مصطبة العصاري (2)

بسم الله الرحمن الرحيم

والصلاة والسلام على سيد المرسلين وعلى آله وأصحابه أجمعين

أهلاً بيكو على مصطبتكو ,مش هرحب بيكو عشان انتو اصحاب المصطبة واللمة الحلوة ما تحلاش غير بيكو ,قبل ما نصب الشاي الفلاحي الجميل ده ,نبدأ بسم الله الرحمن الرحيم ونحمد رب العالمين على نعمه العظيمة علينا ,ونصلي على سيدنا محمد نبينا عليه أفضل الصلاة وأتم التسليم

عمنا الشاعر أحمد شوقي قال

قم للمعلم وفه التبجيلا,كاد المعلم أن يكون رسولا

أعلمت أشرف أو أجل من الذي ,يبني وينشيء أنفساً وعقولا!

قد أيه بيتين شعر في قمة الروعة وفي صميم الصميم,لكن بصراحة ما ينطبقوش على كل المعلمين ,في معلمين دمرت أجيال ,في معلمين كانوا اسوة سيئة جدا للطلبة ,عندي حكايات كتير قوي ومختلفة عن معلمين ,في منهم له أثر طيب في نفسي وفي منهم بدعي عليهم كل ما افتكرهم ههه اكيد كلنا كدة ..لكن حابة اذكر الحكاية دي النهاردة على مصطبتنا الحلوة , اشربوا الشاي كدة وركزوا معايا يمكن تطلعوا بمعنى ولا عبرة

واحنا في تانية ثانوي جالنا مدرس فرنساوي من الصعيد,شاب صغير وخريج جديد, وبالطبع لسة في بداية حياته ومحتاج يثبت نفسه كمدرس جيد ,وكان معيار المدرس الجيد هو اقبال الطالبات والتهافت على اخد دروس خصوصية عنده ,وفعلا أصبح عنده عدد هائل من الطالبات بياخدوا دروس خصوصية.ولأني لقيت نفسي ضعيفة في اللغة الفرنسية ,طلبت منه يديني درس خاص ,وكان رجائي الوحيد إني أخد الدرس لوحدي نظرا لضعفي في اللغة ,ووجود طالبات آخريات معايا مش هيخلي المدرس مركز بشكل كافي في رفع مستوايا ,لكن لما طلبت منه كدة رفض وبشدة وكان حجته إن كدة هدفع كتير قوي,لكن أنا قلتله مش مشكلة الفلوس ,أنا ضعيفة ومحتاجة اهتمام ينصب عليا لوحدي ,لكن رفض وقال ان وجود بنات تانيين هيشجعني ويحفزني للتفوق...في الحقيقة ماكنش ده هدفه الحقيقي ,هدفه الحقيقي هو جمع أكبر عدد من البنات في وقت واحد لضيق وقته ولأنه مش عايز يخسر فلوس أي بنت عايزة درس ..المهم ما كانش قدامي غير إني أرضى بالتلات بنات اللي فرضهم عليا ...مرت السنة وحقيقي ما استفادتش ولا مستوايا اتحسن ,ده لأن كان اسلوبه هو شرح شرح شرح من غير حتى ما يتأكد احنا فاهمين ولا لأ..كم هائل من الأوراق اللي حسستني أن اللغة الفرنسية أشبه بالهيرغلوفية القديمة ..ومع ذلك في السنة اللي بعدها اخدت زميلاتي وروحنا لنفس المدرس نطلب منه درس فرنساوي خاص ( وانا بعتبر ده نوع من الغباء وسوء التصرف ) لكن يمكن اقبال البنات على المدرس ده عمل نوع من الإيحاء بأفضليته ,وان اللي ما استفادش يبقى العيب فيه مش في المدرس ,كنت بقنع نفسي بكدة ...المهم اننا لما انتظرنا المدرس في ساحة المدرسة,وقولناله مسيه احنا عايزين درس ,لقيناه بيتعالى علينا ,وده طبعا لانه نجح بشكل كبير وحس بنرجسية غريبة ..ما بصش علينا أصلا وقال ماعنديش وقت وسابنا ومشي ,طبعا كلنا اتضايقنا وزميلاتي قالوا  دي قلة ذوق,ازاي يسيبنا ويمشي واحنا بنكلمه !..لكن انا عن نفسي في اللحظة دي قررت إني مش هطلب منه الدرس تاني ,وده لاني ما اتعودتش اترجى حد ولا اتنازل عن كرامتي عشان مصلحتي ..قررت اني هكلم المدرس اللي بيدرسلنا في الفصل ,وده كان أستاذ كبير في السن ورجل فاضل ,بس للحقيقة انا لجأتله كبديل وكرد للإهانة .. وسبحان الله وانا واقفة معاه بطلب منه يديني درس عدا المدرس المتعالي, ولما شافني اتصدم ووقف في مكانه وأطال النظر إلينا وبعدها مشي ,وانا كملت كلامي مع المدرس اللي احترم رغبتي في اني عايزة الدرس لوحدي لاني ضغيفة في الفرنساوي ...وكان وجود المدرس الفاضل ده في حياتي نقلة كبيرة قوي وكأنه هدية من عند ربنا ...كان انسان راقي جدا ومتحضر ومن ناس زمان المحافظين على أجمل تفاصيل الحياة ..اتعلمت منه دروس أخلاقية قبل الدروس الفرنسية ..وكان الدرس الأهم والمحوري اللي علمهولي في حياتي هو اللي هحكيه ده ...أول مرة جه اداني الدرس واللي كان عبارة عن ساعة واحدة في الأسبوع مش أكتر ,لكن اجتهد انه يفهمني ويعلمني بدقة مطلقة ويسألني دايماً عشان يتأكد إني منتبهة ,وطبعاُ اداني واجبات عشان اعملها ..لكن انا للأسف أهملت الواجبات وما عملتهاش ,لما جه الحصة اللي بعدها سألني ,عملتِ الديفوار مودمازيل ؟ قلتله لأ ..طبعا بصلي بضيق ,ولملم أوراقه وشال القلم بتاعه وقام وقف وقالي ,لما تحترمي الحصة وتلتزمي بالديفوار ابقي كلميني على الرقم ده ...ساب الرقم ومشي ,وحسيت ساعتها اني مش قدام انسان مادي ,اهم حاجة عنده ياخد فلوس وخلاص ,لكن هو حط شرط لمجيئه واستمراره معايا إني التزم واجتهد ..وحسيت نفسي في الوقت ده طالبة فاشلة وغير جديرة بالأستاذ العظيم ده.عشان كدة فتحت الكتاب وعملت كل الواجبات وذاكرت كل كلمة في الدرس كويس قوي ,وتاني يوم اتصلت بيه وقلتله انا عملت كل الديفوار مسيه ,قالي يعني خلاص هتلتزمي؟قلت ايوة خلاص إن شاء الله ,قالي معادنا الحصة الجاية إن شاء الله ,وفعلاً أستاذي العزيز لم يدخر جهدا في رفع مستوايا في اللغة الفرنسية,لدرجة انه ما كانش بيكتفي بالمنهج ,لكن كان بيجيبلي مقالات من مجلات فرنسية ويساعدني في ترجمتها ,كانت الحصة اللي ما بتزيدش عن ساعة في الأسبوع ,كأنها كورس فرنساوي مكثف بطلع منه بكم هائل من المعلومات والمهارات اللغوية ,أصبح الفرنساوي بالنسبة لي لغة ممتعة جداً ومن أيسر ما يكون ..لدرجة ان في اخر السنة في امتحان الفرنساوي,ترجمت الورقة كلمة كلمة وكنت فرحانة قوي وانا بجاوب باستفاضة عن كل الأسئلة ..خرجت من لجنة الإمتحان لقيت كتير قوي من البنات بيعيطوا وبيشتكوا من صعوبة الإمتحان ,في الوقت ده دعيت لأستاذي الفاضل ..ما انساش فرحته لما ظهرت النتيجة واتصلت بيه اقوله اني جبت 27 من 30 في الفرنساوي ,فرح قوي ودعالي بالتوفيق .ومن وقتها طبعا ما اعرفش عنه حاجة ,لكن مش بنساه من الدعاء ودائما اذكر القصة دي واقول قد ايه كان انسان رائع واتعلمت منه كتير

واسلوبه في التدريس هو الأسلوب اللي انتهجته بعد كدة لما اشتغلت مدرسة لغة انجليزية  لعدد من الطلاب .ما كنتش بكتفي بالمنهج وكنت بدرس للطلبة مناهج اضافية وقصص ومحادثات ..يعني استاذي العزيز علمني الكثير على المستوى العلمي والخلقي ....حقيقي في ناس بيكونوا مش مجرد أشخاص عاديين في حياتنا ,لكن بيكونوا علامات بارزة وبيسيبوا أطيب أثر .....رحمة الله على أستاذي العزيز حياً أو ميتاً

يلا خلصنا حكايتنا النهاردة ,تبقوا تيجوا يوم الحد الجاي هتلاقوني قاعدة ان شاء الله ,كل يوم حد هستناكو على المصطبة ,يلا طريق السلامة ,سكتكو خضرة إن شاء الله هههه ما تنسوش ذكر الله

سبحان الله ,الحمدلله ,لا إله إلا الله ,الله أكبر ,لا حول ولا قوة إلا بالله