الحلقة الثالثة والستين (ف2)

**************************

خلف هذه الجدران,هبة عبد العظيم نور

ممنوع النسخ او أخد اسكرين شوت

**************************

هو بابا نَزَل بسرعة ورزع الباب كدة ليه يا جدو ؟؟؟ وكمان ما ردش عليا

معلش يا نورهان , اكيد ما سَمَعكيش يا حبيبتي , ما قولتليش يا بت , مش هتوافقي بقى على محمد ابن عمتك عشان نفرحوا بيكي ؟

ايّوووه يا جدو بقى , بالله عليك ما تكلمنيش في الموضوع ده تاني عشان ما ازعلش منك

خلاص يا بنتي , الجواز مش بالغصب , ربنا يرزقك بللي يريح قلبك وقلبنا

**************************

خلف هذه الجدران,هبة عبد العظيم نور

**************************

ترررررررررررررررررررررررررررررررررررن وجدي افتح يا وجدي , يارب ما يكون خرج

خالتي بدارة !

هه صحيت من بدري وجيت عشان نلحقوك قبل ما تخرج

اتفضلي

ايه يا ولا المقابلة الوحشة دي ! انت لسة زعلان مني ؟

انتِ اللي زعلانة يا خالتي

يا وجدي أنا عارفة انت بتحبني قد ايه , وعملت اللي عملته ده عشان تنتَقَملي , لكن انت غَلَطت يا وجدي

برضو يا خالتي هتقولي إنّي غلطان !!!

يا حبيبي مين قالك إنّي مستنية العبد يجيبلي حقي ! ... أنا عايزة حقي من رب العباد  اللي لا بيغفل ولا ينام . لكن انك تخطف البت من أهلها وتعمل العمايل دي , لا يا ابني ... تبقي مش وجدي اللي انا ربيته

اللي حصل حصل يا خالتي ... واهي رَجَعت لأهلها

وجدي , اوعى تكون .... أوعى تكون أذيت البت يا حبيبي

أنا !!!! ....لا يا خالتي , اطمني ... أنا كنت بنعاملوها زي اختي ... كان كل همي نحافظوا عليها ونبعدوها عن أي انتقام , هي مالهاش ذنب إن امها تبقى أوسا وابوها يبقى سامي

........... الله يسامحهم هما الاتنين

تفتكري نورهان هتسامحني يا خالتي ؟؟؟

وايه اللي يخليها ما تسامحكش ؟

..... علقتها بيا أوي وعشمتها بالجواز , وفي الآخر المسكينة اكتشفت ان انا واخدها كوبري عشان نوصلوا لأهلها , بس والله يا خالتي ما كنت نقصد نإذي مشاعرها , نورهان دي .......

انت حبيتها يا وجدي ؟

........ مش عارف

مافيش حاجة اسمها مش عارف , أنا سامعة رعشة صوتك وانت بتتكلم عنها

حتى لو كنت حبيتها , لازم ننسوها ..... لإن عمرنا ما هنكونوا لبعض

كل واحد بياخد نصيبه اللي مكتوبله .... هات شنطة هدومك وارجع معايا , أمك زعلانة ومشيلاني ذنبك وبتقولي الولا طَفَش بسببك ههه

ههه حاضر يا خالتي , وانا ما نقدروش نكسرولك كلمة

تن تن كابتن وجدي ... يا كابتن

واحد بينادي عليك برا يا وجدي

لحظة نشوفوا مين يا خالتي

*******

أيوة يا حسام

سلامو عليكو يا كابتن

عليكم السلام يا سيدي , مين قالك ان انا هنا يا ولا ؟

روحتلك ع البيت والست والدتك قالتلي انك هنا

خير يا حسام

في جواب جالك من نادي الأمل وكان لازم نسلمهولك

نادي الأمل !!! وريني كدة

اتفضل يا كابتن

بسم الله الرحمن الرحيم ...... معقووووول ! ههه

خير يا كابتن ؟؟؟

خير يا حسام ههه اختاروني عشان نشتغل مدرب كاراتيه في نادي الأمل

ايّوووووه هههه ألف مبروك يا كابتن , انت تستاهل كل خير وربناااا

ربنا يخليك يا حسام

سلام انا بقى يا كابتن

الله يسلمك .... خالتي ههه تعالي عشان نبشروكِ

أنا سَمَعت يا ولا ههه ألف مبروك يا حبيبي

الله يبارك فيكِ يا خالتي .... بس يكون مين اللي رشحني للشغلانة دي يا خالتي ؟

روح يا حبيبي وأكيد هيقولولك هناك

**************************

خلف هذه الجدران,هبة عبد العظيم نور

**************************

السلام عليكم , ممكن نقابلوا مدير النادي ؟

عليكم السلام , مين عايزه ؟

كابتن وجدي

ايوة ايوة , عندي فكرة عن تشريفك , نورت النادي يا كابتن

الله يخليك , متشكر

لحظة واحدة نبلغوا المدير

 تن تن يا أستاذ سلّام , الكابتن وجدي وصل 

خليه يتفضل بسرعة

حاضر , اتفضل يا كابتن وجدي

شكراً ...... السلام عليكم يا فندم

عليكم السلام ورحمة الله يا ابو الكباتن ههه نورت النادي

الله يخليك . منور بوجودك

احنا سعداء جداً بانضمامك لأسرة النادي وإن شاء الله تكون سعيد معانا

اكيد ان شاء الله , متشكر جداً لحضرتك

طيب اتفضل شوف العقد الأول واطلع على بنوده

قبل ما نشوفوا العقد كنت عايز نعرف مين اللي رشّحني للتدريب في النادي

الأستاذ احمد عادل سليم

.... الأستاذ احمد !!!

واضح انك غالي عليه يامَا , قال فيك قصايد شعر لدرجة إنّي قولتله انت كدة هتخليني نروحوا نجيبوه بنفسي من بيته ههههه

هه متشكر يا كابتن

على فكرة العقد قيمته خمستاشر ألف جنيه في الشهر وقابلين للزيادة , غير الحوافز والجوايز ومكافآت البطولات , وانا واثق انك هتحقق بطولات يامَا للنادي بإذن الله يا كابتن

ان شاء الله .... لكن حضرتك تعرف الأستاذ احمد منين ؟

عن طريق المينا .. الأستاذ احمد من احسن الناس اللي الواحد ممكن يصادفهم في حياته , وحقيقي كنت بنتمنى نخدموه أي خدمة , وجَه موضوعك في وقته عشان نعملوا حاجة بسيطة للأستاذ احمد

**************************

خلف هذه الجدران,هبة عبد العظيم نور

**************************

السلام عليكم يا ضيااااا هه

أهلاااااااً استاذ عبدالله ههه عليكم السلام , عاش مين شافك , ليك وحشة وربناااا

انت كمان واحشني يامَا يا ضيا ... الأستاذ احمد في مكتبه ؟

الأستاذ احمد على رصيف نمرة تسعة واقف مع الرجالة

**************************

خلف هذه الجدران,هبة عبد العظيم نور

**************************

أستاذ احمددددددددددد

أهلا يا عبدالله هه

نفس الرصيف اللي جيت شكرتك عليه من سنين يامَا , يوم ما دفعت الدين عن أمي وطوقتني بجميل حولين رقبتي , وبعد السنين دي كلها جيت تاني عشان نشكروك على جميل فوق جمايلك طوقت بيه رقبتي

أنا ما عملتش حاجة نستحَق عليها الشكر يا وجدي

ازاي تقول كدة وانت صاحب افضال عليا وعلى غيري

الفضل كله لله وحده يا وجدي , اعتبر الوظيفة الجديدة اعتذار بسيط عن اللي حصلك وحصل لعيلتك بسبب عيلتي

استاذ احمد ... أنا هفضل مدين ليك بكل شيء جميل في حياتي , انت سبب كل ابتسامة ابتسمتها , سبب كل أمل ملا حياتي

هه ايه الكلام الكبير ده يا ولا !!! أنت هتقول شعر ولا ايه !!

بالعكس , انا لا عارف نعبر ولا لاقي كلام جميل نقولوه

قولي يا وجدي , اخبار والدك ايه ؟

والدي !!! ما نعرفوش عنه حاجة .... ما نعرفوش حتى إذا كان عايش ولا ميت

طب وده اسمه كلام !!! يبقى لك أب وما تعرفش عنه حاجة !!!

كل اللي نعرفوه اسم المحل بتاع مراته اللي في ميامي

دور على والدك يا وجدي ... دور عليه ... جايز يكون محتاجلك

وهيحتاجلي في ايه !!! ده راح عاش حياته ونَسَى ان له ابن

مش يمكن دوّر عليك وما لقاكش ؟

...... جايز

دور على والدك يا وجدي , حتى لو مش محتاجلك , كفاية يحس بحبك له واشتياقك لحضنه

.... حاضر يا أستاذ احمد , هندور عليه

وعد ؟

وعد يا أستاذ احمد

**************************

خلف هذه الجدران,هبة عبد العظيم نور

**************************

متهيألي هو ده المحل بتاع ألطاف مرات ابويا , امي قالتلي زمان انه في الشارع ده , مافيش محل ملابس غيره , اما نروحوا نسألوا على ابويا ,...... يا ترى هيفتكرني بعد السنين دي كلها ولا نَسَى ان عنده ابن !!

*****************************************************

السلام عليكم

عليكم السلام يا استاذ , اهلا وسهلاً نورت المحل , طلباتك

لا متشكر , أنا مش جاي نشتري , اني جاي نسأل على ابويا

ابوك !!! ابوك مين ؟

مش صاحبة المحل ده اسمها ألطاف ؟

ألطاف ! ده كان زمان , أنا اشتريت المحل ده من سنتين

الله ! هي باعت المحل ؟

ايوة وسَمَعت كمان انها باعت الشقة وسابت ميامي بقالها يامَا

طب ما تعرفش حضرتك هي راحت فين ؟

لا والله يا استاذ ما عنديش علم

مممم طب متشكر

**************************

خلف هذه الجدران,هبة عبد العظيم نور

**************************

وبعدين بقى !!! يكونوا عزلوا راحوا فين !!! نلاقوا ابويا فين دلوقتي ! أنا لا نعرف لألطاف دي قرايب ولا نعرفوا عنها حاجة ,........... ايوة افتكرت , دول اهلها كانوا عايشين في الحارة اللي ورانا زمان  , بس يمكن يكونوا مَشَوا وسابوا الأنفوشي هما كمان , بكرة ننزلوا الأنفوشي إن شاء الله ونسألوا عليها عشان نوصلوا لابويا

**************************

خلف هذه الجدران,هبة عبد العظيم نور

**************************

السلام عليكم يا امّا

عليكم السلام يا وجدي , عملت ايه في شغلانة النادي يا ولا ؟

ههه استلمت الشغل يا امّا , ومش هتصدقي هنقبضوا كام

هيكون كام يعني !

خمستاشر الف جني في الشهر

ايّوووووووه بتتكلم جد  يا ولاااااا ؟

يا امّا قولي ماشاء الله لا قوة إلا بالله هههه

هو احنا هنحسدوك يا ولا ! ههه ماشاء الله لا قوة إلا بالله , الله يسعدك يا حبيبي , يا بداااااااارة تعالي اما نفرحوكي يا بتتتتتتت , وجدي اشتغل وهيقبضوه خمستاشر الف جني ماشاء الله عليييييه هههه

هههه الف مبروك يا وجدددددددي , انت طيب يا ولا وتستاهل كل خير وربناااااااا

أنا  !!!  .... لا طيب ولا حاجة يا خالتي , وما نستاهلوش أي حاجة في الدنيا , الأستاذ احمد هو اللي طيب وسبب الخير اللي انا فيه

ربنا يسعده يا حبيبي ويديه على قد قلبه الطيب

على فكرة يا امّا احنا روحنا ندوروا على ابويا وما لقيناهوش

ابوك !!! ........ وايه اللي فكرك بيه يا وجدي ؟؟؟

ابويا يا امي , ابويااااا , ومهما حصل لازم نعرفوا طريقه ونطمنوا عليه , الأستاذ احمد وصاني وانا وعدته اني ندوروا عليه

ابوك نساك يا وجدي زي ما نساني , احنا ولا على باله , تلاقيه فاكرنا لسة عايشبن في الأنفوشي ولا دريان بللي جرالنا , غرقان في بحر العسل والفلوس , هيدور ع الغلابة ليه يا ابني !!!

أنا لا عايز منه فلوس ولا عايز منه حاجة , أنا بس عايز نطمن عليه , بس الغريبة اني روحت المحل لقيته اتباع وكمان الشقة قالوا انها اتباعت

تلاقيهم راحوا شقة اكبر ولّا يمكن سَكَنوا في فيلا , وبدل المحل اللي باعوه تلاقيهم خدوا محلين تلاتة اكبر واحسن , ما هو معاه واحدة شاطرة تسرق الكحل من العين

أنا ماليش دعوة بيها , أنا كل اللي عايزه ابويا , بكرة هننزلوا الأنفوشي نسألوا على اهل ألطاف يمكن يدلوني عليها

الأنفوشي !!!

ايوة يا امّا الأنفوشي ,......... احنا لازم نرجعوا بيتنا القديم في الأنفوشي

ايييييييييه ! سامعة يا بدارة الولا بيخرف بيقول ايييييه !

انت بتقول ايه يا وجدي !!! ايه اللي يرجعنا الانفوشي بعد السنين دي كلها !!!

لازم نرجعوا يا خالتي , أنا الشغل اللي استلمته يخليني لازم نكونوا في اسكندرية باستمرار

يبقى ترجع لوحدك يا ابن اختي

يعني ايه الكلام ده يا خالتي ؟

يعني اللي سَمَعته يا وجدي , أنا مش هنرجعوا الأنفوشي بعد اللي جرالي , كل حاجة هناك هتفكرني بللي حصل واللي جرى والنار هتقيد في قلبي تاني , وانا ما صدقت انها انطَفت

يا خالتي انا عارف ان النار اللي في قلبك قايدة لحد دلوقتي وعمرك ما نَسَيتي حتى بعد السنين دي كلها

.............................سيبني في حالي يا وجدي , أنا اللي عندي قلته

واحنا ما نقدروش نسيبوكي انتِ وامي هنا لوحدكو

لوحدنا ليه ! حوالينا جيراننا وحبايبنا والكل يتمنى يخدمنا برموش عنيه , واذا كان على القهوة اديك اجرتها والايجار هيجيلنا اول كل شهر , وانت اكيد برضو مش هتنسانا وهتيجي تطمن علينا من وقت للتاني

اوووووووف وده رأيك انتِ كمان يا امّا ؟

روح يا ابني شوف مصالحك وما تشيلش همي اني وخالتك , احنا هنا في أمان , اني هندخلوا نلمولك هدومك يا حبيبي عشان من بكرة ترجع الأنفوشي

اني نازل نقعد ع القهوة شوية

**************************

خلف هذه الجدران,هبة عبد العظيم نور

**************************

وبعدين بقى ! سألت على ابويا في كل مكان يخطر على بالي وبرضو ما لقتوش , اوووووف نلاقوك فين بس يا ابويا , برضو مش هنيأس وهندوروا تاني , بس الأول نروحوا نشوفوا بيتنا القديم ونفتحوه , ايّوووووه سنين يامَا مرت , يا ترى المكان بقى شكله ايه !!!

*******************

ايه ده !!!! معقووووول !!! ابوياااااا !!! ايوة هو ابويااااا , ايّوووووه ده فاتح الورشة زي زمان وبيشتغل !! ايّووووه اني حاسس ان الزمن رَجَع بيا لورا , حاسس اني لسة عيل صغير بنلعب في الحارة زي زمان , حاسس ان امي هتخرج تنادي عليا من البكونة وتقول اطلع يا ولا يا وجدددددي , حاسس ان ابويا بينادي عليا عشان يديني مصروفي زي كل يوم ويبوسني ويطبطب على ضهري , ابوياااااااااااااااااا

السلام عليكم

عليكم السلام يا ابني , تحت امرك

............. انت مش عارفني ؟؟؟؟

مش واخد بالي يا ابني

........... اني وجدي

وجدي !!!!

وجدي ابنك يا اسطى سلامة

وجدددددددددي , ابنيييييييييي , انت وجدددددددي ؟؟؟؟؟؟

اني وجدي يا ابويا

ايّوووووووووووووووووه يا كرمك يا رب يا كرمكككككككك تعالى في حضن ابوك يا ابنييييييييي

ابوياااااااااااااا امووووووه امووووووه

وحشتني يا وجدددددي وحشتني يا ابنيييييييي كنت خايف يجرالي حاجة قبل ما نشوفووووك

........... سيبتني ليه يا ابويا ؟؟؟؟؟

......... حقك عليا يا ابني , حقك عليا يا وجدي , اني غلطت يا حبيبي , سامحني يا ابني

مسامحك يا اسطى سلامة

قول ابويااااااا ما تقولش يا اسطى سلامة تااااااااااني

وحشتني يا ابويا

ابني ابنيييييييييييييييييي يا حبيبي يا وجددددددي اقعد يا وجدي , اقعد يا حبيبييييييي طمني يا ابني , الدنيا عملت  معاك اييييييه ؟

............. تعبتنني يامَا , قَست عليا ياما

يا حبيبي يا ابني , معلش , بس انت راجل وتتحمل جبال يا وجدي

الحمدلله يا ابويا

أأأ أمك عاملة ايه ؟

الحمد لله

........ اتجوزت ؟

لا , امي عاشت عشاني , حَلَفت ما تتجوز عشان ما تجبليش جوز ام يسقيني المرار

....... وخالتك بدارة ؟

الحمدلله بخير

اتجوزت ولا لأ هي كمان ؟

لا ما اتجوزتش , خالتي زَهَدت في الدنيا وفي الرجالة , اللي جرالها ما كانش شوية

ربنا يعوضها ويعوض امك خير يا ابني

امي وخالتي هيرجعوا يعيشوا هنا تاني

هنا !!!

ايوة , اصل اني هنشتغل مدرب كاراتيه في نادي كبير ولازم نعيش في قلب اسكندرية

مدرب كاراتيه مرة واحدة !!! هه بسم الله ماشاء الله , اتاريك يا ولا , طول بعرض وحاجة تِفرح , الله يبارك فيك ويحميك من عيون الناس يا ابني , .... يبقى اني بقى لازم نمشي ونسيبوا البيت قبل امك وخالتك ما يجوا

ايه اللي بتقوله ده يا ابوياااااا !!!

حقهم يا ابني , ده بيتهم , واني هنا اللي غريب , اني ما جابنيش هنا إلا الشديد القوي

............ انت زعلان مع مدام ألطاف ؟

احنا اتطلقنا يا ابني

اتطلقتوا !!!

هنحكولك على كل حاجة يا وجدي

**************************

خلف هذه الجدران,هبة عبد العظيم نور

**************************

عارفة شوفت مين في الانفوشي يا امّا ؟

مين يا وجدي ؟ حد من الجيران القدام ؟؟؟

ابويا

ابوك !! هأ , وده ايه اللي جابه الأنفوشي ! بيزور قرايب المدام !!!

ابويا قاعد في بيتنا القديم

ايييييييه !!! جاب ألطاف وسَكّنها في بيتنااااااا ! امّا راجل قادر وبِجِح صحيححححح

يا امّا ما تغلطيشششش , ابويا قاعد لوحده , اصله طلق ألطاف

طلق ألطاف !!! هههه ليه ! اكتشف انها خبت عليه حاجة راح رامي عليها اليمين زي ما عمل معايا !!! تلاقيها هي اللي سابته بعد ما شَبَعت مننننننه , ما هي اللي زي دي مالهاش عزيززز , على العموم اني ما يهمنيش سابها ليه ولا سابته ليه , المهم انه دلوقتي يسيب البيت قبل ما ندخلووووه , ده بيت امي , مش تكية لكل واحد مش لاقي مأووووى

امي لو سمحتي , اللي بتتكلمي عنه ده ابويااااااا

اشبع بيه يا سي وجدددددي , لكن اني بقى عمري ما هننسى اللي عمله فياااااا , عمري ما هننسى انه سابني نتسَجَن وراح  اتجوز عدوتي  اللي رَمَتني في السججججججججن

في ايه يا ابتسام , بتتعاركي مع وجدي ليه ؟؟؟

تعالي شوفي وجدي واللي بيقوله يا بدااااااارة

في ايه يا وجدي ؟؟؟

امي زعلانة يا خالتي عشان بنقولولها ان ابويا رَجَع بيت الأنفوشي

ابوك رَجَع بيت الأنفوشي !!! ومراته ؟؟؟؟

ال اتطلقوا يا بدارة , بعد ما اتهنت بيه يومين رَمَته زي ما رماااااااني

ابوك طلق ألطاف !!!

ايوة يا خالتي طلقها بعد ما حَصَل بينهم مشاكل يامَا بسبب بنتها

يعني بنتها هي السبب في طلاقهم يا وجدي ؟

احنا هنحكولك ع الكلام اللي ابويا قاله

**************************

خلف هذه الجدران,هبة عبد العظيم نور

**************************

هههههههه سَمَعتي يا بدارة اللي جرا لسلامة على ايد بنت ألطاف !!! لا وكمان ألطاف افتقرت ورَجَعت لأصلهاااااا

ما تشمتيش في مصايب الناس يا ابتسام يختي

اني ما بنشمتوش يا بدااااارة , اني بس بنقولوا انه ذنبي وخَلَص من عنيهم هما الاتنين , خلي ابوك يمشي ويسيب البيت يا وجددددددي

لا يا امي , ابويا فعلاً كان عايز يسيب البيت قبل ما توصلوا , لكن اني اترجيته ما يمشيش , هو هيقعد في شقتنا القديمة واني هنقعدوا معاه , وانتِ وخالتي هتقعدوا في شقة ستي , واعتبريه مستأجر للمكان , واني هندفعولك الإيجار بتاعه

.................... للدرجة دي بتحب ابوك يا ولا ؟

ابويا يا امي , ابويا مهما حصل منه , كفايانا فرقة بقى , كفاااااية , اني تعبت , نفسي نعيش جنب ابويا وامي , اظن من حقي

سيبي الولا يبر أبوه يا ابتسام , ده مهما كان ابوه برضو وما لوش غيره يختي , ما تبقيش انت سبب في قساوة قلبه عليه , خلي اللي بينك وبين سلامة على جنب وما تحشريش فيه وجدي

.......  ماشي يا بدارة ,عشان خاطرك يا وجدي هنقبل ان ابوك يفضل في البيت , لكن مالوش دعوة بياااااا , لا لسانه يخاطب لساني ولا يجي يمتيييي

طبعاً يا امي , قولتلك ده مجرد جار بالنسة لك , ومش هيبقى فيه أي مجال للتعامل بينكو , جهزوا نفسكو عشان  العربية اللي اتفقت معاها تودينا الأنفوشي هتوصل الساعة تمانية الصبح إن شاء الله

**************************

خلف هذه الجدران,هبة عبد العظيم نور

**************************

هههه السلام عليكم  يا ابويا , نازل الورشة ؟

عليكم السلام  يا ابني , ايوة نازل بإذن الله , ايه الشنط اللي انت شايلها دي ؟ هي امك وخالتك وصلوا ؟

طالعين ورايا ان شاء الله

........ طب اني نازل الورشة

نهارك قشطة يا ابوياااااا ههه

ههه قشطة ان شاء الله يا وجدي

**************************

خلف هذه الجدران,هبة عبد العظيم نور

**************************

حمدالله ع السلامة يا ابتسام

............. يلا يا بدارة شهلييييييي , ولا يا وجددددددي انزل خد الشنطة دي منيييييي

حاضررررر

حمدالله ع السلامة يا بدارة 

الله يسلمك يا اسطى سلامة

نورتوا بيتكو ومطرحكو

تعيش يا اسطى , عن اذنك

اتفضلي ...... ايّووووه كان لك وحشة يا ام وجدي ممممم لما ننزلوا نبقوا نتصلوا بالحاج ابراهيم بشر نبلغوه

**************************

خلف هذه الجدران,هبة عبد العظيم نور

**************************

ترررررررررررررررررررررررررن تررررررررررررررررررررررررررررررررن

السلام عليكم يا اسطى سلااااااامة ههه ازيك يا راجل يا طيب

عليكم السلام ورحمة الله وبركاته يا حاج ابراهيمممم وربنا لك وحشة , بقالك يامَا   ما جيتش تسأل يعني !

وربنا لسة راجع من العمرة اني والمدام والعيال , هو ده اللي حاشني عنك وعن السؤال

ماشاء الله , عمرة مقبولة ان شاء الله

ان شاء الله , المرة الجاية نكونوا سوا بإذن المولى

ان شاء الله يا حاج ابراهيم , اني اتصلت عشان نقولولك على خبر حلو

خير يا اسطى سلاااااااااامة

ههه بدور رَجَعت

بدورررررر !!! صحيح الكلام ده يا اسطى سلاااااااااامة ؟؟؟؟؟؟

ايوة يا حاج ابراهيم , لسة رَجَعة ما بقالهاش نص ساعة , واني قولت نكلموك عشان نفرحوك بالخبر ده

ايّووووووووه ده خبر يساوي مليون جنييييييي لالالا يساوي اكتر من كدة بيااااااااما ههههه الله يبشرك بالخير يا اسطى سلامة , اني هنجيبوا ام بشر ونيجو على طووووول سلام يا اسطىىىىىى, ورددددددة يا وردتييييييييييي يا ام بشررررررررررر

ايوة يا سي براهيممممم بحضرلك لقمة تاكلهي قبل ما تنزل على شغلك من غير شر

سيبي اللي في ايدك وتعالي نفرحووووووووكي

خير يا رب اللهم اجعله خيرررررررر

خير يا سي براهيم فرحنييييييي جبت عريس لمهجيييييي ؟

ههههه عريس ايه يا ست انتِ !!! ده خبر اهم من كدة بياماااااااااا

وايه هو الخبر ديه ؟؟؟

لقيتها يا وردة لقيتهااااااااا

هي مين دي يا خويي ؟؟؟؟؟

الست الغالية اللي بنستنوها بقالي سنين يامَااااااا اللي ما كنتش بنناموا الليل بسبب ظلمي ليهااااااا

معقول تكون بدور ؟؟؟؟؟؟

هي يا وردة هيييييييي هههههه جوز اختها اتصل بيا وبلغني انها رَجَعت النهااااااااردة البسي بسرعة عشان نروحولهااااااااا

من عنييي هههههه ده يوم المنى يا خوييي , والله كان قلبي حاسس اننا هنعتر فيها

**************************

خلف هذه الجدران,هبة عبد العظيم نور

**************************

هو ده البيت يا وردة

طب ما تنزل يا سي براهيم عشان نطلع للست

........... مش هنقدر نقابلوها

ايييييييييه ! اومال جايبنا لييييييه ! بقى بعد السنين دي كلها تقول مش هتقدر تقابلهي !!! دي حومة ايه دي يا ولااااااد !!!

اني نقصد انك تطلعي انتِ الأول تمهديلي الجو يعني , اني بصراحة حاسس اني مكسوف والكسوف ملجمني من ساسي لراسي

والله لك حق تتكسف يا خويي , على الله اقدر الين قلبهي , توكلنا على الله , البيت اللي هناك ديه ؟؟؟؟

ايوة يا وردة

طيب يا خويي

**************************

خلف هذه الجدران,هبة عبد العظيم نور

**************************

تررررررررررررررررررررررررررررررررن

 شوفي مين اللي ع الباب يا ابتسااااااام

وهيكون مين اللي جايلنا !! يمكن وجدي نَسَى حاجة ورَجَع ياخدها , ايوة يللي ع الباااااب

نعمين

سلامو عليكو يختي

عليكم السلام

انتِ الست بدور ؟؟

لا , اني اختها

طب اني عايزة الست بدور

انتِ ومين وعايزة بدور في ايه ؟

طب يختي قوليلي اتفضلي , داني ضيفة وجايالها في خير ان شاء الله

ايوة يعني نقولولها ميييين ؟

اني أم بِشر

ام بشر !!! اتفضلي ادخلي على ما نبلغوها

كتر خيرك يا حبيبتي

**************************

خلف هذه الجدران,هبة عبد العظيم نور

**************************

بدارة , سيبي الصحون احنا هنعلقوها في الرشاقة واخرجي شوفي الضيفة اللي جيالك

ضيفة جيالي اني !!! مين دي ؟

ما نعرفوهاش , اول مرة نشوفوها , بتقول اسمها ام بشر

ام بشر !!! اني ما نعرفوش حد بالإسم ده

ايّووووه واني مالي اني بقى , ما تخرجي تشوفيها عايزة ايه يا بدارة

ماشي , يا ترى مين دي !!

**************************

خلف هذه الجدران,هبة عبد العظيم نور

**************************

السلام عليكم

عليكم السلام يا حبيبتي هههه بسم الله ماشاء الله , زي ما تخيلتك بالظبط , وشك حلو وسِمِح

الله يكرمك , اختي قالتلي انك عايزاني

ايوة , اني بقالي سنين طويليي بدوّر عليكي ومش عارفالك طريق

بتدوري علية  اني !!! انتِ مين ؟؟؟؟

اني واحدة مديونالك بشرفها وسمعتها , مديونالك بشهادة الحق اللي شهدتيها وبرئتيني قدام جوزي وقدام الناس كليتهيي

اني !!!! اني مش فاكرة حاجة من دي , تكونيش غلطانة في العنوان ؟

ههه لا , اني قصادكي انتِ يا ست بدور , اني وردييه مرات ابراهيم بشر

ابراهيم بشررررر !!!!!!!

ايوة , مال وشك اتغير كديي وبان عليه الزعل يختي !! اني عارفة ان ليكي ألف حق وحق تزعلي منه وما تنسيلوش اللي عمله فيكي , بس والله يختي ما كان يعرف ان انتِ صاحبة الجميل ده , والله يسامحه اللي ورّطه في العملة السودة دي , لو كان يعرف انتِ مين ما كانش فكّر يأذيكي ابداااااا

يعني اللي كان هيمنعه عن اذيتي هو لو كان عَرَف اني مين !!! و لو واحدة ما يعرفهاش يبقى عادي يعني انه يأذيها ويشوه سمعتها  ويدبحها بالحيا يا ام بشرررررر !!!

لا يختي اني ما قصدتش كدة , حتى لو كان واحدة ما يعرفهاش برضو ما يأذيهاش ولا يظلمها , ربنا حرم الظلم على نفسه وحرّمه بين العباد , لكن نقول ايه في نفوسنا الضعيفيي !!!

............ هو اللي مشيعك ؟

ايوة , ده حتى واقف تحت بعربيته , ما قدرش يطلع لحد عندك إلا لما اطلع اني ونستسمحوكي

الله يسامحه ويسامحنا ويسامح الجميع

اني عارفة ان قلبك شايل منه حمول جبال , لكن والله يختي سي براهيم اتغير خالص , بقى واحد تاني , عارف ربنا ويصلي ويصوم وبِعِد عن اهل السوء وانصلح حاله

وهو عايز مني ايه يعني ؟

عايزك تسامحيه

........ الله يسامحه

طب هو عايز يطلع يراضيكي ويستسمحك

مالوش لزوم , قوليله سامحته عشان ربنا يسامحني اني كمان , اني كمان ظلمت نفسي وظلمت امي , امي اللي ماتت في اليوم ده بحسرتها اهئ اهئئئئئئ سامحيني يا امّااااا اهئ اهئئئئئ

يا حبيبتي يختي !!! بالله عليكي ما تزعلي روحك , اني مش جاية اقلّب  المواجعععع

خلاص يا ام بشر , قولي لجوزك اللي فات مات , واني ما بنحاسبوش حد على اذيته ليا , اني مسامحاه

كتر خيرك يختي , طب معلش خليه يسمع الكلام ده بودانه , ده ما بينامش الليل من تأنيب ضميره , ودايما يدعي في سجوده انه يلاقيكي عشان يطلب السماح , ما تحرمهوش انه يسمع منك كلمة تسر خاطره

............. خليه يطلع يا ام بشر

هههه تعيشي يختي , اصيلي وبنت اصووووول

ترررررررررررررررررن

ايوة يا وردة

اطلع يا ابراهيم ههه

........ قابلتيها ؟

ايوة وقاعدة وياها اهو

........ اني طالع

**************************

خلف هذه الجدران,هبة عبد العظيم نور

**************************

تن تن

سي براهيم اهو , قوليله يتفضل يا ست بدارة

اتفضل

......... السلام عليكم

عليكم السلام

تسمحيلي نقعد

اتفضل

........... اني ..... اني مش عارف ن...ن..نبدأ الكلام منين !!! كل اللي عايز نقولوه , اني جاي نعترفوا بغلطي , اني السبب في كل اللي حصلّك , اني استغفرت ربنا يامَا عشان يغفرلي الذنب ده , عملت حاجات يامَا عشان نكفّروا عنه , لكن احساسي بالذنب ناحيتك عمره ما فارقني , واني صاحي واني نايم واني حتى بين الناس , عمري ما سامحت نفسي , وقولت عمري ما هنسامحوها إلا اذا لقيتك وسامحتيني , طول السنين اللي فاتت واني بندوّر عليكي , مش هتصدقيني لو قولتلك اني كنت بنيجي الحارة كل شهر على أمل اني نلاقوكي او نسمعوا أي اخبار عنك توصلني ليكي , لحد ما ربنا اكرمني بالاسطى سلامة , سبتله رقم تليفوني وقولتله لو الست بدور رَجَعت في أي وقت بلغني على طوووول  , وفعلاً الحمدلله اول ما رَجَعتي بالسلامة اتصل بيا عشان يبلغني

سلامة هو اللي قالك اني رَجَعت !!!

انتِ زعلتي انه بلغني !!!

ما زعلتش ولا حاجة

على العموم هو بلغني لما حس قد ايه اني ملهوف على الوصول ليكي , اني كنت بنجيله كل شهر حتى بعد ما اديته رقم التليفون , كنت نقولوا في نفسي يمكن رَجَعت والراجل نَسَى يتصل ولا يمكن رقمي تاه منه , عشان كدة كنت بنيجي بنفسي نسأل , الحمدلله ربنا استجاب دعائي , كنت خايف نموت ونقابلوا رب كريم قبل ما نوصلولك ونطلبوا منك السماح

اني سامحتك

من قلبك ؟؟؟؟

ايوة من قلبي , كفاية احساسك بالذنب وانك اعترفت انك ظلمتني

ايّووووه ربنا يريح قلبك زي ما ريحتي قلبي , ايّووووووه زي ما يكون جبل وانزاح من على قلبي , مش عارف نشكروكي ازاي على كرمك معايا

اني مش ممكن نردوك مكسور الخاطر بعد كل اللي عملته عشان توصلي , واللي خلاني نسامحوك اكتر هو اني حاسة ان ربنا هداك واتغيرت خالص

نحمده ونشكر فضله يا ست الناس , دلوقتي انتِ ليكِ بدل الدَين اتنين في رقبتي

دينين   !!!

ايوة , الدين الأولاني هو مجيتك لحد عندي عشان تظهري براءة مراتي , والدين التاني هو انك ما خذلتنيش لما جيت لحد عندك نطلبوا السماح

ما تكبرش الموضوع كدة يا حاج ابراهيم , اني ما عملتش حاجة نستحق عليها الشكر , اسفة اتأخرنا في واجب الضيافة , بالإذن

استني يا ست النااااااس , اني واجب ضيافتي وصل بسماحك ليا , ده عندي بالدنيا , بس اني لسة ما خلصتش كلامي

اقعدي يختي شوفي سي براهيم هيقولك ايه

اتفضل يا حاج ابراهيم

شوفي بقى يا ست الكل , احنا عايزين نعوضوكي عن اللي جرالك بسببي

يعني ايه تعوضني يا حاج ؟

اني عارف اني لو عرضت عليكي مال هترفضي تاخديه , سبق وعرضت عليكي المال قبل كدة ورفضتي , لكن اني بقى هندوكي المفتاح ده

مفتاح ايه ده يا حاج ؟؟؟؟

ده مفتاح شقة في برج من بتوعي في لوران , ومن النهاردة هنفرشوهالك احسن فرشششش

شقة ايه يا حاج اللي هنقبلوها !!! بأي صفة ناخدوا منك شقة !!

الشقة دي اعتَبَريها اعتذار عن كل اللي عملته , وعشان قلبي يرتاح ونتأكدوا انك سامحتيني بجد

يا حاج وربنا سامحتكككك مش الشقة اللي هتخليك تتأكد , اني لو مش مسامحاك كنت قولتلك في وشك زي ما قولتها لغيرك , لكن اني بنقولولك بنية صافية أني مسامحااااااك

لا , وربنا لتاخدي الشقققققققة , نبوسوا ايدك ريحيني يا بنت الناااااااااس , ربنا وحده هو الأعلم بحاااااااالي , اني مش هنرضوا عن نفسي غير لما نحسوا اني عملتلك حاجة تكفر عن ذنبييييييي نبوسوا ايدك ما ترفضيشششش

بالله عليكِ يختي اقبليها مننننننه , ايه يعني اخ جاب لاخته شقة !!! الحاج ابراهيم اخوكي واني اختككككك , هات المفاتيح يا سي براهيممممم خدي يختي , والله ما هم راجعيييييين

هه اني والله ما عارفة لزومه ايه بس ! على العموم هنقبلوا الهدية عشان نريحوك يا حاج ابراهيم

الله يكرمكككك الله يريح قلبككككككك ايّوووووووه اني دلوقتي قلبي ارتاح بجد والفرحة مش سيعاااااني ههههه اني هننزلوا من هنا على اكبر معرض موبيليا فيكي يا اسكندرية ونفرشوهالك , وبكرة الصبح ان شاء الله ناخدوكي انتِ وام بشر ونكتبوا الشقة بإسمككككك

لا اني مش هنكتبوا الشقة بإسمي

اومال هتكتبيها بإسم مين يا ست الكل ؟

هنكتبوها بإسم وجدي ابن اختي , اني هندوله الشقة دي يتجوز فيها

وماله , ده مالك وحقك وتتصرفي فيه براحتك ¸بكرة نعدوا عليكي وناخدوا معانا الأستاذ وجدي ونكتبوا الشقة بإسمه , ولو عايز عروسة نجيبوله كمان ههه

ههه عروسته موجودة يا حاج الحمدلله

ربنا يسعده  ويسعدك انتِ كمان , معادنا بكرة ان شاء الله عشان نكتبوا شقة لوران بإسم ابن اختك , يلا يا ام بشر عشان نلحقوا معرض الموبيليا

يلا يا خويي

ايه يا جماعة رايحين فيييين ! ما يصحش كددددة , هنعملوا اتنين شيّ بسرررررعة

متشكرين يا ست الكل , الشيّ نبقوا نشربوه شربات لما نمضوا عقد الشقة ان شاء الله

**************************

خلف هذه الجدران,هبة عبد العظيم نور

**************************

ترررررررررررررررررررررررررن ترررررررررررررررررررررررررن

ده عم مرشدي اللي ع التليفون ههه السلام عليكم يا عم مرشدي , ايه الأنوار دي !

عليكم السلام يا سعيد يا ابني , الله يحفظك , أنا ع القهوة في الأنفوشي , فاضي تجيلي ؟

في حاجة يا عم مرشدي ؟

ايوة , حاجة تخصك

تخصني !! ... طب أنا هنستأذن من الأستاذ ابراهيم ونجولك

يا ابني لو وراك شغل ما تعطلش نفسك , نخلوها وقت تاني

لا يا عم مرشدي , الساعة داخلة على تمانية وما فيهاش حاجة لو استأذنت بدري ساعة

خلاص يا ابني , أنا مستنيك

**************************

خلف هذه الجدران,هبة عبد العظيم نور

**************************

شيل يا ابني كوباية الينسون دي

حاضر يا عم مرشدي , تأمر بأي طلبات  تانية ؟

لما يجي اللي احنا مستنينه ... أهو جَه

سلامو عليكو يا عم مرشدي

عليكم السلام يا سعيد , اقعد يا ابني , روح يا ولا يا عبده هات اتنين شيّ مظبوطين

عنيا يا عم مرشدي

خير يا عم مرشدي

ههه مالك قلقان كدة يا ولا يا سعيد !!

اصلك بتقول حاجة تخصني يا عم مرشدي  , عشان كدة قَلَقت شوية , طول ما احنا في الطريق بنقولوا يا ترى ايه هي الحاجة دي !!

احنا هنريحوك

ها يا عم مرشدي , طمني

بدور رَجَعت

بدوررررر !!! بتتكلم جد يا عم مرشدي ؟؟؟

ايوة يا ولا ... أنا عارف انك ميال لها من زمان , قلت في نفسي يمكن خلاص آن الآوان عشان شملكو يتلم

ايوة يا عم مرشدي , لكن نعرفوا منين اذا كانت هتوافق ولا لأ ! ... ما يمكن ترجع لسامي

لا , بدور رفضت سامي

رفضته !!! ..... يعني هو عرض عليها وقالت لأ ؟

ايوة , أي واحدة عندها كرامة يجرالها اللي جرا لبدور على ايد سامي لازم ترفض الرجوع له ولو هيتاقلها بكنوز الأرض ... خلاص , الساحة خليتلك يا سعيد

....... لا يا عم مرشدي ... مش هينفع

مش هينفع ليه يا ابني ؟ شوفتلك شوفة تانية ولا زَهَدت في البنية ؟؟؟

لا ده ولا ده , بالعكس , انا مش بس بنتمنى بدور , انا بنتمنى التراب اللي بتمشي عليه , لكن بصراحة نخافوا نتقدموا لتصدني زي ما كانت بتصدني زمان

طب خلاص , احنا الصبح إن احيانا ربنا هنروحولها بيتها بإذن المولى ونعرفوا ايه اللي في دماغها

انت اللي هتروحلها بنفسك يا عم مرشدي !!

انت ابني يا سعيد , زيك زي سامي

أنا عارف يا عم مرشدي وربنا , لكن بصراحة خايف سامي يزعل لما يعرف انك روحتلها عشاني

يا ابني المفروض ان سامي يعرف ان كل شيء قسمة ونصيب , وحكاية ان احنا نتدخلولك في الموضوع ده لإنك غالي عندي , وبدور كمان غالية واتظلمت يامَا ونفسي ربنا يعوضها بيك

ربنا يخليك لينا يا عم مرشدي , وربنا انت أب لينا كلنا

اشرب الشيّ يا ولا خلينا نقوموا , بنحبوا نناموا بدري عشان نقدروا نصحوا لصلاة الفجر

ربنا يتقبل منك يا عم مرشدي

اللهم آمين يا ابني ... أوعى يا ولا تكون مقصّر في الصلاة

أبداً وربنا يا عم مرشدي , احنا بنصلوا الخمس فروض جماعة

الله يفتح عليك يا ابني

**************************

خلف هذه الجدران,هبة عبد العظيم نور

**************************

ده سامي ابني قاعد قدام المحل زي عادته

سيب الموبايل اللي في ايدك وشوف الزباين اللي داخلين دول يا ولا يا عباااااااس

حاضر يا أستاذ سامي , كنا بنكلموا حماتي ولا مؤاخذة

لا مؤاخذتك معاك يا اخويا انت وحماتك , شوف شغلك يا رمضااااااان

سلامو عليكو يا ولا يا سامي

اهلاً يا ابويا عليكم السلام , تعالى اقعد استريح

لا , احنا جينا عشان ناخدوا الولا حمو مشوار طياري كدة

اشمعنى حمو يعني !!

هنتعكزوا عليه في الطريق

انت رايح فين ؟

رايح مشوار خصوصي

طب ما نيجوا معاك احنا

لا , خليك انت في المحل راعيه

طب اقعد استريح , حمو راح يجيبلي كوباية شيّ من القهوة

ماشي

الشيّ يا أستاذ سامي , ايه ده , الحاج مرشدي ! ههه يا مرحب يا حاج

الله يخليك يا حمو , يلا عشان تيجي معايا

نيجوا معاك فين ؟

رايح مشوار خصوصي كدة وعايزك معايا

وماله , رايح تتعارك مع حد ولا حاجة عشان نجيبوا معايا شومة ؟

ههه نتعاركوا ايه يا ولا !! شايفني بلطجي !!

بلطجي ايه بس يا عم مرشدي !! هو انت قادر تقف على رجليك عشان تبلطج !!

طيب يلا يا ولا عشان ما نتأخروش

ماشي , عن اذنك يا أستاذ سامي

بالسلامة يا اخويا , ما تتأخرش يا ولاااااا

**************************

خلف هذه الجدران,هبة عبد العظيم نور

**************************

ولا يا حمو , روح اسأل صاحب الورشة دي الست بدور ساكنة هنا

الست بدور مين ؟

ايّووووه , روح اسأل يا ولا

حاضر يا حاج .... الراجل ده جراله ايه ! جايبني معاه عشان نسألوا ع الحريم !!! ..يكونش ناوي يخطب ؟ واحنا مالنا .... سلامو عليكو يا أخ

عليكم السلام ورحمة الله , نعم

نعم الله عليك , هي الست بدور ساكنة هنا ؟

وبتسأل على بدور ليييييييه ؟؟؟

يا عم بالراحة , بتبرقلنا ليه !! , مش انا اللي بنسأل , ده عمك الحاج الكُبّارة اللي واقف هناك ده

والحاج بيسأل عن بدور ليه ؟

طب هي ساكنة هنا يعني ؟

ايوة

طب استنى , يا عم مرشدددددي , تعاااالى , هو ده العنوااااااان

**************************

خلف هذه الجدران,هبة عبد العظيم نور

**************************

سلامو عليكو يا ابني

عليكم السلام يا حاج

كنا عايزين بدور يا ابني

بخصوص ايه يا حاج ؟

قولها عمّك مرشدي عايز يشوفك

.... هو انت الحاج مرشدي تاجر الماني فاتورة ابو سامي طليقها ؟؟

أيوة أنا

وما وصلكش الرد بالرفض يا حاج ؟

يا ابني الكلام ما يبقاش كدة , انا ضيفكو , والضيف ما يتسابش واقف في الشارع قدام الرايح والجاي كدة

آسفين يا حاج , الضيف يُكرم , حقك على راسنا , اتفضلوا

متشكرين ... خليك انت هنا يا حمو

هو انا مش ضيف انا كمان ولا ايه !!!

خليك هنا يا ولااااا

حاضر يا عم مرشدي , ربنا يوفقك مع العروسة الجديدة , يا سلام , أحلى حاجة ان الواحد يجدد حياته بعد التمانين

**************************

خلف هذه الجدران,هبة عبد العظيم نور

**************************

تررررررررررررررررررررن بدور

مين ؟

سلامة

أهلاً يا اسطى سلامة

في ضيف معايا عايز يقابلك

مين الضيف ده ؟

أنا يا بدور يا بنتي

أيّووووووه عم مرشدي ههه ايه النور ده ! وربنا ما مصدقة عنيا ,ده ايه الخطوة العزيزة دي! اتفضل يا عم مرشدي , اتفضل

يزيد فضلك يا بدور , تّشكري ع المقابلة الحلوة , رغم انّي كنت جاي قلقان من مقابلتك

بقى كدة يا عم مرشدي ! دانت ابويا اللي ما شوفتش منه غير كل خير , اتفضل اقعد يا عم مرشدي

الله يبارك فيكِ يا بنتي

طب نستأذن انا عشان سايب الورشة لوحدها

مع السلامة يا اسطى , كتر ألف خيرك .... ازيك يا عم مرشدي , ليك وحشة وربنا

تعيشي يا بنتي ... أصيلة يا بدور وقلبك ابيض

الله يخليك يا عم مرشدي , ازي صحتك

الحمدلله يا بنتي , ادينا كل يوم بحال , حكم السن بقى

سن ايه بس ! دانت كلك شباب اهو الله أكبر ههه

هه الله يكرمك يا بدور

تشرب ايه يا عم مرشدي ؟

لما نخلّصوا كلامنا في الموضوع اللي جايلك عشانه نبقوا نشربوا

....... عم مرشدي , الله يخليك لو كنت جاي تتكلم معايا بخصوص سامي فانا ما عنديش رد غير اللي قولتهوله في وشه , سامي ما يلزمنيش ...يعز عليا نقول الكلام ده وانت جاي لحد عندي يا عم مرشدي

ومين قال انّي جاي عشان سامي !!

اومال عشان مين يا عم مرشدي ؟؟؟

سعيد

سعيد !!! ......هو سعيد لسة ما اتجوزش لحد دلوقتي ؟

لا يا بنتي سعيد اتجوز , لكن مراته ماتت وسابتله عيلين صغيرين

لا حول ولا قوة إلا بالله , وربنا زعلتني يا عم مرشدي

كفاية زعل يا بنتي , احنا جايين عشان نفرحوكِ ونلموا شملك على سعيد

..... هو اللي موسطك يا عم مرشدي ؟

ايوة , بصراحة الولا خاف يجي بنفسه لتصديه وتكسري خاطره زي زمان , عشان كدة جيت نعرفوا رأيك ونبلغوه ..... ها يا بدور , نردوا ع الجدع نقولوا ايه ؟

............ مش هنقدروا نقولوا اه ولا لأ يا عم مرشدي ....بلّغ سعيد ان الرد هيوصله لغاية عنده ... هو لسة شغال عندك ؟

لا , شغال عند ابراهيم هلال في فرع جليم

خلاص يا عم مرشدي .. ربنا يقدم ما فيه الخير ان شاء الله

**************************

خلف هذه الجدران,هبة عبد العظيم نور

**************************

سعيد ,احنا هنروحوا النهاردة نمروا على باقي الفروع , انت هنا بدالي , مش عايز نوصوك ع الشغل

الشغل في عنيا يا أستاذ ابراهيم

تسلم عنيك , السلام عليكم

عليكم السلام يا استاذ ابراهيم ..... هاتلي واحد شيّ بالحليب من القهوة يا زكي على ما نراجعوا الدفاتر دي الله يخليك

من عنيا يا أستاذ سعيد

ايّوووه دي الحسابات الآخيرة ما اتقيدتش في الدفاتر ... نقيدوها ونراجعوا من الأول

لو سمحت عايزة توب قماش يكون حرير ابيض

بدورررر !!!!

**************************

خلف هذه الجدران,هبة عبد العظيم نور

**************************

ولحد هنا وانتهت حلقاتنا لهذا اليوم

اسفة والله مضغوطة جدا وما عنديش وقت انزل اكتر من كدة النهاردة

متشكرة والله بجد على التفاعل وشكرا لكل حبياتي اللي اول مرة يسعدوني بتعليقاتهم ,ليا عودة إن شاء الله للترحيب بيكم بالشكل اللائق لأشخاصكم الكريمة

اقرأ كل التعليقات باهتمام ومنتظرة تحليلاتكم لحلقات النهاردة وتوقعاتكم للقادمة إن شاء الله

والأسئلة اللي وردت هرد عليها حاضر بعد انتهاء عرض الرواية

إن شاء الله بكرة اعوضكم بحلقات كتير

دمتم بكل الخير قرائي الأعزاء

لا تنسوا ذكر الله والصلاة على الحبيب عليه الصلاة والسلام

سبحان الله ,الحمدلله ,لا إله إلا الله ,الله أكبر