رواية أم فتحي( الثالثة)
- قوليلي يا مروة يا مرات ابني
- نعم يا ماما
- بقالك قد ايه كدة متجوزة ابني فتحي ؟
- اربع شهور
- ومش حاسة كدة انك دايخة ونفسك في الفسيخ ؟
- يا ربي. السؤال الزفر بتاع كل شهر. لأ يا ماما مش دايخة ولا
نفسي في الفسيخ
- يعني ايه مانفسكيش في الفسيخ! انتِ بتستعبطي ولا بتستهبلي !
- لا حول ولا قوة الا بالله! يا ماما قلت لحضرتك قبل
كدة انا مابحبش الفسيخ اصلا
- طب اتوكسي على وكستك يعني مش حامل الشهر ده كمان
- لأ مش حامل
- يا مصيبتي يا مصيبتي عليك يا فتحي ياابني. يللي وقعت في ارض
بور ومش باين لها زرع ابدا
- والله كدة حرام. انتِ كل شهر توتريلي اعصابي وتنكدي علية
- وكمان ليكي عين تتكلمي. واحدة غيرك كانت اتكسفت على دمها
ونزلت عينها في الارض
- يا ماما مايصحش كدة دي مش طريقة. وبعدين دي حاجة بتاعة ربنا
- ايوة يا مؤمنة يا موحدة انتِ، اعملينا فيها شيخة
- استغفر الله العظيم
- ايوة استغفري من عمايلك السودة فيا وفي الواد الغلبان اللي مش
هاين عليكي تفرحيه بحتة عيل يشيل اسمه
- لا بجد انا مش قادرة استحمل ولما يجي فتحي ليا كلام معاه
- ايوة يابت قوليله امك عايزة تتربى وتتعلم الأدب وروح اديها
المين على وشها
- اوف. عن اذنك انا داخلة اوضتي
- ايوة يختي ادخلي امسكي الموبايل واديله التقرير اليومي. اما
اقوم اكلم سهير اختي اتفك معاها بكلمتين بدل ما اطق من جنابي
˜—–™
- ترررررررررررررررررن ترررررررررررررررررررررررررررررن
- ايوة يا مديحة ازيك
- ازيك يا سهير
- مالك يا مديحة صوتك مش عاجبني
- البت مرات فتحي يختي سدت نفسي عن الدنيا
- خير يختي فرحيني
- بقالها اربع شهور متجوزة الواد ولحد دلوقتي مش حامل
- لوووووووووووووووووووووووووليييييييييييييييييييييييييييييييييييييييييييييييييييييييييييييي
- انتِ بتزغرطي يا سهير؟
- ايوة بزغرط
- بتزغرطي على ايه
- بزغرط على خيبتكو. اصل انتِ فرحتيني عشان دي بركة دعايا عليكي
وعلى ابنك، وذنب نسمة بيخلص من حبابي عنيكو
- اخص عليكي يا سهير انتِ شمتانة عشان مرات ابني مش حامل
- ايوة شمتانة وان شاء الله مش هتشوف حمل ابدا وربنا هيقطع نسل
ابنك من الدنيا
- بعد الشر عليه الف مرة. لو مخلفش من دي هخليه يسيبها ويتجوز
ست ستها ويخلف ويتهنى بولاده
- ايوة كدة يا مديحة خليه يطلقها يختي بدل ماعمره يضيع جنبها من
غير عيل
- تفتكري كدة يا سهير
- ايوة طبعا انا عايزة مصلحة فتحي. ونسمة موجودة وهي اولى بابن
خالتها وهتجيبله بدل العيل عشرة. احنا عيلة ولادة من قديم الازل
- خلاص يختي على بركة الله نقرا الفاتحة
˜—–™
- تررررررررررررررررررررن تررررررررررررررررررررررررن
- مين
- انا فتحي يا امي، افتحي
- السلام عليكم
- وعليكم السلام يا حبيبي اهئ اهئ اهئ
- ايه ده مالك يا امي بتعيطي ليه ؟
- مراتك بهدلتني يا فتحي وانت غايب
- ازاي الكلام ده
- اهئ اهئ اهئ ليه وليه ياابني بقولها يا مروة
يابنتي يا حبيبتي يا روح قلبي نفسي اشوف ولاد فتحي قبل ما اموت ,تقوم ترد عليا تقولي مالكيش دعوة بينا وما تتحشريش
بيني وبين جوزي اهئ اهئئئئئ
- معقول مروة قالت كدة!!
- اومال يعني بكدب عليك!. اهئ اهئ رديت عليها قولتيلها ربنا
يسامحك يا بنتي. انا قلبي عليكي يا مروة عشان انتِ في غلاوة بناتي بالظبط ,قالتلي ربنا ياخدك انتِ وبناتك ويريحنا منكو اهئ اهئ اهئ
- قالت الكلام ده معقول !انا مش مصدق!!!!!
- وياريت يابني على كدة وبس. دي كمان بقولها حطيلي الغدا يا
مروة يابنتي يا حبيبتي قالتلي الغدا عندك في المطبخ اغرفي لنفسك وبعدين اغسلي
الاطباق اهئ اهئ اهئ
- لا يا امي مش معقول
- طب هاتها قصادي وانا اواجهها يا حبيبي اهئ اهئ. يا عيني عليكي
يا ام فتحي يللي اتبهدلتي من مرات ابنك واتقل مقامك وابنك مش عايز يجيبلك حقك اهئ
اهئ اهئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ
- طب اهدي اهدي يا امي انا هتصرف. هي مروة فين ؟
- قافلة عليها اوضتها وكنت سمعاها بتكلم اصحابها في التليفون
وعمالة تضحك وضحكها سمع الجيران
- طيب انا داخل اشوف في ايه
˜—–™
- مروة..ايه
ده!. ايه يا حبيبتي الدموع دي كلها مالك ؟
- انا تعبت تعبت تعبت فاهم؟؟؟؟؟ مش قادرة استحمل, عايزة امشي من
هنا رجعني لاهلي مش قادرة اكمل زهقت, زهقت
- طب اهدي اهدي يا حبيبتي في ايه بس
- مامتك بتكرهني ومش طيقاني في البيت، بتنكد علية عدد انفاسي.
وكل شوية مسكالي موضوع الخلفة زي ما تكون دي حاجة بايدي
- طب خدي المنديل ده امسحي دموعك يا حبيبتي انا مااقدرش اشوفك
منهارة بالشكل ده
- فتحي جيبلي شقة بعيد عن مامتك لو عايز حياتنا تستمر مع بعض
- يا حبيبتي انا مقدر اللي انتِ متحملاه عشاني بس انا اعمل ايه.
دي مهما كان امي ولازم نستحملها
- امك انت مش امي انا وابقى استحملها لوحدك. انا حاسة اني من
ساعة ما اتجوزتك وانا في حرب. مش بيت هادي وكله سكن ومودة. اللي بيحصل فيا ده حرام
حرااااااااااااااااااااااااااااام
- طيب اهدي بس وكل حاجة هتتحل
- مافيش حاجة هتتحل الا لما نمشي من هنا ونبعد عن كل الهموم دي
ومشاكل مامتك واخواتك
- طيب يا حبيبتي ممكن تسمعيني
- مش عايزة اسمع حاجة. ولو سمحت وديني عند ماما دلوقتي انا
محتاجالها قوي. محتاجة اترمي في حضنها واعيط. ماحدش هيحس بيا الا امي
- حاضر يا حبيبتي حاضر بس اهدي
˜—–™
- يا حبيبتي يابنتي كل ده بيحصلك من غير ماتحكيلي !
- ماكنتش عايزة اشيلك الهم يا ماما وكنت فاكرة اني اقدر اتحمل لوحدي بس ما قدرتش يا ماما
والله ماقدرت
- طب ياحبيبتي اهدي عشان خاطري ماتقطعيش قلبي يامروة. انا مش
عارفة يعني حماتك دي ماعندهاش رحمة خالص كدة .. وبعدين انتِ يادوب بقالك اربع شهور متجوزة, هي
مستعجلة ليه على الخلفة بالشكل ده
- انا بحس يا ماما انها واخدة موضوع الخلفة ده حجة عشان تنكد
علية وهي اساسا لا عايزاني اخلف ولا نفسها تشوف ولاد فتحي ولا حاجة
- على العموم يا حبيبتي انا هاخدك لدكتورة شاطرة كانت بتروح
عندها نهى بنت خالتك ونشوف في ايه معطل موضوع الحمل
- طيب وليه يا ماما يكون العيب من عندي مايمكن يكون من عند فتحي
- على العموم يا حبيبتي هو كمان لازم يعمل تحاليل وربنا يكتبلكو
الخير يارب ويحفظك من شر حماتك وولادها
- والله يا ماما اخته غادة طيبة جدا وهي الوحيدة اللي دايما في
صفي بس للأسف مش بتيجي كتير عشان بيتها بعيد وملخومة بولادها ومدارسهم لكن الست
هالة والست دينا عندنا كل اسبوع بقرفهم ومشاكلهم
- طيب وفتحي موقفه ايه
- هو بيقف قصاد اخواته لكن مامته مابيقدرش يزعلها
- هو موقفه برضو صعب يابنتي ونلتمسله العذر. دي امه
- لكن امه ظالمة يا ماما والمفروض يقف في وشها
- يا حبيبتي ما ينفعش. احنا كمان مش عايزينه يغلط فيها ولا
يتجاوز حدوده ونكون سبب في غضبها عليه
- يا ماما انا مش عايزة اروح مع فتحي
- لا بقولك ايه يا مروة انا دايما اقول عليكي اعقل بناتي
- يا ماما مش طايقة اشوف حماتي كرهتها يا ماما كرهتها مش طيقاها
- حاسة بيكي يا حبيبتي والله حاسة بيكي يا نور عيني. بصي يا مروة
احنا نشوف موضوع الخلفة الاول وبعدين نشوف حل مع حماتك. قومي دلوقتي اغسلي وشك
عشان تروحي مع جوزك
- حاضر يا ماما هسمع كلامك
˜—–™
- انت جيت يا فتحي
- ايوة جيت يا امي. ادخلي انتِ
يا مروة ارتاحي
- ترتاح من ايه ياخويا. من وش امك؟
- امي بقولك ايه بالله عليكي سيبي مروة في حالها
- الله اكبر يا حلاوة ,باين حماتك وصتك تبهدل امك عشان تراضي
بنتها
- والله العظيم حرام عليكي اللي بتعمليه فينا ده. هي كانت مروة
عملتلك ايه عشان تكرهيها بالشكل ده !
- انا لا بكرهها ولا بحبها. انا قلبي عليك انت وعلى مصلحتك
ونفسي اشوف ولادك يا ضنايا
- لو سمحتي يا امي دي حاجة تخصني انا ومراتي وبس. ولو سمحتي ما
تتدخليش
- كدة يا فتحي. هي وصلت لكدة اهئ اهئ اهئ. انا
مااتدخلش في حياتك؟ كتر خيرك يابني.طب يا فتحي والله ما انا قاعدة في
البيت انا هلم هدومي واروح عند ممدوح حبيبي ومراته اللي زي السكر ايناس الغالية
- يا امي استني بس نتفاهم
- مافيش تفاهم انا داخلة الم هدومي وخلي الننوسة تنفعك
˜—–™
- ترررررررررررررررررررررررن ترررررررررررررررررررررررررن
- مين
- افتحي يا ايناس
- مين اللي بيرن الجرس
- انا حماتك ايه مش عارفة صوتي ولا بتستهبلي
- يادي النيلة ايه اللي حدفها علينا الساعة دي.
- افتحي يابت
- اهلا اهلا اهلا طنط حبيبتي وحشتيني اموووووووووووووووه اتفضلي
- ازيك يا ايناس
- الحمدلله يا طنط
- ازي امك
- الحمدلله كويسة خالص وبتسلم عليكي
- الله لا يسلمها البعيدة
- لكن ايه يا طنط الشنطة الكبيرة دي هو حضرتك مسافرة
- لأ حضرتي جاية اقعد في بيت ابني. عندك مانع؟
- تقعدي فين!!!
اهلااااااااااااااااااااااااااااااااااااااااااااااا يا مفاجآتك يا طنط
- فين ممدوح ؟
- ممدوح نايم هصحيه لحضرتك
- والعيال فين ؟
- ناموا هما كمان. دول هيصعقوا من الفرحة لما يشوفوكِ
- صاعقة لما تشيلك
˜—–™
- ممدوح اصحى يا ممدوح الحق امك برا هي وشنطة هدومها.
- امي!!!! اهلا وسهلا بيها
- اهلا وسهلا بيها فين يا ممدوح. ان شاء الله هتنام فين؟
- تنام في اوضتنا
- يا سلام واحنا ننام فين ؟
- خلاص تنام في اوضة الولاد
- ياحلاوتك وانهي سرير اللي هيستحمل امك ان شاء الله
- ايناس ايناس ايناس سدي بقك شوية. هروح اسلم على امي وربنا
يحلها
- ال يا قاعدين يكفيكو شر الجايين
˜—–™
- امي امي حبيبتي الغالية ازيك يا ست الكل
- ازيك يا ممدوح يا حبيبي
- منوراني يا ست الحبايب
- دا نورك يا حبيب امك
- تشربي ايه يا امي
- اشرب دا ايه يا واد انت. انا جعانة عايزة اتعشى
- حاضر يا حبيبتي
- ايناس
- نعمين
- حضري عشا لامي
- حاضر حاضر يا ممدوح
˜—–™
- بس ايه الخطوة العزيزة دي يا ست الكل
- الظروف حكمت اعمل ايه
- مالك زعلانة من ايه ؟
- زعلانة من الدنيا بحالها. اخوك بهدلني عشان بسأل مراته على
موضوع الخلفة
- بصراحة يا طنط عندك حق، دي طولت قوي
- مش كدة برضو يا ايناس
- ايناس ما تتدخليش وتولعيها اكتر
- ما تسيبها يابني الست بتقول الحق. يوه. مالك يا ايناس تخنانة قوي
كدة وزايدة يجي عشرة كيلو
- اصل انا حامل يا طنط
- يا لهوي. حامل يعني ايه دانتِ عندك اربع عيال
- جرا ايه يا طنط هو انتِ لا عاجبك اللي بتخلف ولا اللي قاطعة
خلف!
- ايوة يختي خلفي وانتِ غرمانة حاجة. ابني يشقى ويتعب وانتِ
تجبيله عيال ينحلوا وبره وياخدوا اللي وراه واللي قدامه عشان ما يلاقيش في جيبه
تمن حزمة فجل يخش بيها على امه
- يا امي ربنا اللي بيرزق
- ايوة يابني بس الست لازم تحس بجوزها وتخلي عندها دم
- يا طنط طيب ما حضرتك مخلفة خمسة
- هو انتِ يابت هتعملي راسك براسي ولا ايه. وانتِ مالك ومالي
- طب يا امي يلا عشان تنامي في اوضة الولاد
- وماله زي بعضه روح دخلي الشنطة جوا
˜—–™
- ماما يا ماما
- يا ماما يا ماما
- ايه يا عمار ايه اللي صحاك انت واخواتك
- مين الست التخينة اللي نايمة في سريري دي
- ايه ياعمار دي تيتة مامة
بابا يا حبيبي
- يا ماما انا مش عارف انام. دي عاملة دوشة بمناخيرها
- معلش يا حبيبي هنعمل ايه ظروفنا كدة
- طيب ما تصحيها عشان تمشي
- بس يا ولد لحسن بابا يسمعك يطين عيشتك روح نام
- انام ازاي
- حط قطنتين في ودانك ونام وامشي من وشي وخلي اخواتك ينامو
˜—–™
- صباح الخير ياطنط
- صباح النور يختي. فين ممدوح ؟
- نزل راح الشغل
- والعيال فين ما شفتهومش
- راحوا المدرسة. دول كانوا هيتهبلوا من الفرحة لما شافوكي
وخصوصا عمار
- طيب شوفيلي لقمة اشق ريقي بيها
- حاضر يا طنط من عيوني
˜—–™
- السلام عليكم
- عليكم السلام يا ممدوح يابني
- ازيك ياست الحبايب
- الله يسلمك من كل وحش يا حبيبي
- فين ايناس
- باين في المطبخ
- الغدا يا ايناس
- انت برا يا ممدوح؟
- اومال بنده عليكي من الشغل!
- اهلا يا ممدوح. الولاد زمانهم جايين, نستناهم عشان يتغدوا
معانا
- ترررررررررررررررن تررررررررررررررررررررررن
- افتحي يا ماما افتحي يا ماما احنا جينا
˜—–™
- اهلا يا حبايبي ادخلوا سلموا على تيتة
- ييييييييييييييييييييييييييي هي لسة هنا !
- بس يا قلالات الادب ادخلوا خدوها بالحضن وبوسوها
˜—–™
- ازيك يا تيتة
- اهلا يا عمار
- ازيك يا تيتة
- اهلا يا محمد
- ازيك يا تيتة
- انت مين يا واد ؟
- دا خالد يا أمي
- خلفتوه امتى ده انا ماشوفتوش قبل كدة
- لأ يا امي شوفتيه بس اصله تخن شوية
- ايوة يتخن ماهو يعز الاكل زي امه ,انتوا مش كان عندكو بت رابعة ؟
- ايوة سلمى
- وهي فين؟ ودتوها الملجأ؟
- لأ عند مامتي اصلها تحبها قوي وتحب تقعد عندها
- يعني ايه بنتك عند جدتها ام امها يا سي ممدوح!. البت تيجي
حالا عشان اشوفها
- حاضر يا امي هنتغدا واروح اجيبها عشان خاطر عيونك
˜—–™
- ايه ده يا ايناس يا مرات ابني. انتِ واخدة فرخة بحالها وكوم
لحمة حطاهم قدامك وعمالة تنهشي فيهم زي الغولة كدة ليه !
- جرا ايه يا طنط هو حضرتك بصالي في اللقمة اللي هاكلها!.
وبعدين انا حامل وباكل لنفرين
- انتِ كدة بتاكلي لاربعين نفر
- يا طنط الدكتورة قالتلي اتغذا كويس عشان البيبي
- يا شيخة اتقي الله. هو فيه بيبي بياكل فراخ ولحمة برضو. انتِ
واخدة البيبي حجة عشان تاكلي الفراخ لوحدك
- لا يا امي هي حاطالك ربع فرخة اهو وحاطة ليا ولكل عيل ربع
فرخة
- طب واللحمة يا واد ؟
- لا والله يا امي اصل انا ما ليش حكم ع اللحمة عشان جايباها من
عند امها
- هي بتجيب اللحمة من عند امها وتاكلها لوحديها ؟
- ايوة
- اعوذ بالله. شوف ياخويا البت بتاكل الفرخة زي المجنونة ازاي.
قوم العيال من جنبها يا ممدوح لتاكلهم
- كفاية اكل يا ايناس.
- جرا ايه يا ممدوح هو الواحد ما يعرفش ياكل اللقمة بنفس !
- اما اقوم اغسل ايدي يا
ابني
- ايه يا امي كملي اكلك
- الحمدلله يا حبيبي شبعت. الله يكون في عونك ويرزقك برزق امنا
الغولا دي
˜—–™
- على فكرة يا امي فتحي اتصل بيا وبيسأل عليكي وبيقول انه اتصل
بيكي كتير كنتي بتكنسلي عليه وبعدين قفلتي الموبايل
- ايوة قفلت الموبايل. مش عايزة اكلمه ولا اسمع صوته ولا اشوف
وشه وما تجبليش سيرته
- لا يا امي دا مهما كان فتحي حبيبك برضو
- لا حبيبي ولا ليا دعوة بيه ولا لسانه يجي على لساني تاني ابدا
- على العموم يا امي خليكي قاعدة منورانا لحد ما تهدي خالص
- هو انت عايزني امشي يا ممدوح ولا ايه ؟
- والله يا امي ابدا. انتِ تقعدي طول العمر واشيلك على دماغي
- اه يا طنط خليكي احنا فرحانين قوي والعيال هيطقوا من الفرحة
˜—–™
- ترررررررررررررررررررن ترررررررررررررررررررررررن
- مييييييييييييييييييين
- ام اسماعين
- اهلا يا طنط ام اسماعيل
- ازيك يا مروة يا بنتي
- الله يسلمك يا طنط
- ألاقيش عندك بصلة؟
- ايوة حاضر يا طنط هجيب بصلة من المطبخ لحضرتك
- طب يا حبيبتي عشان ماتروحيش وتيجي تاني هاتيلي معاها راس توم
وكام قرن فلفل
- حاضر يا طنط
- مروة
- نعم يا طنط
- معلش يختي شوفيلي كام حباية طماطم كدة على حزمة جرجير عشان
السلطة
- حاضر يا طنط
- اتفضلي يا طنط البصلة وراس التوم والفلفل والطماطم والجرجير,اي
خدمة تانية؟
- لا يا حبيبتي اصل انا مابحبش اتاقل على حد حتى اسألي ام فتحي
عني
- اه طبعا طبعا يا طنط
- طب معلش لو فيها رزالة وبواخة مني يعني الاقيش عندك كيلو لحمة
تكوني مستغنية عنه ؟
- لا والله يا طنط ماعنديش غير فرخة وهعملها على الغدا
- طب يختي كلوا واتهنوا ولو فاض منكو صدر ولا ورك ابعتيهولي
عشان بحب الفراخ قوي
- حاضر يا طنط من عنيا
- والله يا مروة يا بنتي انا بحبك قوي عشان عمري ماطلبت طلب
واخرتيه عني
- حضرتك تؤمري, الجيران لبعضيها
- ربنا يسعدك يا رب. هي فين ام فتحي مش باينة بقالها كام يوم ؟
- في مشوار كدة
- اه مشوار كدة فين يعني ؟
- في مشوار يا طنط في مشوار ولما تيجي هخليها تيجي لحضرتك عشان
تزورك
- بس غريبة قوي الموضوع ده. ام فتحي مش عادتها تسيب بيتها وتروح عند حد
- البيوت اسرار يا طنط
- اسرار! هو في اسرار من ورايا!. يا لهوي. ام فتحي راحت فين؟؟؟
- عن اذن حضرتك يا طنط عشان هعمل الاكل
- اقفلي اقفلي يا مروة اقفلي ..ياترى انتِ فين يا ام فتحي. ابنك ومرات ابنك ودوكي
فين يا ام فتحي. يا دي الخيبة. اروح فين واجي منين. انا الفار بيلعب في عبي ومش
مستريحة
˜—–™
- فتحي يا حبيبي مابتاكلش ليه?
- باكل يا مروة
- لأ يا حبيبي انت اكلك زي ماهو
- مش قادر اكل ماليش نفس
- ياحبيبي انا عارفة انك زعلان عشان مامتك مش في البيت بس ان
شاء الله لما تهدا نروح نجيبها
- يامروة امي دي اغلى انسانة عندي في الوجود. دي كل حاجة ليا
بعد ابويا. انا عمري ما انسى سهرها معايا وانا بذاكر وماكانتش ترضى تنام الا لما
انام وتطمن عليا.صورتها
دايما قدامي وهي بتعيط من الفرحة يوم نجاحي في الثانوية العامة وهي وخداني في
حضنها وعمالة تشكر ربنا.ولما
كنت ابقى تعبان والله ماكانت تنام وكل شوية تيجي تطمن علية وهي هتموت
من القلق وتطبطب علية وتقولي سلامتك يا حبيبي يارب ما اشوف فيك حاجة وحشة ابدا ،
ولا كانت تاكل ولا تشرب الا لما تشوفني بقيت كويس....ودلوقتي
انا بردلها الجميل واطلعها من بيتها
- يا حبيبي انت ماطلعتهاش من بيتها هي اللي صممت تسيب البيت
برغبتها، ماتحملش نفسك فوق طاقتها
- مروة انا مش قادر اقعد في البيت انا نازل شوية
- رايح فين ؟
- والله ما انا عارف
- طيب ماتقفلش الموبايل عشان اطمن عليك
˜—–™
- استنى عندك. اقف مكانك
- ايه ده. اهلا يا خالتي ام اسماعيل
- لا اهلا ولا سهلا يا رئيس العصابة يا قتال القتلة
- ايه يا خالتي ام اسماعيل في ايه مالك?
- قتلت امك وخبيت جثتها فين يا فتحي . انهار
واعترف بسرعة قبل ما ابلغ البوليس
- يا خالتي ام اسماعيل ابوس ايدك بطلي فورجة
على الافلام البوليسية اللي اثرت على دماغك دي. وبعدين انا هقتل امي
ليه بس !
- عشان تاخد الشقة وتقعد فيها لوحدك انت ووش الإجرام مراتك
- والله ما حصل
- خبيت الجثة فين انطق يا سفاح
- يا خالتي ام اسماعيل امي عند ممدوح اخويا
- الكلام ده تقوله قدام النيابة. انا هلبس عبايتي واروح ابلغ
عنك انت ومراتك
- نيابة ايه بس يا خالتي ام اسماعيل اعقلي الله يكرمك
- تقتل جارتي وعشرة عمري وعايزني اعقل!. اهئ اهئ اهئ يا حبيبتي
يا ام فتحي يللي روحتي بلاش يا ام فتحي ,يللي ابنك قتلك عشان خاطر مراته يختي اهئ اهئ. يللي
عمرك مابخلتي علية يا مأكلاني الحلو كله يا ام فتحي.يللي عمرك ما عملتي اكلة الا
لما بعتيلي منها. هاكل عند مين من بعدك يا غالية. يللي كنتي بتشربيني الشاي ابو
فتلة يا ام فتحي ,خلاص يا ام فتحي هرجع للشاي المغشوش تاني يا غالية
يللي خدتي الخير كله معاكي
- يا الله. يا خالتي ام اسماعيل بطلي نواح امي عايشة
- ايوة هتفضل عايشة في قلبي وحلاوة اكلها على لساني لحد ما
اقابلها في الآخرة
- الله يهديكي يا خالتي ام اسماعيل
- انا مش ههدا الا لما اشوفك متعلق انت ومراتك الحرباية في
المشنقة. انا رايحة ابلغ البوليس
- طب ايه رأيك ايوة انا قتلت امي ولو مادخلتيش شقتك واتهديتي
هقتلك انتِ كمان
- يا لهوووووووووووووووووي الحقوني ياناس
- وايه رأيك لو سمعت انك بلغتي البوليس هسلط عليكي بلطجي من
اصحابي يقتلك. يلا ادخلي على شقتك ومااشوفش وشك ع السلم تاني
- يا لهوووووووووووووي الحقووووووووووووووووني اما اخش استخبى
في شقتي. يا عيني عليكي يا ام فتحي. سامحيني يختي مش هقدر ابلغ عن القاتل العمر مش
بعزقة
˜—–™
- تيتة
- عايز ايه يا واد
- انا مش عايز القناة دي انا عايز اتفرج ع الكرتون
- لأ ما فيش كرتون. مش شايفني بتفرج على البرنامج !
- يا تيتة ده معاد الكرتون اللي بحبه
- حبك برص. اسكت يا واد خليني اتفرج
- يا تيتة انا عايز الكرتون بقى ماليش دعوة
- بقولك ايه يا واد انت ما تقعدش تتنطط فوق دماغي زي ابو قردان
كدة. مافيش كرتون
- يووووووووووووووووووووووووووه انتِ هتمشي امتى ؟
- مشش في ركبك يا قليل الادب
˜—–™
- يا ماما, انتِ يا ماما
- عايز ايه يا عمار
- عايز اتفرج ع الكرتون وتيتة مش راضية
- معلش يا حبيبي هنعمل ايه. لما تمشي ابقى اتفرج براحتك
- هي هتمشي امتى ؟
- وانا ايش عرفني ياابني
- ماليش دعوة يا ماما انا عايز الكرتون
- طب خلاص خد محمد وخالد وروحوا اتفرجوا مع مهاب ابن طنط مايسة
- لأ. هروح من غير محمد وخالد
- ليه ان شاء الله ؟
- عشان محمد وخالد بيعملوا شقاوة وبيضربوا اخوات مهاب الصغيرين
وطنط مايسة بتطردنا كلنا
- لا خدهم معاك انا هتصل بطنط مايسة اقولها
˜—–™
- الو ايوة يا مايسة
- جرا ايه يا ايناس. بعتالي الفريق بتاعك كله ليه يا حبيبتي. مش
كفاية عليا دوشة ولادي. هو انتِ كل ماتحبي تريحي دماغك تبعتيلي عيالك. هو انا
ناقصة!
- معلش يا مايسة اصل العيال عايزين يتفرجوا ع الكرتون وحماتي مش
راضية
- هي حماتك عندك ؟
- شوفتي الخيبة يختي
- وايه اللي جابها ؟
- زعلانة مع ابنها اللي عايش معاها هو ومراته
- جتك خيبة سلفتك انصح منك حدفت حماتك عليكي عشان هي تعيش من
غير مشاكل وتاخد راحتها مع جوزها
- معقول يا مايسة ؟
- ايوة طبعا. انتِ ماتعرفيش شغل السلايف اسأليني انا. حاولي
تطفشي حماتك بأي طريقة
- اطفشها ازاي قوليلي ؟
- سلطي عليها العيال يزهقوها
- يا حبيبتي دي هي اللي زهقت العيال وطفشتهم من الشقة
- ربنا معاكي بقى اصبري
˜—–™
- تررررررررررررررررن ترررررررررررررررررررررررن
- الو ايوة يا ماما
- ازيك يا مروة يا حبيبتي
- الحمدلله يا ماما بخير
- ها طمنيني الاحوال هديت بينك وبين حماتك ؟
- لأ يا ماما الاوضاع اتعقدت اكتر
- لا حول ولا قوة الا بالله. ليه بس كدة يا حبيبتي. حصل ايه ؟
- فتحي شد معاها شوية بسببي وهي طبعا زعلت وخدت هدومها وراحت
عند ممدوح
- وانتِ سبتيها تمشي يا مروة بالسهولة دي ؟
- اومال كنتي عايزاني اعمل ايه بس يا ماما !
- كنتي حايلتيها شوية وهديتيها وبوستي على راسها عشان ما تمشيش
والمواضيع تكبر
- اللي حصل بقى يا ماما
- مافيش حاجة اسمها اللي حصل يا ماما. روحي صالحيها انتِ وفتحي
ورجعيها بيتها عيب كدة
- فتحي بيتصل بيها مش بترد عليه
- يروح يجيبها بنفسه وانتِ معاه
- يروح هو لوحده يا ماما. انا مش هقدر اروح
- مش هتقدري ليه ان شاء الله ؟
- خايفة يا ماما لحسن تهيني وتكسفني قدام مرات ممدوح
- حتى لو حصل يا ستي يبقى عملتي اللي عليكي وبينتي نواياكي الطيبة.
ولا عايزة حماتك تقول انك ما صدقتي سابت البيت .... والله يا مروة لو عملتي كدة وجت منك انتِ
المبادرة وطلبتي من جوزك انك عايزة تروحي تصالحي امه وترجعيها، جوزك هيشيلهالك
جميل طول العمر ويعرف اصلك الطيب وهيفضل فاكر موقفك الجميل ده طول العمر
- خلاص يا ماما حاضر من عيوني لما يجي فتحي هيلاقيني لابسة
وجاهزة واعملهاله مفاجأة واقوله يلا بسرعة نروح نصالح مامتك ونرجعها البيت
- ايوة كدة. هي دي مروة بنتي حبيبتي اللي ربيتها
- ربنا يخليكي ليا يا ماما ومايحرمني من نصايحك ابدا
- ويخليكي ياحبيبتي ويصلحلك حالك يارب ويرزقك بالذرية الصالحة
قريب وتفرحينا
˜—–™
- تيتة حبيبتي انا جيت. وحشتيني هاتي بوسة
- اهلا يا سلمى يا حبيبة تيتة خدي عشر بوسات يا حبيبتي
- خدي واحدة شيكولاتة يا تيتة
- ياخد عدوينك يا بنت ابني. جبتيها منين الشيكولاتة دي ؟
- من عند تيتة صفصوفة
- مين تيتة صفصوفة دي اللي بتفرق شيكولاتة؟
- قصدها على ماما يا طنط
- هي امك اسمها صفصوفة اليومين دول. مش كان اسمها صفية البراوية
- بندلعها يا طنط
- انا بحبك قوي يا تيتة وعايزاكي تقعدي معانا على طول
- تسلمي يا حبيبتي طول عمرك حنينة ولسانك حلو زي عمتك غادة. حتى
سبحان الله طالعة زي القمر شبهها
- ايوة فعلا يا طنط غادة امورة خالص لكن هالة ودينا شبه حضرتك
بالظبط
- اخرسي قطع لسانك, انا شبه هالة ودينا!. اصلك ما شوفتنيش في
شبابي كنت ازاي
- الحمدلله اني ماشوفتكيش
- بتقولي ايه يا بت
- بقول قمر يا طنط قمر
˜—–™
- ممدوح
- ايوة يا ايناس
- انا رايحة عند ماما النهاردة
- انتِ بتستعبطي يا ايناس؟
- ليه يا ممدوح ؟
- انتِ مش عارفة ان امي هنا!
- طب وانا مالي. هي عشان امك هنا اتحرم انا من زيارة امي
- بقولك ايه يا ايناس مافيش مرواح عند امك. انتِ عايزة امي تزعل
- لأ بعد الشر عليها من الزعل. ازعل انا واتفلق مش مهم
˜—–™
- تررررررررررررررن تررررررررررررررررن
- ايوة يا ايناس
- ايوة يا ماما مش هقدر اجي النهاردة
- ليه يا حبيبتي. انا عملتلك المحشي اللي بتحبيه
- الست حماتي عندي زي ماانتِ عارفة والبيه جوزي مش عايزني اتنقل
من جنبها
- يا سلام. هو الواد ده اتجنن ولا ايه. مايقعد هو جنبها واحنا
مالنا. هيشيلنا هم امه ليه
- هعمل ايه بقى يا ماما
- البسي يا بت وتعالي سبيه يتفلق هو وامه. هو هيحكم علينا ولا
ايه
- مش مشكلة بقى يا ماما. ابقى اجي الاسبوع الجاي يمكن تكون
انكشحت
- يابت اختك جاية النهاردة ونفسها تشوفك وكمان خالتك انوار جاية
هي وبناتها
- بجد والله كلهم جايين؟
- ايوة يا حبيبتي البسي وتعالي
- بصي يا ماما لو جيت من غير اذنه هيعملي مصيبة. انا عندي فكرة
- قولي يا نوسة
- انتِ تتصلي بيه وتعملي عيانة وتقوليله معلش يا ممدوح انا
عيانة وعايزة ايناس جنبي عشان تديني الدوا
- انتِ بتفولي علية بالعيا والمرض يا بت؟
- بعد الشر عليكي يا ماما. بس مافيش حل تاني
- خلاص هتصل بيه واعمل عيانة
˜—–™
- ايوة يا ممدوح ياابني
- ايه يا حماتي مال صوتك
- تعبانة ياابني تعبانة وعايزة ايناس
- ليه هي ايناس دكتورة
- هي اللي هتوديني عند الدكتورة يابني يا حبيبي
- بقولك ايه يا حماتي يا حبيبتي انا عارف كويس قوي انك مش عيانة.
اعدلي صوتك بقى وكلميني كويس
- ايوة مش عيانة وعايزة بنتي
- المفروض انتِ اللي تعلميها الصح من الغلط وتفهميها ان طالما
حماتها في البيت يبقى مايصحش تخرج، مش تشجعيها عشان تقصر رقبة جوزها!
- هو حد جاب سيرة رقبتك يا ابني لا سمح الله
- عايزة تشوفي ايناس تعالي انتِ شوفيها
- خلاص بعد الضيوف ما يمشوا هاجي حتى بالمرة اسلم على امك
- ايوة كدة الكلام التمام يا حماتي يا ام الأصول والذوق
˜—–™
- ازيك يا ام ممدوح
- اهلا يا ام ايناس. ماحدش بيقولي يا ام ممدوح الا انتِ
- ماهو ممدوح الكبير ولازم نقولك يا ام ممدوح
- اصل ليا جارة اسمها ام اسماعيل كرهتني في اسم ممدوح من اصله.
كانت على طول تقولي يا ام مندوح، عشان كدة لما جه فتحي قولت خلاص يقولولي يا ام
فتحي
- ربنا يخليهوملك يختي. انتِ ماشية امتى بالسلامة ؟
- وانتِ مالك انتِ هو انا قاعدة فوق دماغك !
- اكيد بيتك وحشك
- لأ ما وحشنيش ومش هريحك واقولك همشي امتى
- هي فين ايناس. انتِ فين يا نوسة ؟
- اهلا يا ماما يا حبيبتي
- اهلا يا حبيبتي. مالك خاسة وعدمانة كدة ؟
- هي مين دي يا ام ايناس اللي خاسة وعدمانة. دي ناقصلها زلومة
وتروح تعيش مع اخواتها في الادغال
- اصل الحمل جاييلي بسدة نفس يا ماما مش طايقة الاكل. يادوب
باكل نص كيلو لحمة بالعافية حتى الفرخة ما بقدرش اكملها
- يا حبيبة امك يختي. كبدي عليكي هتقعي من طولك. انا عارفة حملك
وحش وبتخسي النص كل مرة وشكلك هفتانة
- هي مين دي اللي هتقع من طولها وهفتانة. دي راسها بقت شبه
الكرنبة وعنيها مش باينة من نفخة خدودها
- يختي حرام عليكي هتحسديلي البت خمسة وخميسة الله اكبر. خدي يا
نوسة يا حبيبتي جبتلك فرختين محمرين أزأزيهم قدام التليفزيون بدل اللب. انتِ حامل
وعايزة تغذية يا حبيبتي
- يختي انتِ بتوصيها على ايه. وصيها على عيالها اللي بتاكل
اكلهم وسيباهم معصعصين
˜—–™
- يوه. ياترى اتأخرت ليه كدة يا فتحي. الساعة داخلة على اتناشر
نص الليل
- ياربي كل ما اتصل الاقي موبايله مقفول
- ترررررررررررررررن ترررررررررررررررررن
- مين
- انا يا مروة
- ايه يا فتحي التأخير ده كله يا حبيبي وكمان قافل موبايلك ومش
عارفة اوصلك خالص
- معلش يا حبيبتي سهرت شوية مع جماعة اصحابي
- من ساعة مامتك مامشيت وانت كل يوم سهر ولا ايه يا راجل انت!.
واضح ان مامتك كانت معلماك الأدب ههههههههههههه
- وهي فين امي بس. لكن ايه ده انتِ كنتي برا من ورايا ولا ايه؟
- ودي معقولة دي يا حبيبي اخرج من غير اذنك برضو !
- اومال لابسة هدوم خروج ليه
- عشان نروح نجيب ماما مديحة من عند اخوك
- بجد يا مروة. يعني انتِ فعلا عايزة تصالحي امي بنفسك
- طبعا يا حبيبي. مامتك ما عملتش حاجة غلط اصلا. انا بس اللي
كانت اعصابي تعبانة
- ربنا يزيدك عقل وكمال يا حبيبتي ويخليكي ليا. بس الوقت اتأخر
وما ينفعش نروح دلوقتي. زمانهم ناموا كلهم
- والله يا حبيبي انا لابسة وجاهزة من بدري بس انت اللي اتأخرت
- ما كنتش اعرف النية الجميلة اللي انتِ ناوياها. انا كنت هروح
فعلا اجيبها لوحدي لاني حسيت انك مالكيش رغبة تروحي معايا
- ظلمتني يا توحا ربنا يسامحك
- ههههههههههه ماتزعليش يا مروة يا حبيبة قلبي. خلاص بكرة ان
شاء الله هاجي من الشغل الاقيكي جاهزة ونروح نجيبها ونتغدا عند ممدوح بالمرة ونشوف
ولاده
- خلاص يا حبيبي اتفقنا
˜—–™
- يا ايناس...ايناس
يا اينااااااااااااااااس. سيبي الفرخة اللي في ايدك وكلميني
- ايه يا ممدوح عايزني اتكلم وانا باكل عشان ازور ولا ايه
- واكلمك امتى اصلا اذا كنت كل ما اشوفك الاقيكي بتاكلي. ثم في
حد اصلا يفطر فراخ ع الصبح
- ياربي على سدة النفس واللقمة المنظورة اللي باكلها في البيت
ده. نعم يا سي ممدوح
- اخويا فتحي ومراته جايين النهاردة المغرب اعملي حسابهم ع
الغدا
- واعمل حسابهم ع الغدا ليه ما يتغدوا في بيتهم ولا هي تلاقيح
جتت
- وانتِ مالك انتِ هو انتِ بتدفعي حاجة!. عندنا فراخ في التلاجة
ولا طاروا؟
- انا تلاجتي ما تخلاش من الفراخ يا حبيبي.
- وعندنا لحمة؟
- في كيلو ونص
- خلاص اعملي فراخ ولحمة وكام صنف خضار كدة واعملي صنية كيك ولا
بسبوسة ولا اي حاجة حلوة وانا هجيب فاكهة وانا جاي من الشغل
- جرا ايه يا ممدوح ايه الاكل ده كله وعشان ايه
- عشان اخويا ومراته اللي اول مرة يتغدوا عندنا
- الميزانية ما تسمحش بالحاجات دي كلها. كفاية نص كيلو لحمة
وشوية رز وصنف خضار واحد
- والله. لا يا شيخة. ده جد ده ولا هزار عشان اضحك. ومش شايفة
ان نص كيلو لحمة ده بذخ منك
- يلا زي بعضه.كل واحد ياخد حتة ويحمد ربنا
- طب بطلي استهبال وماتفضحيناش
- يا ممدوح لازم نوفر شوية احنا عندنا عيال وعايزين مصاريف
- يا سلام! والعزومة اللي عملناها لامك واخواتك واللي صممتي
تجيبي فيها ديك رومي وحمام غير البط واللحمة والحلويات اللي صممتي نشتريها جاهزة
من اكبر محل والفاكهة الاشكال والالوان اللي جبتها عشان اهلك. ماكنتيش ساعتها
بتفكري في التوفير. ولا عشان اهلي مايستاهلوش زي اهل جنابك !
- ايه ده يا ممدوح انت بتعد على اهلي الاكل ولا ايه. وبعدين انا
ماقولتش حاجة غلط
- بصي يا ست هانم. زي ما اهلك غاليين عليكي اهلي غالين علية
ولازم اكرمهم في بيتي والا والله العظيم هتشوفي مني معاملة لاهلك زي الزفت ومش
هدفع مليم في عزومة لحد منهم
- وعلى ايه يا خويا الطيب احسن. استغفر الله العظيم
- منك ومن عمايلك يختي
˜—–™
- ترررررررررررررررررررررن تررررررررررررررررررررررررررررن
- الو ايوة يا ايناس
- ازيك يا ماما
- الحمدلله يا حبيبتي ازيك انتِ وازي العيال
- بخير كلهم بس انا بقى متضايقة
- متضايقة من ايه يا حبيبتي. اكيد من العقربة حماتك. عملتلك ايه
الولية دي
- لا يا ماما اذا كان على حماتي هي ماشية النهاردة الحمدلله
الحمدلله الحمدلله
- الف حمد وشكر بركة دعايا يا نوسة. انتِ عارفة امك بينها وبين
ربنا عمار عشان طيبة وغلبانة
- انا عارفة طبعا يا ماما. هو انتِ في حد زيك يا مامتي يا
حبيبتي
- اومال ايه اللي مضايقك. يكون الواد جوزك اللي عايز علقة
محترمة ده ضايقك في حاجة
- يا ماما اديني فرصة اتكلم. هنقضيها تخمينات ولا ايه
- قولي يا حبيبتي انا ساكتة اهو
- دلوقتي ممدوح عازم اخوه ومراته على الغدا وانا بصراحة ماليش
نفس اعزم حد
- بتقولي مين يا بت. هي مش مرات فتحي لسة ماخلفتش ؟
- ايوة يا ماما مانتِ عارفة ان ده سبب زعل حماتي
- وانتِ يا هبلة عايزة تقابليها وتشوفك وانتِ حامل وتنشك عين
تجيب اجلك واجل اللي في بطنك
- معقول يا ماما تفتكري هتحسدني ؟
- اومال يعني هتسمي عليكي وهي شايفة معاكي اربع عيال والخامس في
بطنك وهي مش قادرة تجيب ضفر عيل حتى!
- يا خبر يا ماما انتِ خوفتيني قوي. طب اعمل ايه دلوقتي ؟
- ما تقابليهاش خالص. ما تخليهاش تشوفك
- ازاي بس يا ماما! انتِ عايزة ممدوح يبهدلني!
- بقولك ايه بلا ممدوح بلا نيلة. هو هينفعك لو جرالك حاجة ولا
سقطتي!. اسمعي كلام امك وامشي وراها تكسبي. السلايف عينهم وحشة اسأليني انا، هو
انا انسى لما جليلة مرات عمك دخلت عليا وانا حامل في مصطفى اخوكي وقالتلي اول مرة
اشوف واحدة حامل ووشها منور وصحتها حلوة كدة، بعيد عنك هي مشيت من هنا وانا
اتدهولت وجاتلي سخونية وكنت هموت والعيل كان هيروح فيها
- يالهوي ياماما طب وبعدين. انا خايفة منها قوي
- خلاص اسمعي الكلام وما تقابليهاش
- طب وممدوح ؟
- اتصرفي معاه, ولا هو مضحي بيكي وبضناه اللي جاي وعايز يجيب
اجلكو!
- طيب يا ماما انا هتصرف
˜—–™
- تررررررررررررررررررررن ترررررررررررررررررررررررررن
- اهلا يا فتحي اهلا يا مدام مروة
- ازيك يا ممدوح وازي العيال
- الله يسلمك كلنا بخير اتفضلوا يا جماعة
- مين اللي جه يا ممدوح
- ده فتحي يا امي ومعاه مراته
- ايه اللي جابهم. مش عايزة اشوفهم ماتدخلهومليش. خليهم يمشوا
- كدة برضو يا امي يا حبيبتي هو انا ما وحشتكيش ولا ايه يا ست
الحبايب
- ست الحبايب جنبك ياخويا واستغنيت عني بيها
- انتِ ما فيش حاجة في الدنيا تغنيني عن شعرة من راسك يا امي
- ايوة يا واد يا بتاع الكلام الحمضان
- ازيك يا ماما
- اهلا
- وحشتيني, البيت وحش من غيرك خالص
- هو اداكي كام عشان تقولي الجملة دي ؟
- والله من قلبي. البيت فعلا وحش من غيرك
- صدقيها يا امي. مروة صممت تيجي تصالحك بنفسها
- يا سلام يا سعد قلبي. يا هنايا. مروة مرات ابني بجلالة قدرها
جات تصالحني. مالك يا واد عمال تنفخ فيها كدة. ال جت بنفسها ال. هي تطلع مين يعني
- اطلع مرات ابنك اللي بتحبك وعايزة رضاكي
- لو عايزة تراضيني كنتي حملتي وفرحتينا بحتة عيل
- طب ودي حاجة بايدي !
- يا امي ان شاء الله هتروح للدكتورة مع مامتها
- والدكتورة هتعمل ايه اذا كنت انت مش قادر تعمل حاجة
- معلش ربنا كبير وقادر يكرمنا
- خلاص يا ماما بقى ان شاء الله تروحي معانا النهاردة وتنوري
بيتك
- افكر وارد عليكو
- ماتقول حاجة يا ممدوح
- انا عن نفسي عايز امي تقعد معايا على طول وماتمشيش ابدا. دي
جابت البركة في البيت
- ربنا يكرمك يا ممدوح ويسعدك دنيا واخرة
- ومافيش دعوة ليا انا كمان يا امي ولا ايه
- ربنا ينولك اللي في بالك يا فتحي يابني
- هي فين ايناس؟؟؟؟؟؟؟؟؟؟؟؟؟؟؟؟؟
˜—–™
- ايه يا ايناس انتِ لسة مالبستيش ؟
- البس ليه !
- عشان تقابلي مروة
- واقابلها ليه ان شاء الله. انا جهزت الاكل وكل حاجة ع السفرة
روحوا كلوا
- ايه روحوا كلوا دي!. قومي قابلي مروة وسلمي عليها مايصحش كدة
- يوه يا ممدوح بقى. بصراحة ماينفعش اقابلها. مروة ماخلفتش ولو
شافتني وانا حامل وهي لأ هتحسدني وماما قالتلي ما تقابليهاش
- بقولك ايه يا ايناس شغل الستات والكلام الفاضي ده انا
مااعرفوش. اللي اعرفه ان دي ضيفة في بيتنا ولازم تقابليها وترحبي بيها
- لأ يا ممدوح مش هقابلها
- لأ هتقابليها وانا مش طرطور في البيت عشان واحدة ست تمشي
كلامها علية واتفضلي البسي وخلي يومك يعدي
- اووووووووووووووووووووف حاضر بس انت بقى المسؤول عن اي حاجة
تحصلي انا والبيبي، أما اتصل بماما تشوفلي حل في المصيبة دي
˜—–™
- تررررررررررررن ترررررررررررررررن
- ايوة يا ايناس
- شوفتي ياماما سي ممدوح عايزني اقابل مروة واتخانق معايا وصوته
علي
- وبعدين في الواد ده بقى اللي عامل زي الشريك المخالف. طب بصي
يا ايناس
- نعم يا ماما
- فاكرة الجلابية العرة بتاع الشحاتين اللي عمتك
جابتهالك وهي جاية من العمرة ؟
- ايوة يا ماما دي وحشة قوي وعايزة اقصها واعملها فوط مطبخ
- لأ يا حبيبتي البسيها واعملي عيانة واربطي راسك بمنديل وامسكي
عصايا في ايدك
- واطلع اضربهم بيها يا ماما؟
- لأ يا هبلة هتعملي نفسك مش قادرة تمشي والحمل مدهولك. خلي
منظرك يصعب ع الكافر وبدل ماسلفتك تحسدك تصعبي عليها وتعيط عشانك
- والله فكرة يا ماما حاضر. انا فرحانة قوي يا ماما وهطير من
الفرحة ان حماتي ماشية
- الحمدلله ربنا يفرحك اكتر واكتر يارب
˜—–™
- ايه ده
- مين دي
- لا مش معقول
- دي ايناس يا امي
- ايناس! ومالها ماشية محنية كدة.ما كانت لسة عاملة زي الطور
الهايج وبتجري ورا العيال عمالة تلطش فيهم
- مش عارف يا امي انا مستغرب هي عاملة كدة ليه
- ااااااااااااااااااااه ياني يا وسطي ااااااااااااااااه يا
ضهري اااااااااااااااااااااااااااااه الحقوني
- سندها يا ممدوح دي هتقع يابني
- ايه يا ايناس مالك يا حبيبتي
- تعبانة بموت يا ممدوح مش قادرة
- سلامتك الف سلامة
- سلامتك يا ايناس
- الله يسلمك يا مروة
- ايه بعد الشر مالك
- الحمل تاعبني قوي قوووي قووووي
- هو انت حامل ؟
- في الشهر التاني وبعد تلات شهور هبقى في
الخامسسسسسسسسسسسسسسسسسس سامعة يا مروة
الخااااااااااااااااااااااااااامسسسسسسسسسسسسسسسسسسسسس
- والله الف مبروك ربنا يتمملك بخير. بس هو الحمل بيتعب قوي كدة ؟
- ايوة بيتعب قوي, مانتِ ماتعرفيش عشان ماجربتيش آآآه يا ضهري
ياني
- ايناس حامل عقبال عندك يا مروة. روحي اقرصيها في ركبتها يمكن
تحصليها في جمعتها. عيني عليك يا فتحي. خديها جنبك يا ايناس يمكن العدوى تتنقلها
والنحس يتفك
- يا طنط سيبيني في حالي هو انتِ بتخليها تركز علية اكتر واكتر.
هو انا ناقصة. الله اكبر في عنيكو. آآآه يا وسطي مش قادرة اتحرك يا ممدوح. وصيتك
العيال لو جرالي حاجة
- لا ماتقلقيش يا مرات ابني لو جرالك حاجة انا هجوزه واخد
العيال عندي اربيهم عشان ياخد باله هو من عروسته ويبدأ من اول وجديد على نضافة
- بعد الشر علية, انتِ بتفولي علية ولا ايه يا طنط !
- يوه. مش انتِ اللي بتوصيه ع العيال. حبيت اطمنك عليهم. غلطت
في ايه انا
- آآآآه ياني منك ومن امك ومن عمايلك انت وامك يا ممدوح
الحقوووووووووني يا ناس تعبانة
- سلامتك يا ايناس, طيب مش عايزة اي حاجة اعملهالك ؟
- لأ عايزاكو تمشو وماتشيلوش همي
- يلا يا امي البسي يلا يا مروة عشان نمشي
- ما ينفعش يا فتحي نمشي. انا هدخل اغسل الاطباق
لإيناس وانضف المطبخ وكمان البيت مكركب ماينفعش نمشي ونسيبلها البيت
بالشكل ده دي تعبانة حرام,عن اذنكو يا جماعة انا داخلة انضف المطبخ
- يا دي النيلة ما تمشوا بقى. مالها دي ومال مطبخي. هي داخلة
ترميلي عمل جوا ولا هتعمل ايه دي يارب استر
˜—–™
- يا حبيبتي يا ايناس يا مرات ابني اهئ اهئ اهئ. انا قولتلك يا
ايناس انتِ بقيتي عضمة كبيرة ومش حمل خلفة ما سمعتيش كلامي اهئ اهئ اهئ
- يلا يا امي قومي البسي
- ايوة يا طنط قومي البسي آآآآآه ياني تعبانة
- خلاص يا ايناس انا خلصت المطبخ وخليت الدنيا زي الفل عايزة
حاجة تاني
- انا مش عايزة حاجة خالص انا عايزاكو تروحوا عشان ما تتأخروش
احنا بقينا نص الليل. سمعونا السلام عليكو بقى
- طيب يلا يا امي يلا يا مروة
- لأ روح انت ومروة يا فتحي انا ماينفعش اسيب ايناس وهي تعبانة
هقعد معاها اسبوعين تلاتة كدة يمكن شهر لحد ما تبقى كويسة. ماهو يبني ما ينفعش
اقعد معاها وهي كويسة وبعدين اسيبها بعد ما اتكسحت. انا حما اصيلة وهقعد مع مرات
ابني وهبقى قدوة للحموات من بعدي
- طب خلاص يا امي واجب برضو على العموم الحمدلله انك رضيتي
علينا ومش زعلانة نستأذن احنا السلام عليكم
- لااااااااااااااااااااااااااااااااااااااااااااااااااااااااااااااااااااااااااااااااااااااااااااااا
حماتي لا. اهئ اهئئئئئئئئئئئئئئئئئئئئئئئئ الله يسامحك يا ماما. شورتك هي السبب
اهئئئئ اهئئئئئئئئئئئئئئئئئئ
˜—–™
- بت يا نسمة يا مقصوفة الرقبة انتِ
- نعم يا ماما
- يابت انتِ مش عارفة ان خالتك زعلانة وسايبة البيت بسبب
المخفية مرات ابنها
- طب واحنا مالنا
- واحنا مالنا ازاي. مش تشغلي مخك معايا شوية
- جرا ايه يا ماما هو انتِ عايزانا نصالحهم على بعض ولا ايه
- نصالحهم ايه بس يا بت انتِ. يابت افهمي دي فرصتك. دلوقتي فتحي
اكيد مخنوق من مراته عشان زعلت امه وخليتها تسيب البيت، انتِ بقى بشطارتك تلفي
دماغ فتحي وتخليه يكره مراته ويطلقها ويرجعلك. يابت خليكي واعية زي امك.
- طب واعمل كدة ازاي يا ماما ؟
- مش معاكي رقمه ؟
- ايوة معايا من زمان. من قبل ما يتجوز الزفتة دي
- طب خلاص وريني شطارتك بقى. ويكون في علمك لو ماعرفتيش توقعيه
هتفضلي قاعدة في ارابيزي وماحدش هيعبرك
- يالهوي يا ماما. لا خلاص انا هتصل واغتت واغلس لحد ما اكرهه
في البت دي ويطلقها ويرجعلي
- جدعة يا حبيبتي طول عمرك طيبة وبنت حلال مصفي
- طالعالك يا ماما
˜—–™
- ترررررررررررررررررررن تررررررررررررررررررررررن
- الو
- ازيك يا توحا
- مين معايا
- اخص عليك يا وحش.بقى كدة مش عارف صوتي
- مين معايا يا فندم
- طب فكر شوية
- حضرتك واضح انك ست فاضية وعايزة تضيعي وقت وانا مضطر اقفل
السكة
- ترررررررررررررررررررن ترررررررررررررررررررررررن
- افندم
- بقى كدة يا متوحش تقفل السكة في وشي
- وهقفلها تاني لو ماقولتيش انتِ مين
- انا نسمة
- نسمة مين
- يا سلام! نسمة بنت خالتك سهير
- اهلا يا نسمة خير في حاجة
- ايه طريقة الكلام الرزلة دي. وحشتني وقولت اسمع صوتك
- نسمة عيب الكلام ده, انا راجل متجوز ومتهيألي انتِ بنت محترمة
وبنت ناس ومتربية
- ايه ده ايه ده ايه ده. على مهلك شوية. هو لما اعبرلك عن
مشاعري ناحيتك ابقى مش محترمة !
- الانسانة المحترمة تحترم نفسها وما تقللش من شأنها وشأن اهلها
وتكلم راجل وتتمايع في الكلام بالشكل ده
- انا محترمة غصب عنك, انت اللي مش محترم
- والله لو انا مش محترم كنت رحبت بمكالمتك وجاريتك في الكلام
واتسليت بيكي. لكن انا اخلاقي ما تسمحليش
- جرا ايه يا فتحي هو انت فاكرني متصلة اتسلى ولا اهزر
- اومال متصلة ليه ان شاء الله
- متصلة اقولك هي دي بقى مروة اللي فضلتها علية. اديها قدرت
تفرق بينك وبين امك وتخلي حياتك جحيم
- لا لا لا انتِ معلوماتك مش دقيقة يا انسة نسمة. انا امي ومراتي
زي السمن ع العسل وامي راجعة البيت قريب ان شاء الله وخليكي في حالك انتِ
- انا مش عارفة انت متمسك بالست مروة دي ليه. هي احسن مني في
ايه.ايش حال انها مابتخلفش
- بصي يا نسمة هقولك كلمة عشان ماتتعبيش نفسك ورايا كتير وتهدي
بقى وتسيبيني في حالي، مروة دي مراتي وحبيبتي وسواء خلفت او ما خلفتش مش هفرط فيها
- كدة. طيب. والله انت ما تستاهل الواحدة تفكر فيك. اشبع بالست
هانم بتاعتك
˜—–™
- سمعتي ياست ماما الاستاذ ابن اختك عمل معايا ايه
- ماانتِ اللي جبتيه لنفسك يا شيخة. هو انتِ متصلة تجري رجله
ولا متصلة تتخانقي وتوريله قلة ادبك. يخرب بيت البهايم يا شيخة
- يا ماما هو اللي مادانيش فرصة
- فرصة ايه ونيلة ايه.انا لو بفهم في بقرة كانت زمانها فهمت
ووقعت عشرين طور. انما هقول ايه. نصيبي كدة,
معايا بت عقلها في جزمتها
- بقولك ايه يا ماما. انا مخنوقة ومش عايزة اتكلم
- والله انا اللي مخنوقة ومش عايزة اشوف وشك. اخفي من وشي
الساعة دي يابت انتِ بدل ما افتح دماغك بالكوباية اللي في ايدي، منك لله يا فتحي
انت وامك. اودي البت دي فين يا اخواتي. اجوزها ازاي. اعمل عليها عرض واقول تعالوا
يا ناس خدوا عروسة وعليها ازازتين زيت وباكو شاي!
˜—–™
- مروة
- ايوا يا فتحي يا حبيبي انت جيت
- ايوا يا قمر. ها الغدا جاهز؟
- طبعا يا حبيبي ودا سؤال تسأله برضو. انت عمرك دخلت البيت
والغدا ماكانش جاهز ؟
- لا والله يا حبيبتي ,انتِ عمرك ماقصرتي في حاجة ابدا
- انا رايحة للدكتورة بكرة ان شاء الله انا وماما
- طيب يا حبيبتي ان شاء الله يكون خير
- ان شاء الله يا حبيبي. طيب يلا عشان اساعدك في تغير هدومك
- يلا يا حبيبتي
˜—–™
- تررررررررررررررررن ترررررررررررررررررررررررن
- الو ايوة يا امي يا ست الحبايب
- ازيك يا فتحي يا حبيبي
- الله يسلمك يا حبيبتي هتيجي امتى بقى كفاية كدة
- قريب ان شاء الله. اصل انا قاعدة بسلي ايناس والعيال, واخوك
مش عايزني امشي والله وكمان ايناس مرات اخوك جالها الضغط مش عارفة من ايه
- لا يا امي كفاية كدة على ممدوح. انا كمان ليا حق عليكي. على
فكرة مروة رايحة للدكتورة بكرة هي ومامتها
- يا سلام وتاخد امها ليه ان شاء الله. ما تستنى لما اوديها انا
- يا امي وفيها ايه لما تاخد امها معاها
- فيها اننا كدة هنفضل على عمانا وما نعرفش الدكتورة قالت ايه.
مش يمكن الدكتورة تقول ما فيش منها امل وهما يضحكوا علينا ويقولوا ان العيب منك
انت ويلبسونا السلطانية
- سلطانية ايه بس يا امي اللي هيلبسوهالنا. والله هما تفكيرهم
مش كدة خالص
- وانت ايش عرفك بالحريم وتفكير الحريم. الرجالة ما بيفهموش في
شغل الستات ده اسألني انا. الست من دول يا بني تودي الراجل البحر وتجيبه عطشان
- على العموم هنشوف الدكتورة هتقول ايه
- طيب يا خويا اما نشوف اخرتها
˜—–™
- مدام مروة بعد الكشف عليكي والتحاليل اللي عملتيها
اقدر اقولك انك ما عندكيش اي مانع للحمل، وعلى العموم هطلب منك شوية تحاليل يعلمها
زوج حضرتك ونشوف ان شاء الله
- ان شاء الله. شكرا يا دكتورة
- العفو يا فندم
˜—–™
- الحمدلله يا مروة يا حبيبتي. انا كنت قلقانة جدا عليكي
- الحمدلله يا ماما بجد انا كدة ارتحت نفسيا
- مروة تبقي تقولي لفتحي على التحاليل اللي طالباها الدكتورة
عشان المرة الجاية ناخد النتيجة معانا
- خلاص ان شاء الله
˜—–™
- ياااااااااااااااه يا فتحي انا فرحانة قوي يعني احنا الاتنين
الحمدلله ما عندناش اي موانع للخلفة
- الحمدلله يا حبيبتي. انا بصراحة لما عرفت ان ماعندكيش موانع قلت
يبقى اكيد عندي انا ههههههههه
- الحمدلله يا حبيبي نتيجة تحاليلك انت كمان هايلة. الدكتورة
قالت مسألة وقت والعامل النفسي مهم جدا
˜—–™
- تررررررررررررررررن ترررررررررررررررررن
- ايوة يا فتحي طمني يا حبيبي
- الحمدلله يا امي انا ومروة نتيجة تحاليلنا كويسة جدا
وماعندناش موانع للخلفة
- الله. اومال لما ما عندكوش موانع ما بتخلفوش ليه. بتستهبلوا
ولا بتستعبطوا
- دي حاجة بتاعة ربنا وان شاء الله انا قلبي حاسس ان ربنا
هيكرمنا بس انتِ ادعيلنا
- هو انا ورايا اللي الدعا ليك ولاخواتك يا حبيبي. ربنا يرزقك
بالخلف الصالح عن قريب
˜—–™
- مروة
- يا مروة
- انتِ فين يا حبيبتي
- انا هنا يا فتحي
- ايه يا حبيبتي اول مرة اجي الاقيكي في السرير, انتِ تعبانة
ولا ايه ؟
- اه والله يا فتحي حاسة اني دايخة خالص ومش قادرة اقف. اسفة
والله ما قدرتش اطبخ. دخلت المطبخ حسيت الدنيا بتلف بيا
- سلامتك يا حبيبتي الف سلامة. خلاص يا ستي اطبخ انا مافيش
مشكلة خالص
- تطبخ ايه بس يا حبيبي انت لسة راجع من الشغل مرهق. انا شوية
كدة وهبقى كويسة واقوم اعمل الاكل
- لا يا روح قلبي خليكي مرتاحة, انا هعمل اي حاجة سريعة كدة
وخلاص. عندنا ايه في الفريزر؟
- هتلاقي كفتة متبلة وجاهزة على القلي واعمل جنبها شوية مكرونة
وخلاص
- اه. بموت في الكفتة بتاعتك دي. مش عارف بتبليها ازاي
ههههههههه
- هههههههههه طيب يلا وريني شطارتك في قليها بس
- دقايق معدودة يا مروة هانم وهحضر لحضرتك احلى مكرونة وجنبها
الكفتة اللي تجنن. هروح البس مريلة المطبخ ودعواتك بقى ههههههههههه
˜—–™
- تررررررررررررررررررررررررررن تررررررررررررررررررررررررررررن
- ميييييييييييييين
- انا امك يا فتحي افتح يا حبيبي
- اهلاااااااااااااااااااااااااااااااااااااااا امي حبيبتي
نورتي
- يا مصيبتي!!!!!!!!!! ايه اللي انت عامله في نفسك ده يا واد.
لابس مريلة المطبخ وماسك كبشة. يا لهوووووووووووووووووووي الحقوني ياناس
- ايه يا امي اهدي في ايه
- تعالوا يا ناس اتفرجوا على ابني اللي ربيته وتعبت وكبرته لحد
ماشنباته بقى يقف عليها الصقر اتقلب حورمة
- يا امي مايصحش كدة ادخلي هتفرجي علينا الجيران
- خليهم يجوا ويتفرجوا
- مين اللي بيزعق ع السلم ده. ميييييييييييييييييييييييييين ام
فتحي. يا حبيبتي يختي. هو انتِ لسة عايشة. صحيح كنتي عند مندوح؟
- تعالي يا ام اسماعيل ولمي الجيران يتفرجوا
- في ايه بس يا ام فتحي
- ام فتحي مين يختي انا بقيت ام فتحية خلاص
- يا امي كفاية كدة الله يهديكي ادخلي
- هي فين المحروسة اللي شقلبت كيانك ومسكتك كبشة
- اهلا يا ماما ازيك
- ماما في عينك يا حرباية. انتِ يابت بتستغلي غيابي وتمشي البيت
على كيفك وتوقفي راجل طول وعرض في المطبخ, دانتِ لا عيشتِ ولا كنتِ
- يا امي مروة تعبانة
- تعبانة ايه. ماهي واقفة زي فحل الجاموس اهيه
- والله يا ماما تعبانة ودايخة ونفسي في الفسيخ
- نفسك في الفسيخ!!!!!!!!!!!!!!!!
- الله لما تجيبوا فسيخ يا ام فتحي ابعتولي شوية عشان وحشني قوي
- يا شيخة ماتغوري على شقتك احنا ناقصينك
˜—–™
- يلا يا امي الغدا جاهز
- كمان جايب الاكل بنفسك. اشتغلت سفرجي عند الهانم يا سي فتحي
- معلش يا امي. مراتي تعبانة ومافيهاش حاجة لما اساعدها
- استغفر الله العظيم من كل ذنب عظيم. يا خسارة الرجالة
- كلي يا امي يلا مدي ايدك
- امد ايدي على ايه. هو فين الاكل ده. حد يابني يعمل جنب
المكرونة بتنجان مقلي
- يا امي دي كفتة
- كفتة! انا اول مرة اشوف كفتة سودة
- معلش اصلها كانت هتتحرق مني
- كانت هتتحرق. دي اتحرقت وشبعت حريقة
- تسلم ايدك يا فتحي يا حبيبي الاكل يجنن
- انتِ بتغظيني ولا ايه يا اسمك ايه انتِ؟
- انا بغيظك في ايه بس!
- يعني انا اقول الاكل مش عاجبني وانتِ تقوليله تسلم ايدك!
- يعني مش كتر خيره يا ماما عمل الاكل بدالي
- ايوة ماانتِ عايزة تعملي هانم وتشغلينا عندك. مش بعيد كمان
شوية تقوليلي قومي اعمليلي كوباية شاي
- انا ما اقدرش اطلب من حضرتك طلب زي ده
- ايوة ايوة ايوة اتمسكني خليني اصدقك والدمعة تفر من عيني
- لا حول ولا قوة الا بالله. يا امي في ايه بس
- ولا في ايه ولا مافيش ايه انا قايمة وداخلة اوضتي بلاش كلام
فاضي
- استغفر الله العظيم. هو انا عملتلها حاجة يا فتحي؟
- لا حبيبتي حصل خير كملي اكلك
- ماليش نفس
- عشان خاطري حبيبتي. طب حتى اجبري بخاطري وخدي الكفتاية
المحروقة دي من ايدي هههههههههههههه
- ههههههههههههههههه والله انا مش عارفة من غيرك كانت حياتي
تبقى ازاي. ربنا يخليك ليا يا حبيبي
˜—–™
- يا مروة,انتِ يللي اسمك مروة
- نعم يا امي
- هو انت اسمك مروة اليومين دول
- مروة تعبانة
- وبعدين بقى! هي مراتك دي ايه حكايتها. ايه كل شوية تعبانة
تعبانة. ما التعبان يشوفله مستشفى يقعد فيها
- يا امي معلش اصلها كل شوية دوخة وترجيع ومش عارف مالها
- دوخة وترجيع ونفسها في الفسيخ!! يكونش عندها الحصبة
- ربنا يستر يا امي. على العموم هوديها للدكتورة بالليل
- هو انت كل شوية تدفع فلوس ع الدكاترة! هو انت يابني بتلاقي
فلوسك في الشارع. حرام عليك شقاك ياابني
- اومال مين بس يوديها للدكتور
- ماتخلي ابوها يوديها واحنا مالنا. هي كانت من بقيت اهلنا
- الله يهديكي يا امي
˜—–™
- تررررررررررررررررررن تررررررررررررررررررررررررن
- ايوة يا مروة يا حبيبتي
- ازيك يا ماما
- ازيك انتِ يا نور عيني عاملة ايه
- تعبانة يا ماما تعبانة قوي
- ليه يا حبيبتي سلامتك
- حاسة بأعراض غريبة علية
- اعراض ايه حبيبتي
- دوخة وترجيع ونفسي بتروح لحاجات غريبة قوي غير الالم اللي في
ضهري
- الله الله ايه الكلام اللي يبشر ده
- يبشر بأيه بس يا ماما
- بقولك ايه
- نعم يا ماما
- هي جت
- لأ دي حتى متأخرة كتير
- طيب خير الحمدلله. روحي اعملي اختبار حمل النهاردة واول
ماتيجي بشريني بالنونو بقى
- ايه ده يا ماما تفتكري ممكن يكون حمل؟
- ان شاء الله يا حبيبتي. يارب يستجيب دعائي
- ياريت يا ماما ياريت. عشان نفسي افرّح فتحي قوي
- يا حبيبتي ربنا يفرحكو ويبعد عنكو كل شر اللهم آمين
˜—–™
- طيب يا امي احنا نازلين
- رايحين فين ان شاء الله
- مروة هتعمل اختبار حمل
- هتعمل اختبار حمل لمين
- يعني هتعمل اختبارحمل لمين بس يا امي. ادعي انها تطلع حامل
- قلبي حاسس انها مش حامل وانا قلبي ما يكدبش علية. ده مش شكل
واحدة حامل ابدا
- معلش ادعي برضو. ربنا كريم
˜—–™
- ازيك يا فتحي ازيك يا مروة
- اهلا خالتي ام اسماعيل
- ازيك يا طنط ام اسماعيل
- انتو رايحين فين
- رايحة اعمل اختبار حمل ادعيلي يا طنط بالله عليكي اطلع حامل
- طيب ولو دعيتلك وطلعتي حامل هتجبيلي حاجة حلوة
- طبعا والله من عيوني الاتنين بس ادعيلي
- طيب يارب يا مروة تطلعي حامل عشان تجبيلي كباب وكفتة وانتِ جاية
- حاضر ياطنط بسيطة من عنيا
˜—–™
- مبروك يا مدام مروة انتِ حامل في شهر
- لا مش ممكن بجد. انا مش مصدقة. بجد انا حامل. انا مش عارفة
اقول ايه. الحمدلله الحمدلله الحمدلله. مبروك يا فتحي يا حبيبي
- ياااااااااااااااااااااااااااااااااه الحمدلله يا حبيبتي الف
حمد وشكر اخيرا يا مورا يا امورة يا قمر انتِ. الف حمد والف شكر ليك يارب
- فتحي انا فرحانة انا فرحانة قوي نفسي اقول لكل الناس اللي
اعرفهم والللي ما اعرفهومش. انا بجد فرحانة قوي
- ايه يا حبيبتي الدموع دي كلها
- دموع الفرحة يا حبيبي. احنا اول ما نروح البيت لازم نسجد سجدة
شكر لله
- طبعا يا حبيبتي بس قبل ما نروح نعدي على الحاتي نجيب الكباب
والكفتة لخالتي ام اسماعيل ههههههههههههه
- هههههههههههههههه مش خسارة فيها والله مش خسارة. انا هتصل
بمامتي حالا افرحها
- طيب يا حبيبتي لما نروح البيت اتصلي بيها
- لالالالا انا مش قادرة استنى
- تررررررررررررررررررن ترررررررررررررررررررررن
- ايوة يا مروة
- يا ماما يا ماما انا حامل يا ماما. حامل في شهر انا فرحانة قوي
ياماما
- يا حبيبتي يابنتي. كبرتي يا مروة وحالا السنين جريت وهتبقى
ام. الحمدلله الحمدلله. ده بابا هيفرح قوي لما اقوله
- قوليله يا ماما وقولي للدنيا كلها
- مروة حبيبتي ماتعمليش مجهود جامد خالص انتِ لسة في اول شهور
الحمل. يعني ياريت حركتك تكون قليلة واوعي تشيلي حاجة تقيلة يا حبيبتي
- ان شاء الله يا ماما. طيب سلام دلوقتي عشان مروحين انا كلمتك
اول ما عرفت الخبر
- ربنا يتمملك بخير يا حبيبتي. في حفظ الله مع السلامة حبيبتي
- الله يسلمك يا ماما
˜—–™
- ترررررررررررررررررن تررررررررررررررررررررررررن افتحي يا امي
افتحي بسرعة عندي خبر حلو افتحي
- خير يا حبيبي
- مروة
حااااااااااااااااااااااااااااااااااااااااااااااااااااامل
- انا حامل في شهر يا ماما
- ماشاء الله ماشاء الله. مبروك يا فتحي يا حبيبي اهئ اهئ اهئ
الحمدلله
- بتعيطي ليه بس يا امي
- دموع الفرحة يا حبيبي الحمدلله. بقولك ايه يا فتحي ماتتحركش
كتير يا حبيبي ونام على ضهرك وماتبذلش مجهود
- يا امي مش انا اللي حامل دي مراتي
- برضو ماتبذلش مجهود
˜—–™
- ترررررررررررررررن تررررررررررررررررررررن
- الو ايوة يا فتحي
- ازيك يا ممدوح
- ازيك انت يا فتحي
- ابسط يا ممدوح اخيرا هتبقى عم
- يا الله الف مبروك يا فتحي ماشاء الله فرحتني والله
- الله يبارك فيك يا حبيبي كنت عارف انك هتفرح
- طبعا يا فتحي. هو انا عندي اغلى منك عشان افرحله
- ربنا يخليك يا خويا ويباركلي فيك.
- الله يرزقك بالذرية الصالحة يا فتحي وان شاء الله اول مولود
يكون ولد
- يا سيدي ولد ولا بنت كله نعمة كبيرة من عند ربنا
- الف مبروك للمرة التانية
- الله يبارك فيك يا ممدوح يلا اسيبك بقى مع السلامة
- الله يسلمك يا فتحي
˜—–™
- انت بتبارك لاخوك على ايه يا ممدوح هو في ايه ؟
- مراته حامل ماشاء الله
- ياربي على الغيرة. شوفت بقى اول ماعرفت اني حامل الغيرة كلت
قلبها وحملت هي كمان
- اعوذ بالله منك يا ايناس. هو الحمل كمان فيه غيرة
- طبعا يا سي ممدوح غيرة ونص كمان
- يا ايناس دي حاجة بايد ربنا مش بايد البشر. انا اعرف واحدة
ممكن تغير من واحدة عشان جابت عربية تقوم هي كمان تجيب عربية زيها، لكن صعب واحدة
تغير من واحدة حامل تقوم تحمل زيها
- طب بس بس اصل انت طيب وماتعرفش حاجة عن الستات وطبايعهم
- والله انتِ كرهتيني في الستات وطبايعهم. مش هتباركي لمروة
- قصدك ابارك للغيورة. هتصل بيها وابارك زي بعضه خليني احسن
منها
- مايصحش تتصلي. احنا احسن نروح نبارك بنفسنا
- يا سلام! على ايه دا كله يعني
- يا ايناس صفي قلبك للناس يا ايناس
- خلاص هروح عشان خاطرك مع ان الموضوع مايستاهلش
˜—–™
- مروة على مهلك يا حبيبتي امشي بالراحة
- حاضر يا حبيبي
- ايه ده. ايه اللي على مهلك وامشي بالراحة. ما تنشف شوية يا
فتحي يابني مش كدة. عيب مراتك تشوفك ملهوف عليها اللهفة السودة دي
- في ايه بس يا امي. انا خايف عليها
- لأ بقى دا انت كدة عايز تفرسني وتشلني
- بعد الشر عليكي يا امي
- الله يرحم رجالة زمان ونشوفية رجالة زمان
- يا امي مراتي حامل ولازم حركتها تبقى بحساب
- يا ابني يا حبيبي انت كدة هتخليها تتنمرد عليك. انا خلفتكو
خسمة مافيش مرة ابوك قالي على مهلك يا حبيبتي
- معقول يا امي
- اومال ايه. هو رجالة زمان يتعوضوا. كان الراجل من دول يشخط في
مراته الشخطة يجيبلها تبول لا ارادي، وكان يبرق لها التبريقة يجبلها صرع، انما
دلوقتي الراجل من دول يدلع مراته ويقولها يا توتو ويا سوسو والروس اتساوت
- يعني يا امي الراجل عشان يكون راجل في بيته لازم يكون قاسي
- يا حبيبي القسوة عنوان الرجولة. المفروض يا حبيبي الراجل كل
يوم الصبح اول ما يصحى من النوم يدي مراته المين على وشها
- طب ليه بس يا امي
- بيصبح عليها يا حبيبي. غير تحية بعد الضهر
- ايه تحية بعد الضهر دي كمان
- يعني يا حبيبي يكسرلها رجل يكسرلها دراع او
يفقعلها عين عشان الحياة تمشي
- لا حول ولا قوة الا بالله. يعني ابويا كان بيعاملك كدة
- يا سلام. هو مين ده اللي كان يستجري يفتح عينه فية. ليه هو
انا ملطشة ولا ماليش اهل. انا بس بنصحك لوجه الله يا حبيبي
- الله يصلح حال الجميع
- نادي على الست هانم تعملنا شاي ولا قهوة ولا اي حاجة تتشرب
- هقوم اعملك انا يا امي عن اذنك
- يارب اعمل ايه في الواد ده. هي البت دي عملاله عمل مخلياه زي
الخاتم في صباعها ولا ايه!انا مش هيفش غلي غير هالة بنتي حبيبتي توأم روحي. أما
اقوم اتصل بيها اتفك بكلمتين
- ترررررررررررررررررن ترررررررررررررررررررن
- الو ايوة يا ماما
- ازيك يا هالة يا حبيبتي وازي ولادك
- كويسين الحمدلله انتِ عاملة ايه؟
- انا مش كويسة
- ليه يا ماما بعد الشر مالك
- الهانم مرات فتحي حامل والبيه اخوكي قاعد يدلع فيها وكل شوية
بالراحة يا مروة على مهلك يا مروة لما الواحد اتخنق
- ايه ده. هي حامل اخيرا
- هو انتِ ماحدش قالك؟
- هو انتوا بتقولولي على حاجة خالص ولا معتبرني واحدة منكو!
- معلش يا هالة اصل احنا لسة ما نعرفش الا امبارح
- طب وفتحي ما اتصلش بيا ليه يقولي؟
- وانا مالي انا. اتصلي بيه اسأليه
- ولا اسأله ولا يسألني ولا هباركله حتى. مايستاهلش ولا مراته
تستاهل
- لا لأ يا هالة انا مش معاكي. اخوكي يستاهل كل خير، مراته هي
اللي ما تستاهلش
- طيب وهو اتصل بغادة؟
- والله ما اعرف. بس اكيد اتصل بيها ماانتِ عارفاه بيحبها قوي
- طب ايه رأيك لو كان اتصل بغادة قالها وما قاليش انا مش هكلمه
تاني ولا ليا دعوة بيه
- جرا ايه يا هالة ليه كدة يا بنتي. مايبقاش قلبك اسود كدة
- بقولك ايه يا ماما
- نعم
- في موضوع مهم قوي ولازم نتكلم فيه ونحط النقط ع الحروف من
دلوقتي
- موضوع ايه. خير؟
- ان شاء الله الشقة اللي انتو قاعدين فيها دي مش بتاعتنا كلنا؟
- يعني ايه بتاعتنا كلنا؟
- يعني كلنا نورث فيها بعد ماحضرتك تتوفي؟
- اتوفى! بعد الشر عليا الف مرة ان شالله اللي يكرهوني ، تصدقي
يا هالةانا غلطانة اني اتجننت في دماغي واتصلت بيكي. اقفلي السكة اتقفل
في وشك باب الرحمة ان شالله
˜—–™
- ست مروة,يا
مروة هانم يا مرات ابني يللي مشغلاني عندك
- نعم يا ماما
- دخلت المطبخ لقيت كوباية مش نضيفة وغسلتها. مش عايزاني اغسلك
رجليكي بالمرة ؟
- انا اسفة والله يا ماما. دي اكيد فتحي شرب فيها الشاي
وماغسلهاش
- هو كمان فتحي شغلتيه عندك!. اللهم صل على كامل النور
- عليه الصلاة والسلام. ياماما اصل انا كنت تعبانة فهو عمل شاي
لنفسه
- وان شاء الله هنقعد في القهر الازلي ده لحد ما حضرتك تقومي
بالسلامة؟
- لا يا ماما انا كويسة اهو شوفي حضرتك عايزة ايه
- حضرتي عايزة اطفش من وش حضرتك عشان انتِ سحبتي الاكسجين اللي
في الشقة كله. انا رايحة عند ام اسماعيل على مايجي فتحي
- اتفضلي ياماما
- يارب الطف بيا. اللي ماتتسمى دي هتنقطني بأدبها
˜—–™
- تن تن تنننننننننن
- مين
- انا غادة يا مروة
- غاااااااااااااااااااااااااااااااادة حبيبتي وحشتيني
- يا حبيبتي يا مروة والله انتِ اكتر يا قمر. ايه يا ستي
الاخبار الحلوة دي
- هو فتحي قالك ؟
- قالي يا حبيبتي وقلت لازم اجي اباركلكو بنفسي. الف مبروك
حبيبتي ربنا يتمملك على خير
- الله يبارك فيكي يا غادة. والله وحشاني. وزعلانة منك عشان
بقالك كتير لا جيتي ولا اتصلتي بيا
- والله غصب عني يا مروة. اديكي اهو ربنا كرمك وهتبقى ام وتشوفي
بعنيك الولاد وتعبهم، ولا الدروس الخصوصية والمدرسين اللي داخلين خارجين وكل شوية
اعمل قهوة لده وشاي لده، وغير البيت وطلبات البيت وجوزي وطلباته و الله بفضل
مطحونة طول النهار ومابصدق يجي الليل عشان استلم السرير واصحى الصبح بنفس الطريقة
- يا حبيبتي ربنا يعينك يارب ويخليلك ولادك
- الله يخليكي يامروة تسلميلي يا حبيبتي. فين ماما؟
- عند طنط ام اسماعيل
- ليه في حاجة ؟
- ابدا، قالت انها زهقانة وهتقعد معاها شوية
- طيب انا هروح على هناك وبالمرة اسلم على طنط ام اسماعيل.
- اعملي حسابك هتتغدي معانا يا غادة
- والله مش هقدر يا حبيبتي انا سايبة الولاد في
المدرسة
˜—–™
- تررررررررررررررررن تررررررررررررررررررررن
- مين اللي برا, عدو ولا حبيب؟
- هههههههههه لأ حبيب يا طنط ام اسماعيل انا غادة
- اهلا اهلا اهلا ازيك يا غادة بقالي كتير ما
شوفتكيش وحشتيني ووحشتني الحاجات الحلوة اللي بتجيبهالي
- معلش المرة الجاية بقى عشان مالحقتش اجيب حاجة
- طيب لما مش جايبالي حاجة بتزعجيني وتخبطي علية ليه ؟
- معلش اصل عرفت ان ماما عندك وقلت كمان اسلم عليكي
- الله يسلمك كلك ذوق اتفضلي ادخلي
- ازيك يا ماما
- اهلا اهلا حبيبة ماما ازيك يا غادة
- الحمدلله يا ماما بخير
- ازي ولادك وجوزك
- كلهم بخير وبيسلموا عليكي
- لكن ايه الزيارة المفاجئة دي
- جيت ابارك لفتحي ومروة
- بقى كدة. يعني مش جاية عشاني
- يا ماما جاية عشانكو كلكو
- هو كل الناس بقت تيجي عشان مروة دلوقتي. هو انا خلاص ما
بقاليش لزمة
- ماتقوليش كدة يا ماما انتِ ست الكل ربنا يخليكي لينا
- شوفتي الهانم مرات اخوكي اللي مابتتحركش الا بحساب بناء على
اوامر البيه جوزها اللي بيعاملها زي ماتكون هتجيبله العيل اللي لا قبله ولا بعده
- يا ماما ده اول حمل ليها واكيد فرحانين ربنا يتتملها على خير
- ولسة. هو احنا شوفنا حاجة. يمكن كمان شوية تقوله مشي امك من
البيت عشان خايفة اتوحم عليها
- هههههههههههه يا ماما بلاش شغل الحموات ده. هي طنط ام اسماعيل
راحت فين؟
- انا جيت اهو وجبتلكو كوبايتين مية ساقعة تبلوا ريقكو
- تعيشي يا كريمة يا ام الكرم يا مغرقانا بجمايلك وميتك الساقعة
˜—–™
- ياست مروة ,يا مروة هانم,ياهانم
يللي عاملة مش سامعة
- نعم يا ماما نعم
- بقولك ايه مش ملاحظة أن البيت بقاله كتير ما اتنضفش
والموبيليا كلها تراب
- والله يا ماما تعبانة ومش هقدر اشيل حاجة من مكانها
- وما تقدريش ليه
- الدكتورة محذراني ان اشيل حاجة تقيلة
- يا سلام. يا فرحتي بيكي انتِ والدكتورة. استفدت ايه انا بقى
ان شاء الله. بقولك ايه انا اكتر حاجة اكرهها في حياتي دلع الستات اللي مالوش لزمة
- انا بتدلع برضو يا ماما؟
- ايوة بتتدلعي ولاقية اللي مقويكي على دلعك. اتفضلي نضفي البيت
من اوله لاخره وأياك الاقي ذرة تراب واحدة
- يا ماما...............
- بلا ماما بلا بابا بلا كلام فاضي. ايه. ماحدش قادر عليكي ولا
ايه
- طيب انا هكلم فتحي يشوف شغالة تيجي حتى ولو مرة في الأسبوع
- انا يا حبيبتي ما بحبش الشغالات ولا عمري دخلتهم بيتي. مابحبش
حد غريب يدخل عندي ويعرف اسرار عيشتي
- طيب وانا اعمل ايه. عشان انضف البيت يبقى لازم هبذل مجهود وده
خطر على الحمل
- ماليش في الكلام ده اتصرفي. وساعة واحدة والاقي البيت زي الفل
والا مش هيحصل طيب
- ياربي اعمل ايه بقى اوووووووووووف. انا هكلم ماما تشوفلي صرفة
- ترررررررررررررررررررررن تررررررررررررررررررررررررررررن
- الو ايوة يا مروة يا حبيبتي
- ايوة يا ماما ازيك
- ايه يا حبيبتي عاملة ايه واخبار الحمل ايه معاكي
- شكله مش هيكمل يا ماما
- بعد الشر يا حبيبتي ليه بتقولي كدة بس. هو انتِ حاسة بحاجة.
طمنيني يا مروة
- الست حماتي عايزاني انضف البيت وانفض الموبيليا واشيل واحط
وان شاء الله بقى يبقى عليه العوض في الحمل
- لا حول ولا قوة الا بالله. طيب ما تشوفوا شغالة
- مش راضية
- يعني ايه مش راضية
- بتقول مش بتحب حد غريب يدخل البيت
- استغفر الله العظيم.طيب يا مروة هبعتلك واحدة من اخواتك
- يا ماما ما تتعبيهومش
- يا حبيبتي انتو اخوات وليكو حق على بعض. النهاردة يتعبوا
عشانك بكرة تتعبي عشانهم.اومال اخوات ازاي
- ربنا يخليكي ويخليهم يارب يا ماما
- بس على شرط تخلي اختك تمشي قبل جوزك مايجي عشان مايصحش وجودها
في وجود جوزك
- حاضر يا ماما ان شاء الله
- قولي لحماتك بقى ان اختك جاية وهديها بكلمتين
- انا اللي اهديها برضو يا ماما. عموما حاضر
˜—–™
- يا سارة
- يا هاجر
- نعم يا ماما
- نعم يا ماما
- مين فيكو فاضية
- خير يا جميل في ايه؟عموما انا مش فاضية لكن هاجر فاضية
- يعني وراكي ايه يا ست سارة الا القعدة ع النت
- الله يا ماما هي القعدة ع النت دي شوية. لكن هو في ايه
- عايزة واحدة فيكو تروح لمروة تعمل شغل البيت بدالها
- خلاص يا ماما انا هروح، خلي سارة
- ربنا يخليكي يا هاجر ويرزقك بالزوج الصالح اللي يسعد قلبك
آمين
- ايه ده يا ماما. انتِ بتدعي لهاجر وانا لأ
- ويرزقك انتِ كمان يا ست سارة. بس هاجر مطيعة وعمرها ما قالتلي
لأ
˜—–™
انتهت
الحلقة الثالثة، سأتبعها بالرابعة حالاً، انتظروني
لا
إله إلا الله ولا حول ولا قوة إلا بالله
كاميليا محمد
ردحذفلا إله إلا أنت سبحانك إني كنت من الظالمين
الحلقة رائعة سلمت يداك 🌹❤️
هههههه
ردحذففظيعة والله حضرتك في الكوميدي با أستاذة هوبا
والشخصيات كلها جميلة وعفوية جداً خصوصاً خالتنا الحشرية أم اسماعين هههههه 😂مصرية أصيلة يعني
حلقة جميلة ورائعة
💓دُمتِ مُبدعة 💓