يا اسكندراني يا ابو اسكندر

يا اسكندراني يا ابو اسكندر

يا اسكندراني يا بستاني في جناين الريح

بين شطين ومية عشقتكم عنيا يا اهل اسكندرية

ايّوووووه وربنا بنحبوكوا يا جدعان

ناس زي العسل ورجالتهم وستاتهم جدعان قوي, سواء ناس بسيطة من مناطق شعبية وبينتموا لطبقة الحرفيين أو الصيادين أو أي حد بيتوكل على الله ويسعى على رزقه ساعة صبحية ..أو سواء كانوا ناس بينتموا للطبقات الراقية والمثقفة..أي حد يعاشرهم يعرف قد ايه هما ناس راقيين ومهذبين وابتسامتهم ما بتفارقش وشهم

ومن عشقي لاسكندرية أنا وزوجي نقلنا حياتنا كلها فيها رغم اني قاهرية من أصول صعيدية وزوجي منياوي أصيل, لكن نعملوا ايه! بنعشقوا اسكندرية ههه

أحلى حاجة في اسكندرية مش بس البحر والترام وعبق الماضي القديم الساحر اللي بتشهد بيه المباني والشوارع القديمة ..اسكندرية كيان ساحر وروح خالبة للألباب, لكن أروع ما في اسكندرية أهلها

لكن للأسف في ناس بتشوه أهل اسكندرية المتحضرين الراقيين اللي هما جزء لا يتجزأ من الحضارة القديمة

الناس دول اللي دايماً يتكلموا بلهجة تعالي على أي حد يدخل اسكندرية, سواء مصطاف أو وافد للإقامة , ولأن الناس دول من جواهم مش مصريين حقيقين فهما بيتباهوا بعشرتهم القديمة لليونانين والطاليانا أو أي أجنبي غير ناطق بالعربية ,المهم يكون خواجة ببرنيطة وبيرطن عشان يفتخروا أنهم عاشروه وأخدوا طباعه الخواجاتي المفتخرة , يكون اسمه بنايوتي بقى أو باولوا أو ستيفانو, المهم ما يكونش اسمه حسنين ولا محمدين ولا جاي من الأرياف أو النجوع ( يا قلبي يا موجوع) طيب ليه ! عشان ايه ! مااعرفش

لدرجة إن زمان الاسكندرانية الأصليين كانوا بيقولوا بدل أنا (أني ) وكانت بتطلع من بقهم زي العسل ولها رنة في الودن غير ..لكن عشان ما يتشبهوش بالفلاحين اللي هما شايفينهم مش من مستواهم كان لازم الكلمة دي تنطمس على ايد الجيل الجديد واللي يجيب سيرتها يستحق يرموه في المالح هههه عن نفسي لما عملت رواية ونص احداثها إن ما كانش تلتينها بيدور في اسكندرية ,فلما كتبت (أني) وبعض الألفاظ زي نطلعوا  ننزلوا نجيبوا نودوا ,  طلعوا عليا بعض الاسكندرانية كانوا هياكلوني, لدرجة واحدة بتقولي سهل قوي تتكلمي  مع اي حد اسكندراني عشان تعرفي اننا مش بنتكلم كدة( والله يا قطتي أنا باجي اسكندرية من وانا صغنونة على ايد ماما وطول عمري باجي اسكندرية والكلام ده بيطس في ودني طول ماانا ماشية ,يعني مش بتبل عليكو ولا حاجة ولا هي تهمة عشان تنفوها عن نفسكو ومش عشان حضرتك بطلتي تتكلمي اسكندراني يبقى هيتلغي من الوجود, لا والله , لان اصلاً احلى حاجة في الاسكندرانية لهجتهم,بنموتوا عليها وربنا ونعشقوا نسمعوها هههه

ولو أنا مشيت على منطقك يبقى لما اجي أعمل رواية صعيدي تقوم تيجي واحدة بتقلد القاهريين وتقولي احنا مش بنتكلم كدة !!! وبعدين أنا ماليش علاقة انتِ أو غيرك بتتكلمي ازاي , أنا بتكلم عن اللهجة الأصلية وماليش علاقة بالمستحدثة

يعني دلوقتي الاسكندرانية اللي من نوعيات الناس دول عندهم همين,الأول إنهم يثبتوا انهم ناس راقيين لانهم عاشروا الطالينة واليونانين, والهم التاني انهم يثبتوا حقارة الغير عن طريق التعالي والتنصل من أفعالهم

أولاً بالنسبة للهم الأولاني وربنا يكفيكو شر الهم, إنكو تتباهوا بعشرة الخواجات من يونانين وطاليانا وتقولوا انهم علموكوا الاتيكيت وفن التعامل ,فاسمحولي اقولكو ان دي خيبة تقيلة ,لان معنى كدة انكم كنتم ناس جهلة وهمج وسوقة ودول اللي علموكوا فنون الحضارة والإتيكيت, وأنا كمصرية ما اقبلش كدة لان دي بيقل قيمتنا كلنا لاننا واحد,اه والله واحد,اصل كلمة في سركو كدة مصر دي بلدنا كلنا بمحافظاتها بقى بقراها بنجوعها بأريافها , وبما إن اسكندرية جزء من مصر فمن حق كل مصري انه يجي في اي وقت لانها بلده,الراجل لا اتغرب ولا ركب طيارة ولا عدا على حدود, دي بلدنا يا جدعان

(وبالنسبة لأنكو عشرة طليانا ويونانين وسكنتوا جنب خالتي كاتينا وجوزها الخواجة كرياكوس, فأحب ألفت انتهباكو إن اللي علم أوروبا الإتيكيت والنضافة وفنون الحضارة هما العرب لما دخلوا أوروبا , واللي عايز يتأكد يرجع للتاريخ ويشوف أوروبا كانت ازاي عايشة في جهل وتخلف وما يعرفوش حتى أبسط قواعد النضافة, وعلى الأصل دور ههه

الهم التاني بقى وهو اثبات حقارة الغير والتعالي عليهم, فدي مش أخلاق ناس مؤدبين وعشرة خواجات ههه

وكمان بقى حابة اقولكوا اذا كنتوا بتتعالوا على الفلاحين ولهجتهم,فالشيخ الشعراوي رحمة الله عليه كان فلاح ولآخر يوم في عمره كان بيتكلم باللهجة الفلاحي اعتزازاً بيها وعدم تنكر لأصله البسيط

وكمان الست ثوما(أم كلثوم) اللي كتير منكم بيحبها فدي برضو كانت فلاحة بسيطة وعايشة في الأرياف

الفلاحين منهم زعماء وأدباء وناس من أروع ما يكون, وكلهم كانوا اهاليهم من بسطاء الناس لكن قدروا يربوهم ويعلموهم ويخلوهم اسماء رنانة ومثار للفخر

وإذا كنتم بتتعالوا على الصعايدة ,فلا لا لا استوب وألف ستوب يا خواجة منك له لها , عباس العقاد  وهو رائد من رواد الأدب والثقافة كان صعيدي

الدكتور مجدي يعقوب جراح القلب العالمي صعيدي وينتمي لأسرة قبطية أساسها من المنيا

الأديب طه حسين وهو له من العشاق كثيرين كان من الصعيد, وغيره كتير وكتير

وبعدين هو أصل اسكندرية الجميلة وناسها ايه؟ تعالوا افكركوا اذا كنتم ناسيين

عمكو الاسكندر ذو القرنين لقى جماعة من الصيادين في قرية صغيرة وبسيطة على البحر اسمها  راقودة وباليوناني راكوتيس(مكان كرموز بالضبط), قالك بس, هنا , هي دي المدينة اللي هبنيها وسماها اسكندرية , اسكندرية اللي كلنا روحنا فيها ومن حقنا كلنا كمصرين

يعني اهالينا الاسكندرانية القدام اللي هما أصل البلد كانوا صيادين بسطاء, وانتوا من نسلهم ونسل نسلهم , لا عيب ولا حرام ولا شيء مشين, العيب بقى اننا ننسى اصولنا ونتلزق في الاجانب ونقول دول عشرتنا ودول حبايبنا اللي علمونا الاتيكيت, ولما يجيلنا المصري اللي زينا من أي مكان نهينه ونشتمه على صفحات الفيس ونقول عليه سوفاج ههه طب ليه كدة يا واد عمي,مانا مصري زيِيك برديك هههه

أنا عارفة ان في ناس بسطا بيجو من الأرياف وبيتصرفوا تصرفات منفرة ومثيرة للاشمئزاز, في الحالة دي نخلي أمن الشواطئ أو العاملين عليه يراقبوا التصرفات دي ويمنعوها, حاجة سهلة قوي يعني مش معضلة, يعني لو واحد لابس لبس غير لائق بالطريق العام ,الأمن يوقفه ويمنعه,وكمان حراس الشواطئ يمنعوه,يبقى اكيد مش هيعمل كدة تاني,لكن المسؤولين بيسيبوهم ومش بياخدوا موقف ضد التصرفات أو الملابس الغير لائقة, يبقى هما في نظرهم إن طالما ما حدش اعترض يبقى ماحدش متضايق..كون انهم بسطا فده مش عيب وسهل قوي نقوم سلوكهم , وكمان ما ننساش ان في برضو اسكندرانية لهم تصرفات غير لائقة نهائي بالسلوك العام ..يعني مش بس البسطاء من الصعايدة والفلاحين, كل اللي بيتصرف تصرف غير لائق لازم تقويم سلوكه من المختصين بالأمر

ملحوظة ( ماحدش يجي يقول لالالا اللي بيعموا كدة مش اسكندرانية ,دول الناس اللي بتيجي من الأرياف والصعيد..وهنا عايزة اسأل سؤال بيلح علية قوي

هو حضراتكم سكان المدينة الفاضلة اللي كتب عنها الفارابي واللي هي ترجمتها بالانجليزية يوتوبيا؟

بالتأكيد المدينة الفاضلة مكان لا يتفتق عنه سوى الخيال, كل مجتمع فيه الطيب والخبيث والمستقيم والمنحرف, فمش كل ما سواق توكتوك ولا بلطجي يعمل مصيبة تقولوا لالالا ده مش اسكندراني, ده من الوافدين من الفلاحين والصعيد

عارفين ان في منهم من الفلاحين والصعيد لكن برضو في نسبة كبيرة منهم اسكندرانية, انتو محسسينا ان الاسكندرانية امراء في قصور والخدم والحشم من الصعايدة والفلاحين, أنا عمري ما ركبت تاكسي إلا كان السواق اسكندراني, ودي فيها ايه يعني ! اغلب الصنايعية والحرفيين اللي اتعاملنا معاهم في توضيب شقتنا كانوا اسكندرانية وبتاع الستاير وبتاع المطبخ والكل كليلة اسكندرانية

كلنا شقيانين ولاد شقيانين من أصل كله شقا, وآخرتنا جثة هتترمي في حفرة ياكلها الدود وتبقى رمة وتتحول تراب , سيبكو بلا نعرة كدابة , احنا هننسى اصلنا وأصل اللي جابونا ولا ايه! وبلاش يا جماعة بالله عليكو نميز ونقول فلاح وصعيدي واسكندراني ونتعالى على بعض

الرسول عليه الصلاة والسلام قال في حديث صحيح( من ادعى دعوى الجاهلية فإنه من جثي جهنم,فقال رجل يا رسول الله,وإن صلى وصام؟ قال وإن صلى وصام, فادعوا بدعوى الله الذي سماكم المسلمين المؤمنين عباد الله)

هدانا الله وإياكم

دمتم في أمان الله