نقبهم طلع على شونة

السلام عليكم ورحمة الله وبركاته

اهلا بيكم حبيباتي منورين المصطبة بلمتكم الحلوة

حمدالله ع السلامة يا لولي ,ما تغبيش تاني وتقلقينا عليكِ حبيبتي .خليتيني ادخل اللي ما يتسمى الفيس عشان ادور عليكِ رغم اني مقاطعاه من زمان ,لكن لا لقيت حسابك ولا حساب اختك ,شكلكو قفلتوا الحسابات او غيرتوا اساميكو,بس الحمدلله انك جيتِ وطمنتيني عليكِ ,اللمة هنا احسن من الفيس مليون مرة ههه

مشمشمة حبيبتي نورتي المصطبة,وسعولها يا جماعة  ,ايه الغيبة دي! اللمة ماتحلاش من غيرك

اسماء ,تعالي اشربي شوية شاي في الخمسينة ههه

ماحدش شاف ميرو يا ولاد؟ كل ده بتجيب القصب! ههه اوعي تجبيه ماسخ,هاتيه حلو ومسكر زيك
سمسمة محمد فين يا جماعة. فينك يا سمسمتي

منورة المصطبة يا دكتورة رشا

أم عبد الرحمن ,ناوليني البراد ههه

أم هالة منورة المصطبة يا غزال الفلا هههه (اصل يا جماعة من ساعة رواية خلف هذه الجدران وأم هالة بتناديني على الواتس بغزال الفلا وانا كمان بناديها بيه ) ههه

أهلاً يا أم هبة منورة اللمة الحلوة والله

مريومة ,اهلاً بيكِ حبيبتي ,مبسوطة بوجودك على المصطبة والله

أم عبد الله اللي بتيجي متأخرة وبتشرب الشاي بارد ومتلج ههه ما تتأخريش تاني

يلا بقى نتونس بالحكاوي ,وعلى ما اصبلكو الشاي الفلاحي اللي يظبط الدماغ ده ,صلوا ع النبي عليه الصلاة والسلام على قد ما تقدروا ,اللهم صل وسلم وبارك عليك يا سيدي يا رسول الله

من زمان اسمع مثل ,نقبه طلع على شونة ,ودايماً تتقال لما حد يكون طمعان في شيء ويخيب أمله .والشونة دي بتطلق على المخزن بتاع الحبوب والغلال

.طب يا ترى المثل ده له أصل؟ ايوة اومال

بيقولوا قال ايه, كان في فلاح ساب أرضه وزراعته وقال للناس أنا هحفر وانقب في الأرض وأدور على آثار فرعونية ,وفعلاً الراجل فضل ينقب في الأرض أسابيع لغاية ما عمل سرداب ,وكان فاضل بس حيطة يهدها عشان يتحقق أمله ,فضل يهد في الحيطة لحد ما انهارت ,لكن الصدمة انها كانت حيطة الشونة ووراها الحبوب والغلال مش أثار فرعونية هههه الناس ضحكوا وقالوله (نقبك طلع على شونة )ومن الوقت ده بيتقال لأي حد كان طمعان في حاجة وما حصلتش ,نقبك طلع على شونة ,ربنا ما يجعل نقبنا يطلع على شونة أبداً قولوا أمين

صلوا ع النبي عليه الصلاة والسلام عشان نعمل دور شاي تاني و احكي حكاية النهاردة

اللهم صل على محمد وآل محمد كما صليت على إبراهيم في العالمين إنك حميد مجيد

كان لينا زمان جيران في القاهرة أيام ما كنت طفلة ,كانوا ساكنين في الدور اللي تحتينا ,راجل وست كبار في السن وعايشين لوحدهم ,كانوا بيدّعوا الفقر والحاجة وإن ما عندهومش مصدر رزق ,عشان كدة كان كل الجيران بيعطفوا عليهم ويدوهم فلوس ,واللي طابخ طبخة يديهم منها ,الست مرات الراجل ده كان لها بنت أخ ,بنت اخوها دي كانت بتيجي دايما تسأل عليها وتديها فلوس وتجيبلها أكل ,بس مش لوجه الله ,كانت حاطة في دماغها هدف ,انها تعطف على عمتها العجوزة وجوز عمتها العجوز عشان لما يموتوا تاخد الشقة تجوز فيها ابنها ..عدت الأيام وراحت الشهور وجريت السنين ومرضت العمة مرض الموت ,بنت اخوها فضلت ملازماها وتخدمها وقاعدة تحت رجليها ,ما هو الموضوع يستاهل ,دي هتطلع بشقة ههه

وجه اليوم والعمة العجوزة ماتت ,راح جوز العمة الراجل العجوز اللي بقى لوحده طرد بنت اخو مراته وولادها وقالهم ما تجوش هنا تاني ,انتوا فاكريني ماليش حد ولا ايه ! اتاري الراجل كان له بنت من زوجة قديمة لكن كان مقاطع بنته وولادها ,ولاد بنته دول طلعوا كام يا ترى! كانوا تلات شباب وأكيد كلهم اولى بشقة جدهم ,جت بنته عاشت معاه وكمان اكتشفوا إن الراجل العجوز اللي كان بيدعي الفقر هو ومراته وبياخدوا من الجيران فلوس مش من حقهم كان عنده شنطة بحالها مليانة مشغولات ذهبية غير مبلغ كبير جدا كان مخبيه ,احفاده اشتروا بجزء من المبلغ ده عربية ,وكمان بنته اقنعته يبيع الشقة ,واخدوه واختفوا ومن وقتها اتقطعت اخبارهم ..سمعنا ناس قالوا شفنا الراجل العجوز ده بيشحت في الشوارع ..هل فعلا ده حصله؟ الله أعلم .بس الأكيد إن هو ومراته عاشوا محرومين وفي ضنك رغم ان كان عندهم المال وغيرهم هو اللي اتهنى بيه , وبنت اخو مراته اللي كانت بتخدمهم عشان تاخد الشقة هي وابنها ,نقبهم طلع على شونة  هههه

ربنا يكفينا شر الطمع والطماعين آمين

كفاية كدة النهاردة ,اقابلكم يوم الحد الجاي إن شاء الله على المصطبة ,يلا كل واحدة بالسلامة على بيتها تشوف اللي وراها ,وما تنسوش ذكر الله والصلاة على رسول الله

سبحان الله ,الحمدلله ,لا إله إلا الله ,الله أكبر

اللهم صل وسلم عليك يا سيدي يا رسول الله