئئ

طب بس اهدي , معلش يا حبيبتي , انا هقول لأبوكِ يشوفله حل معاه

وكمان معاذ لازم يعرف يا  امي , انا هقوله

لالالا معاذ لا , بابا ممكن يحل الموضوع بحكمة , لكن معاذ ممكن يتهور ويحصل مشاكل كبيرة يا حبيبتي

اتصرفي يا امي , يا إما تجيبولي حقي يا إما نسيب العمارة دي ونمشي اهئ اهئئئئئئئئئ

طب خلاص اهدي يا حبيبتي , روحي اغسلي وشك كدة , أبوكِ ومعاذ زمانهم جايين ومش عايزين معاذ يلاحظ حاجة , يلا يا حبيبتي روحي اغسلي وشك

حاضر يا امي 

************************************************

تررررررررررررررررررررن تررررررررررررررررررررن افتحيلي يا داااااااااادة دب دب دببببببببب داااااااادة افتحيييييييييي ترررررررررررررررررررررررررررررررررررررررررررررررن داااااااااااادة

ايوة ايوة يا رامي جااااااااااية , هو ماله هيهد علينا الباب كدة !!! اهلا يا رامي

خبيبني يا داااااادة خبينييييييي اااااااااه

ايه مالك ماسك بطنك كدة ليه ؟؟؟؟؟ عندك مغصصصص ؟

لا , مضروووووب , واخد بوكس في بطني اااااااااه منها لله أم ايد تقييييييييلة

ام ايد تقيلة ! اتخانقت مع واحدة صاحبتك وضربتك بالبوكس !!! يبقى أكيد يا رامي طلبت منها طلب مش مظبوووووط

يا دادة فكيني من الحوارات بتاعة سنة ستين دي , انتِ مش فاهمة حاجة خااااااالص , مام فين ااااااااه

الست نسرين بتاخد الشاور بتاعها

ماااااااام

وات از ذا رونج ويذ يو رامي , ماااااااالك ؟

تعالي يا مام شوفي اللي حصل لابنك وانتي ولا على بالك وبتاخدي شااااااور

وات هابند ماي بيبي ؟

وانا طالع في الاسانسير يا ماما لقيت البنت الارهابية بنت عمو ماجد وقّفت الاسانسير في الدور بتاعهم وراحت فاتحة الباب  وهي مكشرة ومبرقة عنيها وقالتلي أين اللحية أيها الكافررررررر خسئت يا شبيه الفرنجججججججة

وات ! قالتلك ايه حبيبي ؟ انت عارف اني ضعيفة موت في الارابيك , بس واضح انها قالتلك كلام مش كويس ,

هي قالتلك ايه ؟

يا مام بقولك قالتلي وهي مكشرة ومبرقة اين اللحية ايها الكافر , يعني مش مربي دقنك ليه يا كافررر يعني خرجتني من الدين وكمان قالتلي خسئت يا شبيه الفرنجة يعني بتشتم الغرب كله يا مام وبتقول عليهم ناس وحشين واللي يعمل زيهم قليل الأددددددب

واااااااات ! هي اللي وحشة وموحوشة والغرب كله بيكرهها , ازاي تقول كلام زي دي !!!

 مش بس كدة يا مام , دي كمان  ضربتني  بالبوكس في بطني يا مااااام ااااااااااه

وااااااااات , نو نو نوووووووو , هي البنت دي جاية تعمل ارهابانات عندنا في العمارة ولا اييييه !! دي لازم تتأدب وحد يقولها انتِ سوفاااااااج

فعلاً يا مام , لازم حد يقولها انتِ سوفاج , مام انا هاخد هدومي واروح عند جدو حالاااااااااً لازم اهرب يا مااااام

ليه رااااااااااامي ؟

يا مام دي ممكن تفتري عليا وتقول كلام ما حصلش

تقول كلام زي ايه حبيبي مثلاً

يعني يا مام , ممكن تقول انها خرجت من الأسانسير لقتني واقف عند الباب مستنيها عشان اشدلها النقاب واشوف وشهاااااااا

وانت تعمل ايه بوشها !!! دي كلام مش حقيقي , انا مصدقاك رامي

ههههه حبيبتي يا مام اموووه , لكن داد بقى مش هيصدقني وهيصدق بنت اخوووووه

داد بتاعك  طول عمره مش بيصدقنا , وعقابا له احنا كمان مش هنصدقه , روح عند جده حبيبي ومش تخاف من حاجة

ثانك يو مام , ثانك يو , انتِ اجمل مام في العااااااااااالم

هههه ثانك يو ماي بيبي

اوعي يا دادة , اوعي بدل ما انتِ واقفة بصالنا زي ما تكوني بتتفرجي على فيلم هابط , يا دوب اخد هدومي واهرب قبل ما يمسكوووووووني

نسرين هانم , انتِ بقى صدقتي الكلام اللي قالهولك رامي ده ؟؟؟

يس اوف كورس , ابني ولازم اصدق هو

يا ست نسرين ده كلامه  كله مش مترتب ولا يدخل العقل , بيقولك البنت برقتله وهي مكشررررة

ودي فيها ايه ! هي مش عندها عنين ؟ يبقى ممكن تبرق , كل الناس بتعرف تبرق بعنتينها , وكمان كل واحد يقدر يكشر , لان الحياة مش فيها حاجة تضحك أصلاً

يا ست نسرين , البنت منتقبة , يعني ماحدش بيشوف وشها اذا كانت مكشرة ولا بتضحك

ريلي ! أها نسيت , أيوة بس رامي مش بيكدب , جايز شالت النقاب وبرقتله وهي مكشرة عشان تخوفه , ومش بعيد تكون ركبت سنان طويلة زي انسان الغابة عشان ترعب الولد , مش شايفة رامي مرعوب ازاي يا لولو ! رامي ابني رقيق خالص ودي ارهابانية وكمان ضربتتتتتتته

اووووووف استغفر الله العظيم , الناس تبقى شايفة الدليل زي الشمس ومع ذلك مخهم راكب شمال ومش عايزين يفهمووووووا 

************************************************

تررررررررررررررررررررررررررررررررررررن ترررررررررررررررررررررررررررررررررن

السلام عليكم , ازيك يا ماجد

عليكم السلام يا عصام , من فضلك عايز اقابلك ضروري النهاردة عشان في موضوع ما يتسكتش عليه

خير يا ماجد ؟

لا مش خير , الموضوع بخصوص رامي ابنك

رااااااااااااامي ! عمل ايه تاااااااااااني ؟

هقابلك عند امي بعد صلاة العشا , يناسبك ؟

يناسبني جداً إن شاء الله , سلام يا ماجد

الله يسلمك

يا ترى عملت ايه يا سي ززززززفت , اما اتصل بيه اشوفه في انهي دااااااااهية

الرقم الذي تحاول الاتصال ................

قافل موبايله , واكيد هربان طبعا , طالما عامل مصيبة يبقى اكيد راح يبات عند جده

 يعني اعمل فيه ايه ده يا رب !!! اتبرا منه ولا اهج واسيببله البلددددددد

**********************************************

عجبك اللي عمله ابنك وتجرأه على بنتي بالشكل السافر ده يا عصااااااام ؟

رامي يعمل كددددددة ! انا عارف انه سافل وقليل الأدب ,بس عمري ما تخيلت ان انحلاله يوصل للدرجة دددددي

اهو وصل للدرجة دي واكتر يا سيدي , علم ابنك الأدب يا عصام وإلا هيكون لي تصرف تاااااااااني

والله يا ماجد انا تعبت مع الولد ددددده انا فشلت في تربيته

اخوك يقصد انه ما كانش فاضي يربي ابنه عشان كدة تربيته فشلت

يا امي ارجوكِ , كفاية البركان الثاير جوايا من ناحية الولد ددددده , انا هعرف اربيه ازاااااااي , انا هعلمه الأدب وهجيبه لحد عندك يعتذرلك يا ماجد , عن اذنكو

اتفضل

اشرب القهوة بتاعتك يا ماجد يا حبيبي , انا عارفة انك زعلان , بس التمس العذر لرامي

يعني ايه التمسله العذر يا امي ! يعني يتجرأ على بنتي بالشكل ده واعدي الموقف !!! ولو عديت الموقف اضمن منين انه ما يعملش حاجة تانية أكثر وقااااااااااحة

انا ما قولتش تعدي الموقف , فعلاً رامي لازم يتعاقب ويقف عند حده , لكن انا كنت عايزة اقول

ان اخوك هو السبب في إتلاف اخلاق ابنه

دي حاجة تخصه يا امي , انا اهم حاجة بنتي , دي مسألة عرض , واذا كان هو ولد تلفان يبقى يبعد عني وعن أولادي , اسف يا امي , ما كنتش احب اتكلم في الموضوع ده قدامك , لكن لقيت ان هنا انسب مكان اتكلم فيه مع عصام

وانت ليه عايز تبعدني من مشاكل الولاد يا ماجد !!! كل حاجة تخصكو تخصني يا حبيبي , معلش يا ماجد , هنتصرف مع رامي بشكل يرضيك إن شاء الله

ان شاء الله يا امي , عن اذنك

اتفضل يا حبيبي , وبعدين معاك يا رامي !!!

*****************************************************

انتِ يا نسررررررررررين , انتِ يا هااااااااااااااااانم , يا نسررررررررررررررررين

ايه ددددده في ايه صاصووووو , صوتك عليان كدة لييييييه , انا اتخضيت خالص

شوفتي عمايل البيه ابنككككككك

عمل ايه رامي حبيب مامي ؟

استنى بنت عمه ماجد وهي خارجة من الأسانسير وكان عايز يشد النقاب من على وشها

واوووووووو ! نفس الكلام اللي توكعه رامي , الولد ده هايل , تخيل صاصو , رامي ابننا عنده الحاسة السادسة واحنا مش كنا نعرف !!!

يا هانم ايه اللي بتقوليه دددددده بقولك ابنك قليل الأدب السااااااافل اتجرأ على بنت عمه وكان هيخسّرني اخوياااااااااا

بنت اخوك هي اللي ارهبانية وضربت ابنييييييي , انا لو كنت ست مش كويسة كنت بلغت البوليسي , لكن انا شريانة خواطر مامته , احنا برضو كلنا مع بعض عيش توست وجبنة على الفطار قبل كدة كذا مرة , ودايما اسمع لولو تقول ان العشرة ما بتهونش غير على ولاد ........ ولاد وااااااات , ولاد البوبي تقريبا حاجة زي كدة , سوري مش فاكرة

بقى انتي بني ادمة الواحد يتكلم معاها برضووووووو ! ابنك الحقير راح فيييييييييين ؟

ابني الحكير اخد هدومه وراح عند بابي

شيء متوقعععععع , بس أنا هعرف ازاي اربيييييييييه , انا نااااااااازل

باي صاصو , ابني الحكير !!! اعتكد دي شتيمة , الفاظاته بقت سعبة خالص صاصو

******************************************

فين عصير اللمون يا رشا , الواحد محتاج يروق دمه ويسترخي

عصير اللمون اهو يا حبيبي , استرخي براحتك ههه انا فرحانة اوي انك قاعد معايا يا هاني

هه متشكر يا رشا , الولاد فين ؟

بيذاكروا

طيب , ربنا يوفقهم

تررررررررررررررررررررررررررررررررررن تررررررررررررررررررررن

موبايلك بيرن يا حبيبي

يييي مش عايز ازعاج , اقفليه يا رشا

اوكيه ممممم ده اخوه عصام , احسن انه قالي اقفلي الموبايل

عجبك اللمون يا حبيبي ؟

كويس , مين كان ع الموبايل  ؟

ممم اخوك عصام

عصااااااام ! وما ادتنيش التليفون ليييييييه ؟

الله ! مش انت اللي قولتلي اقفليه مش عايز ازعاااااااج !!!

ده لما يكون حد غريب مش اخوياااااااا , ما بتعرفيش تتصرفي خاااااالص , مش قادرة تقوليلي اخوك ع التليفوووووون !!!

يا هاني أنا ..........

بس بس بسسسس خدي كوباية اللمون خليني افتح الموبايل عشان اتصل باخويا

تررررررررررررررررررررن

ايوة يا هاااااااااااني انا عايزك حالااااااااااً

في ايه يا عصام ؟؟؟

انزل , انا مستنيك في عربيتي

ماشي , هلبس وانزلك حالاً

**********************************

معقول رامي ابنك توصل بيه الوقاحة للدرجة ددددددي !!!

قولي يا هاني اعمل ايه في الولد ددددددددده , ده حطني في موقف حَرِج جداً مع ماااااااجد , انا كنت قاعد قدام اخويا الصغير زي التلميذ اللي عامل عملة والمدرس بيوبّخه

ما تزعلش من ماجد , أي حد مكانه لازم هينفعل , دي بنته يا عصام , انا لو حد اعترض طريق

منة بنتي الله أعلم ممكن أعمل فيه ايه , ماجد مراعي انكو اخوات وما رضيش يتخذ اجراء مع ابنك , لكن اكيد مستني يشوف عقابك له , هو فين الولد ده ؟

عند جده , ما هو كل ما يعمل مصيبة يروح يستخبى هنااااااااك , روح اتصرف معاه وهاته عشان يعتذر لعمه ماجد يا هاني , انا لو روحت وانا في الحالة دي هفقد اعصابي وافترسسسسسسسه

طيب يا عصام , انا هروحله بكرة الصبح عشان اضمن اني الاقيه هناك

ماشي يا هاني , متشكر

*******************************************

النهاردة يا هاشم عندنا اجتماع في الجمعية هنناقش فيه ميزانية الرحلات والسياحة الداخلية والخارجية

ربنا يوفقكو يا سرفيناز يا حبيبتي , رامي لسة نايم ؟

هه سؤال غريب ! وهو رامي بيصحى دلوقتي !!! كنت عايزه في حاجة ؟

كنت عايز افطر معاه في الجنينة , الولد ده لما بيجي بيجدد شباب وروح الفيلا

قصدك ايييييييه , قصدك ان انا عجوزة مثلاً والحياة معايا مافهاش روح وكئيبة يا هاااااااااشم !!

ايه بس يا حبيبتييييييي اهدي , انا اقدر اقول كدة برضو !! انتِ كلك شباب وحيوية ولسة عاملة عميلة شد في باريس وبقيتي اجمل واصغر من نسرين بنتك

ههههههه ميرسي حبيبي , مع انك قولت الحقيقة ومش بتجامل

طبعاً يا روحي طبعاً اووووووف بقت شبه القردة العجوزة ولا نافع فيها شد ولا تجميل ومع ذلك مصرة انها لسة حلوة وصغيرة

ايه رأيك يا هاشم , لون شعري حلو ولا اغيره ؟

حلو حبيبتي , حلو , حتى لو حلقتيه خالص برضو حلوة , انتِ مبهرة في كل حالاتك يا سيرفي يا حبيبتي

ترررررررررررررررررررررررررررررررررن

افتحي الباب يا عديلة شوفي ميييييييين

حاضر يا دكتور هاشم

********************

اهلا يا فندم , أي خدمة ؟

السلام عليكم , ممكن أقابل الدكتور هاشم من فضلك ؟

نقوله مين حضرتك ؟

العميد هاني زاهر

اتفضل يا فندم في الصالون على ما ادي الدكتور خبر بتشريفك

متشكر

*********************

دكتور هاشم , العميد هاني زاهر

عميد هاني زاهر !!! غريبة اوي , مش متعود يزورني

اكيد جاي عشان يعتذر لرامي يا هاشم

هروح اقابله يا سيرفي واعرف كل حاجة , شوفيه يشرب ايه  على ما البس يا عديلة

حاضر يا فندم

**********************************

اهلا وسهلا يا سيادة العميد,شرفتنا

اهلا بيك يا دكتور هاشم , اسف  اني جيت من غير معاد

جاي بخصوص رامي أكيد

هو حكى لحضرتك على اللي حصل ؟

ايوة ايوة , رامي ما بيخبيش عني حاجة , وانا بصراحة شايف انه مش غلطان , والبنت لازم تتعاقب قبل ما تتعرضله مرة تانية , لازم تفهمها يا هاني بيه ان اولاد الناس مش لعبة , ومش من حقها مهما كان مركزها انها تروعه بالشكل ده , ده الولد لحد اللحظة دي وهو منهار

افندمممممم ! هو قال لحضرتك ايه بالظبططط ؟؟؟

قالي كلام كتير مافيش داعي من ذكره , قول لبنت اخوك عيب

هو ايه اللي عيب !!! فين رااااااامي ؟ عايز اقابله من فضلك

مافيش مانع , يا عديلة , ادي خبر لرامي ينزل حالاً , قوليليه عمك سيادة العميد منتظرك

حاضر يا دكتور

**********************************

بتقولي مين يا دااااااااادة !!! لالالالا انا مش هنااااااا قوليله طلعت لقيته مشييييييي

ما ينفعش يا رامي , كلهم عارفين انك فوق , والدكتور هاشم عايزك تنزل حالاً

لاااااا ما ينفعش اقابل عمي هاني بالذااااااات

هو انت عملت حاجة غلط عشان تخاف منه ؟

انا !! لالالا خالص , ما عملتش حاجة غلط خالص , بس هو اللي مضطهدنييييي

طب انزل بقى عشان ما يصحش كدة

اوووووووف انا عارف ان الموضوع ده مش هيعدي على خير

*************************************

اشرب قهوتك يا سيادة العميد

متشكر يا دكتور هاشم

اهو رامي نزل , تعالى يا رامي

مممم هاي يا عمو

اسمها السلام عليكم

السلام عليكم يا عمو

عليكم السلام , ايه , باصص في الأرض ليه ! مش انت طلعت مظلوم والبنت هي المفترية !!!

..................................................................................

مش هي برضو اللي اعترضت طريقك وشتمتك وظربتك كمان ؟

.................................. لا يا عمو , انا آسف , انا غلطت , مش عارف ايه اللي خلاني عملت كدة , جايز فضول , حب استطلاع , لكن والله ما كنت عايز أأذيها

وهو الفضول وحب الاستطلاع يخليك تتجرأ على حرمة الناس !!! زي ما الناس بتحترم حريتك يبقى انت كمان تحترم حريتهم

ايوة يا عمو بس هي محبّكاها اوي بالنقاب ددددده , ما تلبس عادي زي بقيت البنات وتبين وشها

هه يعني هي المنتقبة دلوقتي عشان بتحتجب عن الناس في هدوء من غير ما تأذي مشاعر حد تبقى ملامة !!! وايه رأيك في البنت اللي مش بس بتكشف وشها , دي بتكشف مفاتنها وتمشي تتباهى بين الناس , ما حسيتش مرة بفضول انك تسألها انتِ بتعملي كدة ليه وقصدك من كدة ايه ؟؟؟؟؟؟ سيبتو كل كوارث البشر وجايين تحاسبوا المنتقبة عن ترفعها عن التفكير التافه في اللبس والموضة وقصات الشعر , أو حتى الحجاب المتزين على جينز وبادي ومالوش أي علاقة بالحجاب !!! زي ما دول لهم حرية , لازم كمان المنتقبة حريتها تُحتَرم , مالكو انتو تكشف وشها ولا تداريه !!! ما تخليكو في بلاويكووووو

......................... انا آسف يا عمي

الاعتذار ده يكون لعمك ماجد مش ليا أنا

حاضر , انا هتعتذرله , وهتعتذرلها هي كمان

لااااااا , مالاكش دعوة بيها , الاعتذار لأبوها كافي

حاضر يا عمي , انا همشي مع عمي يا جدو

ليه بس كدة يا رامي ! ما لحقتش اشبع منك يا ولدددد

معلش يا جدو , هجيلك مرة تانية

طيب … يا سيادة العميد انا شايف انك كنت قاسي جداً مع رامي

قاسي ازاي يعني يا دكتور ! انت عايز الولد يتصرف تصرف بالجرأة والسماجة دي ونقوله برافو عليك !!!

بغض النظر عن اللهجة الساخرة اللي بتتكلم بيها يا سيادة العميد , أحب اذكرك اني جد الولد ونفسيته تهمني , كدة انتو بتقيدوا حرية الولد

حرية الولد !!!!!!! حريته في ايه يا دكتور !!! حريته في انتهاك حرمة الآخرين !!!

ما تعقدش المواضيع بالشكل ده يا سيادة العميد , ده شاب وبيحب المغامرة , المغامرة هي روح الشباب , واستكشاف المجهول برضو من مميزات الشباب , وبنت عمه بالنسبة له شيء مجهول وحب يكتشفه , عادي جداً , ايه اللي حصل يعني عشان تعنّف الولد بالشكل ده !!!

في الحقيقة انا مش لاقي رد مناسب أرد بيه على حضرتك , متشكر على القهوة جداً , بلغ رامي اني منتظره في عربيتي , عن اذنك يا دكتور

اتفضل يا سيادة العميد , إنسان معقد , مسكين رامي مع العقول المتحجرة دي

****************************

وصلنا عند العمارة , اتفضل انزل عشان اخدك ونطلع عند عمك ماجد تعتذرله , هو منتظرنا دلوقتي

ها !!! طب خليها مرة تانية , اصل عايز اطلع اخد شاور

دلوقتي انسب وقت لأن معاذ مش موجود

هو معاذ ما عرفش حاجة ؟

لا , ما حبناش نعرفه عشان ما  نضمنش رد فعله , ممكن أوي يتهور لما يعرف ان حد حاول يتعرض لأخته

مممم طيب كويس انكو ما قولتلوش

اتفضل معايا عشان نطلع لعمك

حاضر

***************************************

عمي ماجد ............ أنا آسف

...................... يا رامي لازم تعرف اني راعيت صلة القرابة والدم اللي بيننا وحاولت السيطرة على اعصابي , لكن انا بحذرك من الاقتراب لبنتي مرة تااااااااانية , مريم مش زي أي بنت , مريم متربية على الدين والقيم والأخلاق , اذا كنت انت بمنأى عن الدين وقيمه , أو بتتعامل مع ناس من نوعية مستهترة بكل ما هو اخلاقي , فلازم تعرف ان مريم مش كدة , وللمرة التانية بحذرك من المساس ببنتي

........................ حاضر يا عمي ماجد , أنا آسف

تقدر تتفضل

متشكر , عن اذنكو

خلاص يا ماجد , سامحت الولد ده ؟

مش هخبي عليك يا هاني , انا لسة قلقان جداً من ناحيته

لا ما تخافش , ما يقدرش يقرب ناحيتها تاني

اتمنى

طيب انا طالع اغير هدومي عشان نازل

اقعد يا هاني , منال بتحضر فطار

انت لسة ما فطرتش لحد دلوقتي ! هه

اعمل ايه بس , كنت مستني الأستاذ ابن اخوك عشان اشوف حل معاه

مريم في المدرسة طبعا

لا , مريم واخدة دور برد وما راحتش المدرسة النهاردة

 سلامتها ألف سلامة طيب قبل ما اطلع ناديلي مريومة عشان اراضيها بكلمتين

حاضر , مريمممممممم , مريووووووووووم

نعم يا ابيييييييي

تعالي يا حبيبتي كلمي عمك هاااااااااني

حاضرررررر

*************

معلش يا جماعة الحلقة السادسة والعشرين غداً صباحاً إذا النت ما قطعش ههه,معلش مضطرة اقفل الجهاز دلوقتي ..تصبحوا على خير