الثالثة والعشرين( حارة الموعودين)

 

ذهب رضا إلى والدته، وقد ربط رأسه بالضمادات، من آثار جروح كاذبة، وثياب مهترءة، وكأنه كان في شجار، وتعرض للضرب المبرح، وأخذ يقرع الباب وهو يتأوه وينادي:

 

أمااا، آآآه، افتحي يا امّااا، آه يا نفوخي

 

هرعت والدته لتفتح لتفاجأ بمنظره، فشهقت وضربت على صدرها:

 

يا مصيبتي! ايه اللي مخرشمك كدة يا واد؟

 

آآآه سنديني يا امّا

 

مالك يا واد انطق

 

طب دخليني عشان اصتريح، مش قادر اقف

 

ادخل يا منيل على عينك واحكيلي

 

طب قربي يا امّا، عشان اسند على كتفك

 

لهزته في صدره بعنف وجأرت:

 

يا اخويا أنا قادرة اسند روحي، لما عجل زيك يسند عليا!

 

وبعدين في حنيتك اللي مقوية قلبك دي يا امّا!

 

ادخل، ادخل يا سبع البرومبة.. دانت كنت خارج متأنتك ومتسبسب على سنجة عشرة، وقولتلي رايح اغني في مهرجان ولاد الأكابر

 

جلس على أحد المقاعد، يـتأوه، ويحاول الاتكاء بآلام كاذبة:

 

آآآه أنا اتبهدلت واتضربت يا امّا

 

مين يا واد اللي ينشك في إيده، وضربك لما عدمك العافية كدة؟

 

الجامهور يا امّا

 

ايه الجامنهور ده؟

 

الناس الي زي النمل اللي كانت جاية تسمعني

 

سمعوا الرعد إن شاء الله

 

أنا اللي سمعته يا امّا

 

ما تحكي يا مخفي الإسم، ايه اللي حصل، طلعت روحي

 

روحت يا امّا الحفلة زي ما قلتلك، وأول ما طلعت عالمرسح وغنيت، عينك ما تشوف إلا النور, الناس طلعلولي عا المرسح، ونزلوا فيا ضرب، واللي ما قدروش يطلع عالمرسح، كانوا بيحدفوني بالكراسي

 

ليه يا واد! انت كنت بتغني ولا بتشتمهم بامهم!

 

مش عارف يا امّا ايه اللي جرالهم! دول زي ما يكونوا حد مسلطهم عليا

 

أنا عرفت مين اللي مسلطهم. منها لله البعيدة، الله ينتقم منك يا ام فوزي

 

أم فوزي مين بس يا امّا!

 

الولية الحئودة، اللي من ساعة ما عرفت إنك بقيت مغنواتي قيمة وسيما، وهي لا على حامي ولا على بارد، وعمالة تاكل في روحها وتقولي اشمعنى ابنك يغني وابني لأ، أقولها ابني صوته حلو ويسلطن الدماغ، تقولي بلا ستين نيلة، ده لا شكل ولا منظر.. اسم الله، هي اللي ابنها حلو قوي! تلاقيها هي اللي بعتتهم وراك عشان يعجنوك، من قهرتها منك ومن حلاوتك يا ضنايا

 

منها لله يا امّا، ما حضش بيصيب حض في حاله.. بس الموضوع أكبر من ام فوزي

 

أكبر من ام فوزي! ... تبقى أم فتحية الشرشوحة، الله ينتقم منها. أصلها نشرت غسيل فوق اللي انا ناشراه وبهدلتهولي، روحت مفرجة عليها الحارة. قامت قالتلي، طب وربنا لانتقم منك انتقام تفتكريني بيه العمر كله، واديها نفذت التهديد وبعتت وراك اللي يعزقوك زي كوم القطن يا حبيب امك. بس أنا مش هسكت، وهسلط على ابنها العجلاتي الصايع. صبرك بالله يا ام فتحية، طالعلك صبح انتِ وابنك

 

يا امّا ارحميني يا امّا، وصيبك من جيران الهم ضول، لا ام فوزي لها ضعوة، ولا ام فتحية تعرف حاجة

 

اومال مين يا واد اللي شلفطك كدة، انطق

 

العدو يا امّا

 

العدو برا وبعيد يا قلب امك.. عدو ايه يا ابني! انت كنت بتحارب؟

 

أكتر يا امّا، أكتر.. اللي يشتغل مغنواتي، عدوينه بيبقوا كتير يا امّا

 

يا ابني هو انت لحقت تغني عشان يبقالك عدوين!

 

من أول يوم يا امّا والعدوين حاطيني في دماغهم.. وبصريح العبارة كدة، قالولي إنك مالاكش مكان في البلد دي

 

ليه! كانت تكية اللي خلفوهم!

 

يا امّا خلاص، أنا ماليش عيش في البلد دي... أنا مصافر يا امّا

 

يا لهوي! تسافر فين وتسيبني لوحدي يا واد!

 

لوحدك ازاي يا امّا! اخواتي بطة وناصرة معاكِ في قلب الحارة، غير جيرانك اللي طول النهار قاعدة معاهم

 

ردت والدته بأسى:

 

اخص عليك يا رضا.. عايز تسيب امك يا رضا! دانت يا واد واخد بحسي، وداخل وخارج عليا.. اخواتك كل واحدة في بيت جوزها

 

خلاص يا امّا، خليهم يتطلقوا ويجوا يقعدوا معاكِ

 

بس يا واد اخرس. ألف بعد الشر. دانا ما صدقت جوزتهم وخلصت من همهم

 

خلاص، أنا كمان مصافر وهتخلصي من همي

 

أمسكت بذراعه توسلاً وقالت:

 

يا واد حرام عليك يا واد، دانت العزيز الغالي، ديك البرابر

 

معلش يا امّا.. حكم الزمان علينا إن كل واحد فينا يعيش بعيض عن الطاني

 

.... طب وانا يا واد!! لو عوزت حاجة اروح لمين؟ لو تعبت في عز الليل، اقول يا مين؟

 

قولي يا رب يا امّا، قولي يا رب واضعيلي ربنا يوفقني في دنيتي الجديدة.. وانا مش هنساكِ يا امّا. أول كل شهر هتلاقي خمس بواكي مقفلين واصلينك مني، تاكلي وتشربي وتجيبي عبايات أبهة وتلبسي وتغيظي جيرانك وتنبسطي

 

طب وانت يا رضا.. ابص حواليا ما لاقيكش يا ضنايا!! .. أنادي بعلو حسي واقول يا رضا ما تسمعنيش!! ولو جرالي حاجة، أموت وانا لوحدي!

 

يا امّا يعني لو قعدت جنبك وانتِ بتموتي، هتحاسب بدالك!! وبعدين لسة بدري عليكِ يا امّا، أنتِ لسة صغيرة وفي عز شبابك وحلويتك يا امّا

 

يا واد دانت اللي ساند ضهري، دانا بتكلم واعلي حسي وسط الناس عشان ليا سند.. تقوم دلوقتي عايز تسيبني وتكسر ضهري!

 

يا امّا ايه الكلام اللي يوجع الطحال ده! وانتِ عايزة من قعدتي جنبك ايه! مش انتِ اشتريتيلي الطكطوك عشان اشتغل واجيبلك فلوص وارميها في حجرك! اديني هصافر وابعطلك فلوص. عايظة ايه طاني يا امّا

 

سيبك من الغنا يا رضا، وارجع للتكتوك وخليك جنب امك. بلا غنا بلا حزن اسود. واهو اللي جاي من التكتكوك نعيش منه ونحمد ربنا، بدل الغربة والشحططة يا ضنايا

 

ما عاضش ينفع يا امّا. لا الطكطوك ينفعني، ولا انا انفع الطكطوك.. أنا بقيت مغنواتي كبير والناس الأكابر بتسمعني

 

طب والتكتوك اعمل فيه ايه يا واد؟

 

بيعيه يا امّا. بعيه وهاتيلك حتتين صيغة ينفعوكِ

 

لا.. أنا هخليه تذاكر منك يا رضا، هخليه تحت الشباك واسلسله بحديد عشان ماحدش يسرقه ولا يطمع فيه.. اهو حاجة  من ريحتك تفكرني بيك يا ضنايا

 

طول عمرك غاوية ريحة معفنة يا امّا.. سلام دلوقتي عشان اجهز نفسي للسفر.. وخدي خمس تلاف جنيه أهم. واول كل شهر هيوصلك زيهم

 

بالسلامة يا ضنايا.. بالسلامة يا رضا.. اوعى تنسى امك يا واد

 

عمري ما انصاك يا ست الحبايب يا حبيبة.. أه نصيت اقولك يا امّا..لو لمحتيني بغني في أي تلافزيون او شاشة موباين، اعرفي إني بغني من بلاد برا، والناس اللي جوا بيذيعوا أغانيا، اوعي حد يضحك عليكِ ويقولك إني هنا وتصدقيه

 

ابداً يا حبيبي، أنا أكدب الدنيا كلها وما اصدقش غيرك انت

 

شاطرة يا امّا.. سلام بقى

 

بالسلامة يا حبة قلب امك

 

غادر رضا منزل والدته، واتجه إلى منزل صديقته هند، فصفر بشفته لتعلم أنه ينتظرها في مدخل المنزل، عند البوابة،  فلبست عباءتها وانتعلت خفها على عجل، ونزلت إليه، فألفته على حاله المزري، ففزعت وسألته:

 

ايه ده! مالك يا رضا؟

 

ههه ما تخافيش يا بت، أنا زي الجن مافيش حاجة، انا بس عامل في نفسي كدة عشان امي تصدق اني لازم اصافر واسيب البلد

 

ايه! انت صحيح مسافر ياه؟

 

لالا يا بت، أنا بس بقولها كدة عشان تطلع من نفوخي اليومين دول على ما ارسطأ أموري

 

مطت شفتها ورفعت حاجباً وسألته:

 

أمور ايه بقى يا سي رضا اللي هترستأها بعيد عن الحارة؟

 

كلام في سرك يا بت، أنا الدنيا ضحكتلي من الودن دي للودن دي، وكبشت بإيديها الاتنين وقالتلي خد يا رضا

 

ممم ياكشي تكون دنيتك قالتلك ادي ضهرك لحبايبك ووريهم عرض قفاك

 

ههه فشر يا بت. أنا برضو اعمل فيكِ كدة! دانتِ اللي متربعة فوق سجادة قلبي

 

اومال ايه لزومه الحركات النص كم، وشغل السر سر اللي عامله على امك ده!

 

يا بت افهمي، أمي مكانها مش معايا، أمي مكانها في الحارة، أمي لو عرفت طريقي مش هتسيبني وهترجعني ألف خطوة لورا، وأنا داخل على دنيا جديدة عايز ناس عليها القيمة، لكن أمي هتقل مني

 

يعني هتشيل ايدك من امك ومن مصاريف أمك يا رضا وتستندل معاها؟

 

ابداً يا بت، طب روحي كدة اخطفي رجلك واسأليها من ورايا، هتقولك رضا اداني خمس بواكي مأستكين عشان اصرف وانبسط.. دا انا حتى قولتلها، ان كل شهر هيكون عندها قدهم

 

جدع ياض يا رضا، ولو انك مش جدع قوي يعني، أمك دي ياما شقيت عشانك، وكان نفسي تراضيها اكتر من كدة وتشيلها فوق راسك، مش تستعر منها

 

وربنا كان نفسي يا هند، لكن أعمل ايه بقى! حكم اختي سوكا، انتِ عارفاها ما بتطيقش امي من زمان

 

واختك سوكا كانت بتطيق مين من أصله! طب ماهي ما بتطقنيش أنا كمان، وبكرة تقولك سيب هند وما تتجوزهاش لتعرك

 

هههه ما هي قالتلي

 

شهقت هند وضربت على صدرها وسبت سوكا:

 

أه يا بنت ال....

 

بلاش أباحة يا بت يا هند. أنا رديت عليها وجبتلك حقك

 

رديت عليها قولتلها ايه ياض؟

 

ههه قولتلها هند دي حب عمري كله، اصيب الدنيا بحالها، إلا هند

 

وضعت يديها في وسطها وسألته وقلبها يحتدم غيظاً من سوكا:

 

والمعدولة المحسبة المنسبة أختك زفتة قالتلك ايه؟

 

قالتلي باين عليك بتحبها اكتر من امك ياض، قولتلها أه

 

هههه جاك أوا يا واد

 

أما يئويكي يا عسل هههه

 

طب هتيجي تخطبني من ابويا امتى ياض!

 

قريب، قريب يا هند

 

زفرت هند وقالت:

 

اديني عقاد نافع يا رضا، الكلام ده ما ينفعنيش. دانا رافضة لابويا خمس عرسان لحد دلوقتي بسببك

 

يا بت هانت يا بت، زيارتي الجاية للحارة، هكون ساحب المأذون في إيدي

 

أما اشوف

 

يا بت دانتِ غالية عندي يا بت.. انتِ ناسية الأغنية اللي خليت حريقة يكتبهالك وولعة يلحمها وعجبتك قوي اما سمعتيها؟

 

ههه طب غنيهالي تاني، بس بصوت واطي لتلم الناس علينا

 

حبك يا هندددد

 

احلى من التمر هنددد

 

لا عرق سوس ولا سوبياااا

 

يتساووا بالزلابية، اللي اسمها هندددد

 

سمعت الأغنية فأسندت ظهرها إلى الحائط وأغمضت عينيها هائمة وقالت:

 

يا لهوي! الأغنية دي بتغسلني من جوا

 

أتاها صوت أمها من أعلى مدوياً:

 

بت يا هند، اطلعي لمي الغسيل اللي هيأرح ع الحبال يللي تنشكي في معاميعك

 

يا لهوي! دي امي. أنا هطلع بقى يا واد يا رضا، بس أمانة عليك يا جدع ما تغيب عليا، ما تشمتش العدوين فيا ياض

 

فشر يا بت. دانا هخلي رقبتك في السما، وهيعيشك أحلى عيشة. بكرة الناس تشاور عليكِ وتقول مودام المطرب رضا التمساح اهيه يا بشرررر

 

هههه يسمع من بقك يا واد ويكون عن قريب

 

أتاها صوت والدتها مجدداً:

 

بت يا هند، روحتي فين يا هبابة البرك

 

يا لهوي! دانا نسيت امي، امشي بقى يا واد يا رضا دلوقتي عشان الحق امي

 

ماشي يا احلى هبابة برك في الدنيا.. سلام يا حب يا مولع في القلب

 

************************************

دخلت نجاة خادمة السيدة سهاد عليها في مخدعها، فوجدتها تنهي صلاتها على مقعدها المتحرك، فقالت:

 

الريستورانت الإيطالي بعت الفطار يا سهاد هانم، اجيبه لحضرتك هنا ولا في الجنينة؟

 

لالا، خليه دلوقتي. ماليش نفس.. نعمة برضو ما جاتش النهاردة؟

 

لا، بس هي اتصلت عشان تكلم حضرتك، ولما قولتلها انك بتصلي الضحى، بلغتني رسالة

 

خير؟

 

بتقولك معلش سامحيها الكام يوم دول عشان بتساعد في تحضير وجبات أكل للناس اللي اتهدمت بيوتها في الزلزال

 

تبسمت السيدة سهاد وقالت:

 

قد ايه البنت دي هايلة.. كل يوم حبي لها بيزيد.. عايشة لغيرها.. بتتفانى في إسعاد الناس حتى لو على حساب نفسها

 

هي فعلاً إنسانة نبيلة

 

... وحشتني قوي.. حاسة إنها بقت جزء مني... تعرفي يا نجاة.. كنت أتمنى إن نعمة دي تكون بنتي وتعيش معايا على طول

 

للأسف مش كل حاجة بنتمناها بتتحقق يا سهاد هانم

 

وجمت السيدة سهاد وقالت بنبرة أسى:

 

.....فعلاً.. كتير من الأمنيات، بتتبخر في هواء الواقع المرير

 

تبسمت نجاة وقالت:

 

صباح السعادة يا سهاد هانم

 

هه صباح التفاؤول يا نجاة .. هاتي المصحف أقرأ فيه شوية عشان يكون صباح سعادة وتفاؤول حقيقي

 

اتفضلي يا هانم

 

*****************************************

 

كانت نعمة في المطبخ تعد أكام من الطعام للمنكوبيين، حين دخلت والدتها تقول متأففة

 

والله ما انا عارفة لزومه ايه اللي بتعمليه ده! ما الناس قاعدين عند أم نهى وهي متكفلة بأكلهم وشربهم، لزومها ايه التكاليف دي!

 

يعني وطنط أم نهى ذنبها ايه تتحمل كل حاجة لوحدها! مش كفاية كتر خيرها فتحت للستات بيتها بدل ما يناموا في الشارع! وكمان بقالها يومين بتأكلهم وتأكل الرجالة اللي عند عم خليل على حسابها. طيب دانا اتحايلت عليها كتير قوي وحلفت عليها لحد ما رضيت إني أعمل الأكل النهاردة

 

ايوة يا بنتي بس بالعقل،  مش عشر فرخات وخمسة كيلو لحمة. غير الخضار، مش احنا أولى بالفلوس اللي بتبعزقيها دي!

 

ههه يا ماما يا حبيبتي ما استحق أن يولد من عاش لنفسه فقط. وبعدين إحنا ربنا وسعها علينا من فضله، ليه بقى نبخل على الناس! يا ماما لازم تعرفي إن المال مال الله، وسبحانه وتعالى أمرنا إننا نعطي غيرنا منه، في أكتر من أية من القرآن الكريم

بسم الله الرحمن الرحيم

( وآتوهم من مال الله الذي آتاكم)

 

بسم الله الرحمن الرحيم

(وانفقوا مما رزقناكم من قبل أن يأتي أحدكم الموت فيقول ربي لولا أخرتني إلى أجل قريب فأصدق وأكن من الصالحين)

 

بسم الله الرحمن الرحيم

( وانفقوا مما جعلكم مستخلفين فيه)

 

يعني يا ماما يا حبيبتي دي أوامر إلهية بالإنفاق من مال الله اللي تركه أمانة بين إيدينا، ده مش مالنا لوحدنا ولا اداهولنا عشان نستأثر بيه لنفسنا ونحرم الناس.. وبرضو ما تنسيش إن الرسول عليه الصلاة والسلام أمرنا بالإنفاق، زي لما في مرة دخل على سيدنا بلال بن رباح ولقى عنده صُبرة من تمر، يعني كوم كبير من التمر، فقال ماهذا يا بلال؟ قال يا رسول الله، شيء إدخرته لغد، فقال: أما تخشى أن يفور له بخار في جهنم؟ أنفق بلال ولا تخش من ذي العرش إقلالا

 

شوفتي بقى يا ماما إن الرسول عليه الصلاة والسلام أمرنا بالإنفاق!

 

عليه الصلاة والسلام.. والله يا بنتي عارفة، بس خايفة نرجع زي زمان مش لاقيين. شايلة همك والله يا بنتي، دانتِ اتبهدلتِ كتير قوي، وياما اتمرمطتي في الشوارع وانتِ بتدوري على شغل

 

والحمد لله ربنا أكرمنا وكانت أخرة صبرنا خير

 

.... ما تأمنيش قوي يا نعمة للنعمة اللي بقيتِ فيها.. والله يا بنتي أنا طول الليل الفكر بيودي ويجيب في دماغي والرعب واكل قلبي

 

رعب ايه بس يا ماما؟

 

خايفة الست اللي اسمها سهاد يجرالها حاجة، وساعتها الشغلانة هتروح من ايدك ونرجع للهم تاني

 

ليه بس الفكر الوحش ده يا ماما! ألف بعد الشر على مدام سهاد، ربنا يديها الصحة وطولة العمر، أنا بحبها قوي والله، وعايزة ربنا يطول في عمرها من حبي ليها، مش عشان بستفيد من وراها.. لكن حتى لو ربنا أراد غير كدة، برضو مش هيسيبنا، وهيرزقنا من فضله

 

 

برضو ما تآمنيش قوي للدنيا وخلي بالك من قرشك ..لسة يا بنتي.. لسة ما آنش أوان الراحة.. لسة سكتك طويلة ومش عارفين بكرة فيه ايه

 

ههه فيه كل خير يا ماما إن شاء الله. طول ما الواحد عنده حسن ظن بالله مش هيخذله أبداً إن شاء الله

 

ونعم بالله يا بنتي

 

طيب سيبيني أكمل الأكل بقى يا ماما، عشان ألحق أوديه لطنط ام نهى ولباقي الناس اللي بيوتهم وقعت

 

طب اوعي اساعدك

 

ههه الله! ايوة كدة يا ست أم نعمة، محتاجة نفسك الجميل عشان الأكل يبقى زي العسل

 

طب ناوليني البصل يختي

 

اتفضلي يا ماما

 

ألا قوليلي يا نعمة، هو الأستاذ عمر على معاده الجديد معانا يوم الجمعة الجاية؟

 

ايوة يا ماما إن شاء الله.

 

يارب يتمملك على خير يا بنتي ويفرحني بيكِ.. ده يوم المنى يوم ما يكون من حظك ومن نصيبك.. ساعتها هطمن عليكِ والخوف والقلق يفارقوا قلبي وارتاح بقى

 

شردت نعمة، وكأنها تسمع  وقع سنابك الوهم تقدح أرض الحقيقة، فتثير الأحلام غبارا يتناثر في الهواء

 

 

********************************

كان عمر منهمكاً  في تفكيره حتى منتصف الليل .. كيف يتم له أمر الخطبة بلا والدته.. لو ذهب بمفرده لاتهمه أهل العروس وأهل حارتها بعدم الجدية في الأمر.. أطرق هنيهة ثم رفع رأسه يقول باسماً: خالتي كريمان ههه مافيش غيرها

 

أمسك بهاتفه ودق على رقم خالته، التي استيقظت فزعة وصاحت به:

 

ايه يا بني أدم يا عديم الذوق والشعور. حد يتصل بحد في وقت زي ده! مش عارف إني بنام بدري عشان اروح المدرسة اللي قلبتهالي كُتّاب تحفيظ قرآن يا متخلف!!

 

ههه ازيك يا خالتو

 

أهلاً يا سئيل يا رزل. عايز ايه

 

محتاجلك

 

محتاجلي يعني ايه!!

 

شوفي يا خالتي كريمان.. أنا قررت أخطب إنسانة وماما مش موافقة عليها، لدرجة انها سابت الفيلا لحد معاد طيارتها للندن، وبالفعل سافرت عند شذى أختي

 

فركت عينيها واعتدلت جالسة، وسألته بانتباه:

 

ليه؟ هو انت عايز تخطب مين؟

 

فاكرة نعمة؟

 

ايه نعمة دي؟

 

البنت اللي جت تشتغل مدرسة موسيقى عندنا في المدرسة

 

أها.. اللي جت بدل مدام رفايلا خوان بابلو؟

 

ايوة.. هي دي

 

هي دي ايه! تقصد هي دي البنت اللي عايز تخطبها؟

 

ايوة

 

أطرقت تفكر، ثم تبسمت وعيناها تلمعان بالمكر وقالت؟

 

عشان كدة بقى مريهان زعلت منك وسابت الفيلا وطارت على لندن؟

 

ايوة

 

ههه ممم مالهاش حق، ليه يعني تكسر قلبين بيحبوا بعض! كل ده عشان البنت فقيرة!

 

يعني انتِ موافقة يا خالتي وما عندكيش مشكلة

 

أنا عندي مشكلة وحيدة وهي انك بتقولي يا خالتي، محسسني إني بياعة في سوق الخضار.. قولتلك ألف مرة تقول يا طنط، أو أونت، أو خالتو، مع اني مش بحب العربي خالص

 

ههه حاضر يا خالتو

 

بتطلع من بقك مزعجة، بس مش مشكلة.. أنا هقف جنبك

 

يا حبيبتي يا خالتو ههه مش عارف أقولك ايه

 

نو نو، مش تقول حاجة. انت زي اخويا الصغير

 

ههه متشكر يا خالتو.. على العموم أنا معادي مع أهل العروسة الجمعة الجاية إن شاء الله بعد العشا.. هعدي عليكِ أخدك بالعربية

 

أوكيه، نو بروبلم ، هكون جاهزة

 

إن شاء الله.. مع السلامة

 

باي باي يا عمر

 

وضعت الهاتف جانباً، وقامت عن الفراش، وخرجت من غرفتها عامدة الردهة.. جلست على إحدى الأرائك وتثاءبت تمدد ذراعيها..ثم طفقت تنادي الخادمة:

 

فاطيما

 

فاطيمااااا

 

كانت الخادمة الخمسينية تصلي ما شاء الله لها أن تصلي من قيام الليل.. فأربكها صوت سيدتها، فأسرعت تختم الصلاة، وانتفضت عن سجادتها وهرعت إليها:

 

ايه ده! انتِ ايه اللي صحاكِ في وقت زي ده يا كريمان هانم؟

 

 روحي هاتيلي كوباية لبن دافية.. بس يكون خالي الدسم

 

لبن ايه في ساعة زي دي! حضرتك زي دلوقتي بتكوني في سابع نومة

 

تليفون من عمر المزعج صحاني

 

ليه كفاالله الشر؟ في حاجة؟

 

ههه خبر يجنن يا فاطيما

 

امتعضت الخادمة من اسم فاطيما وأطرقت تغمغم:

 

الصبر من عندك يا رب

ثم قالت بصوت جهور لسيدتها:

 

يا هانم أنا اسمي فاطمة، من خمس سنين من ساعة ما اشتغلت عند حضرتك، وانا بقولك اسمي فاطمة. فاطيما ده ايه!

 

لا أنتِ فاطيما.. فاطيما أحلى كتير من فاطمة، وفي ميوزك حلوة قوي

 

اللي انتِ عايزاه قوليه، الأسامي ما بتلزقش, ما قولتليش صحاكِ ليه الأستاذ عمر؟

 

ههه أصله عايز يخطب بنت حقيرة من الفقراء، والموضوع ده زعل مريهان أختي وسابتله الفيلا وسافرت على لندن

 

لا حول ولا قوة إلا بالله! هما الفقرا بقيتوا تحتقروهم كمان!! طيب وحضرتك ايه اللي مفرحك ومطير النوم من عينك كدة؟

 

أصل الحكاية دي بجد فرحتني كتير.. زعل عمر ومريهان هيخليهم يبعدوا عن بعض، وخصوصا لو الجوازة دي تمت.. في الحالة دي، مريهان أختي هتغضب على عمر وتسحب منه إدارة المدرسة.. في الحالة دي أظهر أنا بقى واشتري نصيبها وتبقى المدرسة كلها بتاعتي واتصرف فيها زي ما انا عايزة، وأول حاجة هعملها إني هطرد محفظين القرآن اللي ملوا المدرسة، والمدرسات اللي لابسين حجاب المستفزين دول أوووف

 

لا إله إلا الله!! ليه بس كدة يا كريمان هانم! حد يكره القرآن والحجاب برضو!! ده بدل ما تلبسي الحجاب انتِ كمان وتقولي يا رب توبة!!

 

ايه يا رب توبة دي! شيفاني رقاصة ولا ببيع مخدرات!!

 

مش دول بس اللي محتاجين توبة، اللي بيلبسوا عريان ومكشوف دول محتاجين توبة نصوحة بدمع العين قبل ما ربنا ياخدهم

 

ربنا ياخدك انتِ يا مستفزة. أنا لسة قاعدة شوية كتير

 

ههه هو حد ضمن عمره!! دانتِ لسة بتقوليلي على ابن صاحبتك اللي عمل حادثة ومات

 

ده ولد مستهتر .. كان بيسوق عربيته بجنون.. لكن أنا بسوق بشويش وبخلي بالي كويس

 

ههه يا مدام كريمان ده الموت ممكن يجيلك قبل ما تشربي اللبن الخالي الدسم اللي طالباه

 

أخرسي يا مجرمة بدل ما ارفدك.. كلامك كله عن العالم الآخر ومش مركزة معانا في الدنيا

 

هييييح ربنا ما يجعلها في قلوبنا ولا تشغل بالنا.. الواحد همه يدخل الجنة

 

ههه ممم عايزة أسألك سؤال يا فاطيما

 

اتفضلي يا كريمان هانم

 

لو انتِ متِ وروحتي العالم الآخر، لكن مش لقيتي الجنة والشجر والنخل والدهب وكل الكنوز والأنهار والقصور اللي انتوا مصدقين وجودها .. هتعملي ايه؟

 

شوفي يا كريمان هانم.. هما طريقين مالهومش تالت.. الطريق بتاعنا اللي احنا مصدقينه ومؤمنين بيه وإن الجنة حق والنار حق.. والطريق بتاعكو اللي بيقول مافيش لا جنة ولا نار والناس لما تموت هتبقى عدم... لو جاوبتك على سؤالك يبقى لازم تعرفي إن الطريقين مافهومش أذية بالنسبة لي كواحدة لابسة حجاب وبتصلي وبتطيع ربنا

 

ازاي؟

 

يعني يا كريمان هانم، لو لقيت الجنة وإن شاء الله هلاقيها وربنا يجعلني من أهلها، يبقى أنا كدة فوزت فوز عظيم وهعيش في نعيم.. ولو على كلامكو الفارغ انها مش موجودة والإنسان هيبقى عدم وكأنه لا كان ولا عاش.. يبقى برضو مافيش أذية وهبقى شوية تراب يطيروا في الهوا.. لكن انتو بقى يللي بتقولوا مافيش لا جنة ولا نار اللي هتبقى وقعتكو سودة لما تلاقوا كلامنا صح وتلاقوا النار في وشكو وتدخلوها خالدين وجتتكوا تتشوي فيها لأبد الآبدين

 

ارتجفت السيدة كاريمان خوفاً وقالت منكمشة:

 

يا مامي

 

لا، ده لا مامي ولا بابي ولا هتلاقي حد ينجدك.. انفدي بجلدك والبسي الحجاب وقومي صليلك ركعتين وسيبك من الدنيا الفانية

 

أوووه.. انتِ مزعجة كتير .. روحي هاتي اللبن الخالي الدسم وسيبني أفكر أخد المدرسة ازاي من مريهان وابنها المتخلف

 

حاضر يا مدام.. هجيبلك كوباية اللبن واروح اكمل صلاة.. ربنا يهديكِ

 

أشاحت السيدة كريمان بيدها متأففة.. وعادت تفكر في الخلاف الذي نشب بين عمر ووالدته، وكأنه جاءها على صحيفة من ذهب لتحقق مآربها

 

 

*****************************************

سمعت ميسون، الزوجة الرابعة للمعلم عدوي، أثناء حديثه عبر هاتفه مع كبير رجاله، معلومات عن غريمتها جباير، زوجته الأولى والتي تود الانتقام منها، ورد صاع الإهانة صاعين.. فهي لم تنس أنها أركعتها تحت قدميها وأجبرتها على غسلهما إمعاناً في إذلالها.. لذا شحذت مسامعها علها تجد سبيلاً للانتقام...  قال عدوي أثناء الحديث:

 

يعني جباير مسافرة بكرة عاليونان عشان توصل الألماظ والجواهر يداً بيد للخواجة أندرياس ورجالته! طب وهتهرب البلاوي دي ازاي! ..... ههه على رأيك مش هتغلب.. متشكرين عالمعلومات النوفي يا شردي.. ابقى عدي عليا بالليل في العوامة.. أه رايح الليلة دي.. سلام

 

جلست على ذراع المقعد الذي يجلس عليه وقالت بتغنج وهي تداعب وجنته:

 

دودي

 

ههه يا عيون دودي

 

هي ايه حكاية الألماس والمجوهرات اللي هتهربهم اللي اسمها جباير دي؟

 

تربد وجهه وقال بنبرة تحذير:

 

لا بقولك ايه، أنا احب اللي يقعد معايا في مجلس، يبقى أطرش واعمى واخرس، يعني لا احب حد يسألني عن كلام سمعه ولا له دعوة بللي بقوله

 

كدة برضو يا دودي! وانا اللي كنت فاكراك بتحبني!

 

الحب حاجة ورغي الحريم حاجة تانية.. أحب الحريم واعزهم آه، لكن ولا مؤاخذة ما حبش رغيهم في اللي مالهومش فيه

 

هو انا يعني بسألك ليه! ما هو من باب الدردشة

 

ابقي دردشي مع امك، مش مع المعلم عدوي

 

ممم طيب، على راحتك، مش عايزة اعرف حاجة .. لكن قولتلي هي مسافرة بكرة على اليونان؟

 

ما قولتلكيش انتِ، أنا قلت لشردي.. انتِ شردي؟؟

 

قامت عن ذراع المقعد متأففة وقالت:

 

خلاص يا سيدي مش عايزة اعرف حاجة. هروح اشوف بتاع الدليفري اتأخر ليه

 

ايوة كدة، اشغلي نفسك بللي يخصك يا مرسون عشان تعمري معايا أطول فترة ممكنة

 

أسرعت بهاتفها إلى غرفتها واتصلت بالمطار لتستعلم، فرد عليها الموظف:

 

مساء الخير يا فندم

 

مساء النور، لو سمحت كنت عايزة أعرف معاد طيارة بكرة اللي طالعة على اليونان

 

لحظة واحدة............. هتطلع الساعة عشرة مساءاً

 

هه جراتسي

 

شكرت الموظف بالإيطالية، وأنهت المكالمة منتشية، وقالت بوعيد باسم:

 

طيب يا حشرة يللي اسمك جباير.. إن ما بلغت عنك وعن المجوهرات اللي عايزة تهربيها، ما اكونش أنا ميسون ههه سجنك هيكون على ايدي، وساعتها اودعك واقولك، اريفاديتشي ههه

 

**************************************

تفاجأت هالة أثناء تواجدها في مقر عملها، بدخول والدها:

 

السلام عليكم

 

وقفت ترحب به مبتهجة:

 

عليكم السلام ورحمة الله وبركاته يا بابا، ايه المفاجأة دي يا حبيبي!

 

الحقيقة جاي أكلمك في موضوع خاص بعيد عن امك

 

ههه اتفضل اقعد يا بابا، واقف ليه!

 

جلس والدها فقالت:

 

أطلب لحضرتك قهوة ولا شاي؟

 

لا. القهوة هناخدها في مكتب الأستاذ منتصر

 

أسدلت حاجبها وقالت باندهاش:

 

منتصر!... هي ايه الحكاية يا بابا؟

 

شوفي يا بنتي، أنا هديكِ فكرة عن الموضوع قبل ما نروحله

 

اتفضل يا بابا. سامعة حضرتك

 

أخبر ابنته بالأمر، فارتبكت وجال بخاطرها تساؤلات أرجأت الإفصاح عنها ، واصطحبت والدها لمكتب الأستاذ منتصر، الذي استضافهما بترحاب كبير في مكتبه:

 

يا أهلاً وسهلاً يا عمي. والله مفاجأة أسعدتني

 

الله يحفظك يا ابني

 

حضرتك تاخد قهوة ولا شاي ولا حاجة ساقعة، ولا جعان ابعت اجيبلك سندوتشين فول؟

 

هه لا كفاية فنجان قهوة على الريحة، أشربه واحنا بنتكلم في الموضوع اللي جايلك بخصوصه

 

تحت أمرك يا عمي، هنادي على الساعي يجيب القهوة.. تاخدي حاجة يا هالة؟

 

لالا متشكرة

 

*************************

ارتشف والد هالة رشفة من فنجان القهوة، وهو ينظر إلى منتصر، الذي بدت على وجهه استفسارات عن سبب الزيارة .. فقال والدها:

 

أنا عايز أسألك سؤال يا أستاذ منتصر

 

اتفضل يا عمي

 

إنت ما زلت متمسك بهالة بنتي؟

 

ده سؤال يا عمي! أنا كل يوم بيزيد تمسكي بهالة أكتر من اليوم اللي قبله.. بس حضرتك عارف إن والدتها طالبة شبكة تعجيزية. إزاي شاب في ظروفي يقدر يجيب شبكة 100 جرام دهب إلا اذا كان حرامي وابوه حرامي.. أو غني بقى ومولود في بقه معلقة دهب.. لكن واحد زي حالاتي من أسرة متوسطة اتفرمت تحت عجلات غلاء المعيشة ، ما يقدرش يجيب شبكة بالتمن الباهظ ده

 

 

يا ابني طالما متمسك بهالة بنتي يبقى لازم تجيب 100 جرام دهب

 

ازاي بس يا عمي! هو انا ساحر ولا حاوي!

 

أخذ والدها رشفة أخرى من فنجان القهوة وقال:

 

اسمع يا منتصر يا إبني، عشان إنت شاب ممتاز، وأنا معجب بيك جداً، وبتمنى إن جوازك من بنتي يتم بمنتهى السهولة واليسر، ومن غير تعقيدات والدتها.. فأنا عندي خطة هتخلي والدتها توافق على جوازكم وهي في منتهى السعادة، وتزغرتلكو كمان

 

انتبه الأستاذ منتصر بكل حواسه وسأله:

 

ايه الخطة دي يا عمي؟؟

 

قهقه والد هالة وقال:

 

الدهب الصيني

 

فغر فاه مدهوشاً هنيهة، ثم قال:

 

حضرتك تقصد إني أشتري للأنسة هالة، دهب صيني فالصو، بدل الدهب الحقيقي؟

 

أخذ الرشفة الأخيرة من قهوته، ووضع الفنجان جانباً وأجابه باتزان:

 

ايوة

 

ايوة ازاي يا عمي! وهي والدة هالة هترضى؟

 

ما هي مش هتعرف إنه مش حقيقي، احنا هنقولها ان دول 100 جرام دهب حقيقي

 

مطت هالة شفتها وقالت:

 

الخدعة دي مش هتنطلي على ماما يا بابا؟

 

ليه بقى؟

 

لأن ماما عارفة ظروف منتصر كويس قوي، وده سبب رفضها له

 

ما هو ده بقى الكلام اللي انا جايلكو فيه، وهنحتاج معانا والدة منتصر عشان تساعدنا

 

فغر الأستاذ منتصر فاه، ثم قال مندهشاً:

 

أمي!!

 

عاد منتصر إلى أمه بخطة محكمة وضعها والد هالة.. كانت أمه لم تعد بعد من عملها كمدرسة تاريخ.. استبدل ثيابه وجلس ينتظرها.. وبعد قليل، سمع صوت المفتاح يدور في الباب، وصوت أمه يتحدث إلى غلام بالخارج:

 

كتر خيرك يا حبيبي، هات شنطة الخضار بقى واتوكل على الله، ألف شكر

 

العفو يا طنط

 

دخلت أمه منهكة، تحمل حقيبة التسوق فوق صدرها بأنفاس لاهثة، ووجه متعرق، فلحقها منتصر ليحمل عنها الحقيبة:

 

عنك يا أمي

 

الله! انت هنا يا منتصر، ولابس البيجاما كمان!

 

أخذ عنها الحقيبة وقال:

 

لسة واصل، ما بقاليش كتير. اتأخرتي ليه كدة النهاردة يا أمي؟

 

 

****************************************

ونواصل حكايات أهل الحارة في الأسبوع القادم إن شاء الله

 

لا تنسوا ذكر الله والصلاة على الحبيب عليه الصلاة والسلام

 

لا إله إلا الله ولا حول ولا قوة إلا بالله

 

اللهم صل وسلم وبارك على نبينا محمد