رواية أم فتحي( الخامسة)
- ترررررررررررررررررررن ترررررررررررررررررررررن
- الو ازيك يا بهية
- مين معايا
- مين معاكي دا ايه !انا ام فتحي
- ام فتحي مين ؟
- اخص عليكي يا بهية. ام فتحي بنت عمك
- انا ماليش اعمام اصلا وما اسميش بهية
- اخص عليكي يا بهية. كدة برضو تقولي ان انتِ مش بهية يا بهية
- يا ستي انا مش بهية
- هو انا تايهة عن صوتك ولا انتِ هتعرفي انك بهية اكتر مني !
- لا اله الا الله ,النمرة غلط يا مدام
- لالالا يبقى انتِ لسة زعلانة مني بقى عشان ما رضيتش ادخلك
معايا الجمعية ام خمسوميت جنيه. والله يختي ماكان في مكان فاضي. كان العشرين
نفر كلهم محجوزين
- يا ستي بهية ايه وجمعية ايه انا ما اعرفش حاجة من الكلام ده
خالص
- ايه ده. يعني انتِ مش بهية يا بهية ؟
- قلت لحضرتك النمرة غلط
- طب احلفي يا بهية ان انتِ مش بهية
- والله العظيم انا مش بهية
- ولما انتِ مش بهية بتخليني ارغي معاكي واخلص عليكي الرصيد ليه!.
عالم ماعندهاش دم صحيح
˜—–™
- تررررررررررررررررررررن ترررررررررررررررررررررررررن
- الو ازيك يا ماما
- ازيك يا دينا يا حبيبتي
- انا كويسة يا ماما الحمدلله. عندي ليكي خبر حلو
- خير يا حبيبتي
- انا حامل
- والله! ماشاء الله الف مبروك يا حبيبتي فرحتي قلبي
- الله يبارك فيكي يا ماما. لسة عاملة التحليل وجايبة النتيجة
حالا
- الحمدلله يا حبيبتي ربنا يتمملك بخير
- انا جاية بكرة انا والولاد نتغدا معاكو
- اهلا وسهلا يا حبيبتي تنوروني
- وهالة كمان جاية. انا اتفقت معاها نتقابل عندك عشان بقالنا
كتير ما اتقابلناش
- اهلا وسهلا بيكو وبولادكو دي مروة هتطير من الفرحة لما تعرف
انكو جاين وخصوصا هالة. اصل هي ومروة يعزوا بعض قوي...بقولك ايه. ماعندكيش رقم
بهية ؟
- بهية مين ؟
- يادي الغولب. بهية بنت عمي
- لا يا ماما وانا هعرف رقمها منين !
- خلاص هبعتلها فتحي يروحلها ويسأل عليها ويجيبلي رقمها. شكلها
غيرت الرقم
- انتِ عايزاها ليه يا ماما ؟
- يا بنتي دي صلة رحم, ولا هنقطع ارحامنا كمان !
- الله يزيدك حرص ع الدين يا ماما
- اللهم آمين يابنتي. مستنياكو بكرة تيجو من الصبح بدري عشان
ناخد النهار من اوله
- حاضر ياماما. بس تعملولي البط اللي بحبه والمكرونة البشاميل
اللي بموت فيها واعملوا للولاد تشيكن رولز زي كل مرة
- من عنيا يا حبيبتي. هقوم مروة من الفجر تقف في المطبخ تعمل
طلباتك. هو انا عندي اغلى منك !
- ربنا يخليكي ياماما يا حبيبتي, وماتنسيش تقولي لمروة تعمل صينية
جلاش باللحمة المفرومة وفراخ محمرة عشان جوزي هيجي بالليل يتعشى وطالب
الاكل ده ع العشا
- يختي يوم المنى يجي يتعشى ويتهنى يارب. ربنا مايحرمني من
دخلتكو عليا
˜—–™
- مروة..انتِ يا مروة..هي مابتردش ليه. يا
مروووووووووووووووووووووووووووووووووووووووووووووووووة
- نعم نعم يا ماما
- مابترديش على طول ليه!
- كنت برتب الدولاب وكانت ايدي مشغولة
- انا لما انادي عليكي تسيبي كل اللي في ايدك وتردي
- حاضر. نعم حضرتك بتنادي علية ليه؟
- هالة ودينا واجوازهم وعيالهم جايين بكرة ينورونا. انا كتبتلك
طلبات دينا وجوزها وولادها على الاكل في ورقة عشان ما انساش ولا حاجة
- يا ماما طلبات ايه واكل ايه. حضرتك عارفة اني مابقدرش اقف
كتير عشان الحمل ويادوب بعمل اكل سريع مش محتاج مجهود
- يادي الحمل اللي ذلانا بيه. هو مافيش حد حمل غيرك قبل كدة!.
انا خلفت خمسة ماعملتش عمايلك السودة دي
- يا ماما لو سمحتي انا مش هقدر اخدم الاعداد دي كلها. اللي
جايين عددهم كبير
- الله اكبر في عينك. انتِ هتحسدي ولادي ولا ايه.!
- هحسدهم على ايه يعني!.
انا بقول لحضرتك انا ما اقدرش اخدمهم. يعني ممكن هما لما يجوا يطبخوا او نبعت نجيب
اكل جاهز
- يا سلام على الهانم اللي هتمشي البيت على مزاجها وهترتب وتنظم
على كيف كيفها. بقولك ايه هي كلمة واحدة, تصحي مع ادان الفجر تطبخي كل الاصناف
اللي بناتي حبايبي عايزينها
- يعني يا ناس مش حرام الحامل التعبانة هي اللي تخدم وتطبخ
وماحدش يساعدها حتى!
- هو انتِ بس اللي حامل!. دينا كمان حامل وتعبانة ونفسها في
البط والمكرونة البشاميل
- اوووووووووووووف استغفر الله العظيم
- انتِ بتقولي اوف وتسيبيني وتمشي. طب والله لما يجي جوزك
لاقوله على البهدلة اللي مبهدلاها لامه.اما اشوف هيجيبلي حقي ولا لأ
˜—–™
- فتحي لو سمحت تفهم مامتك اني تعبانة ولا هي مش واخدة بالها ان
اهلي بيجوا يخدموني عشان خايفين عليا!. يعني ماما تبعت اختي تخدمني عشان مااتعبش
ومامتك تجيبلي اخواتك عشان اخدمهم ويتهد حيلي في خدمتهم!
- يا حبيبتي اهدي الامور ماتجيش كدة
- اومال تيجي ازاي يا فتحي!
- انا هتصل بيهم وابلغهم انهم يقفوا معاكي ويساعدوكي
- يبقى بتحلم يا استاذ. اخواتك لما بيجوا ما بيتحركوش من مكانهم
وبيعاملوني زي الخدامة ليهم ولولادهم
- لا ما تخافيش انا هتصرف
˜—–™
- ترررررررررررررررررررررررررررررن
تررررررررررررررررررررررررررررن تررررررررررررررررررررررررررررررررن
- مين
- افتحي يا مروة انا دينا ومعايا هالة والولاد
- اوووووووووووووووووووووووف حد يجي الساعة تمانية الصبح برضو!.
ايه البني ادمين دي!
- هيييييييييييييييييييييييييييييييييييييه
هييييييييييييييييييييييييييييييييييييييييييييييييييه
هييييييييييييييييييييييييييييييييييييييه هييييييييييييييييييييييييييييييييه
هييييييييييييييييييييييييييييييييييييييييييييييييييييييييييييييييييييييييييييييييييييييييييييييييه
- اهلا وسهلا يا اهلا يا اهلا
- اهلا بيكي يا مروة عاملة ايه
- ازيك يا مرات فتحي
- تعبانة. تعبانة قوي الحمدلله
- سلامتك من التعب يا روحي. بسرعة بالله عليكي الفطار عشان
نزلنا من البيت من غير فطار والولاد هيموتوا من الجوع
- المطبخ قدامك اهو يا دينا حضري الفطار اللي انتِ عايزاه
- نعم نعم يا ست مروة. هي مين دي اللي تحضر. انتِ جرالك حاجة في
دماغك ولا ايه
- باين عليها الحمل اثر على مخها يا دينا يا اختي
- بقولك ايه بقى انتِ وهي انا حامل وتعبانة واذا كنتوا انتوا مش
خايفين عليا انا بقى خايفة على نفسي وعلى اللي في بطني
- بقى كدة. طب والله لنقول لماما تيجي تشوف صرفة في المعاملة
البايخة بتاعتك دي
˜—–™
- ماما انتِ فين يا ماما
- اهلا اهلا يا حبايب ماما ازيكو يا بنات. على مهلك يا دينا
بالراحة على نفسك يابنتي انتِ حامل
- شوفتي الهانم مرات ابنك اللي كان ناقص تطردنا من ع الباب
- مالها ان شاء الله عملت ايه
- ال ليه وليه يا ماما بقولها حضريلنا فطار. تقوم تقول ماليش
دعوة حضروا انتوا انا حامل وتعبانة
- هي قالت كدة!. طب والله لهتعمل الطاق تلاتة النهاردة وان
شالله تسقط حتى. انا ماحدش يعاندني ويمشي كلامه عليا
- لا وايه كمان يا ماما سي فتحي متصل يقول ساعدوها في عمايل
الغدا عشان مابتقدرش تقف
- ولا تعبروها. سيبوها تعمل كل حاجة وماحدش يساعدها وتخبط راسها
في الحيط. عشنا وشوفنا. واحدة ماتساويش هتتحكم فينا. اقعدي يا دينا يا حبيبتي
الوقفة مش حلوة عشانك يا حبيبة ماما.
- اه والله يا ماما ضهري واجعني قوي
- ارتاحي ارتاحي يا روح قلبي. ماقولتليش انتِ في الكام
- في التاني يا ماما
- ربنا يتمملك بخير يا حبيبة ماما. انتِ يا مروة
الفطار ماجاش ليه. يا
مرووووووووووووووووووووووووووووووووووووووووووووووووووووووووة
- أوف,لا بقى,أنا هتصل بفتحي يجي يشوفله حل مع امه واخواته
˜—–™
- ترررررررررررررررررررررررن تررررررررررررررررررررررررررن
- الو ايوة يا مروة
- فتحي تعالى شوفلك صرفة في مامتك واخواتك تعالى بسرعة ارجوك
- يا مروة اجي فين!. انا عندي شغل كتير ما ينفعش اسيبه واجي
- يا فتحي اهلك مبهديلني اخر بهدلة. انا مش قادرة استحمل ارجوك
تعالى بأي شكل
- مروة بلاش دلع بقى. وبعدين هما مش عندنا كل يوم مافيهاش حاجة
لما تتعبي شوية
- كدة برضو يا فتحي!.
- مع السلامة يا مروة دلوقتي عشان مش فاضي
˜—–™
- ها يا بنات ايه رأيكو في الغدا. كل طلباتك اتنفذت يا دينا.
انا ماقدرش اشوف نفسك في حاجة وما اكلهالكيش
- ربنا يخليكي يا ماما. الاكل يجنن. بصراحة مرات فتحي نفسها حلو
في الاكل قوي
- مش قوي يعني يا دينا. المكرونة مش عجباني ولا عاجبة ولادي
- هما العيال فين ؟
- اهم بيطنططوا في كل حتة شوية. هما العيال بيقعدوا في حتة !
- دشششششششششششش دددشششششششششششششششششششششششششششش
- ايه ده. صوت حاجة اتكسرت
- انتوا يا ولاد. يا مازن يا طارق يا سما يا هدير. كسرتوا ايه
- دي فازة
- يا ماما مش احنا دول ولاد خالتو هالة
- لا مس احنا دول ولاد خالتو دينا
- مازن وهدير هاديين مش بيكسروا حاجة. اكيد ولادك يا دينا
- لأ بقى طارق وسما مؤدبين واكيد ولادك هما اللي كسروا الفازة
يا هالة
- انتو هتتخانقوا ولا ايه. يا مروة تعالي لمي الازاز اللي اتكسر
ده لحسن حد من العيال يتعور ولا حاجة
- حاضر الخدامة جاية حاضر تحت امركو
˜—–™
- مروة
- يا مروة حبيبتي
- مروة مابترديش علية ليه
- لو سمحت يا فتحي مش عايزة اتكلم
- حصل ايه بس ؟
- هو ايه اللي حصل ايه!. ادخل المطبخ وشوف الحوض اللي مليان
اطباق وكل ماغسل شوية الاقيهم زادوا تاني ,ادخل الصالون وشوف الورق والزبالة اللي مرمية في
الارض من ولاد اخواتك ومافيش واحدة في اخواتك تقول لولادها عيب ,شوف سيراميك الحمام اللي دخلوا عليه بجزمهم واثار
الطين اللي عليه ,ولا تحب احكيلك على الالم اللي هيموتني في ضهري
وبطني.
- يا حبيبتي حصل خير معلش المفروض نستحمل شوية
- ابوس ايدك مش عايزة اسمع منك ولا كلمة انا تعبانة وعايزة انام
ومعلش ابقى اعتذر للهانم مامتك اني مش هقدر اغسل الاطباق ولا انضف البيت عشان خلاص
ما عنديش ادنى طاقة اعمل بيها اي حاجة وشكرا ليكو جدا
- مروة حبيبتي
- تصبح على خير يا فتحي
˜—–™
- ااااااااااااااااااااااااااااااااااااااااااه
ااااااااااااااااااااااااااااااااااااااااااااااااااااااااااااااااه فتحي الحقني
ااااااااااااااااااااااااااااااااااااااااااااااه
- ايه يا مروة في ايه يا حبيبتي مالك
- الم رهيب رهيب مش قادرة اتحمله
ااااااااااااااااااااااااااااااااااااااااااااااه
- ايه ده ايه الدم ده في ايه انتِ جرالك ايه يا مروة
- ااااااااااااااااااااااااااااااااااااه اتصلي بماما انا
تعبانة حاسة روحي بتطلع هاتلي ماما هاتلي ماما ارجوك
- يا حبيبتي احنا الساعة تلاتة بعد نص الليل ماينفعش اتصل بيها.
انا هاخدك اوديكي مستشفى حالا
- اتصلي بماما اااااااااااااااااااااااااااااه اتصلي بماما
بقولك
- تررررررررررررررررررررررررررن
ترررررررررررررررررررررررررررررن
ترررررررررررررررررررررررررررررررررررررررررررررررررررررررررن
- ايه ده
- مين بيتصل في الوقت ده استر يارب في ايه تررررررررررررررررن ترررررررررررررررررررررررررررررررررن
- في ايه يا راضية
- ايه ده فتحي
- الو في ايه يا فتحي مروة مالها
- مافيش حاجة يا طنط كويسة
- كويسة ازاي اومال متصل بيا ليه دلوقتي. بنتي مالها فيها ايه
- هي تعبانة شوية بس وقالتلي اتصل بيكي
- اقفل انا جاية حالا
- في ايه يا راضية مروة مالها
- بنتي تعبانة. زي مايكون قلبي حاسس. عمالة اتقلب في السرير ومش
جايلي نوم وقلبي متوغوش عليها. انا هلبس واروحلها حالا
- استني هلبس واجي معاكي
- في ايه يا ماما
- اختك مروة تعبانة
- مروة! مالها يا ماما بعد الشر
- مش عارفة مش عارفة يا سارة سيبيني دلوقتي خليني البس ربنا
يستر
- انا هاجي معاكو يا بابا
- خليكي انتِ يا سارة مافيش داعي لوجودك
- ازاي بقى يا بابا. دي اختي. مش هقدر استنى لازم اجي انا داخلة
البس
˜—–™
- ترررررررررررررررررررررررررررررررن تررررررررررررررررررررررررررررررن بببببببببببببببببببببب
دببببببببببببببببببببببببببببببب تن تن افتحوا افتحوووووووووووووووا
- اتفضلوا
- بنتي فين ؟
- اتفضلي في اوضتها يا
طنط
˜—–™
- مروة حبيبتي. مالك يا بنتي فيكي ايه
- تعبانة تعبانة يا ماما حاسة بألم رهيب وفي دم كمان. انا مش
قادرة
- ايه اللي حصل يا مروة. انتِ شيلتي حاجة تقيلة يا حبيبتي ؟
- يا ماما حماتي عزمت ولادها كلهم وخلوني طبخت ونضفت البيت كله
وعمالة اخدم فيهم وفي ولادهم وطول النهار واقفة على رجلي وماحدش حتى ساعدني ولا حد
حس بيا وبألامي
- فتحي
- نعم يا عمي
- هي دي الأمانة اللي سلمنهالك ووعدتنا تحافظ عليها ؟
- والله يا عمي انا ماطلبت منها ترهق نفسها بالشكل ده.
- يعني في الآخر بنتي هي الغلطانة !
- مالوش لزمة الكلام يا ام مروة, احنا هناخدها بالعربية نوديها
مستشفى
˜—–™
- هو في ايه مين اللي جه يا فتحي
- دول اهل مروة
- اخص عليهم ناس ماعندهومش دم. ازاي يجوا في وقت زي ده
- جايين عشان مروة تعبانة
- تعبانة من ايه
- من كتر الارهاق بتاع امبارح
- هو حد ارهقها ولا جه ناحيتها ولا هي بتتلكك !....ازيك يا ام مروة
- اهلا. يلا يا سارة ساعدي اختك تلبس عشان نمشي
- حاضر يا ماما حاضر. بس بجد بقى يا للي اسمك فتحي. انت مش راجل
وماتستحقش يكون ليك زوجة زي مروة
- سارة. عيب كدة مايصحش
- هو ايه اللي مايصحش يابابا. هو ده لو راجل يسيب مراته تتبهدل
وتتهان وتشتغل خدامة لأهله وهو واقف يتفرج عليها !
- بصي يا سارة والله لولا انك بنت ومايصحش اقل ادبي عليكي لكنت
علمتك الادب دلوقتي
- الادب ده تروح تعلمه لمامتك واخواتك
- سارة وبعدين قولتلك مايصحش دا مهما كان جوز اختك
- ويعني يرضيكو اهله اللي ماعندهومش اخلاق ولا ضمير دول يعملوا
في اختي كدة. مين دول اصلا عشان يعملوا كدة !
- وانا عشان خاطر عمي وطنط مش هرد عليكي. بس ليا موقف تاني
- يلا سندي اختك خلينا ننزل من هنا نشوف جرالها ايه
- انا نازل يا امي
- رايح فين. ماهم اهلها معاها. انت ايه اللي موديك !
˜—–™
- طمنيني يا دكتورة الجنين سقط ولا ايه
- لالالا الحمدلله الجنين كويس بس هي محتاجة راحة
تاااااااااااااااااااااامة يعني ماتقومش من السرير الا في أضيق الحدود. المرة دي
ربنا ستر لكن اي حركة او مجهود يبقى خطر جدا
- الحمدلله الحمدلله. مروة انتِ هتروحي معانا يا حبيبتي
- ياريت يا ماما
˜—–™
- مروة حبيبتي سلامتك الف سلامة
- مروة
- كدة برضو مش عايزة تردي على فتحي حبيبك
- ارجوك يا فتحي ارجوك سيبني في حالي
- انتِ فعلا هتروحي مع اهلك
- لو ماعندكش مانع ولا ناوي تضحي بيا وبأبنك وتسيبني فريسة
لمامتك !
- طيب يا حبيبتي على راحتك. ارجوكي سامحيني. انا ماكنتش اعرف
انك تعبانة بالشكل ده وان المجهود خطر عليكي
- واديك عرفت. بس بعد بهدلتي والجري ع المستشفيات
˜—–™
- ترررررررررررررررررررررررررن ترررررررررررررررررررررررن
- مين
- يعني هيكون مين يا امي انا فتحي
- اهلا يا حبيبي. اومال مراتك فين
- يا امي مراتي كانت هتموت بسبب عمايلكو. والله العظيم حرام.
انتِ شوفتي منها ايه وحش عشان تكرهيها بالشكل ده بس
- ايوة ايوة يبقى مراتك واهلها قلبوك على امك الغلبانة.
وتلاقيها عاملة التمثيلية دي كلها عشان توقع بيني وبينك يا حبيبي
- كفاية يا امي كفاية. كفاية انا اعصابي مش متحملة
- يابني ماتعملش في نفسك كدة. مافيش ست تستاهل تزعل عشانها،
تروح واحدة يجي الف بدالها ولا تزعل نفسك.
- يا امي انا بحب مراتي ومش هضحي بيها مهما كان
- البت دي اكيد سحرالك. انت مش طبيعي ابدا
˜—–™
- ارتاحي يا مروة ارتاحي يا حبيبتي
- ربنا يخليكي ليا يا ماما
- لو عوزتي اي حاجة نادي علية انا مش هنام. اوعي تقومي من
السرير
- حاضر يا ماما. بجد نفسي انام
˜—–™
- ماما
- نعم يا سارة
- انا زعلانة منك
- زعلانة مني! ليه يا حبيبتي ؟
- انتِ السبب في كل اللي بيجرا لمروة ده
- انا يا سارة! انا السبب في ايه يابنتي
- كام مرة مروة جاتلك واشتكيتلك من معاملة حماتها واخوات جوزها.
وانتِ كل مرة تقوليلها اصبري واستحملي بدل ماتقوليها خدي موقف ووقفيهم
عند حدهم. هو احنا رخاص قوي عندك كدة يا ماما ؟
- لا حول ولا قوة الا بالله. يابنتي انا عايزاها تحافظ على
بيتها
- وهو فين بيتها ده اصلا!. انا اللي شايفاه انها خدامة ببلاش
لناس اغراب مش عارفين قيمتها. وزوجة لبني ادم ما يستاهلش ضفر رجلها
- يابنتي الام كل مناها تشوف ولادها سعدا, وفي مشاكل ممكن
تتداوى وتعدي بدل ماتكبر. ولا انتِ كنتِ عايزاني اقولها اطلبي الطلاق!
- وفيها ايه يعني لما تطلب الطلاق اذا كان الجواز في اهانة
لكرامتها!
- يا حبيبتي الطلاق مش حاجة ساهلة. دا كسر للست
- ياسلام! والحياة مع زوج مش قادر يحمي زوجته مش كسر للست؟ ماما
انتِ المسؤولة عن كل اللي مروة وصلتله بسبب نصايحك السلبية
- كدة يا سارة ؟ يعني خوفي عليكو وحبي ليكو في الأخر بقى ولا
حاجة؟ انا أم سلبية؟ ربنا يسامحك يابنتي
- اللي حصل ده خلاني فوقت لنفسي يا ماما. انا مش ممكن افكر
اتجوز الا من انسان قوي يقدر يحميني مش يخليني جارية لأهله
- وكمان لازم اشتغل عشان ماحدش يذلني ولا يكسرني. مش هعمل زي
مروة واضحي بشغلي ووظيفتي عشان راجل,
وياريته في الآخر كان يستاهل
- انتِ فاهمة الحياة غلط
- وانا سعيدة اني فهماها غلط اذا كان الصح في نظرك هو الحالة
اللي مروة وصلتلها
˜—–™
- تررررررررررررررررررررن تررررررررررررررررررررررررررن
- الو ايوة يا غادة يا حبيبتي
- ازيك يا ماما وحشتيني
- انتِ وحشاني اكتر يا حبيبتي
- ازي فتحي ومروة
- مروة في عينها. بهدلتنا وفرجت علينا الدنيا واختها قليلة
الادب شتمت اخوكي. كنت عايزة ارد عليها بس بعيد عنك كانت عاملة زي الغولا. خوفت منها
بصراحة
- في ايه يا ماما ايه اللي حصل لده كله
- ال يختي عملت نفسها تعبانة وبتسقط واتصلت بأهلها واشتكتلهم
مني. من امك الغبانة يا غادة اللي لابتهش ولا بتنش يابنتي
- لا حول ولا قوة الا بالله. طيب هي مروة كويسة!
- شوفوا يا اخواتي البت اقولها امك اتبهدلت واخوكي اتشتم تقولي
هي مروة كويسة
- يا ماما انا بصراحة عمري ما بحكم من طرف واحد. هي مروة نايمة
ولا صاحية
- وانا ايش عرفني.
- هي مش عندك؟
- راحت عند امها ال تعبانة يعني. كيد نسا. نروح فين من كيد
النسا!
- طيب أنا هتصل بفتحي أشوف ايه الحكاية
˜—–™
- تررررررررررررررررررررن ترررررررررررررررررررررن
- الو ايوة يا غادة
- في ايه يا فتحي مروة مالها ؟
- تعبانة والله وكان الجنين هيروح مننا بسبب امك واخواتك.
ارهقوها وتعبوها وماحدش هان عليه يساعدها وهما عارفين انها حامل وتعبانة
- لا حول ولا قوة الا بالله. انا مش عارفة يعني هالة ودينا دول
جنسهم ايه. استغفر الله العظيم يارب. فيها ايه يعني لما يقوموا يساعدوها ويحسوا
بيها وبتعبها !
- الحمدلله على كل حال
- طيب يا فتحي اقفل دلوقتي مع السلامة
˜—–™
- ترررررررررررررررررررررررررن
تررررررررررررررررررررررررررررررررررن
- مين
- انا غادة يا طنط
- ياااااااااااااااااااه ايه النور ده ازيك يا غادة يا حبيبتي
ايه المفاجأة الحلوة دي
- ربنا يخليكي يا طنط. انا سمعت ان مروة تعبانة جيت اطمن عليها
- يا حبيبتي يابنتي! ربنا يكرمك يارب. يسلملي قلبك الطيب يا
حبيبتي
- الله يخليكي يا طنط. على ايه يعني. مروة دي ربنا يعلم غلاوتها
في قلبي والله. انا بحبها وارتاحلها اكتر من اخواتي
- ربنا يديم المعروف يارب ويهدي النفوس يابنتي
- اللهم آمين يا طنط. ممكن اشوف مروة
- اتفضلي يا حبيبتي
˜—–™
- السلام عليكم. ازيك يا مرمورة عاملة ايه الف سلامة عليكي
- غاااااااااااااااااااااااااااااااااااادة يا حبيبتي وحشتيني قوي
- والله انتِ اكتر. ها طمنيني عليكي عاملة ايه وازي ابن اخويا
الشقي اللي جرجر عمته لحد هنا عشان تطمن عليه وعلى مامته هههههههههههه
- هههههههههه الحمدلله ربنا ستر كان هيروح فيها هو ومامته
- بعد الشر عليكي يا حبيبتي ربنا يتمم حملك على خير
- يارب يا غادة ادعيلي
- ماتزعليش يا مروة من اللي عملوه اخواتي, والله يا حبيبتي انا
مايرضيني اللي عملوه. سامحينا يا حبيبتي
- وانتِ ذنبك ايه بس يا غادة عشان اسامحك
- اعمل ايه هما اخواتي
وعمايلهم بتتنسبلي
- لا والله انا عمري ماجمعتك معاهم في اي حاجة. انتِ والله
وحنيتك ومعاملتك الحلوة بتخليني استحمل كتير
- ربنا مايحرمنيش منك يا مروة. خليكي عند ماما لحد ما ترتاحي.
ولما ترجعي يا حبيبتي برضو اوعي تعملي غير اللي في استطاعتك. ماتتعبيش عشان حد.
عشان في الآخر نادر لما تلاقي ناس تقدر تعبك
- الله المستعان يا غادة. بس سيبك انتِ انا هموت من الفرحة اني
شوفتك النهاردة
- ايه ده يا مروة هو انتو مش هتقدمولي حاجة اشربها عشان زعلانين
من ماما واخواتي ولا ايه ههههههههههه
- ههههههههههه لا والله ازاي تلاقي ماما بس سايبانا نتكلم
براحتنا
- اتفضلي يا غادة يا حبيبتي عملتلك عصير فراولة عشان عرفت انك
بتحبيه
- تسلميلي يا طنط ربنا يخليكي
˜—–™
- فتحي
- نعم يا امي
- هي الهانم مراتك مش هتحن علينا وتيجي بقى. دي بقالها شهر
يابني عند امها
- هروح اجيبها بكرة ان شاء الله بس يا امي لو سمحتي ما تكلفيهاش
فوق طاقتها
- اخص عليك يا فتحي. هو انا يابني عمري طلبت منها حاجة فوق
طاقتها
- ربنا يصلح الحال. وياريت بقى هالة ودينا يفارقونا الكام شهر
دول ولما تحبي تشوفيهم ابقي روحيلهم
- هي دي الطلبات الجديدة بتاعة الست؟
- امي بالله عليكي اذا كنتي هترجعي لنفس المعاملة انا هاخد
مراتي وأأجر شقة ونقعد فيها ونبعد عن المشاكل
- اخص عليك يا فتحي اهئ اهئ اهئ انا بتاعة مشاكل يابني !
- طيب معلش يا امي ما تزعليش حقك عليا. احنا اللي بتوع مشاكل
- ربنا يهديكو يابني وتبطلوا تعملوا مشاكل. فتحي
- نعم يا امي
- انا عايزة اصالح مروة بس كرامتي مش سامحالي
- بجد يا امي عايزة تصالحيها ؟
- اصلها بصراحة صعبت عليا والله وهي نازلة واختها مسنداها ووشها
اصفر وعنيها مغربة كدة
- والله يا امي مروة طيبة
- والله وانا كمان طيبة بس الشيطان بيوزني عليها مش عارفة ليه
- يا امي استعيذي بالله من الشيطان وعامليها بما يرضي الله
- خلاص يا فتحي انا هفتح صفحة جديدة وهسامح مروة على كل اللي
عملته فيا
- ربنا يخليكي يا امي
- وفرصة حلوة. فرح نسمة بعد اسبوع على المعلم فرج الفرارجي عشان
تبقى تحضر انت ومروة. دول هيعملوا فرح كبير قوي قوي
˜—–™
- فرج
- نعم يا انوسة نوسمة
- جيبت بدلة الفرح
- بدلة! هو انا هلبس بدلة عدم اللامؤاخذة ؟
- اومال ناوي تفضحنا وتيجي بجلابية الشغل زي كل مرة وعليك بواقي
ريش وريحتك انتن من ريحة الفراخ !
- وليه بس الدخلة الشمال دي يا مودام المستقبل. ليه بس كدة يا
نسانيسوا
- ايه نسانيسوا دي. شايفني نسناسة قدامك. ايه الجليطة دي
- اومال عدم اللامؤاخذة بيدلعوكي بأيه ؟
- ممكن نسومة أو ناسو
- ههههههههههه ناسوا! هههههههههههه ناسوا وأهله. دا نسانيسوا
أرحم
- بصراحة انا قرفانة منك ومن شغلتك ومن طريقة كلامك ومن كل حاجة,
انت لازم تتغير
- طب ماانا مغير الجلابية ومستحمي قبل مااجي وحاطط
في شعري فوزلين. اعمل ايه تاني عشان ترضى عني يا جميل?
- انا ناوية ادلعك واقولك يا فروج
- ههههههههههه على فكرة حبايبنا بتوع لبنان بيقولوا ع الفرخة
فروج. يعني ماروحتيش بعيد يا انوسة نوسمة. شوبيك لوبيك فروج بتاع الفراريج بين
ايديك يا جميل
- يييييييييييييييييييييييييييييييييييي ارحمني يارب
- فين الشاي يا حوماتي
- الشاي أهو يا معلم فرج
- تسلم الأيادي يا حوماتي يا وش السعد انتِ
- ايه ده ايه ده. انت يابني ادم ايه اللي بتعمله ده !
- عملت ايه يا انوسة نوسمة ؟
- حد يشرب الشاي بالطريقة دي!. اشرب من غير صوت
- انا مابعرفش استمخ من كوباية الشاي الا لما اشربها بصوت وإلا
دماغي ما تتظبطش
- يا اخي ان شالله ما اتظبطط دماغك. صدعتني بالدوشة اللي انت
عاملها دي. انت بتشرب ولا بتزمر !
- وبعدين بقى في قلة المزاج دي. ماتحضرينا يا حوماتي
- ماتسيبي الراجل يشرب براحته يا نسمة.
- يسلم فومك يا حوماتي
- ماقولتليش يا فرج
- يا عيون فرج
- البوفيه هيبقى مفتوح ولا نظامه ايه
- بوفيه ايه عدم اللامؤاخذة ؟
- البوفيه بتاع الفرح. هنأكل الناس ايه ؟
- الله. واحنا نأكلهم ليه!. هما جايين يباركلونا ولا جايين
ياكلوا !
- لازم ياكلوا ماينفعش.
- المحل وصاحب المحل تحت امرك. نجيب كام قفص فراخ واخلي الواد
مرزوق يفرقهم ع المعازيم
- يا اخي حرام عليك. هنفرق فراخ صاحية!. انت عايز تفضحنا ؟
- خلاص ندبحها ونريشها ويبقوا ينضفوها هما بقى بمعرفتهم
˜—–™
- مروة
- نعم يا ماما
- فتحي جه برا عشان ياخدك
- انا لبست وجاهزة يا ماما أهو
- يا سلام ومالك مسعجلة كدة ههههههههه
- جوزي وحشني يا ست ماما ههههههههههه
- ربنا يصلحلكو حالكو يارب وبيعد عنكو الشر آمين
- ايه ده يا مروة انتِ هتروحي مع فتحي. هو انتِ ما بتوبيش!
- جوزي يا سارة جوزي وحبيبي وبحب التراب اللي بيمشي عليه
- مايستاهلش
- سارة انا لحد دلوقتي ما عاتبتكيش على اهانتك لجوزي
- ياربي. كمان هاتعتبيني!. هو انا اهانته ليه يعني!. مش عشان
خاطر سواد عيونك!. انا غلطانة اني اتدخلت
- اختك عندها حق يا سارة انتِ غلطتِ. دا مهما كان راجل وليه
كرامته وماينفعش يتهان ويطعن في رجولته بالشكل ده
- خلاص يا ماما خلاص الموضوع انتهى مش كل شوية تقعدوا تدوني
كلمتين
˜—–™
- فتحي
- نعم يا عمي
- عايزك في كلمتين اتفضل معايا
- تحت امرك يا عمي
- بص يابني انا وافقت ان مروة ترجع تاني عشان متأكد انك ندمت
وهتصلح حاجات كتيرة واوضاع غلط في حياتكو
- طبعا يا عمي
- يا فتحي انا اللي مخليني التمسلك الاعذار هو اني كنت زيك في
يوم من الأيام وكان عندي مشاكل بين زوجتي وامي لكن بالحكمة والعقل قدرت اراضي
واكسب كل الأطراف,وبالعكس قدرت اخلق بينهم روح المحبة كمان. عرفت زوجتي ان امي اهم
من الدنيا وفي نفس الوقت غمرت زوجتي بحناني واهتمامي وماخليتش حد يدوس على كرامتها,ولما
اخواتي البنات كانوا يحاولوا مضايقتها كنت بوقفهم عند حدهم واعرفهم ان كرامة زوجتي
من كرامتي واللي يهينها كأنه أهاني
- فهمت حضرتك يا عمي واوعدك اني هنفذ نصايحك
- انا متأكد يا فتحي يا إبني. انا واثق فيك
˜—–™
- تررررررررررررررررررررررررررررررررن
ترررررررررررررررررررررررررررررن
- مين
- انا فتحي يا امي ومعايا مروة
- اهلا اهلا اهلا ازيك يا مروة والله ليكي وحشة والبيت مالوش
طعم من غيرك. اتاريكي ليكي غلاوة في قلبي وانا ما اعرفش
- ايه ده. انا بحلم!!!!!!!! الكلام الحلو ده بتقوليه ليا؟
- ايوة يا حبيبتي تحبي اقرصك ولا اخبطك بحاجة على دماغك عشان
تعرفي انك مابتحلميش؟
- لالالا ما فيش داعي ربنا يخليكي ليا يا ماما
- ايه اللقاء الجاف ده يا مرات ابني!. هو انتِ مش هتبوسيني
وتترمي في حضني وتعيطي وتقوليلي وحشتيني يا ماما!
- يا سلام عشرين الف بوسة يا ماما
اموووووووووووووووووووووووووووووووه اموووووووووووووووووووووووووووووووه ربنا
مايحرمنيش منك
- ولا منك يا حبيبتي
- الله. دا باين انا اللي بحلم يا امي وعايز حد يخبطني على
دماغي ههههههههههه
- ادخلوا يا ولاد غيروا هدومكو على ما احط الغدا ع السفرة
- ايه ده يا ماما هو حضرتك طبختي؟
- اومال يا حبيبتي. قلت اطبخ بدالك النهاردة عشان انتِ لسة
جاية. بس ماتاخديش على كدة. عشان رجلي وجعاني والله و مش بقدر على وقفة المطبخ
- تسلميلي يا ماما ربنا مايحرمني منك ابدا يا ست الكل
- يا سلام يا امي كان فين الكلام الحلو والمعاملة الطيبة دي من
زمان
- معلش يابني كله بأوانه. انا داخلة احط الاكل ع السفرة على ما
تغيروا هدومكو
˜—–™
- الله. تسلم ايدك يا ماما الأكل يجنن
- شوفتي ملوخيتي يا مروة?.
- جميلة قوي يا ماما والله
- بس ما قدرتش اشهق وانا بعملها حقك علية. خوفت اشهق لروحي
تطلع. وانا لسة صغيرة ومقبلة ع الحياة
- بعد الشر عليكي يا ماما ربنا يخليكي لينا
- تسلم ايدك يا امي هي دي الفراخ ولا بلاش. اتعلمي يا مروة
هههههههه
- بجد يا ماما لازم تقوليلي ايه الخلطة الحلوة اللي انتِ
عاملاها للفراخ عشان تبقى بالطعامة دي؟
- تدفعي كام وانا اقولك
- هههههههههههههه اللي انتِ عايزاه يا قمر
˜—–™
- مروة
- نعم يا ماما
- ممكن اجيب ام اسماعيل صاحبتي ونقعد في الصالون شوية؟. وما
تخافيش مش هنرمي ورق ولا هنعمل شقاوة هنقعد مؤدبين
- هههههههههه يا ماما معقول يعني بستأذنيني!. ده بيتك وعلى
راحتك
- ربنا يخليكي يا مروة.انا حطيت المية في البراد لما تغلي
صبيلنا الشاي وهاتيهولنا اذا سمحتي
- من عيوني يا ماما
˜—–™
- ترررررررررررررررررررررررررررن
ترررررررررررررررررررررررررررررررررن
- فتحي الباب بيخبط.
- مين
- انا نسمة يا فتحي
- نسمة!!!!!!!!!
- اهلا يا نسمة اتفضلي
- ازيك يا فتحي
- الحمدلله بخير اتفضلي في الصالون هناديلك امي
- هي مروة مش هنا ولا ايه
- موجودة هتيجي تسلم عليكي
˜—–™
- اهلا اهلا نسمة بنت اختي ازيك يا حبيبتي
- ازيك يا خالتوا مديحة. انا جيت افرجك على الشبكة اللي جابهالي
فروجي
- فروجك! فروجك مشوي ولا محمر. فرجيني يختي. ازي عريسك وطيوره
- كويسين يا خالتوا..هي فين مروة؟
˜—–™
- مروة
- نعم يا فتحي
- نسمة برا وعايزة تسلم عليكي
- هي فرحها امتى صحيح؟
- الاسبوع الجاي ان شاء الله
˜—–™
- السلام عليكم ازيك يا نسمة
- وعليكم السلام اهلا يا مروة اهلا. ايه ده. انتِ حامل؟
- اه يا روحي, هو ماحدش قالك ولا ايه؟
- ماقولتلناش ليه يا خالتي؟ ولا احنا مش هنفرح لفتحي!
- نسيت. اصل لسة الموضوع جديد
- جديد ايه. دي بطنها قدامها وقربت تولد. انتِ في الكام؟
- في الخامس
- انتِ بتخمسي في وشي ولا ايه يا ست مروة!
- وانا هخمس في وشك ليه!. انا ما اعرفش الحركات دي
- انا جيت عشان افرجك انتِ بالذات ع الشبكة عشان تعرفي ان كل
واحد قيمته من قيمة شبكته. فروجي جابلي شبكة بخمسين الف جنيه. مش بست الاف زي ناس
ههههههههههههههههه
- آآآآه. تعالى سندني يا فتحي عشان مش قادرة. خليني اعرف ارد
على بنت خالتك
- على مهلك يا حبيبتي
- تسلملي يا حبيبي آآآآه يا ضهري ياني. في ناس مفروسة وبتبصلي
بغل يا عيني. بصي يا حبيبتي الشبكة اللي جايبهالك المعلم فرج الفرارجي بيزغلل عينك
بيها عشان يعميكي عن عيوبه. الشبكة يا روح قلبي مش كل حاجة. المهم انك تتجوزي راجل
مقتنعة بيه وبتحبيه وهو بيموت فيكي. شبكة ايه يا ام شبكة!
- بقى كدة. انتِ بتستفزيني؟
- والله انتِ اللي بتجبيه لروحك. انا قاعدة كافية خيري شري انتِ
اللي فتحت الموضوع آآآه يا ضهري الحمل تاعبني قوي يا نسومة عقبالك يا
روحي,بس انتِ ماقولتليش يا نسومة, هي مرات بتاع الفراخ بتولد ولا بتبيض
ههههههههههههههه
- يييييييييييييييييييييييييييييييييييييييييييي انتِ انسانة
مستفزة
- بس يا بنت اختي ليطقلك عرق انتِ عروسة يختي ماتعمليش في نفسك
كدة
- انا ماشية يا خالتي
-
استنينا
في العشة. قصدي في الفرح يا بنت اختي
˜—–™
-
لابسة ورايحة على فين يا نسمة؟
-
رايحة المحل عند فرج يا ماما
أشوفه جاب البدلة ولا هبب ايه بدل ما يفضحنا
-
طيب ما تتأخريش عشان الغدا جاهز
وجعانة
-
حاضر يا ست ماما
˜—–™
- فرج
- ايه الانوار دي! المحل نور يا ست الكل ازيك يا انوسة نوسمة.
تشربي ايه
- انت متخيل اني هشرب حاجة في المكان المقرف ده!. اقف بعيد
ريحتك صعبة
- مش هتشربي حاجة يعني؟.
- لأ
- على راحتك يا برنسيسة. ليك حق تتدلع يا حلو
- يا اخي بطل الاسلوب البيئة ده في الكلام. ايه القرف ده
- واد يا مرزوق
- نعم يا معلمي
- روح هاتلي الشيشة خليني اعدل نفوخي
- شيشة! انت بتشرب شيشة!
- ومالك اتخضيتي كدة زي ماكون بشرب مخدرات لا سمح الله. دي شيشة
لزوم المعلمة والمريسة
- عملت ايه في موضوع البدلة
- بصراحة مش موافق على موضوع البدلة ده
- يا سلام. ليه بقى ان شاء الله؟
- المعلمين يستنقصوني وتتقل قيمتي في السوق يا انوسة نوسمة وانتِ
مايرضكيش. انا مهما كان هبقى يور وايف ولازم تتشرفي بيا
- بقولك ايه هي كلمة واحدة هتلبس بدلة يعني هتلبس بدلة
- مابحبش المناطيل انا ولا الجوكيتات
- هتتعود عليها ولازم تلبسها
- خلاص أمري الى الله. الواحد لازم يسمع كلام مودامه
برضو
- ايوة كدة اتعدل. هتجيب البدلة منين؟
- لا ما تشليش أيها هم بخصوص هذوها الموضوع. انا ليا واحد صاحبي
ترزي بريمو هيفصلي بدلة آخر أوبهة
- هو في وقت لتفصيل البدل دلوقتي!. الوقت ضيق لازم تشتري
- لأ هفصل عند صاحبي. اصل انتِ ماتعرفيش زباينه يبقوا مين. البدلة
هتكون اخر سايحة ما تخافيش
- آخر سايحة! إسمها آخر صايحة يا بني أدم..ربنا يستر
˜—–™
- يلا يا جماعة اتأخرنا
- احنا جاهزين اهو
- اتأخرنا زمان العروسة جت من الكوافير
˜—–™
- يا عروسة
- نعم
- العريس مستنيكي برا
˜—–™
انتهت الحلقة الخامسة، تتبع بالسادسة حالاً إن شاء الله
لا إله إلا الله ولا حول ولا قوة إلا بالله
هههههه
ردحذفوالله الحلقة جميلة والواحد مش عارف يعلق على ايه ولا إيه😂😂
يا ترى هتعملي إيه يا نسمة مع المعلم فروج 😂
تسلم إيدك يا غالية
💓دُمتِ مُبدعة 💓
كاميليا محمد
ردحذفلا إله إلا أنت سبحانك إني كنت من الظالمين
الحلقة جميلة جدا ودمها خفيف قوي وخصوصا المعلم فروج ونسومة هههههه