رواية (أم فتحي) الثانية

 

-   تن تن تنننننننننن 

-   مين 

-   افتح يا فتحي انا حماتك يا حبيبي ومعايا اخوات مروة 

-   اهلا اهلا ازيك يا طنط. ازيكو يابنات 

-   الله يسلمك يا جوز بنتي. 

-   الله يسلمك يا فتحي 

-   فين مروة ؟

-   هبلغها انكو هنا عن اذنكو 

 

-    مامااااااااااااااااااااا وحشتيني 

-   يا حبيبة ماما. وحشتيني 

-   ازيك يا سارة ازيك يا هاجر وحشتوني 

-   وحشتينا قوي قوي يا مروة 

-   البيت من غيرك وحش خالص يا مروة 

-   ربنا يخليكو يا حبايبي. عقبالكو يارب ان شاء الله 

-   قوليلي اخبار فتحي معاكي ايه يا حبيبتي ؟

-   فتحي حنين وطيب خالص يا ماما 

-   الحمدلله يا حبيبتي، ربنا يسعدكو ويهنيكو يارب 

-   تشربوا ايه ؟

-   لأ يا حبيبتي احنا جينا نطمن عليكي وماشين على طول. حماتك جاية امتى؟

-   بعد يومين ان شاء الله 

-   بصي بقى يا مروة ماوصكيش على حماتك يا حبيبتي. شيليها في عنيكي، ماتزعليهاش ابدا، ودايما تقوليلها حاضر وطلباتها مجابة. خليها دايما راضية عنك يا حبيبتي ومهما عملت استحمليها 

-   حاضر يا ماما من عنية 

-   بصي يا حبيبتي خدي فتحي النهاردة وانزلوا اشترولها هدية حلوة واول ما تيجي قدميهالها 

-   ليه يا ماما وبمناسبة ايه الهدية ؟

-   بمناسبة حياتك الجديدة معاها وتعبير عن حبك ليها وفرحتك انك هتعيشي معاها 

-   حاضر يا ماما 

-   وكمان عايزاكي تسألي فتحي عن اكتر اكلة حماتك بتحبها وتعمليها اول يوم تيجي فيه ، وتعرفيها انك عملتيها عشان خاطر هي بتحبها 

-   حاضر ياماما. في نصايح تانية ولا كفاية كدة؟ ههههههههه

-   اه كمان اشتروا تورتاية كدة وقولولها  انه احتفال بيها وبوجودها 

-   من عيوني يا ماما 

-   طيب ياروح ماما احنا ماشيين 

-   ايه يا ماما خليكو شوية 

-   ايوة ياماما احنا عايزين نقعد مع مروة دي وحشانا خالص 

-   يلا يا بنت  انتِ وهي ، نبقى نيجي مرة تانية، يلا اتحركو ..مع السلامة يا مروة يا حبيبتي وماتنسيش اللي وصيتك عليه 

-   الله يسلمك يا ماما. حاضر ان شاء الله هعمل زي ما قولتيلي

 

-    تن تن ننننننننننننننننننننننننن تن تن تننننننننننننننننننننننننننننن

-   مين 

-   افتح يا فتحي انا امك يا عين امك 

-   ياااااااااااااااااااااااااااااااه يا أمي، وحشتيني يا ست الحبايب وحشتيني يا غالية 

-   ماتشوفش وحش ابدا يا حبيبي. ياسلاااااااام، بيتي كان واحشني بشكل ..ماكنتش بعرف انام عند غادة، طول الليل اتقلب في السرير ومابيجنيش نوم الا وش الصبح 

-   الحمدلله يا حبيبتي اديكي رجعتي نورتي بيتك 

-   الحمدلله ربنا مايحرمني من بيتي ابدا. اومال فين سعاد؟ 

-   سعاد مين ؟

-   سعاد مراتك يا حبيبتي. هي لحقت تغضب وتروح لامها !

-   يا أمي أنا مراتي اسمها مروة. وبعدين هي بتلبس وجاية تسلم عليكي 

-   اهلااهلا اهلا يا ماما وحشتيني قوي اموووووووووووووووووووه 

-   ماما!  زي بعضه. اهلا يا مرت ابني ازيك 

-   الله يسلمك يا حبيبتي. يلا يا ماما ادخلي غيري هدومك على ما احضر الغدا. حذري فذري طبخالك ايه؟

-   هو انتِ عاملة كل غدوة فزورة واللي يحلها هو اللي هياكل؟

-   لأ يا حبيبتي كلنا هناكل بس انا عملالك اكلة بتحبيها قوي 

-   وانتِ عرفتي منين الأكل اللي بحبه ؟

-   سألت فتحي طبعا 

-   اكيد عملالي فشة وممبار 

-   لأ يا ماما بصراحة دي حاجات صعبة ومابعرفش اعملها 

-   اومال طبختي ايه يا خايبة الرجا  خلصيني 

-   عملت لحضرتك ملوخية بالأرانب 

-   لسة واكلاها عند غادة، ياريتك ما عملتيها 

-   معلش يا ماما المرة الجاية اعملك اكلة غيرها 

-   طيب يختي اما اقوم بقى اغير هدومي على ما تعمليلي اكل جديد غير اللي انتِ عملتيه 

-   اااااااااااااه أهلاً، ابتدينا من أولها 

-   بتقولي حاجة يا مرات فتحي ؟

-   بقول نورتي البيت يا ماما 

-   منور بوجودي ووجود ابني جنبي

™™™™

-   يلا يا امي الغدا جاهز 

-   حاضر اديني جاية اهو 

-   عملتلك صنية بطاطس بالفراخ يا ماما 

-   طيب 

 

-    ها يا أمي ايه رأيك في طبيخ مروة ؟

-   اهي حاجة تسد الجوع وخلاص 

-   يا أمي قوليلها حاجة تشجعها 

-   اشجعها ازاي يعني. ازمر بالزومارة واقول بيب بيب مروة؟

-   خلاص يا أمي لا تقولي ولا تعيدي 

-   الظاهر الأكل ما عجبش ماما 

-   انتو هتحققوا معايا!. ما تاكلوا وانتوا ساكتين 

-   حاضر يا أمي، منورة 

-   منورة يا ماما، منورة جامد قوي 

-   بوجودك يختي 

 

-    شوفتي يا ماما جبتلك ايه !غمضي عنيكي 

-   ليه هو احنا هنلعب استغوماية !

-   غمضي بس 

-   اديني غمضت 

-   فتحي بقى. ايه رأيك في العباية الحلوة دي 

-   ذوق مين المعفن ده!. وحشة قوي والوانها تقرف 

-   يعني ما عجبتكيش يا أمي؟ 

-   لأ ما عجبتنيش. تلاقي الست الهانم استرخصت وجابت 

-   والله يا ماما دي غالية خالص 

-   غالية بكام يعني؟ 

-   يعني ينفع اجيب لحضرتك هدية واقولك تمنها! 

-   انتِ يابت هتمثلي فيلم هندي!. هو انتِ كنتي دافعة فيها حاجة!. كله من فلوس ابني 

-   لا والله يا أمي دي فلوس مروة. صممت تجيب الهدية على حسابها 

-   اه عشان كدة جابت ارخص حاجة 

-   ربنا يسامحك يا ماما 

-   يسامح العباد ربنا يختي 

-   قطعي التورتة يا مروة 

-   انتو جايبين تورتة؟ 

-   ايوة يا ماما جايبينها عشان خاطر عيونك 

-   طيب خلاص طالما جايبينها عشان خاطر عيوني يبقى ماحدش ياكل منها غيري 

-   بالهنا والشفا يا أمي 

-   عالم ماتجيش الا بالسك على دماغها. ال البت عايزة تاكل عقلي وتخليني احبها بالعافية. بس على مين. انا صاحية لعمايلها كويس قوي. لا تراجع ولا استسلام 

***************************** 

-    اصحووووووووووووووووووووووووووووا 

-   يلا 

-   يا فتحي 

-   يا مروة 

-   يلا الساعة بقت ستة 

-   دب دببببببببببببب دب دددددددددددددددددددددددب 

-   يا فتحي 

-   اصحى وصحي مروة 

-   في ايه في ايه !يا فتحي اصحى ، مامتك عمالة تخبط وتدبدب ع الباب مش عارفة مالها 

-   في ايه؟، ايه الخبط والرزع ده !في ايه ع الصبح !

-   اخرج شوف في ايه 

-   يا فتحييييييييييييييييييييييييييييي

-   ايوة يا أمي، في ايه في ايه ؟؟

-   مافيش حاجة يا ضنايا بصحيكو 

-   يا امي النهاردة الجمعة ولسة الواحد ماخدش كفايته من النوم 

-   طب خلاص نام انت وصحي مراتك تعملي كوباية شاي 

-   شاي! دلوقتي ؟

-   ايوة شاي ودلوقتي كمان. ايه طلبت طلب غريب ولا حاجة وانا مش واخدة بالي !

-   لا ابدا يا أمي غريب ازاي !

 

-    مروة حببيبتي، معلش ممكن تعملي شاي لأمي ؟ 

-   حاضر يا حبيبي من عنيا 

-   انا اسف حبيبتي صحيتك بدري 

-   لا يا حبيبي ما فيش حاجة 

****************************************8 

-    اتفضلي الشاي ياماما 

-   شكرا يا مروة يا مرات ابني 

-   طب عن اذنك 

-   عن اذني يعني ايه!. إنتِ رايحة فين ؟

-   هدخل اكمل نوم 

-   نوم ايه يا مرات ابني!. روحي يختي فتّحي شبابيك الشقة خلي نسمة الصبحية تدخل

-   ايه! حاضر ياماما 

 

-    انا فتحت الشبابيك 

-   شكرا يختي، روحي بقي اوضتي شيلي المخدات وحطيها ع الشباك في الشمس عشان المكروبات 

-   حاااااضر يا ماما حااااااضر 

************************************888 

-    شيلتهم يا ماما وحطيتهم في الشمس 

-   طب يا مرات ابني روحي هاتي يختي الجردل والشرشوبة وامسحي البلاط 

-   دلوقتي يا ماما!

-   اومال بكرة ! ولا يمكن بكرة 

-   حاضر حاضر، تحت امرك 

 

-    اه ياني، خلاص ياماما خلصت 

-   مسحتي البلاط كويس ونضفتيه وخلتيه زي الفل كدة ولا لأ ؟

-   ايوة يا ماما حتى تعالي شوفي 

-   اصل انا احب النضافة قوي واعزها اكتر من عيالي 

-   حاجة تاني يا ماما ؟

-   روحي انشري كام حتة الغسيل اللي في الغسالة 

 

-    نشرت الغسيل يا ماما 

-   خلاص يختي قشريلي برتقانة وخشي نامي انتِ 

-   لا. نوم ايه بقى !النوم طار 

-   احسن برضو بلا نوم بلا خيبة، روحي حضريلي الفطار 

-   هو انتِ مش هتستني فتحي لما يصحى ؟

-   لا هفطر ولما يصحى هفطر معاه تاني مايجراش حاجة 

-   حاضر ، حاضر من عنيا

––––

-   معلش يا مروة ، انا عارف ان أمي تعبتك معاها 

-   ماتقولش كدة يا فتحي، دي زي ماما بالظبط 

-   على فكرة اخواتي جايين كلهم النهاردة وولادهم عشان يباركلولنا 

-   اهلا بيهم في اي وقت 

*******************************************88 

-    يا مرووووووووووووووووووووووووووووووووووووة 

-   مروة يا مرات ابني 

-   نعم يا ماما 

-   فتحي قالك ان اخواته جايين النهاردة؟

-   ايوة قالي 

-   طيب هتطبخي ايه ؟

-   هعمل بسلة 

-   غادة ما بتحبهاش بس هالة بتموت فيها .اعملي لغادة كوسة واعملي لدينا بامية واعملي لممدوح سبانخ ومراته اعمليلها محشي كرنب ، والعيال اعمليلهم تشيكن رولز وبرجر 

-   ايه ده يا ماما !انا هعمل الحاجات دي كلها ازاي !

-   زي الناس. فيها ايه دي !

-   طيب ياماما مانشوف صنفين كلهم بيحبوهم ومجمعين عليهم ونعملهم 

-   لأ ، أنا ولادي كل واحد بيحب اكلة غير التاني 

-   استغفر الله العظيم، حاضر 

 

-    ترررررررررررررررررررررن تررررررررررررررررررن 

-   هيييييييييييييييه هييييييييييييييييييه هييييييييييييييييييه 

-   العروسة اهيه اهيه العروسة اهيه اهيه 

-   هيييييييه 

-   مين دوووووووووووول ؟؟؟

-   ولاد اخواتي يا مروة ، واخواتي طالعين 

-   بس يا ولد سيب الفازة بس يابنت ما تتنططيش ع الطرابيزة، إلحق يا فتحي 

-   بس ياولد انت وهو وهي وهي 

-   هييييييييييييييييييييييييييييييييييييييييييييييييه 

-   السلام عليكم 

-   ازيكو يا عرايس 

-   أهلاً يا هالة

-   وحشتنا يا توحا 

-   ربنا يخليكِ يا غادة ، طيب سكتوا عيالكو، سكتوهم 

-   ووووووووووواء ووووووووووووووواء وااااااااااااااااااء 

-   سكتي ابنك يا هالة

-   مش راضي يسكت يا غادة  ، بس يا واد ماانا لسة مرضعاك. طالع مفجوع زي ابوك 

-   هما العيال اختفوا راحوا فين يا مروة !! 

-   يا خبر ياخبر، إلحق يا فتحي دول دخلوا اوضتنا 

-   نهاركو مش فايت 

––––

-   برا يا ولد انت وهو اطلعلوا برا 

-   شايف يا فتحي البنت بهدلت المراية بالروج 

-   أنا هتصرف يا مروة ، حاسب حاسب ياولد  .اقفلي الدولاب يا بنت 

-   لالالالالا دي مش طريقة يا فتحي

-   خلاص انا هطلعهم برا وانتِ اقفلي الأوضة بالمفتاح 

 

-    ايه ده ان شاء الله! مين اللي قفل الأوضة بالمفتاح ؟؟

-   انا يا هالة 

-   وقفلاها بالمفتاح ليه يا حبيبتي !كنا هنسرقها ولا هنسرقها !!

-   يا هالة انتِ شوفتي الولاد بهدلوا الدنيا ازاي ؟

-   بيت جدتهم يا حبيبتي ويلعبوا براحتهم. طول عمرهم بيلعبوا وعمر ماحد قفل منهم الأوض بالمفاتيح 

-   في ايه يا هالة مايصحش كدة ، مروة عندها حق ، واحنا ما نرضاش حد يعمل كدة في بيوتنا ، واللي ما نرضاهوش على نفسنا ما نرضاهوش عليها

-   بقولك ايه يا غادة انا مش نقصاكي، والبني ادمة دي لازم نحط معاها النقط ع الحروف من الاول عشان ما تفتكرش ان البيت بيتها وانها حرة فيه 

-   لا حول ولا قوة الا بالله 

-   في ايه بتزعقوا ليه يا ولاد ؟

-   تعالي شوفي ياماما الست مروة اللي قفلت باب اوضتها بالمفتاح عشان ماحدش يدخلها 

-   مافهاش حاجة يا هالة، هي ما غلطتش 

-   انتِ اللي بتقولي كدة يا ماما !!

-   اومال يا بنتي عايزاني اقول ايه !. كل واحدة حرة في اوضتها 

-   كدة برضو يا ماما! ال وانا  اللي فاكراكِ هتنصفيني 

-   بقولك ايه يا هالة ، مش كل ماتيجي تمسكي في خناق حد، دانتِ كرّهتي ايناس مرات ممدوح تيجي هنا بسببك 

-   كدة برضو يا ماما! طب انا ماشية ومش داخلة البيت ده تاني 

-   يكون احسن برضو بلا هم 

-   استني بس يا هالة انا مايرضنيش تزعلي بسببي 

-   لأ حساسة قوي يا ست مروة. انا ماشية عشان ترتاحي ، أوعي يا ست غادة انتِ كمان 

-   طيب حاسبي ، سيبيها تمشي يا مروة. هو ده طبعها وكل مرة لازم تتخانق وتعمل مشكلة وتنكد ع الكل 

-   ايوة يا غادة بس انا ماكنتش احبها تزعل مني 

-   لأ ما تشليش هم،  هالة زعلانة من الدنيا كلها ومزعلة الدنيا كلها 

-   اومال دينا ماجاتش ليه يا غادة ؟

-   زمانها جاية 

-   وفين ايناس مرات ممدوح ؟

-   لأ ايناس مرات ممدوح هتيجي بالليل عشان نكون خلصنا طبيخ وتنضيف وتيجي هي تعمل هانم ههههههههههههه

-   احنا هنتغدى في يومكو ده ولا لأ إن شاء الله 

-   حاضر يا ماما هحط الأكل حالا 

 

-    ااااااااااااااااااااااااه اما كان حتة يوم متعب بشكل يا فتحي 

-   معلش يا حبيبتي، تعبتك معايا 

-   بصراحة يا فتحي انا ماكنتش عارفة ان طبع اختك هالة وحش كدة 

-   شيلي هالة من دماغك عشان دي بتاعة مشاكل ، وكمان دينا اختي ما تحاوليش تصاحبيها ولا تديها سرك ، لإنها لو حصل مشكلة بينك وبينها هتغدر وتطلع أسرارك برا ، وأمي دايما كانت تقول دينا دي عاملة زي البحر بتقلب مرة واحدة

-   طيب الحمدلله انك فهمتني طبعها عشان اخد حذري 

-   بصي ، هي اطيب واحدة في اخواتي غادة، طول عمرها غلبانة وعلى نياتها 

-   من غير ما تقول، طبعها يشهد. هي فعلا طيبة قوي وانا بحبها خالص 

-   يا مروووووووووووووووة 

-   مرووووووووووووووووووة 

-   ايه ده !هي مامتك لسة صاحية !!

-   غريبة قوي ، وبتنادي عليكي

-   طيب هروح اشوفها عايزة ايه 

-   ما تتأخريش مستنيكي 

 

-    نعم يا ماما 

-   انتِ عصرتي الفراولة اللي جابتها غادة؟

-   لأ هعصرها الصبح 

-   لأ اغسليها واعصريها دلوقتي عشان عايزة اشرب كوباية قبل ما انام 

-   حاااااااااااااااااااااااااااااااااضر من عنيا 

 

-    اتفضلي يا ماما 

-   يزيد فضلك ، فتحي فين ؟

-   فتحي هينام وانا داخلة انام 

-   يا بنتي سيبي الراجل ينام، عنده شغل الصبح حرام عليكي تهدي حيله اكتر ماهو مهدود.

-   هدة حيل ايه يا ماما !انا تعبانة وداخلة انام 

-   لأ خليكي سهرانة معايا ونسيني 

-   هو حضرتك مش هتنامي ؟

-   لأ هتفرج ع الكارتون، اقعدي اتفرجي معايا

 

-    تن تن تن 

-   مين؟

-   ام اسماعين

-   اهلا اهلا جارتي حبيبتي ام اسماعيل الغالية ادخلي يختي

-   ازيك يا ام فتحي، مش باينة ليه؟

-   هعمل ايه يختي شغل البيت ما بيخلص

-   يوه !هي مرات فتحي ما بتساعدكيش ولا ايه؟

-   يختي ولا بتمد ايدها في حاجة. طول النهار وقفالي قصاد المراية تتزوق وتهندم في روحها ويجي الراجل تاخده على الاوضة ماشوفهومش الا تاني يوم الصبح

-   يا عيني يختي. طب ما تشدي عليها شوية

-   اشد على مين !. دي بت لسانها طويل وقليلة الأدب يختي

-   اخص على بنات الأيام دي. داحنا كنا تحت رجلين حمواتنا

-   اي والله يا ام اسماعيل ، انا حماتي ماتت وهي بتدعي علية. يوه قصدي وهي بتدعيلي

-   والله يا ام فتحي صعبتي عليا. طيب ما تشتكيها لجوزها

-   هو جوزها قادر عليها يا ام اسماعيل يختي !. دي بتشخط فيه الشخطة تنططه

-   رجالة اخر زمن يختي. بس دي كدة هتركبه وتدلدل رجليها

-   هي لسة هتركب يختي! ماركبت وخدنا على قفانا والحمدلله

-   سلامة قفاكي يا ام فتحي يختي

-   تسلمي يختي. تشربي ايه؟

-   هاتيلي كوباية عصير فراولة 

-   يوه. وانتِ عرفتي منين ان عندنا عصير فراولة  ؟

-   شوفت غادة بنتك طالعة بشنطة قولتليها ايه اللي معاكي ده يا غادة قالتلي فراولة لماما، قولت اجي اخد حقي في الفراولة. مش الجار ليه حق برضو في فراولة  جاره؟

-   ايوة طبعا اومال ايه ، هقوم اجيبلك كوباية ولما اشوف غادة هديها بالشبشب

 

-   تررررررررررررررررن تررررررررررن تررررررررررررن 

-   الو 

-   ايوة يا ماما 

-   اهلا يا دينا ازيك يا حبيبتي 

-   ازيك انتِ يا مامتي وحشتيني 

-   إنتِ اكتر يا حبيبة مامتك ، ازيك وازي ولادك وجوزك ؟

-   كويسين قوي الحمدلله. اصل انا خارجة كمان شوية انا وحاتم وقولت اكلمك قبل ما انزل 

-   خارجين رايحين فين يا حبيبتي ؟

-   رايحين نتفسح ونغير جو 

-   ايوة كدة يا حبيبتي اخرجي واتفسحي واتهني، ربنا يخليلك جوزك يارب ويعيش ويفسحك 

-   ربنا يخليكي يا ماما 

-   وهتتفسحوا فين بقى يا دينا ؟

-   هنتعشى برا  في مطعم يجنن ع النيل وبعد كدة هنعمل شوبينج 

-   اتعشوا برا واتهنوا واعملوا شوبينج براحتكو يا حبيبتي. انا عايزة ايه من الدنيا غير اني اشوفك مبسوطة انتِ واخواتك! 

-   ربنا يخليكي ياماما. طب عايزة حاجة؟

-   عايزة سلامتك يا حبيبتي ، مع السلامة 

-   الله يسلمك يا ماما 

 

-    ايه ده !لابسين كدة ورايحين على فين انت والمحروسة يا سي فتحي ؟

-   خارجين نتفسح شوية عشان بقالنا كتير ما خرجناش 

-   تتفسح دا ايه! يابني حرام عليك فلوسك يا حبيبي. اقعد يا حبيبي لا تروح ولا تيجي تعالى نشرب كوبايتين شاي سوا انا وانت بس لوحدنا 

-   يا امي مروة من حقها تغير جو البيت وتشم هوا 

-   وماله جو البيت!. ما الشبابيك كلها مفتحة أهو، ما تشم هوا زي ما هي عايزة ، هو حد حاشها !

-   يا ماما انا فعلا مخنوقة ونفسي اخرج 

-   مخنوقة من ايه يا بت انتِ!. يبقى مخنوقة مني انا بقى. انا اللي خنقاكي وكابسة على نفسك 

-   يا ماما انا ما قولتش كدة 

-   لأ قولي ماهو ده اللي ناقص يا ست هانم. النهاردة تقولي مخنوقة من امك. بكرة تقوليله طلع امك برا 

-   لا حول ولا قوة الا بالله، يا أمي حرام عليكي تنكدي علينا كدة. 

-   كدة يا فتحي!. يعني امك كئيبة!. طيب يا ابن الكئيبة. خد المفرفشة واخرج 

-   يلا يا مروة ، السلام عليكم 

-   مش هرد عليكو سلام، ما تستاهلوش…. طيب يا مروة ، بتتحديني وتاخدي الواد وتخرجي!. ان ماوريتك، طب والله ما هنام الا لما تيجي عشان انكد عليكي نكد متوصي عليه في اخر مؤتمر حموات انعقد الشهر اللي فات 

 

-   ها يا مروة ايه رأيك في المطعم الشيك ده ؟

-   حلو قوي يا فتحي 

-   وايه رأيك  في العشا اللي يجنن ده ؟

-   طيب طالما انت شايف انه يجنن بتاخد رأيي ليه! ههه

-   هههههههههههه عشان تأكدي على رأيي 

-   اه فعلا هو جميل 

-   مالك يا مروة ؟

-   مافيش حاجة يا فتحي 

-   انا حاسس انك بتبتسمي بالعافية وغصب عنك، والكلام حتى طالع غصب عنك 

-   لا ابدا متهيألك ، انا مبسوطة خالص 

-   مش باين. قوليلي مالك. أمي مزعلاكي في حاجة ؟

-   لا ابدا يا حبيبي، بس بصراحة....!!!

-   كملي 

-   الموقف اللي عملته مامتك واحنا خارجين وزعلها وضيقها خلاني سرحت وقولت في نفسي لو كنا عايشين لوحدنا كنا خرجنا وروحنا وجينا براحتنا من غير قيود 

-   طيب ما احنا خرجنا براحتنا أهو 

-   لأ طبعا. مامتك زعلانة وماكانتش عايزانا نخرج اصلا. لكن لو كنا عايشين لوحدنا ما كانش حد عرف عننا حاجة ولا منعنا عن حاجة 

-   انتِ ندمانة يا مروة انك اتجوزتيني ؟

-   حبيبي ما تقولش كدة. انا بحبك اكتر من نفسي. انت كل حياتي يا حبيبي

-   ربنا يعلم حبيبتي قد ايه بحبك، انتِ حياتي وروحي ودنيتي كلها 

-   ربنا يخليك يا حبيبي ومايحرمنيش منك 

-   مروة انا عايزك تكوني  صبورة زي ما انتِ، وماتنسيش إن أمي ست كبيرة ولازم نراضيها ونستحمل مهما عملت 

-   حاضر يا فتحي، ربنا يقدرني واكون عند حسن ظنك 

-   ربنا يباركلي فيكي حبيبتي 

-   عايزين ناخد حاجة حلوة لماما واحنا مروحين 

-   كلك ذوق حبيبتي والله. طب ناخد ايه معانا ؟

-   تعالى ناخد صينية بسبوسة بالقشطة والمكسرات 

 

-    السلام عليكم، ازيك يا أمي وحشتيني 

-   وحشاك ليه ياخويا. لو كنت وحشاك كنت قعدت جنبي 

-   ازيك يا ماما 

-   ماما في عينك 

-   طب شوفي جبنالك معانا ايه يا أمي ؟

-   جبتوا ايه ؟

-   بسبوسة بالقشطة والمكسرات 

-   بسبوسة !.تلاقي المحروسة بتحبها وجايبها عشانها 

-   والله جايبها عشانك انتِ يا أمي يا حبيبتي 

-   مقبولة منك يا حبيب امك 

-   اتعشيتي يا ماما ؟

-   اومال يختي هستنى لحد دلوقتي من غير عشا عشان اقع من طولي ولا يجيلي انيميا! 

-   طيب عايزة حاجة يا ماما ؟

-   والله كنت ناويالك على نية سودة بس النوم كابس علية. خليها الصبح بقى، النهار له  عنين 

 

-    تررررررررررررررررررن ترررررررررررررررررررن 

-   ألو

-   السلام عليكم يا مروة

-   وعليكم السلام ازيك يا سارة 

-   عاملة ايه يا مروة وحشاني 

-   والله يا حبيبتي انتِ وحشاني اكتر، ازي ماما وبابا وهاجر ؟

-   كلنا كويسين ، وانتِ عاملة ايه مع جوزك ؟

-   الحمدلله بخير 

-   وحماتك؟ ههههههههههههههههه

-   بتضحكي على ايه انتِ كمان !

-   شكلها مطلعة عينك 

-   انتِ بتقولي فيها!،  بصراحة ست صعبة جدا، وبسمع منها كل كلمة وكلمة تحرق الدم بس مابرضاش ارد عليها 

-   طب وهي تحرق دمك ليه إن شاء الله.! مش كفاية انك رضيتي تتجوزي ابنها من غير مايجيبلك شقة !

-   تقولي ايه بقى!. معتبراني عدوتها ومش عايزاني اعيش لحظة سعيدة 

-   اعوذ بالله. انا الست دي ما ارتحتلهاش من ساعة ماشوفتها 

-   بقولك ايه يا سارة ، اوعي تجيبي سيرة لماما 

-   ماما! يعني هي ماما هتعمل ايه !. هتقولك معلش يابنتي ياحبيبتي اصبري.. طيب واخواته؟

-   عليه اخت اعوذ بالله من الشيطان الرجيم. البت اللي اسمها هالة دي. اخر مرة مشيت بخناقة والحمدلله ما جتش تاني 

-   احسن. بس برضو مسيرها هتيجي 

-   لأ لأ اصلها مشيت زعلانة وحلفت انها مش جاية تاني واكيد مش هتيجي إلا لما  حد يروح يصالحها. وماحدش راحلها اصلا 

-   ربنا يصلح حالك يا مروة ويكفيكي شرهم 

-   اللهم آمين. المهم ما تجبيش سيرة لماما 

-   خلاص يا ستي مش هقول. انتِ هتيجي امتى؟

-   هقول لفتحي واشوفه فاضي امتى يجيبني عندكو 

-   طيب تعالي قريب عشان وحشتيني قوي 

-   ان شاء الله يا حبيبتي. سلمي على ماما 

 

-    تن تن تنننننننننننننننننن تن تن 

-   مين مين مين ؟؟

-   انا هالة، افتحي يا مروة اهئ اهئ اهئ 

-   يا مامي ايه اللي جابها دي!. هي جت لما سمعت سيرتها دي ولا ايه !

-   اهلا اهلا اهلاااااااااااا هالة هلولة ام لسان سكر 

-   هييييييييييييييه هيييييييييييييييييه هيييييييييييييييييييييييه 

-   انتو جيتوا يا قطاقيط !. دا يوم ايه البمبي ده !

-   استني يا مروة ما تقفليش 

-   ليه يا حبيبتي جايبة جيرانك معاكي ولا حاجة ؟

-   لأ البواب طالع بشنط الهدوم 

-   هدوم ايه ؟

-   اصل جوزي اتخانق معايا وطردني روحت جايبة العيال وشنط الهدوم وجيت 

-   يا مصيييييييييييييييييييبتي 

 

-    هيييييييييييييييييييييه هيييييييييييييييييييييييه هييييييييييييييييه 

-   ادخلوا عند تيتة سلموا عليها يا ولاد على ما انيم اخوكو في السرير 
هييييييه هيييييه تيتة اهييه

-   يالهوي! ايه اللي جابكو تاني يا بلاوي انتوا ؟؟

-   احنا كينا محا ماما 

-   كيتو محا ماما. وايه اللي جاب ماما اصلا !. 

-   ازيك يا ماما اهي اهئ اهئئئئئئئئئئئئئئئئئ

-   يا ضنايا !. مالك يا هالة يا بنتي بتعيطي ليه ؟

-   حسين طردني من الشقة وقالي ماتجيش هنا تاني مش عايز اشوف وشك 

-   لييييييييييييييييييييييييييه  عملتي ايه يا مصيبة انتِ ؟ 

-   ولا حاجة يا ماما. ما انتِ عارفاني طول عمري غلبانة لا بهش ولا بنش اهئ اهئ هو اللي راجل مفتري 

-   احكيلي يا هالة ايه اللي حصل 

-   ابدا يا ماما.اصل اخته جالها عريس من عيلة كبيرة قوي. روحت انا قولتله ازاي عيلة كبيرة زي دي ترضى تناسب عيلة بيئة ومعفنة زي عيلتكو. يبقى انا كدة غلطت في حاجة يا ماما؟

-   الله يهدك هدة قوية يا هالة يا بنتي. يعني تغلطي في الراجل وعيلته ومش عايزاه يطردك !. ده كويس انه ما طلقكيش 

-   ليه يا ماما !هو اللي يقول الحقيقة الناس تزعل منه ليه !

-   يابنتي حرام عليكي ، طول عمري اقولك يا هالة خلي لسانك حلو زي امك وانتِ مافيش فايدة فيكي ، والراجل اللي اتهف في نفوخه واتجوزك اديكي هتطيريه من ايدك وتقعدي في ارابيزي ، يابنتي دانا دبحت خروفين على باب العمارة يوم ما اتجوزتي عشان خلصت منك ومن قرفك ومناقرتك في اخواتك ليل نهار، تقومي ترجعيلي تاني ومجرجرالي تلات عيال !

-   ايه ده يا ماما !هو مش انتِ دبحتي الخروفين عشان اطمنتي عليا ؟

-   لأ  دبحتهم عشان اطمنت على ضغطي

-   كدة يا ماما !. خلاص لو متضايقة مني اخد ولادي واقعد جنب الجامع اشحت وأكّلهم

-   لا حول ولا قوة الا بالله ، روحي يختي غيري هدومك انتِ وولادك لحد مانشوف صرفة في عمايلك السودة دي 

-   طيب يا ماما انا جعانة انا والعيال وعايزين نتغدا ، هي الست مروة طابخة ايه ؟

-   طابخة لوبيا 

-   مابحبهاش ، خليها تعملي حاجة تانية 

-   روحيلها المطبخ وسبيني في حالي، وخدي معاكي العيال دول مش عايزة دوشة 

 

-    انتِ خلصتي طبيخ يا مروة ؟

-   اه يا هالة. هو انتِ جاية تساعديني؟

-   لأ جاية اقولك اعمليلي حاجة غير اللوبيا 

-   لأ والله مش هقدر عشان انا ماصدقت اخلص الطبيخ، ومن الصبح اصلا ما قعدتش واتهد حيلي من شغل البيت 

-   يعني ايه ان شاء الله !. انا مابحبش اللوبيا 

-   خلاص لو جعانة قوي عندك تونة في التلاجة 

-   يا سلام. انتِ هتأكليني على مزاجك ولا ايه !

-   لأ يا ستي العفو. على العموم عندك فراخ في الفريزر طلعي واعملي 

-   بقولك ايه يا مروة لمي نفسك من اولها انا مش نقصاكي، فاهمة ولا لأ ؟. اعمليلي حاجة تانية وخلي يومك يعدي 

-   استغفر الله العظيم. حاضر يا هالة. هعمل عشان خاطر فتحي مايقولش اني قصرت مع حد من اهله في حاجة 

-   ايوة كدة اتعدلي

-    

-   ترررررررررررن ترررررررررررن 

-   ايوة يا مروة يا حبيبة قلبي 

-   إلحق يا فتحي الست هالة اختك جت غضبانة ومطرودة وجايبة عيالها وشنطها وهتعسكر عندنا 

-   معقول! 

-   اومال يعني بهزر !

-   طيب ما عرفتيش هي زعلانة مع جوزها ليه ؟

-   لأ ما اعرفش. كلمه يا فتحي وصالحهم على بعض ابوس ايدك. ولادها مدمرين البيت ومكركبينه، وهي انت عارف لسانها وافعالها 

-   ماينفعش اكلمه الا لما اكلمها هي الاول عشان الصورة توضح واتكلم على اساس. الله المستعان

 

-    منورة يا هالة 

-   بوجودك يا فتحي ياخويا 

-   بصراحة يا هالة بعد اللي حكتيه ده يبقى الراجل مش غلطان وانتِ لازم تعتذريله 

-   لأ مش هعتذر ، هو اللي يعتذر ويبوس رجلي كمان عشان ارجعله 

-   يا هالة مايصحش. ده جوزك وابو عيالك، ماينفعش تغلطي فيه، وبعدين الست مابترتاحش الا في بيتها 

-   لأ انا قاعدة هنا مبسوطة والعيال مبسوطين 

-   بس احنا مش مبسوطين بقى يا حبة قلب أمك

-   بقى كدة يا ماما !. على العموم انا قاعدة في ملك ابويا 

-   ملك ابوكي !. هو فين ملك ابوكي !. يكونش ساب الاطيان والفدادين. بلا خيبة. عاش فلسان ومات فلسان 

-   امي ما يصحش كدة. على العموم انا هكلم حسين واحل معاه الموضوع 

 

-    يا حسين خلاص بقى انا هخليها تعتذر 

-   لأ مش ممكن. الست دي انا مش عايزها. خليها عندكو لحد ما تتربى 

-   يا عم انت كدة بتربينا احنا حرام عليك 

-   ماعنديش كلام تاني اقوله يا فتحي 

 

-    فتحي 

-   نعم يا أمي 

-   خد ولاد اختك ينامو معاكو في الاوضة 

-   ينامو فين!!

-   اومال يبني هنيمهم في المطبخ ولا في الحمام !. انا هاخد هالة عندي في اوضتي وانتو خدوا العيال عندكو في اوضتكو 

-   بقولك ايه يا توحا يا خويا ، ابقى نام على طرف السرير ومروة على طرف السرير التاني وخلوا العيال في النص عشان مايقعوش 

-   لأ سلامتهم الف سلامة من الوقوع. انا بقول اخد مراتي وننام ع السلم احسن 

-   براحتكو يا حبيبي

 

-    يا صباح الخير يللي معانا يللي معاااانا، دي هالة اخت جوزي منورانا منورااانا، .صباح الخير يا هالة 

-   صباح النور. فين الفطار ؟

-   الفطار جاهز ع السفرة ، روحي افطري انتِ والولاد 

-   فين ماما ؟

-   مستنياكي ع السفرة يا قمرة 

-   طيب. هاتي  للولاد كوبايتين لبن 

-   كل حاجة موجودة ع السفرة ما تقلقيش 

 

-    قوليلي يا ماما 

-   عايزة ايه يا هالة ؟

-   هو مش فتحي داخل على شهر جواز ؟

-   ايوة. بعد بكرة يبقى شهر بالظبط 

-   طيب هي مراته حامل ولا لأ ؟

-   وانا ايش عرفني! 

-   ازاي يا ماما !. المفروض نسألها. لحسن تكون مابتخلفش ولا حاجة ونكون خدنا مقلب 

-   اي والله يا بنتي عندك حق. اندهيلي عليها البت دي 

-   مروة تعالي كلمي ماما 

-   حاضر 

-   نعم  يا ماما خير 

-   قوليلي يا روح ماما. مش حاسة كدة ان نفسك غامة عليكي ولا نفسك في الفسيخ ولا حاجة ؟

-   فسيخ ايه وغممان ايه !. انا مش بحب الفسيخ اصلا 

-   تبقى مش حامل يا ماما. يادي المصيبة 

-   في ايه يا هالة ؟

-   في اننا خدنا فيكي مقلب يا ست مروة وانتِ مش بتخلفي 

-   انتِ بتقولي ايه !. انا ماكملتش شهر جواز 

-   يا حبيبتي انا وخواتي البنات كل واحدة فينا خلفت بعد تسع شهور بالتمام والكمال وماعندناش حد بيتأخر التأخير الفظيع ده 

-   ان شاء الله هروح للدكتورة 

-   دكتورة !.  طيب يختي اما نشوف اخرتها مع الدكتورة

-   عن إذنكو هروح اكمل شغل البيت 

-   بصي يا ماما انتِ ما تسكتيش عليها البت دي. يعني لو ما حملتش الشهر الجاي خلي فتحي يطلقها ويتجوز 

-   عندك حق يا ضنايا  صحيح قلبك على اخوكي. انا مش هسكت على الموضوع ده تاني

************************************************ 

-    ماما انا حاوز سندوس

-    وانا يا ماما حاوزة سندوش 

-   روحوا عند طنط مروة قولولها 

 *************************************************

-    طنط ملوة انا حاوز سندوس 

-   يا حبيبي انت مش لسة واكل انت واختك من نص ساعة !!

-   وانا ياطنط ملوة حاوزة سندوش 

-   حاوزة سندوش! ربنا يريحنا من وشك ووش امك. حاضر يا حبيبي حاضر يا عسل روحوا عند ماما وهجيبلكو 

 

-    عاجبك عمايل مراتك يا فتحي يا اخويا !!

-   عملت ايه يا هالة خير ؟ 

-   طول النهار نايمة في اوضتها وانا وماما اللي طبخنا ونشرنا الغسيل ونضفنا البيت وقعدت انده عليها عشان تساعدنا راحت قالتلي انا تعبانة وعايزة انام 

-   بس ده مش طبع مروة يا هالة 

-   انت بتكدبني ولا ايه يا فتحي !

-   خلاص يا ستي انا هتكلم معاها في الموضوع ده 

 

-    حمدلله ع السلامة يا حبيبي 

-   الله يسلمك يا مروة 

-   مالك في ايه ؟

-   يا مروة ما يصحش تسيبي ماما وهالة لوحدهم وما تساعديهومش في شغل البيت ، انتِ كدة احرجتيني قدامهم 

-   يا خبر ابيض !. انا !. مين اللي قال الكلام الفارغ ده ؟. يا فتحي دول مش بيتحركوا من مكانهم وانا اللي عاملة زي الخدامة في البيت ، والله انا اللي بطبخ وبعمل شغل البيت كل يوم غير كمان ولاد الست هالة وطلباتهم طول النهار 

-   بس هالة بتقول كلام غير ده 

-   يعني انا كدابة يا فتحي؟ 

-   والله انا ما بقيت عارف حاجة 

-   طيب انا مستعدة اواجهها  ، تعالى معايا لو سمحت يا فتحي وشوف بنفسك 

 

-    مين يا هالة اللي طبخ وعمل شغل البيت ؟

-   ايه يا ست مروة انتِ جاية تحققي معايا !. على العموم انا اللي عملت كل حاجة انا وماما 

-   والله انتِ كدابة يا هالة 

-   وانتِ قليلة أدب. ازاي واحدة زيك تكلمني بالأسلوب ده !

-   سامع اختك بتهيني ازاي  يا فتحي؟

-   لو سمحتي يا هالة ما تغلطيش في مراتي ، أنا ما اسمحلكيش 

-   في ايه؟ ايه الدوشة دي ؟

-   تعالي يا ماما شوفي فتحي بيبهدلني عشان خاطر مراته 

-   جرا ايه يا فتحي ! انت هتتخانق مع اختك بسبب الست هانم ولا ايه ؟

-   يا ماما انا مش السبب في حاجة 

-   ايوة يختي اعملي كل مصيبة ومصيبة وقولي ماليش دعوة. اظهري على حقيقتك يا ساهية يا سهتانة. بس انا مش هسمحلك توقعي بين ولادي وتكرهيهم في بعض 

-   يا أمي انتِ مش فاهمة حاجة. هالة هي الغلطانة 

-   وحتى لو كانت هالة هي الغلطانة ما يصحش تنصر مراتك عليها. دي مهما كان اختك. لكن دي طلعت ولا نزلت مراتك وبكلمة واحدة تتحرم عليك وتغور في داهية 

-   لا بجد دي اهانة  وانا مش هستحمل اكتر من كدة. انا عايشة مذلولة في البيت ده والكل بيتحكم فيا 

-   وايه يا حبيبتي اللي مصبرك ع الذل! ما تلمي هدومك وتفارقينا 

-   كدة برضو يا ماما !. طب خلاص انا فعلا هلم هدومي 

-   عاجبك كدة يا أمي !. عاجبك كدة يا هالة !. والله لو مراتي سابت البيت انا كمان هسيبه ويبقى ده اخر اللي بينا 

-   انت بتعلي صوتك عليا يا فتحي عشان خاطر المحروسة !. طب يا فتحي على راحتك ياابني ، اللي عايز تعمله اعمله

****************************************** 

-    مروة حبيبتي انتِ بتعملي ايه بس !

-   بلم هدومي. انا لازم امشي من هنا 

-   تمشي من هنا ازاي !

-   مش بعد كل التعب ده وكل اللي بعمله عشان مامتك ترضى عني وفي الآخر بدل ماتشكرني على خدمتي ليها بتطردني من البيت 

-   يا حبيبتي اهدي بس مش عايزين نكبر الموضوع 

-   الموضوع كبير قوي يا فتحي من الأول وانا اللي بصغره ومابحبش احكيلك على حاجة من اللي بيحصل وبشوفه 

-   يا حبيبتي مجرد ما هالة هتمشي البيت هيهدا وكل حاجة هتبقى كويسة 

-   اختك مش باين انها هتمشي، وكمان انا مستغربة ان ماحدش فيكو حاول يصالحها على جوزها 

-   يا حبيبتي لازم تعرفي ان هالة مالهاش كبير ومابتسمعش كلام حد، عشان كدة انا وممدوح مش بنتدخل  في حياتها من اساسه 

-   يا حبيبي دي بقالها شهرين هنا. انا خلاص تعبت. احنا بقالنا تلات شهور متجوزين وماشوفتش يوم راحة في البيت ده. ياريتنا كنا جيبنا شقة يا فتحي حتى لو طولنا فترة الخطوبة 

-   طب بس اهدي حبيبتي وان شاء الله كل الامور هتبقى كويسة. انا هكلم ممدوح وهكلم اعمامي يجوا يشوفوا حل للست هالة اللي مقومة البيت حريقة دي

 

-    تررررررررررررن ترررررررررررررن تررررررررن 

-   الو ايوة يا فتحي 

-   ازيك يا ممدوح 

-   الله يسلمك يا فتحي ، عامل ايه ؟

-   مش كويس 

-   يا لطيف يارب. ليه كدة يا راجل !

-   ايوة يا سيدي ما انت عايش بعيد ومش دريان بحاجة 

-   ايه يا عم في ايه. اكيد هالة قالبة البيت ساحة حرب هههههه

-   انت بتضحك يا ممدوح!. هالة اختك ماسكة ودن امك زي ابليس طول النهار وعمالة تسلطها على مراتي الغلبانة، وامك بتصدق اي حاجة بتسمعها وتبهدل مراتي 
وفي الآخر طلعت مراتي هي اللي وحشة وغلطانة وهالة هي الحمل الوديع 

-   لا حول ولا قوة الا بالله. انا مش عارف نعمل ايه مع البني ادمة دي. دي حتى ايناس مراتي نفسها تيجي تزور مراتك وخايفة من هالة 

-   قولي طيب هنتصرف ازاي ؟

-   مافيش حل غير انها تعتذر لجوزها وترجع بيتها. لازم الشدة معاها المرة دي 

-   طيب هتيجي امتى ؟

-   بكرة ان شاء الله بعد الشغل

 

-    بقولك ايه يا هالة انتِ لازم تعتذري لجوزك. انتِ  اهنتي الراجل وغلطتي في حقه ودي  مش اخلاق ستات محترمة 

-   مش هعتذر يا ممدوح ومالكش دعوة انت

-   سامع قلة أدبها يا فتحي!!! 

-   احترمي نفسك وانتِ بتتكلمي مع اخوكي الكبير 

-   وانت كمان يا فتحي ما تتحشرش 

-   اما انك وقحة وقليلة الأدب فعلا 

-   تعالي ياماما شوفي البهوات ولادك عاملين رجالة علية 

-   بس يابت اخرسي ، اخواتك رجالة غصب عنك وكلامهم سيف على رقبتك. ايه يابت انتِ مالكيش كبير ولا ايه!. عايزة تطلقي وتقعدي جنبي؟

-   كدة يا ماما برضو !

-   ايوة كدة واتفضلي لمي هدومك وخدي ولادك ، واخوكي ممدوح هيوصلك بيتك ، بلا قلة ادب وكلام فاضي 

-   ماشي يا ماما اهئ اهئ اهئئئئئئئئئئئئئئئئئئئئئئئئئئئئئئئئئئئئئئئئ

 

-    ااااااااااااااااااااااااااه غمة وانزاحت يا مروة  

-   الحمدلله يا حبيبي. بصراحة كان البيت لا يحتمل 

-   معلش يا مروة ، انتِ اتحملتي كتير الفترة اللي فاتت 

-   كله يهون عشان خاطر عيونك... انت فاضي امتى توديني عند ماما عشان وحشتني قوي هي وبابا واخواتي ؟

-   ان شاء الله الجمعة بالليل بعد ما اخواتي يمشوا نبقى نعدي عليهم 

-   خلاص ان شاء الله 

-   طيب روحي راضي امي بكلمتين عشان زعلانة 

-   هي برضو اللي زعلانة يا فتحي !. انت ماشوفتش هي عملت فيا ايه ؟ 

-   يا حبيبتي دي ست...

-   ماتكملش يا فتحي ، انا حفظت كلامك كله. دي ست كبيرة ولازم نراضيها. حاضر يا حبيبي. حتى ولو على حساب كرامتي 

-   هو انتِ  لما تراضي أمي يبقى على حساب كرامتك! 

-   يا فتحي انا اللي اعرفه ان اللي يغلط يعتذر. لكن انا في البيت ده بيتغلط في حقي واتبهدل وبرضو بعتذر 

-   عارفة ليه يا حبيبتي ؟

-   ليه يا حبيبي ؟

-   عشان انتِ  أطيب وأرق مخلوقة في الدنيا 

-   ايوة يا سيدي اضحك عليا بكلمتين حلوين من بتوعك 

-   إنتِ احلى حاجة في حياتي يا مروة 

-   خلاص يا حبيبي عشان خاطر غلاوتك في قلبي هروح اراضيها بكلمتين 

-   ربنا يخليكي يا أعقل زوجة في الوجود 

 

-    مساء الخير يا ماما 

-   اطلعي برا اوضتي يابت 

-   انا جاية ابوس راسك واعتذرلك عشان زعلتك 

-   ايوة يختي تغلطي وتقومي البيت حريقة وفي الآخر تعتذري 

-   معلش يا ماما سامحيني مش هعمل كدة تاني 

-   هسامحك بس عشان خاطر فتحي ابني حبيبي ونور عيني 

-   ربنا يخليهولك يا ماما وتعيشي وتنوري حياتنا. عايزة حاجة قبل ما انام؟

-   ايوة. اعمليلي كوباية ينسون عشان صوتي باظ من كتر الزعيق بسببك وسبب عمايلك 

-   من عيوني يا ماما. احلى كوباية ينسون هتكون عندك 

-   اعمل ايه. هو انا موديني في داهية إلا طيبة  قلبي مع مرتات ولادي. بس اللي يقدّر حنان الحما 

***************************************************** 

-    مروة 

-   نعم يا حبيبي 

-   تلات مجات نيسكافيه حلوين من ايديكِ الحلوة وتعالي نقعد في البلاكونة مع امي نتونس معاها شوية 

-   من عيوني يا حبيبي حاضر 

 

-    ازيك يا ست الحبايب 

-   اهلا يا فتحي يا حبيبي، اقعد شوية في الهوا جنب امك 

-   ما انا جاي فعلا اقعد معاكِ 

-   ايه الرضا ده كله يا سي فتحي !

-   رضا ايه بس يا أمي. دانا اللي عايز رضاكِ يا غالية 

-   راضية عليك يا حبيبي من كل قلبي يا مراضيني 

-   ربنا يخليكِ يا امي وتفضلي راضية كدة على طول 

-   الجو حلو قوي النهاردة وفيه نسمة حلوة 

-   مابلاش سيرة نسمة دي هههههههههههههه

-   اه والله فكرتني بسهير اختي ونسمة بنتها ، دول جايين بكرة يتغدوا عندنا 

-   أمي ما تخليش حد يضايق مروة 

-   ايه اللي جاب سيرة مروة دلوقتي !

-   يعني انا مش عايز خالتي ولا نسمة يقولولها  حاجة تضايقها، وانتِ  عارفة اسلوبهم 

-   ماله اسلوبهم !. طب دي سهير طيبة الدنيا فيها ونسمة دي اسم على مسمى 

-   ربنا يستر 

-   السلام عليكم 

-   وعليكم السلام 

-   عملتلكو نيسكافيه اتفضلوا 

-   ايه ده! هي الكوباية التالتة  دي بتاعة مين ؟

-   بتاعتي انا يا ماما 

-   هو انتِ هتقعدي معانا زيك زينا كدة تشربي نيسكافيه ؟

-   ده بعد اذنك يا ماما يعني 

-   يابنتي حرام عليكي علبة النيسكافيه ما بتكملش اسبوع. وفري شوية يمكن يجيلنا ضيوف ولا حاجة 

-   اوفر ازاي يعني ؟

-   يعني تعمليلي انا وفتحي وانتِ لأ ، ولما تروحي عند امك ابقي اشربي عندها 

-   حاضر هبقى اشرب عند امي 

-   يعني يا أمي هي جت على كوباية مروة  !ههههههههههههه

-   بوفرلك يا حبيبي انا قلبي عليك 

-   قلبك فيه الخير يا ست الحبايب 

-   على فكرة يا ماما، ماما بتسلم عليكي هي وبابا 

-   الله يسلمهم من كل وحش ، ناس كويسين مع اني ما ارتاحتلهومش لما شوفتهم أول مرة وخصوصا امك الأنعورة دي 

-   يا أمي يا أمي 

-   ايه ياواد بتغمزلي ليه  !!

-   غريبة ! مع ان ماما حبتك خالص من اول ماشافتك وعلى طول هي وبابا يوصوني عليكي 

-   ناس ولاد اصول ونعم النسب. هي امك اسمها ايه صحيح ؟

-   ماما اسمها راضية 

-   يوه !. ابوكي اسمه صابر وامك اسمها راضية! لا حول ولا قوة الا بالله. هما اتجوزوا بعض غصب عنهم ولا ايه !

-   تعرفي يا ماما، القعدة معاكي جميلة قوي وما يتشبعش منها 

-   ما انا عارفة 

-   شوفتي يا أمي مروة بتحبك ازاي !

-   لازم تحبني، مش مدياها راجل زي الفل لو لفت الدنيا ما تلاقيش ضفره !

-   طبعا ياماما عندك حق والله 

-   قومي يابت كفاية كدة انتِ هتصاحبيني ولا ايه !. روحي كملي شغل البيت اللي وراكي 

-   حاضر يا ماما

 

-    تررررررررررررررررن ترررررررررررن

-   شوفي مين بيرن جرس الباب يا مروة. دي باين سهير اختي جت هي وبنتها 

-   حاضر يا ماما 

 

-    أهلا وسهلا

-   روحي يا بت قولي لستك مديحة  سهير هانم وبنتها الامورة نسمة هانم اتنازلوا وجم عشان يشرفوكوا 

-   ايه ده ايه ده هي مين دي اللي بت يا ست انتِ !!  

-   هو مش انتِ الشغالة برضو ؟

-   لا وانتِ  الصادقة أنا  ست البيت ده 

-   ست البيت ده اختي مديحة 

-   وانا مرات ابنها ، ومتهيألي حضرتك عرفاني كويس واتقابلنا في الفرح 

-   مش فاكرة 

-   مش مهم. اتفضلوا في الصالون على ما اندهلكو حماتي 

 

-    اهلا اهلا اهلا سهير اختي حبيبتي 

-   ازيك يا مديحة 

-   ازيك انتِ  يختي. عاملة ايه يا نسمة يا حبيبتي 

-   الحمدلله يا خالتي. على فكرة اسمها ايه مرات فتحي دي قابلتنا مقابلة وحشة قوي وكان ناقص تطردنا من ع الباب 

-   ايوة حصل يا مديحة يختي بس انا مش راضية اقولك 

-   ايه ايه ايه. وقعتها سودة انا رايحالها  اطين عيشتها 

-   ربنا يوفقك يا اختي 

 

-    جرا ايه يا ست مروة. مالك ومال اختي وبنت اختي !

-   في ايه يا ماما ؟

-   بيشتكوا منك مر الشكوى وبيقولوا انك قابلتيهم وحش.

-   والله ما حصل ، دول هما اللي كلموني بطريقة وحشة وكمان نسمة عمالة تبصلي من فوق لتحت بكل كره 

-   بقولك ايه يا مروة ، لو عايزة تعيشي معايا تحطي لسانك جوا بقك وتشيلي جزم ضيوفي على دماغك 

-   يا ماما لو سمحتي احترمي شعوري 

-   شعورك ايه يا عديمة الشعور يا قرعة انتِ. انتِ في البيت ده تقولي حاضر وطيب وما تناقشنيش 

-   حاضر يا ماما حاضر 

-   روحي حطي الاكل ع السفرة خلي الناس تاكل 

-   ثواني والأكل هيكون ع السفرة

************************************** 

-    تررررررررررررررن تررررررررررررررررررررن 

-   الو ايوة يا فتحي 

-   ايه ده ! ايه الرد الناشف ده !. مافيش كلمة يا حبيبي حتى! 

-   معلش يا فتحي اصل انا مخنوقة 

-   في ايه يا حبيبتي. حد زعلك ؟

-   الست خالتك وبنتها بيعاملوني على اني شغالة  واللي اسمها زوبعة دي عمالة تبصلي من فوق لتحت بطريقة مستفزة 

-   هههههههههههههههههههههههه

-   انت بتضحك يا فتحي عشان تغيظني اكتر !

-   يا حبيبتي ما هما لازم يعملوا كدة. هو انا ماقولتلكيش ان نسمة كان نفسها ومنى عينها تتجوزني 

-   ايوة ايوة بقى كدة. وطبعا كانت مامتك موافقة هي كمان 

-   طبعا وزعلت معايا جدا لما رفضت اتجوز نسمة  وفضلتك عليها 

-   وعشان كدة مامتك مش طيقاني 

-   لا يا حبيبتي ده موضوع وراح لحاله 

-   بالنسبة لك يا سي فتحي. لكن بالنسبة لنسمة وامها لأ 

-   والله يا مروة هما حرين 

-   يعني ايه حرين 

-   هو احنا هنحاكم الناس على مشاعرها 

-   لأ يا سيدي مش حكاية مشاعر دول جايين يخططوا على تقيل وعايزين يرجعوك ليهم بأي طريقة 

-   يا حبيبتي دماغك راحت لبعيد قوي 

-   على العموم كويس قوي انك عرفتني عشان اوقف كل واحد عند حده، ونسمة دي بقى سبهالي خالص وانا هتصرف معاها  مع السلامة دلوقتي 

-   ايه يا مروة استني نكمل كلامنا 

-   بعدين بعدين يا حبيبي ورايا مهمة صعبة هنفذها واكلمك  سلام 

-   الله يسلمك. مروة مراتي اتجننت. الله يسامحك يا أمي انتِ وخالتي 

 

-    منورين يا جماعة. نورتي يا طنط سوسو نورتي يا نسومة يا امورة

-   منورين  انا وبنتي غصب عنك

-   معلش يا نسومة  ما اتغدتش معاكو اصل انا بستنى فتحي حبيبي عشان نتغدا سوا مابعرفش اكل من غيره  وهو كمان يا روح قلبي يقعد من غير اكل لحد ما يرجع البيت عشان ياكل معايا

-   اوووووف

-   مالك يا حبيبتي حرانة ولا ايه؟اشغلك التكيف قبل ما تولعي؟

-   مالها البت دي عمالة تتني وتتفرد علينا كدة وماحدش مالي عينها  يا مديحة

-   مش عارفة يختي ايه اللي جرالها دي كانت زي القطة المغمضة

-   اتفضلي شيكولاتة يا طنط سوسو

-   ما بحبهاش يا روح طنط سوسو

-   ولا انتِ يا نسومة بتحبيها؟

-   ما بحبش حاجة خالص

-   اصل النوع ده دايما فتحي يجيبهولي عشان بموت فيه. عمره ما اخرلي طلب ربنا يخليهولي

-   اووووووووووووووف يا ماما يلا نمشي من هنا انا هطق

-   ههههههههههههههه

-   سلامتك يا ضنايا هتموتولي البت اللي حيلتي حرام عليكو

-   اجيبلك كوباية لمون تروق دمك يا نسومة

-   مش عايزة منك حاجة

-   على راحتك يا حلوة...وانتِ بقى مش ناوية تتجوزي عشان نفرح بيكي ولا ايه

-   انا مابفكرش في الجواز خالص

-   ههههههههههههههه كل البنات بيقولوا كدة لما يتزنقوا

-   لأ يا حبيبتي انا بنتي عرسانها كتير فعلا بس انا مش راضية افرط فيها

-   على راحتك يا طنط سوسو

-   مش كفاية كدة يا ماما ولا مستنية نتهزأ أكتر من كدة

-   كفاية قوي يابنتي. قال وبيقولوا مرات فتحي طيبة وكنت فاكرة  ان احنا اللي هنحرق دمها

-   لأ يا ست ماما هي اللي حرقت دمنا

-   يلا يابنتي نمشي

-   استني بس يا سهير

-   يختي بقى بلا سهير بلا نيلة جاتكو القرف انت وابنك ومرات ابنك

************************************ 

-    ايه ده هي خالتي ونسمة مشيوا ولا ايه؟

-   اسأل مراتك يا عين امك 

-   عملت ايه مراتي بس 

-   قعدت تتدلع وتتمرئع في كلامها مع الناس وتغيظ في نسمة الغلبانة وخليتهم يقوموا يجروا زي اللي قرصهم تعبان 

-   ههههههههههههههههههه يخرب عقلك يا مروة 

-   ايوة اضحك قوي. ادي الست مراتك قطعتنا من الحبايب والقرايب وماحدش هيزورنا تاني بسببها وهنقعد زي القرود في الجبلاية نطنطط لوحدينا 

-   يا امي خليكي منصفة مرة واحدة مع مروة 

-   انا لو اطول اقوم انصفها نصفين وارمي كل نصف في بلد مش هتأخر 

-   انتِ  عارفة ان خالتي ونسمة ما بيطيقوش مروة 

-   وانا مع اختي وبنت اختي 

-   على العموم هي دافعت عن نفسها وعن بيتها واديكو عرفتوا ان عندها مخالب وانياب وتقدر تاخد حقها 

-   عندها مخالب وانياب! ايه يابني هو انت متجوز ملك الغابة!. جايب واحدة ترعب امك وتثير الزعر في المنطقة!. بقى دا جزاء امك يا فتحي !

-   يا امي هي عارفة ان انتِ  خط احمر وماتقدرش تقرب منك ولو بكلمة 

-   اعتبر ده وعد يا ضنايا؟ انا في حمايتك يا فتحي يابني 

-   ماتخافيش يا امي ربنا معانا 

انتهت الحلقة الثانية

 

إلى اللقاء غداً إن شاء الله مع حلقتين جديدتين

 

لا تنسوا ذكر الله والصلاة على الحبيب عليه الصلاة والسلام

لا إله إلا الله ولا حول ولا قوة إلا بالله

 

اللهم صل وسلم وبارك على نبينا محمد