من آمنك لا تخونه ولو كنت خاين

السلام عليكم ورحمة الله وبركاته

يا مرحب بحبايب قلبي اللي منورين المصطبة ,يا دي النور يا دي الهنا يا دي الناس الحلوة ههه

اهلا يا لولي ,يا مرحب يا ميرو , اهلا بأم هبة , منورة يا ام عبد الله , ازيك يا ام عبد الرحمن ,ربنا ييسر حالك وتيجي جنبنا على المصطبة دايما ,وسعوا للدكتورة رشا يا جماعة ,واسماء حبيبتي جت كمان يا أهلا يا أهلا ,لالالا مين دي ,دعاء ! ايه النور ده يا دودو , نورتي اللمة الاولانية ,بس ابقي تعالي هنا شوية ههه لا مش معقول , أم هالة ! ازيك يا ام هالة يا عسل , يلا بقى عشان نشرب الشاي , اهو غلي اهو وهصبه , على ما نصب الشاي صلوا ع النبي شوية عشان نبدأ حكاوينا

اللهم صل وسلم وبارك عليك يا سيدي يا رسول الله

ال على رأي المثل ,من أمنك لا تخونه ولو كنت خاين

لكن في ناس خيانة الأمانة في طبعها ,الناس دي بقى ربنا يكفينا شرها

من ضمن الناس دول ,في العمارة اللي احنا ساكنين فيها في اسكندرية ,في ناس كتير مشترين الشقق هنا عشان يجوا يقضوا الصيف فيها أو عشان يأجروها للمصيفين ويستفيدوا بالإيجار ...من ضمن الناس دول ,راجل مراته وكلته في شراء شقة بفلوسها عشان تيجي تصيف فيها هي وولادها ..الست صرفت على الشقة كتير قوي ,ديكورات وعفش واجهزة وقفلتها ليها ولولادها ..لكن جوزها اللي عايش معاها في محافظة تانية ,كان اتفق مع البواب انهم يأجروا الشقة للمصيفين طول ما الست مش موجودة ..وبالفعل كان ده بيحصل والراجل ياخد الايجار لنفسه ...لكن في مرة من المرات اللي كان مأجر فيها الشقة ,مراته قالتله أنا هاخد الولاد واسافر اقعد كام يوم في اسكندرية ,طبعا الراجل جري على التليفون وقال للبواب ابوس ايدك مشي الناس اللي في الشقة حالا ,مراتي جاية هههههههههه البواب قاله ,ازاي بس يا استاذ ! الناس طلعوا بشنطهم واستقروا من كام ساعة ,قاله اتصرف ,لازم يمشوا حالا ...طبعا البواب طلع للمستأجرين وقالهم معلش لازم تسيبوا الشقة دي دلوقتي وانا هنقلكم شقة تانية ,الناس طبعا زعلوا وقالوا يبقى خلاص ,مش هندفع ايجار اليوم اللي قضيناه هنا ,قال مافيش مشكلة ,ونقلهم على شقة جديدة ...لكن الست صاحبة الشقة لما جت ,لاحظت حاجات غريبة ,من ضمنها وجود اواني في الحوض مش مغسولة ..الست نزلت جري على البواب تسأله وهي شاكة فيه ,قالتله هو حد كان في الشقة ؟ قالها لا ,قالته لا ازاي ! انا لقيت حلل مش مغسولة ,معنى كدة ان في حد استخدمها وطبخ فيها ..قالها يمكن بتوع التكييف لما جم يركبوه ههه قالتله وهل ده يعقل ان عمال جايين يركبوا تكييف ,هيقعدوا في الشقة يطبخوا! هههه قالها ما اعرفش بقى ,قالتله يبقى انت بتأجر الشقة مفروش من ورانا ,قالها ما حصلش ..طبعا البواب في موقف صعب ومش عايز يفضح جوزها ,رغم ان من رأيي ان البواب نفسه غلطان والمفروض يرفض يساعد واحد خاين أمانة ..المهم ان الست اتصلت بجوزها وقالتله على الوضع اللي لقيته ,راح الراجل فبرك كدبة حلوة كدة وبلف بيها دماغها ,قالها أه صحيح دانا كنت ناسي ,اصل فلان صاحبي قالي انه هيعدي يقعد يومين في الشقة ,بس انا نسيت اقولك يا حبيبتي ..طبعا الست صدقته واعتدرت للبواب وقالتله انا اسفة ظلمتك ,جوزي حكالي على الموضوع هههه

والله بجد ربنا يكون في عون الست دي ,لان اكيد بيخونها في حاجات تاني كتير ومش محافظ على أموالها

حكينا حكاية راجل خاين للأمانة ,طب صلوا ع النبي عشان احكيلكم حكاية ست خاينة للأمانة ومش بتتقي الله في مال جوزها

الست دي جوزها عنده مصنع ملابس ,قالتله العمال بيخونوك وبيسرقوك وانت مشغول برا ,خليني أنا المشرفة عليهم ..الحقيقة هي راحت المصنع عشان تستولى على نسبة كبيرة من الإيراد وبعدها تقول العمال اللي بيسرقوا ..كانت حوشت مبلغ كبير قوي ,وفي مرة جوزها احتاج فلوس ,عرضت عليه انها تستلف من صاحبتها عشان تجيبهومله ..طبعا هي لا هتستلف ولا غيره ,الفلوس فلوس الراجل وشقاه ..وطبعا هي قالت انها سالفاها لسببين ,اولا ما ينفعش تقول انها بتاعتها ولا هيشك انها بتسرقه وثانيا قالت انها سالفاها عشان تضمن انه يرجعها

ولان المبلغ كان كبير قوي ,الراجل شك ان حد ممكن يسلفه لحد بالبساطة دي ومن غير شيكات ولا ايصالات أمانة ,فقالها الفلوس دي بتاعتي ,وانتِ بتسرقيني وبتخوني الأمانة ..طبعا انكرت وحلفت وكل حاجة ,لكن الراجل ما صدقش ..اضطرت تتصل بصاحبتها وتقولها ارجوكِ انجديني وقولي انك مدياني الفلوس ,عايزاكِ تبعتيلي رسالة تهديد على الموبايل بتطالبي فيها بفلوسك وإلا هتحصل مشاكل بيني وبين جوزي ممكن توصل للطلاق..وفعلا صاحبتها اضطرت تعمل كدة عشان هي ما تروحش في داهية ...لكن اللي الخيانة في دمه ما بيبطلهاش ..الست دي كانت لما بتتفق مع مدرسين لولادها كانت تقول لجوزها على مبلغ ضعف اللي المدرس بيطلبه وتاخد هي الباقي ..بصراحة صنف من الستات بشع قوي ربنا يعافينا

ايه رأيكو في الناس دي ؟ فعلا الخيانة بتكون صعبة قوي لما بتيجي من أقرب الناس

صلوا ع النبي وخدوا الحكاية دي ع الماشي

افتكر وانا صغيرة كنت أسمع عن شاب متغرب عشان يكون نفسه ,وكان عاقد عقد الزواج على واحدة قريبته وبيستعد للعودة عشان اتمام الجواز .وكان بيبعت دايما الفلوس على اخوه عشان يشيلها عنده كأمانة ويقدر يشتري شقة يتجوز فيها ..وبعد غربة سنين رجع عشان ياخد فلوسه من أخوه ,اخوه قاله انا احتجت الفلوس وصرفتها كلها ..الشاب ده جاله صدمة نفسيه كبيرة واختفى وماحدش عرف طريقه لحد النهاردة ,لدرجة ان الزوجة اللي كان عاقد عليها بعد ما انتظرته سنين وسنين وما ظهرش ,أهلها طلقوها عن طريق المحكمة ..وهو لحد دلوقتي  مختفي وماحدش عارف عايش ولا مات ولا ايه اللي جراله ..شيء محزن بجد ..ربنا يعافينا من كل خاين أمانة ويرزقنا بصحبة أهل الأمانة آمين

يلا بقى كل واحدة بالسلامة على بيتها ونتقابل على المصطبة يوم الحد ان شاء الله ,ما تنسوش ذكر الله والصلاة على رسول الله

سبحان الله وبحمده ,سبحان الله العظيم