زوجتي والمفتاح( الثانية)

 

عند ظهيرة اليوم التالي دلف السيد محفوظ إلى زوجته التي كانت تعد نفسها للذهاب معه إلى قصر ابن عمه لتهنئته, فقال يتعجلها:

ــــ يلا يا خديجة اجهزي عشان الحنطور مستني تحت

ــــ خلاص اهو يا سي محفوظ هحط النقاب وننزل

وضعت النقاب ونادت على بنتيها تتعجلهما:

ــــ يلا يا حفصة يلا يا صفية حطوا النقاب خلينا ننزل اتأخرنا

ــــ حاضر يا امي

 

********************

عند بوابة القصر المنيف, نزل الحاج محفوظ وعائلته من العربة التي يجرها الحصان, وحيا الحارس

ــــ السلام عليكم ورحمة الله وبركاته

ــــ وعليكم السلام ورحمة الله وبركاته اهلا وسهلا يا حاج محفوظ

ــــ اهلا بيك . من فضلك تبلغ حافظ باشا اني وصلت انا والست جماعتي

ــــ تحت امرك اتفضل

كانت الخادمة عزيزة في انتظار السيدة خديجة وبناتها لدا باب مبنى القصر, فأدخلتها وأشارت إلى الصالون الكائن في البهو وقالت:

ــــ اتفضلي هنا يا فندم .هبلغ جيلان هانم ان حضرتك موجودة

ــــ شكرا . اقعدوا يا بنات

************************

أتت إليهم السيدة جيلان, تقول بترحيب بالغ بلكنتها التركية:

ــــ ميرحبا خديجة هانم ميرحبا حبيبتي . ميرحبا حبايب قلب صفية حفصة

ــــ اهلا جيلان هانم ازيك والله وحشاني من زمان

ــــ لو كنت صحيح وحشتك كنت جيت زورتني خديجة هانم

ــــ والله يا حبيبتي شغل البيت والولاد واخدين كل وقتي اعذريني . طب وانتِ ليه ماتجيش تزورينا وتنورينا ؟

ــــ انا كمان معذور حبيبتي .مش في وقت . قهوتك ايه خديجة هانم؟

ــــ قهوة مظبوط

ــــ وانتو حبايب قلب تشربوا ايه؟

ــــ لا احنا مش عايزين نشرب حاجة احنا عايزين نشوف شريفة وعفيفة

ــــ حالا يجو حبيبتي صفية. عزيزة دادة تبلغهم

طفقت تنادي خادمتها: عزيزة, عزيزة

ــــ افندم جيلان هانم

ــــ بلغي هوانم شريفة عفيفة ايجو حالا

ــــ تحت امرك يا هانم

********************

نزلت عفيفة تستبق الدرج بطفولة, وهرعت إليهم ترحب:أهلاً طنط خديجة, ازيكو صفية وحفصة

ــــ أهلاً أهلاً يا عفيفة, ازيك وحشتينا

ــــ انتو كمان كلكو وحشتوني .

سألتها أمها: فين اختك بنت عفيفة؟

ــــ هتيجي حالا مامّا . انا مبسوطة كتير انكو زورتونا النهاردة طنط خديجة

ــــ الله يحفظك يا حبيبتي

توجهت عفيفة بحديث مداعبة مرح إلى الفتاتين:ازيك حفصة ازيك صفية فينكو من زمان . انتو احلويتوا قوي وبقيتوا شبهي هاها

ضحكت صفية وقالت: ازيك إنتِ يا عفيفة, انا طلبت من والدي انه يجيبني انا وحفصة عشان نشوفك انتِ وشريفة

ــــ ميرسي صفية , ازيك حفصة

ــــ  ازيك انتِ , وحشتينا يا عفيفة انتِ وشريفة

نظرت السيدة جيلان إلى ابنتها عفيفة وتنهدت بعمق وقالت للسيدة خديجة:البنت عفيفة دي تعباني كتير خديجة هانم. بنت عنيد كتير متعب كتير .هيطير عقل أنا

ــــ أنا يا مامّا ! ظلم والله يا طنط ظلم . انا طيبة كتير هاها

ــــ هاها لا يا جيلان هانم دي عفيفة زي النسمة الرقيقة بس هي بتشاكسك شوية

تبسمت السيدة جيلان وقالت:انتو هتتغدوا معانا النهاردة طبعا يا طنط خديجة

ــــ لا والله يا حبيبتي مش هينفع

فتدخلت عفيفة بروحها المرحة في الحديث وقالت:طب انتِ عارفة طنط عم حسين الطباخ عاملنا ايه ع الغدا؟ . عاملنا شركسية .وانتِ لو جربتي شركسية عم حسين هتيجي كل يوم تتغدي معانا هاها

ــــ هاها بالهنا والشفا ليكو يا حبيبتي

ــــ لا خديجة هانم, تالله بالله هتتغدا معانا مش امشي إلا بعد غدا وكمان بنات اقعد مع بعض واحنا نقعد مع بعض حبيبتي

ــــ طب بس سي محفوظ قالنا ساعة ونمشي

ــــ مش تقلق انا هبلغ عزيزة تبلغهم في صالون

رمقت السيدة جيلان ابنتها الكبرى شريفة تمشي على استحياء صوبهم, فقالت تمدحها:

ــــ  شريفة هانم بنت حظرتنا جت ترحب بيكم خديجة هانم, تعالي شريفة هه بنت خجول كتير

ــــ هه ربنا يحفظهالك يا جيلان هانم هي واخواتها

حيتهن الفتاة الحيية بلهجة فرنسية لهج بصوت خافت هادئ كطبعها:بنجور طنط خديجة بنجور حفصة وصفية

ــــ اهلا شريفة وحشتينا

ــــ ابتسمت السيدة خديجة ونادت الفتاة: تعالي يا شريفة يا حبيبتي اقعدي جنبي, دانتِ وحشاني خالص

ــــ ميرسي طنط خديجة

*******************************

في مجلس الرجال, حيث يجالس حافظ باشا ابن عمه الحاج محفوظ..هنئه الحاج محفوظ قائلاً:

ــــ تهانينا القلبية بالبشاوية يا حافظ باشا يا ابن عمي

ــــ الله يبارك فيك يا محفوظ . دفعت فيها كتير قوي قوي عشان اخدها

ــــ الله يعلي مراتبك كمان وكمان

ــــ اشرب قهوتك

ــــ يدوم العز

يسمعان دقات على باب الغرفة, فيأمر حافظ باشا الطارق قائلاً:

ــــ ادخل

دخلت الخادمة عزيزة تقول: جناب حافظ باشا, عصمة جيلان هانم تبلغ جنابك ان الهوانم هيتغدوا معاها

ــــ طيب اتفضلي انتِ.....خلاص يا محفوظ, خلي الحريم يقعدوا مع بعض النهاردة شكلهم هيتفقوا علينا ياسيدي هاها

ــــ هاها يا منجي من المهالك . طيب انا همشي وهاجي بعد المغرب اخدهم إن شاء الله

********************

 

عادت الخادمة عزيزة تخبر جيلان هانم:

ــــ بلغتهم جيلان هانم

ــــ تمام, بلغي سفرجي يحضر غدا

ـــــ أمرك جيلان هانم

ـــــفقالت السيدة خديجة: طيب بس الاول عايزين نصلي العصر انا والبنات يا جيلان هانم

ـــــ وانا وشريفة  كمان نصلي معاكي طنط . احنا مش بنصلي الا في اليوم اللي بتيجي تزورينا فيه

ـــــ معقول ! ازاي الكلام ده . الصلاة فرض حبيبتي ولازم نأديها في مواعيدها . انتِ ما بتقوليلهومش ليه يصلوا يا جيلان هانم؟

ــــ مش ارضى . كتير بقول هما مش اسمع كلام , بصلي وحدي

ــــ طيب يلا الله يهديكو روحوا ا توضوا عشا نصلي

ــــ فردت عفيفة ضاحكة:نسينا الوضوء ازاي هاها

الفتت السيدة خديجة إلى ابنتها صفية قائلة:روحي معاهم يا صفية فكريهم بالوضوء

ــــ حاضر يا أمي

 

********************

بعد تناول الغدا اجتمعت الفتيات الأربع في ركن بعيد عن الوالدتين يتسامرن, فجلست  عفيفة إلى البيانو ونادتهن
ــــ تعالي صفية إنتِ وحفصة اعزفلكو اخر مقطوعة اتعلمتها من مدام رينيه مدرسة البيانو بتاعتي.هتعجبكو كتير

 

شرعت في العزف فانتفضت صفية تنهاها: لالا ارجوكِ مش عايزين, بطلي عزف

ــــ ليه صفية هو انا بعزف وحش ؟. انا زعلانة منك

ــــ لا مش حكاية وحش أو حلو . احنا مش بنحب الموسيقى

ــــ هاها في حد مش يحب موسيقى !. موسيقى دي غذاء الروح

ــــ غذاء الروح ! حبيبتي غذاء الروح هو سماع القرآن

ــــ بس انا مش بحب اسمع قرآن

ــــ ده طبيعي . لانك بتحبي الموسيقى . وحب القرآن ما يجتمعش في قلب واحد مع حب الموسيقى

ــــ وجهة نظرك واحترمها . بس برضو الموسيقى غذاء الروح . جربي تسمعيها تلاقي نفسك بتسرحي في عالم حالم  جميل . دنيا تانية غير الدنيا اللي احنا فيها دي

ــــ لا ياستي مش عايزة اجرب . اعزفي بعد ما نمشي

ــــ موسيقى دي هواية جميلة راقية جداً . انا احب موسيقى كتير كتير

*********************************

وخلف حياتها العبثية التي لا هدف من ورائها تحيا لأجله, وخلف روحها المرحة, تفور في رأسها أفكار كبركان ثائر لا يخمد, فذهبت إلى والدتها أثناء احتسائها فنجان من القهوة في البهو ربما تجد ضالتها

ــــ مامّا

ــــ افندم عفيفة

ــــ نفسي اسألك سؤال محيرني كتير انا وشريفة

ــــ اتفضل عفيفة  هانم إبنتنا

ــــ ليه, ليه, ليه بابّا يفضل عادل عليا انا وشريفة رغم انه اخونا الصغير؟؟؟

ــــ حبيبتي عادل ده فالاد .شيل اسم بابّا

ــــ يعني هو احنا شايلين اسم صاحب السرايا اللي جنبنا !ولا يمكن احنا بنات راجل تاني

ــــ اخرس بنت ,اخرس .انت عايز لفق تهمات شرف حظرتنا وتخلي ابوك فرغ رصاصات في قلب بنت ادب سيس!!!!

ــــ سلامة قلبك ما مّا . انا بس عايزة افهم

ــــ يابنت انت اتجوز روح بيت جوزك .تنتسب لجوزك . مش شيل اسم عيلة حافظ باشا . عادل فالاد يشيل اسم ابوه واي حاجة عظيم اعمل تنسب لابوه

ــــ يا سلام!! . اي حاجة عظيم اعمل! . هو بيعمل اي حاجة عظيمة غير الأكل والنوم!!!!!!

ــــ اخرس بنت اخرس . اطلع جناح . مش عايز كلم معاك

تنهدت عفيفة وقامت عن مقعدها عامدة الدور العلوي

***************

في الدور العلوي, اتجهت إلى غرفة أخيها لغرض في نفسها. دقت الباب استئذاناً, فما أن سمح لها حتى دخلت تقول:

ــــ عادل

ــــ افندم عفيفة .

ــــ هو انت هتركب خيل النهاردة؟

ــــ طبعا

ــــ طيب ممكن تخليني اركب الفرس بتاعك اخويا حبيبي ؟

ــــ لأ لأ لأ مش ممكن. وسيبيني دلوقت عشان نازل الجنينة لبابّا

زفرت وتوعدته بصوت خافت:طيب, استنى عليا يا عادل.ان ماوريتك
*******************

أسرعت إلى غرفتها, فألفت أختها تتفرس في إحدى لوحاتها, فاتجهت إلى أدراج الخزانات تفتش عن شيء على عجل ونادت:

ــــ شريفة

ــــ افندم عفيفة

ــــ هاتيلي مقص حالا حالا

ــــ مقص ! هتعملي ايه بمقص؟

ــــ خلا خلاص لقيت مقص عن اذنك

ــــ رايحة فين مجنونة؟

********************

أمام اصطبل الخيول بحديقة القصر, ضرب حافظ باشا على كتف ابنه عادل بقوة وقال متفاخراً به:

ــــ يلا يا عادل يا حبيبي خليت السايس يخرجلك الفرس يا أقوى فارس . البس لبس الفروسية وحصلني

ــــ داكور بابّا

********************************

ما أن دلف عادل إلى غرفته, حتى صعق برؤية لبس الفروسية ممزق وملقى على الفراش وإلى جواره المقص. فصاح فزعاً

ايه ده !!!!! . ايه اللي عمل في لبس الفروسية كدة؟ . وايه المقص ده!

***************

هرع إلى أبيه حزيناً يحمل الملابس الممزقة, وصاح بضيق

ــــ با بّا . شوف لبس الفروسية اتعمل فيه ايه

ــــ ايه ده . مين عمل كدة

دخل حافظ باشا إلى القصر يرغي ويزبد ونادى في بنتيه بصوت مرعد

ــــ  بنت يا شريفة بنت يا عفيفة ,شريفة,عفيفة

جاءت الفتاتان تركضان:افندم بابّا

ــــ مين قص لبس الفروسية بتاع عادل ؟  انتِ يا شريفة ؟

ــــ لا بابّا مش انا مش أنا

ــــ انتِ يا عفيفة

ــــ لالالا بابّا مش أنا

ــــ اومال مين انطقوا؟

ــــ فنظر عادل إلى عفيفة بضيق وقال لأبيه: متهيألي بابّا انها عفيفة عشان كل ماتشوفني اركب خيل تتغاظ وتبصلي بحقد

ــــ فألقت عفيفة التهمة على أختها: لالا بابّا دي شريفة هي اللي قصته

ــــ صدمت شريفة وقالت باكية:حرام عليكي عفيفة والله مش انا بابّا, دي عفيفة

ــــ فبكت عفيفة كذباً وقالت:لا يا بابّا مش تصدقها مش أنا دي شريفة  

ــــ كدة ! انتو الاتنين هتتضربوا . الكرباج, هاتولي الكرباج

ــــ سمعت السيدة جيلان الهرج والمرج فجائت تسعى:فيه ايه جناب حافظ باشا .ليه حظرتكم زعق؟

ــــ تعالي شوفي بناتك وقلة أدبهم . بوظوا لبس الفروسية بتاع أخوهم

ــــ ليه كدة بنات ادب سيس . اعتذروا لاخوكم

ــــ لا دول هيتضربوا بالكرباج

ــــ لا باشا ارجوك دول بنات كبير مش اطفال . مش اضربهم

ــــ اسكتي يا هانم والامصيرك الكرباج زي بناتك

امان ربي امان . انت اضرب حظرتنا كمان . انا ماشية قبل ما تنفذ تهديدات . بنات حبايب قلب انا حزينة كتير  بنات حظرتنا اهئ اهئ . خلص ضرب وتعالى افطر جناب باشا جوز حظرتنا  

ــــ جائت إحدى الخادمات مسرعة تحمل الكرباج وأعطته إياه:الكرباج يا جناب الباشا

ــــ ايوة الكرباج عشان تتأدبوا

أمسك بالكرباج يضربهما وهما تفران أمامه صارختان

ــــ آآآه بابّا حرمت بابّا آآآه

ــــ آآآه مش أنا بابّا مش أنا آآآه

ــــ وكمان محبوسين طول اليوم ومافيش فطار ولا غدا ولا عشا .عشان تتعلموا الأدب

خرج مسرعاً وأغلق الباب بالمفتاح وتركهما في محبسهما

********************

كانت شريفة تبكي بحرقة وتنشج, فتأففت عفيفة ونهرتها قائلة

ــــ يوه! كفاية بقى شريفة ازعجتيني .بطلي عياط

ــــ انا مش بعيط عشان اتضربت بالكرباج . انا بعيط عشان انتِ اختي

ــــ ههه مع إني سعيدة إنك أختي

ــــ تقدري تقوليلي أنا ذنبي ايه اتضرب بالكرباج واتحبس واجوع بسببك!!!!

ــــ ذنبك انك اختي الكبيرة ولازم تشاركيني . اصل كدة كدة بابّا هيعاقب اللي قص اللبس وانا لو اعترفت العقاب هيبقى عليا لوحدي لكن لما العقاب يتقسم على اتنين يبقى اخف شوية

ــــ انتِ اكبر كارثة في حياتي

ــــ هههه أشكرك شريفة، ده  وسام احطه على صدري

******************************

في منزل السيد محفوظ

زفر علي ونادى اخته صفية متأففاً

ــــ صفية

ــــ نعم يا علي

ــــ انتِ ماركبتليش زرار القميص ليه؟

ــــ نسيت يا علي والله، انا اسفة

 

يعني ايه اسفة !.انا طلبته منك اكتر من مرة ازاي تنسي ؟؟؟؟

ـــ طيب انت ليه بتزعقلي يا علي ! قولتلك نسيت

ــــ طب اتفضلي ركبيه دلوقتي حالا

ــــ انا مش فاضية دلوقتي

ــــ سيبي اي حاجة في ايدك وخيطيلي الزرار سامعة ولا لأ

أتى الوالد على صوت الشجار:

ــــ ايه ده . بتزعق ليه يا علي يابني؟

ــــ تعالى يا والدي شوف صفية . كذا مرة اطلب منها تركب زرار القميص وما تنفذش اوامري

ــــ اوامرك ! يعني ايه أوامرك يا ولد

ــــ انا اخوها .يعني انا الراجل . يعني اوامري تتنفذ

ــــ لا حول ولا قوة الا بالله . انت كدة بتقهر اختك وده مش في اسلامنا .احنا مسلمين ورسولنا أمرنا بالرفق بالنساء .اللي يقهر إمرأة يبقى بيعصي اوامر رسول الله صلى الله عليه وسلم اللي قال رفقا بالقوارير .شبه المرأة بالقارورة لرقتها وسهولة كسرها . المسلم بأوامر سيدنا النبي عليه الصلاة والسلام ما يكسرش انثى

 

ــــ عليه الصلاة والسلام . يا والدي انا ما قصدتش . انا بس عايز القميص ده بالذات واتضايقت لما لقيته زي ماهو

ــــ يبقى تركّب  الزرار  بنفسك . او تطلب من اختك بأدب .ولا انت عايز تتشبه بغير المسلمين  في قهر النساء

ــــ معاذ الله يا والدي . انا اسف . انا اسف يا صفية حقك علية، انا هركب الزرار بنفسي

انصرف الوالد، فأحضر علي الخيط والإبرة، وأنزوى في أحد المقاعد يحاول أن يثبت زرار قميصه..ولكن محاولاته تبوء بالفشل، فلا يستطيع أن يدخل الخيط في ثقب الإبرة..لمحته أخته الصغرى، فوضعت يدها على فهمها تكاتم الضحك ولفتت انتباه أختها صفية:

ــــ صفية

ــــ نعم يا حفصة

ـــــ شايفة علي محتاس ازاي مش عارف يركب الزرار ههه مش عارف يدخل الخيط  في الإبرة  ههه

نظرت إليه صفية بشفقة، وقامت إليه، وقالت بحنو:

ــــ علي

ــــ نعم يا صفية

ــــ هات اركبلك الزرار يا حبيبي

 

ــــ ربنا يخليكي ليا يا اختي يا حبيبتي . بجد والله ماكنتش عارف اركبه، جزاكِ الله خيرا
********

كانت عفيفة تتنقل بين غرف وأروقة الدور العلوي متأففة..حين جاءتها الخادمة:

ــــ عفيفة هانم

ــــ نعم دادة عزيزة

ــــ مدام سيلفيا مدرسة الفرنساوي وصلت

ــــ طيب انا نازلة حالا
********

نزلت مسرعة تحمل كراساتها، وحيت المعلمة الإفرنجية:

ــــ بنسوار مدام سيلفيا

ـــ بنسوار مودمازيل عفيفة، كومان سافا

ــــ بيا

ــــ عملتي الديفوار؟

ــــ أها اتفضلي

ــــ برافو، برافو جميل

ــــ ايه رأيك فيا وفي شطارتي مدام سيلفيا ههه

ــــ انتِ جميل، وكل حاجة فيكِ جميل. تري تري جولي، حقيقي انتِ  شكلك جميل قوي قوي قوي ...خسارة عزيزتي خسارة كبير

ــــ ههه خسارة اني جميلة !

ـــــ لا . خسارة انك مش حاسة بجمالك لان مافيش حد يقدره

ــــ يعني ايه!! . مش فاهمة

ــــ يعني انتِ  مسكينة ومظلومة في دين ظالمك وحارمك من حريتك وحقوقك

ــــ حقوق ! اي حقوق؟

ــــ حقوقك في ان كل الناس يشوفو جمالك . حقوقك في انك مش تغطي وشك وتتحرمي من كلمات إطراء ومدح في جمالك البارع ده

ــــ إنتِ  بتقولي ايه مدام سلفيا! . احنا ممنوع نخرج كاشفين وجوهنا. مامّا تقول ده فعل الغانيات، لكن بنات عائلات محترمات يترفعوا عن كشف الوجوه

ــــ مامّا غلطان ومظلوم زيك... تعرفي عزيزتي عفيفة لو جربتي تسمعي كلمة انتِ  جميلة هتعمل في احاسيسك ايه ؟

ــــ طيب ما هو انا بسمعها من أنّة الكبيرة ومن مامّا ومن صحبات مامّا

ــــ حبيبتي انا مش اقصد ستات زيك . انتِ  لازم تسمعيها من راجل

ــــ ايه ! ايه الكلام ده . يعني ايه اسمعها من راجل

 

ــــ يعني لازم تكشفي وشك عشان جمالك يبان لكل الرجالة .لازم كلهم يقدروا اد ايه إنتِ  جميلة ويجروا وراكي ويتنافسوا على قلبك

ــــ ..... كلامك جميل قوي قوي مدام سيلفيا

ــــ اومال لو سمعتي الكلام الجميل من راجل هيحصلك ايه ! الحب ده حاجة جميلة اوي عزيزتي عفيفة . لازم راجل يحسسك بأنوثتك يمدح مفاتنك والا ازاي انتِ  واحدة ست من غير احاسيس حب وهوى!

ــــ ياااه!! كلامك رائع رائع,  أروع من كل مقطوعات الموسيقى اللي تعزفها مدام رينيه  . خلتيني أسرح بعيد، بعيد قوي مدام سيلفيا

ــــ اسرحي حبيبتي، اسرحي في أميرك الجميل اللي لازم يشوفك وينبهر بجمالك ويخطفك على حصانه ويطير بيكي ورا السحاب بعيد، يعيد، بعيد عن الدنيا والناس

ــــ طيب وده يحصل ازاي بس !. هو انا بخرج لوحدي خالص!!!!!

ــــ فكري عزيزتي، فكري وأكيد هتوصلي لحل . ما تستسلميش للقيود . تمردي .كسري . حطمي. المهم إنك  تاخدي  حريتك . حقك في الحب والحياة
**************************************************

في صبيحة اليوم التالي، هرعت جيلان هانم إلى غرفة بنتيها متهللة لتزف لهما بشارة:

ــــ عفيفة....شريفة

ــــ افندم مامّا

ــــ عندي خبر جميل بنات

ردت عفيفة وقلبها يتمنى ذلك:

ــــ خير ما مّا .بابّا طلق حضرتك ؟

ــــ اخرس بنت عفيفة اخرس ادب سيس .

ــــ طيب ايه خبر اجمل من كدة؟

ــــ أنّة يلدز هتوصل بكرة من اسطانبول

قفزت عفيفة فرحاً لبشرى قدوم جدتها التركية:

ــــ أنّة يلدز! حبيبتي أنّة . خبر جميل ما مّا . انا فرحانة كتير

ــــ وانا كمان فرحانة زي عفيفة مامّا . لكن  انّة هتقعد معانا ولا في سرايتها؟

ــــ لالا، انّة أقعد معانا، دي وحشاني كتير

*********************************

في صبيحة اليوم التالي وصلت الجدة، فهرعت الخادمة إلى الدور العلوي تبشر جيلان هانم:

ــــ عصمة يلدز هانم وصلت عصمة جيلان هانم

ــــ نازلة حالا عزيزة , بلغي هوانم صغيرين

ــــ أمرك جيلان هانم
***********************************

نزلت السيدة جيلان مسرعة وهرولت إلى والدتها ترحب بشوق واحتفاء:

ــــ انّة  ههه انّة حبيب قلب، ميرحبا انّة ميرحبا، وحشتيني كتير

ــــ جيلان هانم بنت حظرتنا وحشتيني كتير كتير

ــــ اتفضل اقعد أنّة يلدرز

ــــ فين هوانم عفيفة شريفة حبايب قلب أنّة يلدز؟

ــــ عفيفة نازل اجري على سلالم عشان يقول ميرحبا انّة ههه

ــــ أنة يلدز حبيبتي هاتي حضن كبير

ــــ براحة بنت , انا مش اتحمل انت ,  وقعت انّة . فين شريفة هانم اختك عفيفة هانم  حفيد حظرتنا ؟  ليه مش جه سلم على أنّة ؟

جاءت شريفة تمشي على استحياء وقالت بنبرة هادئة رقيقة:

ـــ انا جيت أنّة، وحشتيني أنّة ههه

نقلت الجدة نظرها بين الفتاتين إعجابا بحسنهما وقالت:

ــــ امان ربي امان، غزلان، غزلان

ــــ تشكرات انّة

جلست الجدة تتكئ على عصاها وسألت ابنتها بتجهم:

ــــ فين حافظ فلاح بغل جوز حظرتكم جيلان هانم بنت حظرتنا؟

كاتمت عفيفة الضحك وهمست في أذن أختها:

ــــ هاها شوفتي أنّة بتقول ايه على بابّا شريفة . فين بابّا يجي يسمع!

ردت السيدة جيلان على والدتها:

ــــ حافظ باشا جاي حالاً أنّة

جاء السيد حافظ يدخن سيجاره الفخم وحياها باستعلاء:
ـــــ صباح الخير عصمة يلدز هانم

ــــ صباح قطرانات على دماغك فلاح حافظ، بوس ايدين هانم فالاد، بوس

ــــ استغفر الله العظيم حاضر

قبل يدها متأففاً، فقالت وهي تنظر إليه بازدراء:

ــــ فين فلاد بغل عادل؟

جاء عادل وحياها بجفاء:

ــــ صباح الخير انّة

ــــ صباح خيرات فلاد عادل . ايه ده فالاد فلاح زي ابوك . ازاي مش تبوس ايد  أنّة  فلاح ادب سيس!

ـــــ حاضر أنّة

قبل يدها متأففاً وتنحى بعيداً، فهمست جيلان هانم في أذن والدتها تعاتبها:

ــــ مش تشتم عادل أنّة . عادل حبيب قلب

ــــ مش حبه انا فلاد عادل .دي شبه ابوه مناخير كبيرات، حواجب مقفولات، شبه هيافانات

ــــ لا أنّة، عادل فالاد جميل، جميل، حبيب قلب

استدارت الجدة إلى السيد حافظ  وقالت:

ــــ سمعنا انك خدت بشاوية فلاح حافظ

ــــ الحمدلله يلدز هانم

ــــ منين جبتي فلوس شحات منين؟

ــــ وبعدين يلدز هانم! أووووووف  . انا الحمدلله فلوسي كتير

ــــ مش فلوسك حرامي .هيرسيز . فلوس بنتي شفتطه  في كرشك

قهقهت عفيفة وقالت:

ــــ مالكيش حق يا انّة، دا احلى حاجة في بابّا كرشه، ولا ايه رأيك مامّا ؟ هاها

ـــ بنت أدب سيس مش جيب سيرة كرش بابّا . كرش بابّا عظيم

سألت عفيفة جدتها بمرح:

ــــ ماقولتليش انّة ايه رأيك فيا . احلويت ولا زي ما انا؟ وايه رأيك في شريفة . انا احلى ولا هي؟

ــــ امان ربي امان . شوك جوزال، شوك جوزال . انتو هوانم غزلان تركي جميل

عارضها حافظ باشا باستياء:

ــــ من فضلك يلدز هانم . انا بناتي مصريين مش اتراك

ــــ انت اخرس فلاح . دول هوانم تركي جميل شبه جيلان هانم بنت حظرتنا . لو انت مش اتجوز هانم تركي غزال بنت حظرتنا  كنت جيبت هوانم تركي جميل زي دول من ست فلاح زيك ؟

ــــ لا طبعا العفو .هجيبهم منين .

همس في أذن زوجته حانقاً:

ــــ سكتي امك شوية من فضلك وقوليلها تراعي مركزي قدام الولاد

ــــ مامّا مش اشتم جناب حافظ باشا جوز حظرتنا

ــــ لا ، اشتم،  دا فلاح عايز كرباج

********

في المساء، ذهبت عفيفة إلى غرفة جدتها رغبة في سبر أغوار الماضي..دقت الباب وقالت:

ــــ أنّة يلدز، نمتي ؟

ــــ لا صاحي عفيفة هانم حفيدة حظرتنا حبيب قلب

ــــ ههه طيب انا جيت اقعد معاكِ شوية , وحشني الكلام معاكِ انّة

ــــ اقعد عفيفة هانم حفيد حظرتنا اقعد

ــــ  داكور أنّة , اتفضلي شيكولا جميل

ــــ تشكرات عفيفة هانم حفيد  حظرتنا

تبعتها شريفة إلى غرفة الجدة، دقت الباب ونادت بنبرة مهذبة:

ــــ أنّة

ــــ دي شريفة اختي جت كمان

ــــ ادخل شريفة هانم حفيد حظرتنا

ــــ هه تشكرات أنّة , ممكن اقعد جنبك عفيفة ؟

ــــ  اقعدي شريفة , عارفة انك بتموتي فيا وتحبي تقعدي جنبي في كل مكان  ههه

ــــ اختي وبحبك مهما أعاني  بسببك، اعمل ايه!

ــــ  ميرسي اختي الجميلة ههه، ماقولتليش انّة.. لما انتي بتكرهي بابّا بالشكل ده ازاي وافقتي على جوازه من مامّا وازاي اصلا اتعرفوا على بعض ؟

ــــ ابوك كان يشتغل في ارض حظرتنا

 

ــــ كان بيشتغل ايه أنّة؟

ــــ كان لم دود من قطن

ـــــ يع!! ههه وبيعمل ايه بالدود ده ههه

ــــ يابنت . في دود كل  قطن في ارض . احنا نجيب فلاح شحات كتير كتير يلمو دود من قطن عشان نحافظ على قطن

ـــــ  بابّا كان بيلم دود شريفة هههه

ـــــ وطي صوتك ليحبسنا تاني والمرة دي بسبب الدود

ــــ طيب ازاي مامّا اتجوزته؟

ــــ امك عبيط .دماغ عايز كسر. مرة ابوك يلم دود، جاله ضربة شمس، وقع في ارض شالوه دخلوه سرايات، امك عبيط عيط عشانه، صعب عليه اتجوزته

ـــــ هههه هو عشان جاله ضربة شمس تقوم تتجوزه !. يعني دلوقتي لو عم حسنين الجنايني جاله ضربة شمس يجوزهولي ولا يجوزه لشريفة ؟ههه

ــــ لا بنت . هو ضحك على امك، فلاح مكار .حب . غزل . اقع في غرام .

ــــ مممم قولتيلي.  دي مامّا طلعت رومانسية قوي ههه عاشقة الدود... كملي يا أنّة  كملي انتو عملتو ايه؟

 

ــــ جدك شوكت باشا طرده من ارض ومن عزبة . امك هدد انتحارات .وافقنا عشان امك مش ينتحر

ــــ بقى كدة !!.... دا الإنتحار  وسيلة ضغط بقى . بس إلا  بابا اللي كان بيلم الدود ده كمان هههه

************
جاء موعد درس الفرنسية، ونزلت عفيفة إلى المعلمة الإفرنجية المتحررة:

ــــ بنسوار مدام سيلفيا

ــــ بنسوار مودمازيل عفيفة

ــــ انا عملت الديفوار

ـــ سيبك من الديفوار دلوقتي . انا جبتلك كتب مهمة جداً عن حرية المرأة لازم تقريها

ــــ كتب ايه دي؟

ــــ كتاب تحرير المرأة وكتاب المرأة الجديدة بتوع قريبك قاسم بك امين

ـــــ هاها قريبي! قريبي منين كمان ده!

ــــ اصل هو باباه تركي ومامته من صعيد مصر وانتِ مامتك تركية وباباكي من صعيد مصر يبقى هو قريبك من ناحيتين هاها

ــــ ايوة دا فعلا طلع قريبي ههه هاتي الكتب

 

ــــ انصحك بالتركيز اكتر على كتاب المرأة الجديدة عشان بيبين اد ايه المرأة مظلومة وإن الإسلام دين ظالم

ــــ الإسلام ! الإسلام دين ظالم !!!!!!!!!

ــــ اقري واتأكدي بنفسك عزيزتي عفيفة
****************************

في اليوم التالي، نادت السيدة جيلان الخادمة لأمر هام:

ــــ عزيزة

ــــ افندم جيلان هانم

ــــ بكرة عيد ميلاد عادل بك ابن حظرتنا، وحافظ باشا عامل حفل كبير، بلغي طباخ جهز كل اصناف بيعمل في عزومات وحلويات كتير كتير وكمان كيكة عيد ميلاد

ــــ كل سنة وعادل بك طيب .هبلغ الطباخ تحت امرك جيلان هانم

أسرعت عفيفة إلى والدتها مقطبة الجبين وقالت متضجرة:

ــــ ايه ده مامّا! اشمعنى هتعملوا لعادل حفلة عيد ميلاد .انا عيد ميلادي كان الشهر اللي فات، ليه مش عملتو حفلة؟ وكمان شريفة عيد ميلادها كان الشهر اللي قبله، ليه مش عملتو حفلة؟؟؟؟

ــــ عفيفة .دي اوامر بابّا وانا مش اتدخل

 

ــــ كدة ! طيب.. انت مش يتدخل أنا بقى يتدخل . ان ما بوظتلكو الحفلة . استنى علية يا عادل
********

 

انتهت الحلقة 

انتظروني يوم الثلاثاء إن شاء الله مع أحداث جديدة

لا تنسوا ذكر الله والصلاة على الحبيب عليه الصلاة والسلام والاستغفار

استغفر الله الذي لا إله إلا هو الحي القيوم وأتوب إليه 

اللهم صل على محمد وعلى آل محمد كما صليت على إبراهيم وعلى آل إبراهيم إنك حميد مجيد

لا إله إلا الله ولا حول ولا قوة إلا بالله