زوجتي والمفتاح( السابعة)

 

دخلت تابعة المغنية الشامية إلى غرفتها في الملهى لتتعجلها:

ـــــ يلا يا ست عالية الجمهور في انتظارك

ـــــ جاييه بسبوسييه

في طريقها إلى المسرح استوقفها صاحب الملهى:

ـــــ يا ست عالية

ـــــ شو إستاذ الياس

ـــــ لو سمحتي من فضلك أكون شاكر لأفضالك غني اغاني تبسط الزباين . الإيراد قل النص بسبب الأغاني الهادفة بتاعتك

ـــــ مو تخاف إستاذ الياس . أنا بضاعفلك الايراد اليوم

***************
***************

أستقبلها الجمهور المخمور بالصفير، وحياها أحدهم بصوت جهور:

ـــــ منورة يا ست عالية

ـــــ نورك وجيه بيه، الله يعطيك العافييه

قال قائد الفرقة الموسيقية:

ـــــ يلا التخت جاهز، ابتدي يا ست عالية

بدأت في الغناء:

قال الارنب لإموووووووووووه

اسمحيلي راح إلعب ما ماااااااااااااااااااااااااا

قالتلوه لأ يا روحي يمكن يجي التعلب لالالا يمكن يجي التعلببببببب

ـــــ يلا ردوا يقصف عمركم الله

قالت تابعتها:

يردوا على ايه يا ست عالية!. الأغنية دي مش بتاعتك . دي هتتغنى بعد أكتر من 100 سنة

ـــــ شووا! دي غنيتي. بدهم يلطشوها مني. العمى

ـــــ لا مش بتاعتك يا ست عالية

ـــــ مش مهم بسبويه

عادت للغناء:

يلا قال الارنب لإمووووووووووووووه اسمحيلي راح العب ماماااااااااااااااااا

كاد صاحب الملهى أن يخلع شعره من جذوره من شدة الغيظ، فناداه أحد الزبائن:
ـــــ يا أستاذ الياس

ـــــ نعم يا غرقان بيه

ـــــ لو سمحت شيل ازايز الخمرة لحسن الأرنب يزعل، وياريت تشيل البار وتحط بداله مرجحتين على ما اروح اجيب المدام والاولاد,
أنا توبت على ايديكو

صاح بها صاحب الملهى:

ـــــ يا ست عالية الله ينتقم منك هتطفشي الزباين، غني اغنية مفرفشة خلي الناس تفرفش

ـــــ اصل أنا حامل وبدي أغني أغاني للطفوليه . الب الإم . شو عم بعمول في الب الإم

ـــــ يا ست طالما حامل اقعدي في بيتك ما تجيش تتوحمي عندنا احنا مش ناقصين

همست لها تابعتها:

ـــــ يا ست عالية طوعيه المرة دي . أنا سامعة انه هيتفق مع حسنية الرايقة

ـــــ العمى في قلبه . يلا انزلوا بالغنيي الجديديه

ياااااااااااااااااه سحر عيونه ونظراته

لما اتلاقينا عين في عين

يااااااااااااااااااااه شو مهضوميه كلماته

نبهتها تابعتها مرة أخرى:

ـــــ يا ست عالية الأغنية دي مسروقة من المستقبل

ـــــ شو!!!  دي كمان . مين ها الذعرة اللي  راح تغنيهيه؟

ـــــ واحدة من بلاد الشام زيك

ـــــ العمى في عويناتها الالعوطة . تُسرُق غنياتي .الله لا يسامحها

ـــــ لا يا ست عالية دي بتاعتها، مش بتاعتك

ـــــ شو أغني . شو أغني

قال لها صاحب الملهى بغيظ شديد:

ـــــ بقولك ايه يا ست عالية

ـــــ شو إستاذ الياس

ـــــ أنا رأيي تروحي تنامي على ضهرك، وترتاحي وتسبيني في حالي خليني اشغل الصالة واعوض خسارتي

ـــــ سنديني بسبوسيه كتير تعبانيه...إلياس

ـــــ افندم
ـــــ هات المصاري تبعي يا الياس بدل ما بفرج عليك خلق الله

ـــــ خدي ياستي . تخسريني وتاخدي مصاري

**************************************

في بيتها، استقبلت المغنية الشامية، رفيق المتآمر معها:

ـــــ شو رفيق مستعد يا عريس؟ هاها

ـــــ على أتم استعداد . بس الراجل عايز يجي يزورنا في السرايا عشان يعرف بنته هتعيش فين

ـــــ أنا أجرت لإلك سرايا جديديه، وعملت اللازم،  وحجزت لك تذاكر الباخرة يا عمري موتشيل هم ها الشغلة ههه... لكن خبرني يا رفيق ، عجبتك الصبييه ؟؟

ـــــ هي عجبتني بعقل! دي جمالها ما يتوصفش

ـــــ ههههه الله يعطيك العافييه

*************************************

في قصر حافظ باشا، جاءت الخادمة لتبلغ سيدة القصر بأمر يهمها:

ـــــ جيلان هانم

ـــــ افندم عزيزة

ـــــ مدام مارسيل الخياطة جابت هدوم العروسة

ـــــ شوك جوزيل شوك جوزيل.. خليه اتفضل

ـــــ اتفضلي مدام مارسيل

دلفت الخياطة الإفرنجية وحيت سيدة القصر:

ـــــ بنجور جيلان هانم، أنا خلصت فستان الفرح وباقي الهدوم بتاع عروس

ـــــ بنجور مدام مارسيل . تشكرلار على سرعة في تفصيل هدوم عروس

ـــــ ميرسي جيلان هانم . ياريت اشوف العروس عشان اشوف هدوم مظبوط ولا عايز تعديل

 

*********************************
ارتدت العروس الفستان الأبيض لتجربه، وسألت أمها:

ـــــ ها. ايه رأيك ما مّا في الفستان؟

ـــــ شوك جوزيل، فستان شوك جوزيل.

استدارت جيلان هانم إلى الخياطة وقالت وهي تشير إلى الفستان:

 بس من فضلك ضيقي من هنا شوية. واسع كتير مدام مارسيل

ـــــ تحت أمرك هانم

***************************

ألفت عفيفة والدتها تخرج من الغرفة، فهرعت إليها:

ـــــ ما مّا

ـــــ افندم عفيفة

ـــــ هي مدام مارسيل مش خلصت فستان بتاعي؟

ـــــ لا

ـــــ لأ ليه بقى!!!!

ـــــ يا بنت هي مركز في هدوم عروس

ـــــ وأنا اخت عروس، ولازم فستاني يخلص. ولا هحضر فرح اختي بالبيجاما!

زفرت والدتها وقالت وقد ضاقت بها ذرعا:

ـــــ بنت، بنت، بنت، روحي أوضتك، مش فاضي لرغي كتير

ـــــ يوووه! هو ما حدش طايقني في البيت ده ليه!

**********************************

عاد الحاج محفوظ من الوكالة في المساء، وألقى التحية على زوجته:

ـــــ  السلام عليكم يا خديجة

ـــــ اهلا يا سي محفوظ، وعليكم السلام. حمدالله ع السلامة

ـــــ  الله يسلمك ، أومال الولاد فين ؟

ـــــ ناموا من بدري، دقايق والعشا يكون جاهز

ـــــ  لالالا مش حاسس بالجوع دلوقتي يا خديجة ، على فكرة أحب أبلغك إننا معزومين على فرح

ـــــ خير ان شاء الله ، فرح مين؟

ـــــ فرح شريفة بنت ابن عمي حافظ باشا

ـــــ ماشاء الله . خبر جميل ههه  . ومين العريس؟

ـــــ عريس تركي، يمكن قريب والدتها ولا ما اعرفش يعرفوه منين

ـــــ هههه ابن عمك يحب التراكوة ويحب يناسبهم . الظاهر هيشوف لعفيفة هي كمان واحد تركي يجوزهولها

ـــــ يا ستي ربنا يتمم بخير، أهم حاجة يكون يستاهل البنت

ـــــ اه والله يا سي محفوظ . شريفة دي أنا احبها بصراحة يمكن اكتر من عفيفة عشان هدوئها ورقتها. عاملة زي النسمة

ـــــ ان شاء الله يكون يستاهلها

ـــــ يارب . ويارب عقبال صفية وحفصة وعفيفة كمان

ـــــ اللهم أمين

************************************

جاء رقيق إلى منزل المغنية الشامية في زيارة غير مرغوب بها، فاستقبلته بتأفف:

 

ـــــ شو يا رفيق؟ شو بتريد! جاي لحدي هلأ ليه ؟

ـــــ جاي اخد فلوس البدلة يا ست عالية، ولا هصرف ع الجوازة دي من جيبي!

ـــــ يقصف عمرك الله . انت مش واخد مصاري مشان  البدلة عشييه ؟

ـــــ صرفتهم، اعمل ايه! . كانت سهرة حلوة وخلصت فلوسي عليها

زفرت بضيق وسبته:

ـــــ يا الله ع ها الطماع . خد مصاري. بس يكون بعلمك ما في مصاري تاني لحد ما بتسافر ع أوروبا

****************************************

نادت المغنية الشامية خادمتها بأسارير منفرجة:

ـــــ بسبوسيه يا ام العريس يا تركييه هههه

ـــــ افندم عالية هانم هههه

ـــــ حضرتي الفستان اللي عم تحضري بيه فرح ابنك رفيق بك؟

ـــــ ايفيت تمام كله تمام ... بس احنا هنروح أنا ورفيق لوحدنا؟ . يقولوا علينا ايه! ما لناش اهل تراكوة  يعبرونا!

ـــــ لا طبعا أنا محضرة حالي، وعم ببعت معاكم كام بيه على كام هانم صناعي تبعي ههه

ـــــ يا جاهزة إنتِ  يا للي ما بتفوتكيش حاجة ههه

*****************************

وهما يحتسيان الشاي في المساء، سألت السيدة خديجة، زوجها الحاج محفوظ:

ـــــ بقولك ايه يا سي محفوظ . هو انت ناوي تروح الفرح؟

ـــــ لا طبعا، أنا ناوي اروح بعد الفرح أنا وانتِ نبارك

ـــــ لالالا يا سي محفوظ احنا نروح يوم الفرح الصبح عشان كمان نبارك لشريفة قبل ما تمشي ونيجي قبل ما يعملوا افراح ولا احتفلات

ـــــ نعم الرأي يا خديجة والله . خلاص اجهزي انتِ  والبنات يومها من الصبح...  لكن هو علي مش هيجي معأنا يا خديجة  ؟

ـــــ ما انت عارف علي عنده مذاكرة كتير ربنا يوفقه

ـــــ اه فعلا اخر سنة في مدرسة الحقوق وعايز اجتهاد زيادة . يارب اشوفه قاضي اد الدنيا

ـــــ هاها قاضي مرة واحدة!!

****************************

في صبيحة يوم العُرس، كانت جيلان هانم منشغلة بالكثير من الأعمال، فنادت زوجها على عجل:

ـــــ حافظ باشا، شوف طباخين خلصوا اكل حفلة ولا لسة

رد بامتعاض:

ـــــ أنا !! أنا مالي أنا بشغل الطباخين يا جيلان هانم !

ـــــ اوه! حافظ باشا أنا مشغول مع ابنتنا عروس جميل

ـــــ أوف!حاضر يا هانم، حاضر

****************************

وصلت السيدة خديجة رفقة بنتيها إلى ردهة القصر، واتجهن إلى جيلان هانم، هنئتها السيدة خديجة بفرحة عارمة:

ـــــ مبروك يا جيلان هانم

ـــــ اهلا اهلا خديجة هانم حبيبة حظرتنا ميرحبا . تشكرات على مباركات حبيبة قلب

هنئتها حفصة باسمة:

ـــــ مبروك خالتو جيلان

ـــــ تشكرات حفصة حبيب قلب

وكذا فعلت صفية:

ـــــ مبروك يا خالتو

ـــــ تشكرات صفية ، عقبال حظراتكم بنات

ـــــ هي فين العروسة عشان نباركلها يا جيلان هانم ؟

ـــــ اتفضلوا خديجة هانم ،  هي في اوضتها بتجهز ومعاها عفيفة هانم

*******************************

بلغ الخدم سيدة القصر بوصول والدة العريس:

ـــــ والدة العريس وصلت جيلان هاااانم

ـــــ اهلا ميرحبا جولبهار هانم

ـــــ الله يرحب بيكي يا حبيبتي لولولويييييييييييييي

ـــــ ايه ده ايه ده مين دي !. انتِ  ايه جرالك جولبهار هانم! . انت اعمل كدة ليه؟

ـــــ دي زغروطات  عشان فرح ابن حظرتنا لولوليييييييييييييييييييييييي

دمدمت الجدة التركية سباباً حين سمعت الزغاريد:

مين هيافان عامل هيصة برا؟؟؟؟؟؟

أجابتها جيلان هانم:

ـــــ دي والدة عريس جولبهار هانم أنّة

ـــــ مجنون دي ولا ايه !. في هانم تركي زغرت !!!!!!!

ـــــ هو أنا عكيت ولا ايه! . الست عالية هتخرب بيتي ... أنا أعمل زي مصريات في افرحات يلدز هانم

ـــــ تركي مش قلد حد . هانم تركي راقي مش قلد حد

ـــــ عندك حق حبيبة قلب

***************
لم تشعر السيدة خديجة بالارتياح لوالدة العريس، فسألت جيلان هانم:

ـــــ مين الست دي جيلان هانم؟

ـــــ دي والدة عريس. تعالي سلمي عليها خديجة هانم

ـــــ ما تزعليش مني يا جيلان هانم، الست دي شكلها مش مريح ابدا

ـــــ ليه  ؟

ـــــ مش مرتاحالها . بقولك ايه انتو عارفين الناس دول كويس يا جيلان هانم؟

ـــــ ايفيت، حافظ باشا سأل عليهم كويس

ـــــ لا حول ولا قوة الا بالله . أنا قلبي اتقبض لما شوفتها . طب بقولك ايه بلاش تخلي شريفة تسافر بالله عليكي . خليها في مصر جنبنا

ـــــ هههه حبيبتي دي هتسافر انجلترا مع عريس قضي شهر عسل

غمغمت السيدة خديجة وهي تضع يدها على صدرها المنقبض:

(يا ربي . أنا مش مرتاحة . ربنا يستر على شريفة . ربنا يخلف ظني . البنت طيبة ومسكينة استر يارب)

استأذنت من السيدة جيلان:

ـــــ  طيب أنا مضطرة اخد البنات ونمشي عشان سي محفوظ مستنينا

ـــــ على فين خديجة هانم! الفرح لسة مش ابدأ

ـــــ لا يا حبيبتي احنا جينا نبارك ونشوف شريفة قبل ما تسافر . ربنا يتمم بخير ويخلف ظني

********************************

دقت جيلان هانم على باب غرفة ابنتها التي تستعد للزفاف:

ـــــ شريفة هانم ابنة حظرتنا ؟

ـــــ هه ادخلي مامّا

انبهرت بجمال ابنتها في ثوب الزفاف الأبيض:

ـــــ يا الله!! عروس جميل، جميل ابنة حظرتنا، تبارك الله، تبارك الله

وأثنت عليها عفيفة بابتسامة بعرض سعادتها:

ـــــ الله ! ايه كل جمال ده شريفة ! انتِ  رائعة النهاردة  اختي هاها

ـــــ ميرسي عفيفة عقبالك

**********************

في مجلس الرجال، قال حافظ باشا لعاقد الأنكحة:

ـــــ اتفضل اعقد العقد يا حضرة المأذون

ـــــ حالاً يا باشا ، هاتلنا بطاقة العريس

ـــــ بطاقتك يا عريس

ـــــ اتفضل حافظ باشا

نظر حافظ باشا في البطاقة وغضن حاجبيه حين وقعت عينيه على اسم العريس كاملاً، وقال باندهاش:

رفيق اسماعيل محمد ابراهيم!!..اومال فين اوغلو؟

ابتسم وقال بملامح واثقة:

ـــــ ده جدي الخامس، واسمه مش في البطاقة يا باشا

ـــــ والجنسية مصري!

ـــــ معايا جنسية مصرية من زمان هاها

************************************

تم العقد بالخديعة..هرعت عفيفة إلى إلى أختها في الدور العلوي لتهنئها:

ـــــ مبروك شريفة، مبروك، بقيتي مدام رفيق بك اوغلو ههههه

ـــــ الله يبارك فيكي عفيفة عقبالك

تبسمت والدتها وتعجلتها:

يلا عروس جميل  ابنة حظرتنا ، معازيم في انتظار حظرتكم عشان ابدأ حفل سعيد بغناء وطرب جميل

*********************************

كانت العروس الجميل تنزل الدرج وأعين النساء تتعلق بها ويتهامسن في انبهار:

ـــــ عروس نازل على سلالم هوانم

ـــــ تبارك الله عروس جميل

وقفت والدة العروس بين النساء تتباهى بجمال ابنتها جذلة:

ـــــ شايفة عروس  ابنة حظرتنا انجي هانم؟ شايفة عروس ايتن هانم ؟ ههه

ـــــ تبارك الله جميل جميل جيلان هانم . بنت حظرتكم جميل تبارك الله كل معازيم مبهورين بجمال عروس

قالت جيلان هانم بلطف لمطربة الحفل:

ـــــ يلا غني مطربة جميل

أمرت يلدز هانم المطربة:

ـــــ غني تركي بأمر حظرتنا يلدز هانم جدة عروس، غني جانم يلالالي امان . نغم عثمالي امان يلالالي

ـــــ ما بعرفش تركي هانم، هغني مصري

ـــــ مطربة هيافان مش اعرف تركي . فرح قطرأنات . فرح زفتات

استدارت المطربة للفرقة الموسيقية لتبدأ العزف:

ـــــ يلا التخت جاهز ؟

ـــــ اتفضلي يا استاذة

بدأت الغناء:

الشمع قايد قااااااااايد

يا فرحة بيضاااااااا  بييييييييييييضا

والفرح زايد زااااااااااايد

يا ليلة بيضا  بيضضضضضضا

عروستنا بدر بان في ليلة قدرررررر

شوف الجمال يا عين وسمي وصلييييييي

عروستنا بدر بان في ليلة قدرررررر

شوف الجمال يا عين وسمي وصلييييي

لالي لالي يا نجمهم في العالييييييييي

افرحيلهم وغنيلهم يا ليالييييييييييي

لا لي لالي يا نجمهم في العالييييييييي

افرحيلهم وغنيلهم يا لياليييييييييي

***************
كانت العروس تحزم امتعتها بمساعدة أختها في غرفتها استعداداً للسفر بعد أن انتهى الحفل..فدق شقيقهم على الباب ونادى:

ـــــ شريفة

ـــــ ادخل عادل

ـــــ مبروك شريفة هانم أختي

ـــــ ههه ميرسي عادل

قالت عفيفة لأخيها بخفة روحها المعتادة:

ـــــ وأنا مش في مبروك عادل ! ههه

ـــــ هو انتِ كمان اتجوزتي ! مباركة تكون لعروس

ـــــ دمك تقيل ههه هيجي يوم اتجوز واسيب السرايا ، ابقي عيش فيها لوحدك

ـــــ  هه يكون أفضل عزيزتي عفيفة..... شريفة بابّا بيقولك ضيوف مشيوا ، تعالي سلمي على عريسك في صالون وكمان استعدي عشان معاد باخرة قرب

ـــــ داكور عادل ، هقفل شنطتي وانزل حالا

قالت عفيفة بلطف:

ـــــ انزلي انتِ لعريسك شريفة ، أنا هقفل الشنطة  بدالك

ـــــ هه ميرسي عفيفة

***************
التقت شريفة بزوجها المخادع في الصالون، فاستقبلها بشهد الكلمات:

 

ـــــ شريفة حبيبتي مراتي ، مش مصدق اننا بقينا لبعض طول العمر ،  بحبك يا عمري

ـــــ هه مش تخجلني  رفيق بك

ـــــ بعبرلك عن مشاعري يا احلى حاجة في حياتي

ـــــ انت رقيق اوي رفيق

ـــــ انتِ لسة شوفتي حاجة. الرقة على اصولها هتشوفيها في أوروبا يا حبيبة با بّا هههههه

***************

كانت الأسرة تستعد لمصاحبة العروسين إلى الميناء، فقالت عفيفة لوالدتها:

ـــــ أنا هاجي معاكو ما مّا اودع شريفة في المينا

ـــــ تعالي بنت عفيفة ، جهز نفسك بسرعة

ـــــ حالاً مامّا

***************

في الميناء وسط صخب السفن والمسافرين، احتضنت عفيفة أختها وهي تبكيها بحرقة:
ـــــ شريفة هتوحشيني كتير، السرايا من غيرك هتبقى وحشة خالص، ازاي هنام وانتِ مش معايا في الاوضة!!

ردت شريفة بنشيج:

ـــــ حبيبتي إنتِ  كمان هتوحشيني عفيفة، وما مّا هتوحشني خالص

اذرفت والدتها العبرات وأسدت إليها نظرة حانية وقالت:

ـــــ خلاص حبيب قلب هتسيبي حظرتنا؟. شريفة انتِ  اجمل حاجة في حياتي حبيبتي  ، أنتِ  بنت مطيعة، بنت هادية، مش تعبتيني أبداً

نشجت شريفة وارتمت في أحضان والدتها:

ـــــ هتوحشيني ما مّا، هتوحشيني كتير . بحبك كتير ما مّا. مش عارفة هقدر ابعد عنك ازاي

زفر حافظ باشا وقال بتأفف:

ـــــ وبعدين بقى! يلا معاد الباخرة والعريس مستني

ـــــ حاضر با بّا

ودعتها عفيفة بحضن دافئ تسري فيه دموعها:

ـــــ مع السلامة شريفة، مع السلامة، هتوحشيني اختي حبيبتي

قالت شريفة ناشجة:

ـــــ الله يسلمك عفيفة

استدارت جيلان هانم إلى العريس توصيه بابنتها خيرا:

ـــــ خلي بالك من شريفة هانم بنت حظرتنا رفيق بك

ـــــ شريفة في عنيا طنط جيلان، هوريها اللي عمرها ما شافته في حياتها

ـــــ تشكرات رفيق بك، انت شاب نبيل

*************************************

تفاجئت جيلان هانم بوالدتها قد تهيئت للمغادرة، والخدم يحملون حقائبهاإلى خارج القصر، فهرعت إليها متلهفة:

ـــــ على فين آنّة؟

ـــــ رايح سرايات حظرتنا  جيلان هانم . وحشتني ذكريات مع شوكت باشا

ـــــ خليكي أنّة . هتروحي هناك لوحدك اعمل ايه!

ـــــ لا مش اقعد. كمان أنا بفكر ارجع اسطانبول

ـــــ ليه أنّة !. من فضل حظرتكم بلاش ارجع اسطانبول

ـــــ لأ! مش في حد بيرتاح غير في بلاده جيلان هانم بنت حظرتنا . هرجع اسطانبول  بعد شهر كمان . تشكرات على استضافات جيلان هانم بنت حظرتنا

ـــــ خدم حظرتكم في سرايات أنّة ؟

ـــــ ايفيت كله موجود

********************************

في قصر والدة الطبيب، اتجهت الخادمة إلى سيدتها تسألها بعد تردد:
ـــــ قوليلي يا شكرية هانم . أنا نفسي اسأل حضرتك سؤال محيرني بس حبي ليكي يدفعني اني اسأله مع انه مش من حقي

ـــــ سؤال ايه يا نعمات؟

ـــــ هو مش حضرتك قولتي انك هتبحثي عن عروسة لعلاء بك ؟

تنهدت الأم بعمق وهو تهز رأسها بأسى:

ـــــ آآآه من علاء! . قلبي واجعني من افعاله يا نعمات . ولا بيفكر في جواز ولا في باله جواز ومش عارفة اعمل معاه ايه

ـــــ وليه حضرتك ما تشوفيش عروسة وتعرضي الأمر عليه يا شكرية هانم

ـــــ هو رافض المبدأ من اساسه يا نعمات، الله يهديه. دا كان عايز يرجع أوروبا وقعد على شرط اني ما افتحش معاه موضوع الزواج مرة تانية

ـــــ ليه بس كدة !. حاجة تزعل . ربنا يهديه

ـــــ يارب يا نعمات يارب

********************************

مر الطبيب بالقصر كعادته في طريقه كل ليلة..ولكن هذه المرة رمق الأقفال وقد أزيلت من البوابة، فكاتم نفسه حديث دهشته:
ـــــ ايه ده! . حاجة غريبة اوي . مافيش قفل على السرايا... الفضول هيقتلني اني اعرف مصير البنت دي . ياترى ربنا هداها ولا لسة زي ماهي ويئست مني ودورت على غيري . ياترى ايه معنى الدموع اللي شوفتها في عنيها . ياترى هي مين!!...بس الحمدلله مش موجودة رغم ان مافيش اقفال على السرايا . يارب تكون اتغيرت وربنا هداها . بس ما اعتقدش انها اتغيرت . اللي زي دي صعب تتغير . يارب انساها وابطل تفكير في مصيرها

*******************
وصل الطبيب إلى قصر والدته، وألقى عليها السلام باسماً:
ـــــ السلام عليكم ورحمة الله، ازيك يا أمي

ردت والدته بوجه عابس:

ـــــ وعليكم السلام ورحمة الله وبركاته، ازيك يا علاء

ـــــ الله يسلمك يا أمي، وحشتيني . نزلت الصبح وانتِ  نايمة وما شوفتكيش عشان ابوس ايدك

ـــــ لا تبوس ايدي ولا تكلمني، أنا زعلانة منك

ـــــ ليه يا أمي . ليه بس . أنا عملت حاجة تزعلك؟

ـــــ يا علاء يا حبيبي، ياعلاء يا ابني سنين عمرك بتجري ، انت دلوقتي عمرك خمسة وعشرين سنة، هتتجوز امتى يا ابني!

تربد وجهه ورد حانقاً:

ـــــ أمي، أمي، أمي لو سمحتي أنا وافقت اني اعيش في مصر بناء على رغبتك  وما ارجعش أوروبا، و كان شرطي انك  ما تكلمنيش في موضوع الجواز تاني

 

ـــــ يا حبيبي، عزت ابن خالتك اللي اصغر منك بسنة اتجوز وعنده ولدين . أنا قلبي بيتقطع لما اشوفك من غير زوجة واولاد

ـــــ يا أمي أنا شغلي واخد كل وقتي وماعنديش وقت لزوجة ولا لأولاد

ـــــ طيب ايه رأيك صديقتي فوزية هانم عندها بنت ماشاء الله عليها ادب وجمال واخلاق . بنت رائعة بكل المقاييس . تحب احددلك معاد ونروح نشوفها؟

ـــــ أمي أنا قولت مش عايز اتجوز

ردت ثائرة:

ـــــ انت ازاي مسلم وبتقول كدة! . يعني ايه مش عايز تتجوز! . الرسول عليه الصلاة والسلام قال من رغب عن سنتي فليس مني

ـــــ عليه الصلاة والسلام . يا أمي أنا عارف كويس الكلام ده . بس صدقيني اللي هتتجوزني مش هتكون سعيدة معايا وأنا ما احبش اتعس حد بسببي

ـــــ أوووووووف ، ولد عنيد

تبسم وسألها ممازحاً ليذهب ما بها من كدر:

ـــــ ايه يا أمي! هو الطباخ نام ومافيش عشا ولا ايه!

ـــــ غير هدومك يا علاء على ما اخلي السفرجي يحضر العشا على الطرابيزة

ـــــ طب ممكن تبتسمي يا أمي هه

ـــــ ابتسم !!!! انت قتلت جوايا كل المشاعر الحلوة وحرمتني اني يكون ليا احفاد يأنسوا وحدتي في اخر ايأمي، الله يسامحك يا ابني

***************************************

وصل العروسان إلى أوروبا..اصطحب العريس المخادع عروسه إلى أحد الأحياء الفقيرة، ومنها إلى الغرفة التي سيقطنان بها، فتح باب الغرفة وقال متهكماً:
ـــــ اتفضلي يا  عروستي يا بنت الحسب والنسب

اتسعت حدقتاها من هول الصدمة، وهزت رأسها في ذهول وقالت:

ـــــ ايه ده . ايه ده رفيق بك . ايه الحي الحقير ده ! ايه الغرفة الحقيرة دي !. احنا هنقضي شهر العسل في المكان ده ؟

سقط القناع عن وجهه القبيح:

ـــــ بقولك ايه ، بطلي بقى النفخة الكدابة بتاعتك يا بنت التراكوة وعيشي عيشة جوزك

ـــــ ايه ده !.ايه الاسلوب الغريب اللي بتتكلم بيه ده رفيق بك !! أنا مش هعرف اقعد في مكان حقير زي ده . دي تقريبا غرفة واحدة

قهقه وقال بمكر:

ـــــ طب واحنا محتاجين اكتر من غرفة واحدة في ايه !. وبعدين دي محجوزة عشانك مخصوص من ناس بيردوا الجميل لابوكي هههه

ـــــ ناس ! مين ناس دول وعايزين ايه من بابّا

ـــــ با بّا !! يا شيخة زهقتيني من بابّا ومامّا وطريقة الكلام  الخنقة دي،  ابقي اسألي ابوكي عن الست عالية وعمل معاها ايه . يلا غيري هدومك، أنا مستعجل، وعندك الشنطة دي فيها ازايز الخمرة،  وضبي سهرة على مزاجك

ردت بارتياع:

ـــــ خمرة !! انت بتشرب خمرة رفيق بك ؟؟

ـــــ هههه هو أنا عايش الاعشانها! يلا وضبي السهرة يا قطة

ـــــ لالالالالا أنا في كابوس.. اكيد في كابوس.. أنا مذهولة .. الخمرة حرام ... وأنا مش ممكن امسك ازازة خمرى بايدي

اكفهر وجهه وصاح بها وقد كشر عن أنيابه:

ـــــ بقولك ايه! ما تخلنيش افقد اعصابي، غيري هدومك، وصبي الخمرة وهتشربي معايا

ـــــ اشرب انت براحتك، أنا مش هشرب

انتفخت أوداجه وانقض عليها كالوحش الكاسر يجرها من جمة شعرها:

كدة  !طب انتِ اللي جبتيه لنفسك بقى تعالي هنا

صرخت الفتاة باكية:

ـــــ آآآه سيب شعري، سيب شعري آآآآه

ـــــ ودول المين على وشك عشان تتعلمي طاعة جوزك يا بنت التراكوة

أنهال عليها صفعاً، فضجت الغرفة الحقيرة بصراخها:

ـــــ آآآآه، آآآآه انت بتعمل كدة ليه حرام عليك، كل ده عشان قولت مش بشرب خمرة!

ـــــ انتِ هنا تنفذي اوامري وبس. وخلي ليلتك تعدي على خير، غيري هدومك ووضبي نفسك لجوزك يا قطة ولا ناسية ان النهاردة دخلتنا ههههه

صرخت الفتاة مستغيثة بدموعها المنهمرة:

ـــــ لا،لا أنا عايزة مامّا، عايزة با بّا، عايزة امشي من هنا

قهقه العربيد وقال:

ـــــ هنا يا حلوة لا في مامّا ولا بابّا . هنا في رفيق . رفيق وبس.

صاح بالفتاة المرتجفة:

ـــــ  يلا خلصيني

ردت بنبرة مرتعدة:

ـــــ طيب ارجوك أنا عايزة اتوضى واصلي الاول

ـــــ تعملي ايه يختي !!

ـــــ طنط خديجة قالتلي اول حاجة اعملها لما اوصل اني اتوضى  واصلي أنا وانت عشان ربنا يبارك في حياتنا

قهقه وهو يفتح زجاجة الخمر:

ـــــ لا أنا هصلي ولا إنتِ  هتصلي. الصلاة دي تنسيها خالص . هنا في خمرة ومتعة وبس

تفرست في ملامحه بارتجاف وقالت:

ـــــ انت شكلك اتغير كدة ليه!!. انت ملامحك بقت شيطانية كدة ليه!!

ـــــ هاها أنا شيطان

ـــــ انت ازاي مسلم وبتشرب خمرة وبتضرب زوجتك وتهينها!

ـــــ أنا مش مسلم

صرخت الفتاة:

ـــــ ايه! انت بتقول ايه! انت مين؟ . انت مين رد علية

ـــــ ما تتخضيش كدة . أنا في بطاقتي مكتوب مسلم، بس أنا ما بعترفش بأي دين

ـــــ انت كافر

ـــــ بالظبط كدة، يلا خلصيني عشان ابتديت افقد اعصابي، وانت ما تعرفيش رفيق لما يفقد اعصابه ممكن يعمل ايه

ـــــ لا . انت كافر . يعني مش نجوز لبعض

ـــــ كدة ! طيب واضح اني هاخد حقوقي بالعنف

انقض عليها انقضاض الذئب على فريسته ونالها عنوة وصراخها يزلزل أركان الحجرة الحقيرة

*******************
في تلك الليلة استيقظت جيلان هانم فزعة بعد أن رأت جاثوماً أرعبها، نادت على زوجها مرتعدة:
ـــــ حافظ باشا، حافظ باشا، اصحى حافظ باشا

ـــــ في ايه يا جيلان هانم! بتصحيني ليه؟

ـــــ شوفت كابوس. كابوس فظيع ازعج حظرتنا . بنتي بنتي .شريفة حبيبة قلب . بنتي بنتي

ـــــ في ايه يا جيلان وترتيني؟

ـــــ شوفت بنتي وشوفت تعبان اجري وراها، واتمكن منها واتلف حواليها وبيأذيها بسمومه.

بكت ورجته:

ـــــ  بنتي، أنا عايز بنتي حافظ باشا،هاتلي بنتي

زفر ورد باستياء:

ـــــ جيلان هانم . إنتِ  بس عشان اول مرة تفارقيها حاسة الأحاسيس دي ، استعيذي بالله من الشيطان ونأمي

ـــــ اعوذ بالله من الشيطان الرجيم اعوذ بالله من الشيطان الرجيم . يارب خليك مع بنتي يارب

***********************************

في صبيحة اليوم التالي، استيقظ الزوج العربيد على نشيج العروس واستغاثاتها:

ـــــ أنا عايزة ما مّا، عايزة امشي من هنا

قام عن فراشه يقول متهكماً:

ـــــ انتِ لسة بتعيطي من امبارح يا بنت التراكوة . أنا خارج اجيب اكل واجي . عشان تعرفي اني راجل طيب . حضري الخمرة على ما اجي . كفاية امبارح حضرتها لنفسي وشربت لوحدي. النهاردة لازم تشربي معايا وتشاركيني

غادر الغرفة، فرفعت ناظريها إلى السماء باكية، تسأل الله الغوث والنجاة:

ـــــ يارب خليك معايا . انقذني ياربي انقذني . أنا لوحدي ياربي . أنا بستجير بيك

 

*************************************************

انتهت حلقات هوانم جوزيل

حظرتكم شرفتم مدونات

 

نقابل حظرتكم يوم الُلاثاء إن شاء الله

 

لا تنسوا ذكر الله والصلاة على الحبيب عليه الصلاة والسلام

لا إله إلا الله ولا حول ولا قوة إلا بالله

اللهم صل وسلم وبارك على محمد

استغفر الله وأتوب إليه

سبحان الله وبحمده، سبحان الله العظيم