الحلقة السادسة والستين (ف2)

الكتاب: خلف هذه الجدران  

الجزء الخامس

بقلم: هبة عبد العظيم نور           

الناشر: المؤلف

رقــــم الإيداع: 00000/2017م

منورة يا ست ثريا , الست سعاد نازلة حالاً

على راحتها , ازي ولادك يا شوقية 

الحمدلله يا ست ثريا , اهو البنتين في بيوتهم والولا في ورشة النجارة مع عمه

ما علمتيهوش ليه بس يا شوقية ؟

ما رَضَاش , مش غاوي علام من صغره , خد الاعدادية بالعافية ونَزَل وَقَف مع عمه في ورشة النجارة واتجوز بنته وخلف ولا وبت واهي الدنيا ماشية

والبنات متعلمين ؟

هند معاها دبلون تجارة ومايسة معاها دبلون صنايع ,خدوا الدبلونات واتجوزوا من سنين يامَا وخلفوا واهم عايشين بيربوا العيال

بتزوريهم ؟

ايوة اومال , بس مش دايماً يعني , كل اسبوعين تلاتة نروحوا نطلوا عليهم ونعدوا ع الولا في الورشة نطمنوا عليه ونرجعوا

لكن هما ما بيجولكيش هنا ؟

لا , من زمان واحنا ما نحبوش العيال يجوا هنا

سعاد منعاكِ تدخليهم ؟

ابداً وربنا , الست سعاد طول عمرها تقولي لو عايزة تجيبي العيال هنا هاتيهم يلعبوا في الجنينة , بس احنا ما كناش بنرضى بسبب سي أدهم , نخافوا يتطاول عليا قدام عيالي ويزعلوا ويشيلوا في نفسهم لما يشوفوا امهم بتتهان , ومن يمة تانية كنا بنخافوا يشتمهم ولا يقولهم امكو خدامة ويكسر بخاطرهم , وانا عيالي غالين عليا يا ست ثريا

الله يخليهوملك يا شوقية ويصلح حالهم وحال عيالنا

آمين يا رب , سي علي ابنك لسة ما خطبش ؟

لا لسة

ربنا يرزقه ببنت الحلال

كله مقدر ومكتوب يا شوقية

الست سعاد نازلة اهيه , هنروحوا نعملولكو اتنين شيّ , بالإذن يا ست ثريا

اذنك معاكِ يا شوقية

أهلاً

أهلاً بيكِ يا سعاد ... ازيك وازي صحتك ؟

كويسة .... تاعبة نفسك وجاية لحد هنا عشان تسألي عن صحتي !!!

وفيها ايه !

قصّري وهاتي من الآخر يا ثريا , ادخلي في الموضوع دوغري وقوليلي جاية ليه

جاية نقولولك ان الزمن دوّار , اللي بيأذي بني أدم في يوم لابد تتردله الآذية

............. قصدك ايه يا ثريا ؟؟؟؟

قصدي انك خوضتي في أعراض ناس يامَا يا سعاد ومن ضمنهم أشجان اختي وغيرها وغيرها , وكنتِ فاكرة بجبروتك ان اللي بتعمليه مالوش مردود, لكن لا ... ربنا يمهل ولا يهمل يا سعاد , ادي بنتك اترد فيها كل اللي عملتيه واللي هي كمان عملته , يامَا بنتك خاضت في أعراض بنات الناس وما رحمتهومش بلسانها , وجه اليوم اللي تدوقوا فيه الظلم يوم ما اتقبض على بنتك في تهمة تمس الشرف , لَبَستها تهمة زور في زور , ....... دوقتوا مرارة الظلم يا سعاد ؟؟؟؟

............. انتِ جاية تشمتي فيا وفي بنتي يا ثريا ؟...... كنت فاكرة انك جاية تعزيني في اختي

حد الله بيني وبين الشماتة يا سعاد , ربنا يعلم أن ده مش قصدي من الزيارة

أومال قصدك ايه من ورا الزيارة يا ثريا ؟؟؟

قصدي انك تتعظي يا سعاد , اتعظي وفوقي قبل الآوان .... ادي اختك وأقرب الناس ليكِ راحت في التراب بعد عُمر طويل عاشته بالطول وبالعرض كانت فاكرة ان مالوش نهاية , اتنعمت في العيشة اللي اتمنتها من صغرها , لبَست الحرير ... اتزينت بالجواهر ....ملكت نعيم الدنيا بإديها الاتنين , لكن في الآخر ماتت وسابت ده كله ... الأجل خَلَص واتدفنت في التراب , راحت لربها بعملها , عملها بس , لا حرير ولا جواهر ...الدنيا مش دايمة يا سعاد ,مش دايمة , والعاقل اللي يتعظ بغيره , نبص للي ماتوا وسابوا الدنيا خدوا منها ايه !!! .... أنا فكرتك بللي حصل لبنتك عشان نقولولك ان ده حساب الدنيا الهيّن , حساب يوم القيامة أكبر من كدة بيامَا يا سعاد , احنا مش حِملُه .... فوقي يا سعاد ... فوقي قبل ما يجيلك الموت زي ما جَه لاختك ... كانت عايشة معاكِ بتضحك وتتكلم وتروح وتيجي ولا على بالها , في لحظة واحدة بقت بين أيادي الله ... والله أعلم مصيرها ايه عنده ..... فوقي يا سعاد قبل ما يفوت الآوان .... أنا قلت اللي عايزة نقوله وفكري فيه كويس .... أنا ماشية

...............................................................

الله ! هي الست ثريا مَشَت يا ست سعاد ؟

...................................................

ست سعاد

................................................

مالك يا ست سعاد ... ايّووووه ! ايه الدموع دي كلها يا حبيبتي  !!! هي الست ثريا قالتلك حاجة زعلتك ؟؟؟

............... سيبيني لوحدي يا شوقية ... أنا حاسة ان نفَسي رايح ومش قادرة نتكلم

يا حبيبتي !! هو حصل ايه بس ؟؟؟

أنا ...... أنا عايزة ننام

اطلعي يا حبيبتي نامي وارتاحي

لا ... أنا مش عايزة ننام ... أنا ..... أنا هنلبس ونخرج

هتروحي فين ؟؟؟؟؟؟؟

**************************

خلف هذه الجدران,هبة عبد العظيم نور

**************************

تررررررررررررررررررررررررررررررررررررررررررررن

ادخلي جوا يا هيام انتِ وامي لما نشوفوا مين ع الباب

حاضر يا حبيبي , تعالي يا ماما

طيب يا حبيبتي

****************

أمي !!!!!!!!!!!!!!!

...... أزيك يا احمد

أنا بخير طول ما انتِ بخير يا أمي , اتفضلي يا حبيبتي , اتفضلييييي , يا هيام , يا هياااااااام , امي جت يا هيااااااام , أمي هنااااااا ههههه

معقووول !!! ههههه ايه النور ده يا طنط ! وربنا ما مصدقة عنيااااااا

ازيك يا هيام

الله يسلمك يا طنط هههه والله العظيم أنا مش عارفة أوصفلك فرحتي قد ايه لما شوفتك

تعيشي يا هيام ... كتر خيرك

الست ام احمد ! هه ايه النور ده يا حبيبتي ! نورتي بيت ابنك

تعيشي يا ام خالد , ده نورك انتِ

تسلمي يا ام احمد , وربنا يا حبيبتي لما سَمَعت بموت اختك الله يرحمها كنت عايزة نيجو نعزوكِ , لكن ........ يعني ما حبيناش نضايقوكِ ونجولك الفيلا

الفيلا فيلتك يا ام خالد , تشرفي في أي وقت

الله يكرمك ويسعدك يا ام احمد ... انتِ النهاردة بقى تتغدي معانا , هنطبخولك بإديا وندوقوكِ أحلى أكل دوقتيه في حياتك

مالوش لزوم يا ام خالد , أنا جاية لاحمد في كلمتين وهنمشوا على طول

معقول ! ودي تيجي برضو !!! ما تتكلم يا احمد

أمي هتتغدا معانا النهاردة ان شاء الله , عايزين بقى ندوقوها أحلى أكل من ايديكِ يا ام خالد يا عسل ههه

ههه وربنا لنعملولها أكل لا قبله ولا بعده , يلا يا هيام عشان تساعديني

حاضر يا ماما , عن اذنك يا طنط

اتفضلي

نورتيني يا أمي , وربنا أنا الدنيا كلها ضَحَكت في وشي أول ما فتحت الباب ولقيتك قدامي

ربنا ما يحرمنيش منك يا احمد

.........مالك يا أمي ؟ شكلك حزين أوي

اهئ اهئئئئئ أنا تعبانة أوي يا احمد , خدني في حضنك يا ابني , محتاجة لحنيتك

أميييي امووه امووه مالك يا أمي ؟؟؟

أنا مخنوقة ... كَرَهت نفسي وكَرَهت عيشتي وكَرَهت الدنيا كلها اهئ اهئئئئئئ

ليه بس كدة يا أمي ؟؟؟ ... في حاجة زعلتك ؟

ربنا غضبان عليا يا احمد .... مش كدة ؟

ليه بتقولي كدة يا أمي ؟؟؟

اهئ اهئئئ أنا عمري ما صليت ولا مرة في حياتي يا احمد .... طول عمري نكرهوا الصلاة ..... لما كان ابوك يغصب عليا نصلي , كنت نمثل إنّي بنصلي , وأول ما يخرج من الأوضة كنت نشدوا الطرحة من على راسي وننفخ من الضيق ونرموها على الأرض ...... ولما كان يسألني لما يرجع من الشغل , صليتي يا سعاد , كنت نكدبوا عليه ونقولوا أيوة يا عادل ... الصلاة كانت طول عمرها تقيلة عليا

......... كانت متقّلاها الذنوب يا أمي

اهئ اهئئئئئ ....... أنا نفسي نصلي يا احمد ... لكن ربنا مش هيقبل صلاتي

أوعي تقولي كدة يا أمي , ربنا رحمته واسعة وبابه مفتوح للتوبة

يقبل العاصية اللي زيي ؟

ربنا غفور رحيم يا أمي , مهما بلغت الذنوب من عَظَم فرحمته وغفرانه أعظم ... قومي اتوضي يا أمي وانا هنصلي معاكِ , يلا يا أمي , استعيذي بالله من الشيطان الرجيم وقومي معايا

حاضر ...... أحمد

أأمريني يا أمي

أنا عايزة نعمل عمرة

بجد يا أمي !!! ههه دي أحسن حاجة سَمَعتها منك في حياتي كلهااااا

بس انت تيجي معايا , عايزاك انت وبس , انت أقرب إنسان ليا في الدنيا يا احمد

دي قمة السعادة بالنسبة لي يا أمي , النهاردة أسعد يوم في عمري كله والله

ربنا يسعدك يا ابني ويفرّح قلبك

ياااااااااااااااااااه يا أمي ...... أول مرة تدعيلي

أنا طول عمري بندعيلك يا احمد

بس أول مرة نسمعوا دعاكِ ليا يا أمي

وهتسمعه لحد آخر يوم في عمري يا ابني

ربنا يديكِ الصحة والعمر يا أمي امووه , يااااه يا أمي لو تعرفي بنحبوكِ قد ايه

مهما كنت بتحبني , أنا بنحبوك اكتر يا احمد

ههه امووه ربنا ما يحرمنيش منك يا أغلى من حياتي يا أمي

**************************

خلف هذه الجدران,هبة عبد العظيم نور

**************************

تن تن رحمممممة

ادخلي يا ماما

انتِ صاحية ! داني افتكرتك نايمة

كنتي عايزاني في حاجة يا ماما ؟

مش اني اللي عايزاكي , اخوكي احمد جه برا ومستنيكي

احممممممممد هههه اخيراً جه من نفسه يسأل عليااااا ! هغير هدومي وريحاله على طووووول

**************************

خلف هذه الجدران,هبة عبد العظيم نور

**************************

نورتنا يا احمد وربنا , ازي هيام والولا خالد ؟

كويسين الحمدلله يا ام رحمة , وهيام بتقولك هتيجي تزورك بكرة ان شاء الله هي وامها

يأنسوا وينوروا , دي امها دي ست طيبة وأميرة واني نحبوها اوي وربنا

هي كمان بتحبك يا ام رحمة

نعملولك شيّ ولا تتغدا الأول معانا ؟

لا كفاية الشيّ , اني جيت نسلم عليكو عشان طالع عمرة ان شاء الله اني وامي

وربنا ! ههه ربنا يتقبل منكو بإذن الله ممم اول مرة امك تروح هناك

ايوة , كل شيء بأوانه يا ام رحمة , مش عايزة حاجة من هناك ؟

عايزاك تدعيلي وتدعي لاختك رحمة بصلاح الحال يا احمد

ان شاء الله , اومال هي فين رحمة ؟؟؟

بتغير هدومها وجاية على طول , على ما نعملولك الشيّ تكون جت , يلا يا رحمة تعالي كلمي اخووووووكي

جاية اهو يا مامااااا هههه ازيك يا احمددددد وحشتني اووووووي امووووه امووووووووه

ازيك انتِ يا رحمة

مممم احمد انت هتفضل زعلان مني ومتغير معايا طول العمر !!!

اني في يوم من الأيام يا رحمة قولتلك لو جه اليوم اللي نكتشف فيه انك بتعملي الغلط من ورايا مش هتلاقي احمد اللي تعرفيه , هتلاقي واحد تاني عمرك ما عَرَفتيه

يا احمد انا اعتذرت بدل المرة ألف , اعمل ايه تاني عشان ارضيك !!!

يهمك رضايا يا رحمة ؟

طبعا يا احمد , ازاي يكون عندك شك في كدة !!!

طالما عايزة رضايا يبقى توافقي على الجواز من علي ابن خالتك

تاني علييييييي !!! يا احمد الموضوع ده اتقفل بالنسبة لي وبالنسبة له كمان

بالنسبة لك اه , لكن علي لسة عنده امل

لا , يا ريت ما يبقاش عنده أي امل عشان انا مش هغير رأيي , علي مش اكتر من اخ بالنسبة لي

اسمعي يا رحمة , ارفضي علي براحتك  , لكن الولا بتاع القاهرة  ده تنسيه خاااااااااالص

..................... انت ليه بتكره ياسر بالشكل ده

ما تنطقيش اسم الولا ده قدااااااااااامي , ويكون في علمك ده لو اخر واحد في الدنيا برضو مش هنجوزهولك , حتى لو هتفضلي من غير جواز طول عمررررك , والكلام لحد كدة انتهىىىىىى اني ماشي

اني جبت الشيّ يا احمد , انت قايم رايح فيييين ؟

معلش يا ام رحمة , اني اسف , لازم نمشي حالا , السلام عليكم

عليكم السلام يا احمد

في ايه يا رحمة ! احمد كان صوته عالي وبيزعق ليه ؟

اهئ اهئ اهئئئئئئئئ يا ماما ده مش ممكن يكون احمددددد , احمد اتغير خالص يا ماماااااا

ايه اللي حصل بس يا بنتي ؟

اهئ اهئئئئئئ بيقولي ان عمره ما هيوافق على جوازي من ياسر حتى لو ياسر آخر واحد في الدنيا

يا بنتي هو كان ياسر طلب الجواز منك ولا فتح سيرة !!!

هيجي ازاي يطلبني يا ماما وهو شايف كل الكره ده من اهلي وخصوصا احمدددد

احمد قلبه ما يعرفش يكره يا بنتي , احمد بيحبك اكتر من نفسه واني عارفة كدة كويس , موقفه من ياسر ده انتِ السبب فيه , ومش هنتكلموا يامَا في الحكاية دي ولا هنقلّبوا في القديم تاني

يعني كدة خلاص يا ماما !!! اصدرتو حكمكو ان جوازي من ياسر مستحيل !!!!

لا حول ولا قوة إلا بالله ! يا بنتي ياسر ما جاش طلبككككك هنروحوا نجيبوه احنا ونقولوله تعالى اتجوز بنتنااااا !!!

حتى لو جه يا ماما , احمد مش هيوافق

ايّوووووه  اني ماليش دعوة بالكلام ده , هو اخوكي الكبير وادرى بمصلحتك , احمد طول عمره باكي علينا وواقف في صفنا واني مش هنخسروه مهما حصل يا رحمة , اني داخلة نحضروا الغدا عشان ابوكي زمانه جاي

اهئ اهئئئئئئئ ليه بس كدة يا احمد لييييييييه

**************************

خلف هذه الجدران,هبة عبد العظيم نور

**************************

جهَزنا الفطار يا ست سعاد

طيب يا شوقية,هنسبق انا وأوسا ع السفرة وانتِ روحي قولي لادهم يجي يفطر

من عنيا

****************************

تن تن,سي أدهم,الست سعاد والست أوسا مستنينك ع الفطار

طيب

نيجو نزقولك الكرسي؟

لا.أنا هنيجي لوحدي

**************************

خلف هذه الجدران,هبة عبد العظيم نور

**************************

صباح الخير ياامّا

يسعد صباحك يا حبيبي

منور يا برنس ههه,اهو الحبايب اتجمعوا تاني,لفت السنين ودارت وانا وانت رَجَعنا فيلت بابا,أنا متطلقة وانت مراتك طفشانة ههههه

.......................................

اخرسي يا بتتت.ما تسمميش بدن اخوكِ.كان لازم تجيبيله سيرة البت دي دلوقتي!كل يا أدهم,خد حتة الجبنة التركي دي من ايدي.

تسلم ايدك يامّا.

وانا يا أدهم قشرتلك بيضة

هاتي يا ام لسان بينقط سم

ههه وربنا ما نقصدوا نزعلوك.كنا بنهزر عشان نفرفشوك شوية.

البت بنتك عاملة ايه؟

ما تجبليش سيرتها.بت جاحدة,سابتني واترَمَت في حضن ابوها وكأن مالهاش أم.وبكرة تتجوز من غير ما تقولي.ماهي خلاص نَسَت إني امها

بس يا أوسااااا,مش ناقصين نكد ع الصبححح,أخوكِ اللي فيه مكفيه ومش ناقصك

على رأيك يا ماما,كل واحد يشيل هم نفسه عشان ماحدش هيشيلهوله.ناوليني طبق البطاطس المحمرة يا ماما

خدي يختي

تررررررررررررررررررررررررررررررررن

روحي شوفي مين يا شوقيييييية

حاضر يا ست سعاااااد

**************************

خلف هذه الجدران,هبة عبد العظيم نور

**************************

سي أحمدددد هههه

ههه صباح الفل يا خالتي شوقية

صباحك قشطة ولبن حليب بلون قلبك ان شالله ههه امك واخواتك بيفطروا اهو

صباح الخير يا امي , ايدك نبوسوها

يسعد صباحك

عاملة ايه يا أوسا

بناكلوا بطاطس محمرة ههه

هه بالهنا والشفا...ازيك النهاردة يا أدهم؟

زي ما انت شايف

ربنا يتم شفاك على خير يا اخويا

اقعد افطر مع اخواتك يا احمد

سبقتكو يا أمي,أنا قلت نعدي نصبح عليكو قبل ما نروحوا المينا

طب اقعد نشربوا الشيّ سوا

حاضر يا أمي...مش محتاج أي حاجة يا أدهم؟

كويس انك جيت دلوقتي,كنت عايز نديك مفاتيح الفيلا بتاعتي عشان تجيبلي حاجة من هناك

أأمر يا أدهم ,عايز ايه من الفيلا؟

هتروح تجيب مفاتيح الخزنة بتاعة مكتبي في الشركة,وبعدها تطلع ع الشركة تفتح الخزنة وتجيبلي كل الأوراق اللي هناك.

تحت أمرك يا أدهم.

وعايزك بعدها تعرض الشركة للبيع.

ليه بس كدة يا أدهم! خلي الشركة زي ما هي,وربنا ان شاء الله يعافيك وترجع لشغلك من تاني.

أنا حر في ماااااااالي,قولتلك عايز نبيع.

حاضر يا أدهم.اللي انت عايزه هننفذوه

مفاتيح الفيلا هتلاقيها ع السراحة في اوضتي.ولما توصل الفيلا هتطلع الدور الفوقاني, اوضة النوم على ايدك اليمين في الطرقة اللي هتقابلك.هتلاقي مفاتيح الخزنة في ميدالية في درج الكومودينو اللي على شمال السرير..الخزنة لها أرقام سرية هنكتبوهالك

ماشي يا أدهم,هنعملوا كل اللي انت عايزه عشان نريحوك.

**************************

خلف هذه الجدران,هبة عبد العظيم نور

**************************

بت يا عطا , قولي لسي أدهم واحد عايزه اسمه رياض

حاضر يا خالتي شوقية

**********************

تن تن سي أدهم

عايزة ايه يا عطا

واحدعايزك اسمه رياض

رياض!خليه يدخل

حاضر ....اتفضل

أدهم باشاااا,سلامتك يا عم الكل

الله يسلمك يا رياض,أول ما افتكرت تسأل!

وربنا جينالك المستشفى مرتين ولقينا الزيارة ممنوعة,قلنا نستنوا اسبوعين تلاتة لحد ما تتحسن ونقدروا نشوفوك,روحنالك ع المستشفى لقيناك خرجت بالسلامة,روحنا جايين على هنا طوالي.

اقعد يا رياض

ربنا يخليك,سلامتك ألف سلامة يا أدهم باشا,زعلنا يامَا وربنا ع اللي حصلك ده,وكمان زعلنا على ناصر والرجالة

ما تجيبليش سيرة الأندال دوووول,اتخلوا عني لما شافوا قوة رجالة جمال ابو السعد,كانوا عايزين يبيعوني ويضحوا بيا وينجوا بأرواحهمممم,أهم راحوا في ستين داااااااهية,كلاب ورااااااااااحت

خلاص بقى يا أدهم بيه,اذكروا محاسن موتاكم

الأشكال اللي زي ده ما كانش لها محاسن..كنت فاكرهم رجالتي وعزوتي,لكن وقت الجد...لقيت نفسي لوحدي

الحمدلله ان ربنا نجاك يا أدهم بيه

.........تشرب ايه يا رياض؟

ولا حاجة يا باشا,احنا جينا بس نطمنوا عليك

لأ.هنطلبولك شيّ,استنى ندوسوا ع الجرس عشان عطا تيجي

هه انتو الخدامين عتدكو بجرس!

لأ يا رياض..ده عشان انا صوتي ما بقاش يوصل غير بجرس..نفضلوا محبوس في اوضتي وعاجز عن كل حاجة,وماحدش يعبّرني غير بالجرس ده

ربنا يشفيك يا أدهم باشا

ترررررن عطا

نعمين يا أدهم بيه.

اعملي شيّ لرياض وهاتيه بسرعة

من عيني حاضر

بتصرف منين يا رياض طول الفترة اللي فاتت؟

خيرك مغرقنا يا باشا.كنت شايل قرشين للزمن وهما اللي نافعيني وفاتحين بيتي دلوقتي لحد ما ترجعلنا بالسلامة ونفتحوا الشركة من جديد

احنا هنبيعوا الشركة يا رياض

ايه! يعني مش هترجع الشركة تاني؟

نرجعوها ازاي بس يا رياض!.أنا صحتي زي ما انت شايف, وماعنديش استعداد ندخلوا شركتي كل يوم متشال على كرسي....مش بعد ما كنت بقوتي وبندخلوا شركتي واقف على رجليا ورافع راسي ندخلوها وانا متشال يا رياض..الموت عندي أهون

بعد الشر عليك يا أدهم باشا...طب وانا؟...أنا هنعمل ايه!

انت لك عندي مكافأة مية وخمسين الف جنيي.اظن مبلغ محترم تقدر تعمل بيه مشروع على قدك, ولا تتصرف بيهم زي ما انت عايز

طب ما تخليهم متين الف يا أدهم بيه,انت عارف اني لو فكرت نعمل مشروع هنحتاج مصاريف يامَا

ماشي يا رياض,هنخلوهم متين ألف

ربنا يكرمك يا أدهم باشا ويشفيك يارب , وربنا ما عارفين نشكروك ازاي

تن تن..الشيّ يا أدهم بيه

حطيه عندك يا عطا

حاضر...أي خدمة تانية؟

ايوة,افتحي الدرج ده وناوليني دفتر الشيكات والقلم اللي جنبه

شكله ايه دفتر الشيكات ده؟

ايّووووووه الدفتر الزفت اللي هتلاقيه عندك في الدررررج,وهاتي القلم,ولا كمان ما تعرفيش شكل القلمممم!

حاضر,حاضر يا بيه,اتفضل اهم

هاتي

عن اذنكو

ده شيك بمتين ألف جنيي يا رياض

متشكر يا أدهم باشا,ربنا ما يحرمناش منك,احنا هنبقوا نعدوا عليك دايماً عشان نطمنوا على صحتك

اشرب الشيّ يا رياض

يدوم الكرم يا باشا

**************************

خلف هذه الجدران,هبة عبد العظيم نور

**************************

آآآآآآه هنحاول نقوم,عايز نقف على رجلي,آآآآه مش هنفضل محبوس في الكرسي طول عمري لاااا,هنحاول,هنحاووول,آآآآه,آآآخ وقعت,وقعت,ايّوووووه,شوقييييييييييييية,انتِ يا شوقييييييييييييية

جاية يا سي أدهم,ايّوووووه,انت وَقَعت!

كنت عايز نقف يا شوقية,لكن ما قَدَرتش,ماقَدَرتش

لا حول ولا قوة إلا بالله!وليه يا ابني بس تتعب نفسك كدة!دانت لسة بتتعالج

والعلاج مش جايب نتيجة يا شوقية,مش جايب نتيييييييجة,نفسي نقف على رجلي زي زمااااااان

قول يا رب يا سي أدهم,قول يارب,استنى اما نسندوك..بس مش هنقدروا لوحدي,نخافوا نسندوك نقوموا نقعوا سوا,الصحة ما عادتش زي زمان والقوة راحت يا ابني..هننادوا الست سعاد تسندك معايا

لاااااااا,لا انتِ ولا هي!هنسندوا على الكنبة دي ونقوموا آآآآآه,قربي الكرسي يا شوقية

اهو يا سي أدهم, اهو,قوم يا ابني,قوم

آآآآآآآآه الحمدلله

استريح,ما تعملش العملة دي تاني يا سي أدهم

لأ,لازم نحاول تاني يا شوقية’لاااااازم

**************************

خلف هذه الجدران,هبة عبد العظيم نور

**************************

شوقية,أنا مسافرة بكرة انا واحمد عشان نعملوا العمرة

يا ألف نهار ابيض يا ست سعاد, وربنا من ساعة ما عَرفنا والفرحة مش سيعانا ههه,تروحوا وتيجوا بالسلامة يا رب,وما تنسيناش من دعوة حلوة عند الحبيب النبي عليه الصلاة والسلام,دي أمانة وبنحملوهالك يا ست سعاد

عليه الصلاة والسلام,إن شاء الله يا شوقية,أهم حاجة تخلي بالك من أدهم ومن طلباته,ولو اتعصب ولا قالك حاجة ضايقتك استحمليه,الولا نفسيته تعبانة...حسرة قلبي عليه.

حسرة ايه كفالله الشر!ربنا ما يجيب حسرة,ادعيله انتِ بس هناك وهو ان شاء الله هيخف ويرجع احسن من الأول

يا رب يا شوقية..يارب.

**********

الفطار يا بت يا رحمة,تعالي افطري معايا انا وابوكِ

حاضر يا ماما,جاية وراكِ

**************************

خلف هذه الجدران,هبة عبد العظيم نور

**************************

صباح الخير يا بابا اموووه

صباح النور يا حبيبتي,ياسلام!أحلى بوسة في الدنيا وربنا المعبود ههه

هههه ربنا ما يحرمنيش منك يا بابا,صباح الخير يا ماما

وانا ماليش بوسة يا بت!ولا عشان خلاص اتلميتي على ابوكِ يبقى امك تتنسى!

معقول يا ماما!احلى بوسة لست الحبايب وملكة البيت ده اموووه.

 هههه وربنا بكاشة بس بنموتوا في بكشك يا بت

ههههه

احنا بعد الفطار هنروحوا الفيلا نطمنوا على أدهم يا أشجان,سعاد سافرت الصبح هي واحمد ومافيش في الفيلا غير أوسا وأدهم,لازم نسألوا عشان ما يقولوش أبونا ما سألش

واجب يا عادل,دول مهما كان ولادك

الولا أدهم مش عاجبني خالص يا أشجان...وشه دبلان ومليان حزن,الولا زي ما يكون كَبَر وزاد عمر على عمره

الله يكون في عونه يا عادل,لولا المية المعكرة اللي بينا كنا روحنا شوفناه,بس انت عارف ان هو وامه بيكرهوني كره العمى

سعاد اتغيرت واللي جرا لابنها كسرها يا أشجان

سعاد لو اتغيرت مع الدنيا كلها مش هتتغير معايا ابدا يا عادل,وأدهم من نفس طينة امه, وأوسا كمان ما تفرقش عنهم, واحنا بنقولوا خلينا بعيد احسن.

على راحتك يا أشجان

أنا هروح معاك عند اخواتي يا بابا.

صحيح يا رحمة؟

أيوة,عايزة اطمن على أدهم,وكمان أبلة أوسا وحشتني.

وماله يا بنتي,دول دمك ولحمك, وانتو ولاد حلال مصفي وعمري ما أكلتكو حرام عشان تقاطعوا بعض ولا تهونوا على بعض..خلصي فطار وقومي البسي

**************************

خلف هذه الجدران,هبة عبد العظيم نور

**************************

نورت الفيلا يا حاج عادل

بنورك يا شوقية

ازيك يا ست رحمة يا عسل وازي الست اشجان

الحمدلله بخير يا دادة شوقية

ان شالله دايماً بخير يا حبيبتي

أدهم صاحي يا شوقية؟

ايوة صاحي,لسة كان طالب شيّ وعملناهوله.

خد الدوا؟

ايوة,خد بتاع الصبحية,والتاني معاده بعد الغدا ان شاء الله.

اومال فين أوسا؟

الست أوسا في اوضتها بتتفرج ع التليفزيون ومعاها البت عطا.

طب قوليلها ابوكِ جَه هو واختك.احنا هندخلوا لأدهم,تعالي يا رحمة

**************************

خلف هذه الجدران,هبة عبد العظيم نور

**************************

تن تن أدهم

اتفضل يا ابويا

صباح الخير يا ابني

صباح النور

عامل ايه دلوقتي؟

زي امبارح وأول.

ربنا يشفيك يا ابني ..لو عايزني نسفروك برا نحجزولك على أول طيارة ونسافروا معاك,أهم حاجة صحتك ترجعلك ونشوفوك واقف على رجليك تاني,فلوسي كلها فدا خطوة تخطيها على رجليك يا أدهم

......ربنا ما يحرمنيش منك يا ابويا....لو العلاج طول ومالقيتش نتيجة يبقى أكيد هنسافر,ادينا بنتعالج اما نشوفوا اخرتها

أزيك يا أدهم

أهلاً

أختك صممت تيجي تشوفك وتطمن عليك

.......متشكر

بتشكرني على ايه يا أدهم!دانت اخويا

................................................

تن تن بابا,صباح الخير

صباح النور يا أوسا

ازيك يا بت يا رحمة هه

ازيك انتِ يا أبلة أوسا, ونورهان عاملة ايه؟

نورهان في عينها,ما نعرفوش عنها حاجة,نَسَت امها من ساعة ما راحت عند ابوها.

طب ما تسألي عليها انتِ يا أبلة.

لا هنسألوا عليها ولا عايزة نشوفوها

يا بنتي ما تجمديش قلبك على بنتك,جايز تكون البت شايلة منك عشان ما بتسأليش عليها من ساعة ما راحت عند ابوها

ايّوووووه!هو مين يا بابا اللي يسأل ع التاااااني!دانا امها, وهي ما عندهاش ريحة الدم

طب خلاص,خلاص,اصل انتِ عمرك ما هتتغيري ولا عمر الزمن هيعلمك حرف من عبره

...كتر خيرك يا بابا...تعالي معايا يا رحمة نقعدوا في اوضتي

ماشي يا أبلة أوسا,عن إذنك يا بابا

روحي بس ما تغيبيش فوق عشان نمشوا,مش عايزين نتأخروا على امك

سيب رحمة معايا النهاردة يا بابا,دانا كل يوم قاعدة لوحدي نكلموا نفسي,كويس ان رحمة جت النهاردة عشان تونسني

خلاص يا بابا,سيبني اقضي اليوم مع أبلة أوسا وتعالى خدني بالليل.

لا مش هنيجوا تاني الليلة دي,باتي وبكرة نعدوا نخدوكِ

تمام يا بابا,اتفقنا

**************************

خلف هذه الجدران,هبة عبد العظيم نور

**************************

قوليلي يا بت يا رحمة,انتِ لسة حاطة الجدع بتاع القاهرة في دماغك؟

ياسر!.....ياسر ده مش انسان عادي بالنسبة لي,ياسر ده بحس انه جزء من تكويني, ومع ذلك......مع ذلك ما اعتقدش اننا لبعض.....أحمد كاره ياسر قوي, وانا عمري ما هتجوز ياسر من غير موافقة احمد مهما كنت بحبه

...... وهو بيحبك بجد يا رحمة؟

أيوة يا أبلة أوسا..بيحبني اكتر من نفسه

وانت ايش عرفك يا بت!ما يكونش ليه يعني بيرسم عليكِ عشان فلوسك وبيضحك عليكِ بكلمتين حلوين عشان يحط ايده على مالك....ما تبقيش خايبة زي اختك يا رحمة , ما يكونش ليه الجدع ده بيرمي شباكه عليكِ عشان يصطادك انتِ وفلوس ابوكِ!جربنا تعبان من الصنف ده واتدلعنا منه واللدعة كانت بالدم...اسمعي يا بت,انتِ لسة صغيرة واحنا واجب علينا ننصحوكِ..يوم ما تفكري وتقولي يا جواز لازم يكون راجل ماله قد مالك ان ما كانش اكتر,اوعي تبصي لواحد كحيان وتقولي ده بيحبني...اسأليني انا يا بت..الطمع ملا قلوب الناس , والولا بتاعك ده لو قلبه انفتح وانقرا تلاقيه ناويلك على نية سودة ولو كنتِ جنيي هيحطك في جيبه.

ههههه يا خبر يا أبلة أوسا..انتِ فقدتي ثقتك بالرجالة للدرجة دي!

واكتر من الدرجة دي يا بت,عشان كدة لازم ننصحوكِ

مش كل الناس زي بعض يا أبلة أوسا..احنا معاشرين عيلة ياسر من سنين طويلة,ناس طيبين قوي وراضيين بقليلهم,عمر ما كان عندهم طموح غير الصحة والستر,حسابات المال ولغة الثراء دي ما يعرفوهاش خالص ولا عمرهم سعوا إليها....وبعدين احنا بنتكلم في ايه يا ابلة أوسا!...قلتلك أحمد مش موافق ...يعني مافيش أمل

يكون أحسن..بكرة احمد يجيبلك أحسن عريس فيكِ يا اسكندرية, يكون ابن أصل ومال وجاه وحسب ونسب يا بت...ولاد الأصول يتجوزوا ولاد أصول, والولا التاني يببقى يتجوز واحدة على قده

........... كل واحد بياخد نصيبه اللي مكتوبله عند ربنا يا أبلة أوسا

**************************

خلف هذه الجدران,هبة عبد العظيم نور

**************************

تن تن أدهم

مين؟

أنا رحمة,ممكن أدخل؟

.....ادخلي

عامل ايه؟

كويس

أنا جيت اشوفك اذا كنت عايز حاجة

أيوة,قولي لشوقية ولا عطا يعملولي كوباية شيّ

أنا هعملهولك بنفسي

....تعرفي؟

ههه هو انا صغيرة!أيوة بعرف اعمل الشاي وبعمله حلو قوي كمان,على فكرة بابا بيحب الشاي من ايدي جداً

طيب اعمليلي كوباية

حاضر

**************************

خلف هذه الجدران,هبة عبد العظيم نور

**************************

عجبك الشاي يا أدهم؟

كويس

مممم ممكن أسألك سؤال؟

سؤال ايه؟

انت ليه مكتئب كدة؟

وانتِ شايفة الحالة اللي انا فيها تخليني نتفائل!

وليه ما تتفائلش!انت أحسن من غيرك بكتير الحمدلله,يا أدهم انت ربنا نجاك من حاجة صعبة قوي,يعني دي نعمة لازم تشكره عليها

...........أنا عايز ننام

طيب حاضر,هسيبك تنام,بس الصبح بقى هحضرلك الفطار بنفسي وافطرك بإيدي كمان هه تصبح على خير

.....................................................

**************************

خلف هذه الجدران,هبة عبد العظيم نور

**************************

تن تن أدهم,صباح الخير

صباح النور

جبتلك الفطار بنفسي زي ما اتفقنا

.......ماليش نفس نفطر

لا بجد هزعل منك,طب دانا هفطر معاك,حد يطول يفطر مع بنت زي القمر كدة ونفسه ما تتفتحش!

هه

ههه اخيراً ضحكت!

بيقولوا انك طالعة حلوة لجدتي زبيدة

أه فعلاً بيقولوا,بس انا ما شوفتهاش,انت شوفتها يا أدهم؟

لا ما شوفتهاش,ماتت لما كانت أمي حامل فيا.

الله يرحمها..طب افطر بقى عشاك اخدك ونخرج الجنينة شوية

تاخديني الجنينة ازاي! انتِ ناسية ان عشان نوصلوا للجنينة في سلالم لازم ننزلوها!

اه صحيح....مش مشكلة,هنادي ع البواب يساعدك.

لااااا.أنا مش عايز نخررررج,مش عايز حد يحسسني بعجزززززززي.

خلاص يا أدهم اهدا,حقك عليا,أنا آسفة,أنا قصدت بس انك تغير المكان وتفرفش شوية

مش عايز حاجة.

طيب خلاص,يلا عشان تفطر..أنا فردتلك الجبة على التوست..اتفضل.

...متشكر...........رحمة

نعم

أنا اللي عايز نسألك سؤال دلوقتي.

اتفضل.

....انتِ ليه مهتمة بيا قوي كدة؟

ايه السؤال الغريب ده!يا أدهم انت اخويا,يعني حتة مني...وجعك هو وجعي..ما تتصورش يا أدهم اللي حصلك ده تعبني نفسياً قد ايه,والله ما كنت بنام من كتر العياط.

.....تعيطي عشاني انا!....بعد كل اللي عملته فيكِ!

وانت عملت ايه يعني!كل اللي حصل منك انا نسيته,كل اللي فاكراه انك اخويا وحتة مني ونفسي اشوفك سعيد..نفسي اشوفك بتمشي على رجليك تاني.

نمشوا على رجليا!

مافيش مستحيل يا أدهم مع قدرة ربنا,خلي عندك أمل واطلب من ربنا انه يشفيك

.....أنا شَبَعت,شيلي الأكل

انت ما أكلتش غير واحدة توست بس,ماينفعش كدة

قلتلك شيلي الاكل وسيبيني لوحدي

....حاضر.....على فكرة أنا همشي النهاردة مع بابا,لكن هاجي بكرة الصبح ان شاء الله,هقعد معاكو يومين ومع ماما يومين لحد ما طنط سعاد ترجع ان شاء الله.عن اذنك

**************************

خلف هذه الجدران,هبة عبد العظيم نور

**************************

ياسين , روح لياسر اوضته وقوله تعالى عشان تتعشى , اخوك يادوب خد نص ساندوتش ع الفطار وما كلش من ساعتها

حاضر يا ماما , حضري انتِ بس وانا هقنعه يجي ياكل

ماشي يا حبيبي , انا عارفة ايه اللي سد نفسه !!! دا ما كانش بيبطل اكل يا حبيب قلبي

**************************

خلف هذه الجدران,هبة عبد العظيم نور

**************************

تن تن ياسر

ادخل يا ياسين

ايه يا ابني , انت مخاصمنا ولا ايه !!

انا مخاصم نفسي ومش طايق اتكلم مع حد ولا اشوف حد

حتى اخوك حبيبك ! هههه بعتني يا ياسر !!!

انا مش فايقلك يا ياسين , سيبني اقعد لوحدي

ماما بعتاني ليك عشان اقولك تعالى اتعشى

لا , اتعشوا انتو , انا لازم انام عشان اصحى بدري , ورايا مشوار مهم لازم اروحه

مشوار ايه ده ؟؟؟؟

مافيش داعي تعرف , دي حاجة خاصة بيا ومش عايز حد يعرفها

ما تقول يا ابني في ايه , هو انا من امتى بطلع اسرارك برا !!!

........... انا قررت اسافر اسكندرية الصبح إن شاء الله

اييييييه ! تروح اسكندرية تعمل ايه ؟؟؟ اوعى تكون ناوي تقابل رحمة وتجيبلنا المشاكل

يووووووو مش رايح اقابل رحممممة وانا غلطان اني اتكلمت معاك اصلاااااااا

طب بس بس خلاص حقك عليا , انا بس عايز اعرف انت مسافر ليه ؟؟

عايز اقابل احمد اخو رحمة

عشان تطلبها منه ؟؟؟

ما ينفعش اطلبها منه إلا لما اوضحله موقفي واحاول اصفي الجو معاه

طب ما تاخد بابا معاك يا ياسر , جايز لما يشوف بابا معاك موقفه يتغير ويوافق على موضوع الجواز

يا سلام ! ولو خدت بابا معايا وبرضو فضل على موقفه وشتمني وهزئني زي ما عمل المرة اللي فاتت , وممكن كمان يتعامل مع بابا بشكل مش كويس , وانا مش ممكن اعرض بابا لموقف سخيف زي ده , لازم اسافر لوحدي

طب افرض سافرت وما عرفتش تقنعه ؟؟

مش هيأس , هسافرله تاني وتالت وعاااااااشر لحد ما يعرف اني متمسك برحمة ومش ممكن اتنازل  عنهاااااااا

مش عارف اقولك ايه يا ياسر

ما تقولش حاجة يا ياسين , انا عايز الكلام اللي قولتهولك يفضل سر بينا , مش عايز ماما وبابا يعرفوه

ماشي يا سيدي , بس انت هتقول ايه لبابا وماما على غيابك بكرة ؟

مش عارف مممم هتحجج بأي حجة وخلاص

طب تعالي بقى عشان تتعشى وإلا ماما هتزعل

ماشي يا ياسين

**************************

خلف هذه الجدران,هبة عبد العظيم نور

**************************

اديني جبتلك ياسر  اهو يا ماما هههه

تعيش وتجيب يا حبيبي , ايه يا سي ياسر , قاعد لوحدك في الاوضة بتحضر عفاريت ولا بتعمل ايه ؟

معلش يا ماما , مخنوق شوية

يا دي الخنقة اللي مسكاك ومش عايزة تسيبككككك , يا ابني كأبتنااااااا

معلش يا ماما , انا اسف

خد دوق المكرونة بالباشاميل اللي بتحبها , مليت اللحمة بهارات لما ريحتها بقت مفحفحة وطعمها يهبل , كل الحتة دي وادعيلي

ههه تسلم ايدك يا ست الكل

تسلم يا حبيبي , خد يا ياسين طبقك اهو يا حبيبي

متشكر يا ماما , اديني طبق المخلل ده

خد بس ما تكترش منه عشان غلط , ايه رأيك في المكرونة يا ياسر ؟

عشرة على عشرة يا جميل ههه

ههههه بالهنا والشفا يا حبيبي

مممم على فكرة يا ماما انا عندي مشوار مهم بكرة

بخاف من مشاويرك , رايح فين يا حبيبي ؟؟؟

يعني هلف على شغلانة مناسبة يمكن الاقي

هتلف فين يعني ؟ هتدور في الشوارع وتقول يلي عنده شغلانة مناسبة !!!

واحد صاحبي قالي على كام معمل كدة هعدي عليهم واشوف

ريح نفسك يا حبيبي مافيش شغل لا ليك ولا لغيرك , عايز نصيحتي ؟ خليك مع بابا في السوبر ماركت واحمد ربنا

يا ماما ما هو مش هينفع اشتغل في السوبر ماركت على طول , لازم ادور على وظيفة مناسبة لشهادتي

والله يا ابني مش هكسّر مقاديفك , روح يمكن تلاقي شغل  , ربك قادر ع المعجزات , كل المكرونة يا حبيبي

ماشي يا ماما , هو انتِ مش هتاكلي ولا ايه ؟

لا طبعاً , هستنى ابوك , ما اقدرش ابلع اللقمة من غيره

هه نفسي اتجوز واحدة زيك يا ماما

هههههه خالك قالهالي زمان وقولتله مش هتلاقي , صنف امك انقرض يا ياسر , انا يا ابني اللي زيي صناعة ياباني معمرة حتى مع اساءة الاستخدام ,  لكن دلوقتي مافيش في السوق غير صيني وتيواني , خناقتين وتلاقيها راحت عند ابوها وقالتلك مش راجعة حتى لو جبتلي قطع غيار ههههه

ههههه بس لو بتحبني بقى عمرها ما هتستغنى عني

مممم ربنا يرزقك يا ابني , هو انا اكره اشوفك متهني يا ياسر !!! دور ع الشغل وبعدين ندورلك ع الياباني

**************************

خلف هذه الجدران,هبة عبد العظيم نور

**************************

لو سمحت والله عايز اقابل الاستاذ احمد

الاستاذ احمد مش موجود يا استاذ

يوووووو مش موجود يعني ايه !! انا جايله مخصوووووص

وربنا استاذ احمد ما هنا , الأستاذ احمد طَلَع عمرة امبارح هو والست والدته

عمرة !!! طب لو سمحت هيرجع امتى ؟؟؟

ما نعرفوش والله , تقريبا بعد عشر تيام بس مش متأكد , هو حضرتك مين عشان لما يجي نبلغوه ؟

لا مش ضروري , السلام عليكم

عليكم السلام