حقدها قتلها

السلام عليكم ورحمة الله وبركاته

ازيكو عاملين ايه ,منورين المصطبة ,وبرحب بالحبيية سمسمة محمد اللي جت قعدت جنبنا على المصطبة ونورتنا ,كلكم حبيباتي وربنا ما يحرمنيش منكم ابدا ,ميرو وأم عبد الرحمن وأم عبد الله وأم حسين ودعاء واسماء ومريومة دودي..فينك يا لولي غايبة من اسبوعين ,والدكتورة رشا ولا حد شافها الأسبوع ده هي وأم هبة  ,فاتكم الشاي والحكاوي ههه لعل المانع خير وفي انتظار طلتكم الحلوة

على ما نصب الشاي الفلاحي المعمول على نار هادية ده ,نبدأ بسم الله  ونحمد ربنا على نعمه الكتير ونصلى على الحبيب عليه الصلاة والسلام عشان كلامنا يبقى كله بركة

بسم الله والحمدلله والصلاة والسلام على خير خلق الله محمد عليه أفضل الصلاة والسلام

اتفضلوا الشاي يا جماعة ما تتكسفوش ,المصطبة مصطبتكو ههه

أحلى حاجة في الدنيا لما القلب يبقى صافي ويحب الخير للناس كلها حتى لو محروم منه ,ربنا يكفينا شر أهل الحقد والمكايد

من الحكايات  اللي فيها كتير من العبر ,حكاية بنت كانت جارة لينا أيام زمان في القاهرة ,ربنا أعطاها من الجمال ما يسر الناظرين ,بياض شاهق وشعر أصفر وعيون عسلي ,كانت من أجمل بنات شارعنا ,وكمان كانت مجتهدة جدا في دراستها ,ووالدتها دايما بتشجعها ,وكانت تقول لأمي الله يرحمها  ,عايزة أعلم بنتي تعليم عالي ,كفاية اخواتها كلهم تعليمهم متوسط

كان مع البنت دي في المدرسة الثانوي إتنين من بنات الجيران ,ورغم جمالها وذكائها اللي فاقهم  كانت بتحقد عليهم ومش عايزاهم يكملوا تعليمهم ,الحقد بتاعها تطور لأفعال ,فكرت ازاي تقعدهم من المدرسة وما يكملوش تعليم ,مالقتش وسيلة غير انها تطلع عليهم إشاعات قذرة انهم مصاحبين شباب وبيجولهم عند المدرسة ,وقالت الكلام ده لكل الجيران عشان تشوه صورتهم وتخلي أهاليهم يقعدوهم في البيت وما يكملوش تعليم ,البنتين راحولها البيت عشان يعاتبوها ,ما رضيتش تدخلهم ووقفت على الباب تتوعدهم وتهددهم وتقول ,إن ما قعدتكم من المدرسة ما ابقاش انا ,كانوا مستغربين موقفها جدا وقالوا عليها انسانة مريضة ومش طبيعية ..عدت السنة وظهرت نتيجة الثانوية العامة والبنت كانت جايبة أعلى مجموع فيهم وكان مجموعها يأهلها لكلية كويسة جدا زي الصيدلة ,بس ما لحقتش تفرح ,سبحان الله  اتقدملها ابن خالتها عشان يتجوزها وده كان جاهل ولم ينل اي قسط من التعليم وبيشتغل صبي في ورشة للنقش على النحاس ,والغريبة ان والدتها اللي كانت عايزاها تتعلم تعليم جامعي اتقلبت عليها وصممت تجوزها ابن خالتها وما تدخلهاش الكلية اللي البنت عاشت حياتها تحلم بيها ,ووالد البنت كمان كان موافق على جوازها ,البنت كانت بتبكي بدموع عنيها واشتكت للبنات اللي كانت بتكيد لهم وقالت ,شفتوا ابويا وامي عايزين يعملوا فيا ايه ! لكن خدت جزائها العادل واتجوزت الشخص ده وما كملتش تعليمها ,والبنات اللي كانت بتكيد لهم وعايزة تمنعهم من التعليم ,واحدة دخلت أداب حضارة أروبية وواحدة دخلت تجارة

يعني سبحان الله حقدها عاد بالدمار عليها لوحدها

ربنا يكفينا شرها وشر أمثالها آمين

كفاية كدة النهاردة واشوفكم يوم الحد الجاي إن شاء الله

لا تنسوا ذكر الله والصلاة على رسول الله عليه الصلاة والسلام 

اللهم صل على محمد وآل محمد كما صليت على إبراهيم في العالمين إنك حميد مجيد

سبحان الله وبحمده ,سبحان الله العظيم