اللي اختشوا ماتوا

أهلاً بيكو على مصطبة العصاري ,تعالوا اشربوا شاي ,يا مرحب

كلنا طبعا عارفين قصة اللي اختشوا وماتوا ..ودول كانوا ناس في حمام من الحمامات القديمة ,ولما حصل حريق في الحمام ده عافانا الله وإياكم ,الناس خرجوا من الحمام وهما من غير ملابس ,عدا مجموعة من الناس ,ودول اللي اختشوا يخرجوا عرايا ,وماتوا في الحريق ,ومن يومها وبينضرب بيهم المثل في الحياء والخشى ..ودايما الناس تقول لاي حد بيتجاوز حدود الأدب أو الأعراف أو التقاليد (اللي اختشوا ماتوا )

ومن ضمن الناس اللي ماعندهومش خشى كانت بنت قابلتها في قاعة الكمبيوتر في الجامعة ..البنت شكلها من البنات اللي بيتقال عليهم لِونين ههه يعني ,دلوعة كدة ومحلية نفسها بشوية ماكياج وطرحة حجاب منقرشة ..المهم يعني هي كانت لطيفة ,اتعرفنا على بعض واخدنا تليفونات بعض ,وفضلنا على تواصل خفيف بعد التخرج ,هي راحت تتدرب في مكتب محامي ,لحد هنا عادي . اللي مش عادي انها مرة قالتلي ,مرات المحامي بتغير مني جدا وعلى طول تكلمني بأسلوب وحش ,قلتلها هو معاكِ زميلات تاني بيتدربوا؟ قالتلي ايوة ,قلتلها اومال اشمعنى انتِ يعني اللي هتتكلم معاكِ وحش ؟  قالتلي اصلها مش حلوة ,فبتغير مني عشان أنا احلى منها ,خايفة اخطف منها جوزها .عشان كدة كل شوية تيجي المكتب ,وخصوصا ان شقتها في نفس العمارة,اصلها مش واثقة من نفسها رغم انها دكتورة في الجامعة وشخصية مرموقة .قلتلها هي عندها ولاد ؟ قالتلي عندها ولدين  .. قلتلها طيب بلاش تستفزيها بتصرفاتك عشان ما تفهمكيش غلط .....بعد مدة اتصلت بيا وقالتلي مرات المحامي اتخانقت معايا في غيابه وطردتني من المكتب ,وهو لما عرف جالي البيت اعتذرلي قدام أهلي وقالي لازم ترجعي المكتب

الحقيقة هي لما حكتلي الموقف ده ,أنا تأكدت ان المحامي مش بيتعامل معاها كمحامية بتتدرب في مكتبه ,أكيد كان في حاجة في قلب البعيد من ناحيتها ..أنا ما علقتش على كلامها ,سمعت وسكت,,وبعد فترة قصيرة اتصلت بيا وهي فرحانة وقالتلي أنا اتخطبت ,قلتلها مبروك ,قالتلي عارفة اتخطبت لمين ! لأستاذ فلان المحامي اللي بتدرب عنذه..بصراحة انا اتخضيت وقلتلها طيب ومراته ؟ قالتلي وهي مبسوطة ,طلقها ,سألتها بخضة وكأن الموضوع يخصني ,طيب وولاده ؟ قالتلي رماهوملها ....طبعا التعبير صعب قوي ويدل على عدم رحمة (رماهوملها)

وقالتلي بفخر ,على فكرة خطيبي مابيعملش حاجة تزعلني ابدا ,حتى ولاده من ساعة ما طلق امهم ماشافهومش ...اللهم لا حول ولا قوة إلا بالله ...طبعا البنت دي سقطت من نظري وما بقتش طايقة اسمع صوتها ,لكن كنت حابة اعرف الحكاية دي هتوصل لفين ..عشان كدة فضلت اتصل بيها على فترات متقاربة وانا كلي أمل انها تقولي انه رجع لمراته وولاده ...لكن للأسف ..في مرة قالتلي خطيبي جاله جلطة ودخل المستشفى ,وانا كنت تعبانة قوي ودخلت المستشفى ...اعتقد ان اللي حصلهم كان نتيجة دعاء طليقته عليه وعليها ,لان قلبها مفتور من الحزن أكيد على زوجها اللي طلقها عشان واحدة تانية ما تساويش ,وحزن على ولادها الصغيرين اللي ابوهم حرمهم من أبوته واحتوائه ,وأكيد حزن على نفسها وانها مالقتش تقدير من الراجل اللي دافعت عنه وحاولت تزيل السوء والشر من طريق حياتهم لكن هو ر جع الشر بكل قوته وطردها هي وولادها برا حياته ,حقيقي شيء في منتهى القسوة .....كان الاتصال الاخير ليا بيها واللي برضو كان عندي أمل اسمع شيء كويس ,لكن ظني خاب ,الاتصال ده كان يوم زفافها على المحامي ....الله اعلم الدنيا عملت فيها ايه ولا وديتها لحد فين ,والله أعلم حال المحامي ده ازاي وحال طليقته وأولاده

لكن هل يا ترى كل الرجال كدة ؟ هل كل واحد فيهم لما يلاقي واحدة تتدلع عليه ولا تسمعه كلمتين حلوين ,هل عنده استعداد يسيب مراته عشانها ؟؟ وهل لازم الزوجة تكون جميلة عشان جوزها يحافظ على حياته معاها ؟ ولا في عشرة وأيام حلوة وحاجات كتير قوي أغلى من كنوز الأرض بتجمع بينهم ؟

طيب صلوا ع النبي واسمعوا مني الحكاية اللطيفة دي

اخت واحدة صاحبتي ست عادية مش جميلة  ,جوزها كان صاحب عمل خاص وله شريكة , يعني زيها زيه في العمل ولها نفس السلطات .الراجل ده كان اخوه شغال معاه ,, الشريكة دي ماكانتش متجوزة ,وشريكها احلو في عنيها وفكرت ترمي شباكها عليه عشان تاخده من مراته ,واهي تبقى شركة برا وجوا وزيتهم يبقى في دقيقهم هههه

فراحت كلمت اخوه بشكل مباشر وقالتله ,هو فيها حاجة لو اخوك اتجوز تاني على مراته ؟ الراجل حب يجاريها في الكلام عشان يعرف اخرها ,قالها لا طبعا مافهاش حاجة انه يتجوز طالما قادر يفتح بيتين ,لكن مين العروسة ؟ قالتله أنا ,ياريت تكلمه ,قالها حاضر ,وراح بلغ مرات اخوه ,قالها الحقي دي شريكة جوزك عايزة تتجوزه هههه..طبعا مراته هدت الدنيا  وقالتله ازاي الست دي تتجرأ وتطلب طلب زي ده ...طبعا حصل مشاكل والراجل راح تاني يوم لشريكته يقولها عاجبك كدة المشاكل اللي عملتيها في بيتي دي !! قالتله انا اسفة ,اديني رقم مراتك وانا اعتذرلها ,ولما اتصلت بتقولها انا فلانة شريكة جوزك راحت قايلاها ,ولكِ عين تتصلي! ده صحيح اللي اختشوا ماتوا هههههههه وقفلت السكة في وشها ..فالشريكة بتشتكي وتقوله يعني عاجبك مراتك واللي عملته فيا؟ قالها والله دي واحدة ست خايفة على بيتها وولادها ..وبعدها فض الشركة بينه وبينها عشان يحافظ على بيته

ده بقى راجل عارف يعني ايه زوجة واولاد ,مش ماشي ورا واحدة ملونة تلاعبه على الشناكل ههه

على فكرة أنا مش ضد الجواز التاني ,لكن ضد الظلم ,ضد إن الواحد يطلق الزوجة الأولى من غير ذنب ويتجوز عليها ويرمي أولاده ..لكن اذا كان الطلاق لازم بسبب عيوب في الزوجة فالرجل لا يلام ,بس برضو ما يقصرش في حق ولاده ..لكن يرميهم ويخلي واحدة ما تساويش تقول رماهملها عشان خاطري ,فده ما يرضيش ربنا ,ربنا عدل وبيطلب مننا العدل ...حكاية طليقة المحامي واجعة قلبي قوي ,لان زيها كتير ,ربنا يعافينا وإياكم من السوء وأهله آمين

لا تنسوا ذكر الله والصلاة على الحبيب عليه الصلاة والسلام

سبحان الله ,الحمدلله ,لا إله إلا الله , الله أكبر