رواية (أم فتحي) الحلقة الأولى

أم فتحـــــــي

 

 

 

 

 

 

الكتاب: أم فتحي

 

بقلم: هبة عبد العظيم نور  

الناشر: المؤلف

 

 

 

 

 

 

 

 

جميع الحقوق محفوظة للمؤلف

 

أم فتحي

 

 

 

 

 

 

 

بقلم

هبة عبدالعظيم نور

 

 

 

 

 

 

 

الناشر المؤلف

 

 

 

 

 

 

إلى رفقاء العالم البائس

دعوة إلى الإبتسام

 

                                                 هبة عبد العظيم نور

الزوج والزوجة والحماة، ثالوث الحياة الزوجية الشهير، الزوج الذي تتجاذبه أطراف زوجته وأمه ويذوق ألوان الحيرة كل يوم، من ينصف وممن يقتص، أيقتص من أمه لزوجته ويكون عاقا، أم يظلم زوجته ويتركها كالعصفورة الفريسة بين أنياب أمه  ويكون سلبيا ظالما ساقطا من عين زوجته، الزوجة ووقوعها تحت سطوة الحماة واخوة الزوج ومعاملتها كالجارية التي جُلبت من سوق النخاسة لخدمة فخامتهم  وليس مسموحا بتضجرها أو إبداء بعض التذمر، ووقوف الزوج عن بعد مدعيا الحياد في سكون آثرا السلام النفسي، الحماة وإشعال الفتن بين الزوج والزوجة وتكدير صفو الحياة، ترى من الرابح ومن الخاسر في هذه المعركة الزوجية الحامية الوطيس، ومن يقدر على إخماد البركان.

اقدم لكم الدراما الإجتماعية الكوميدية الساخرة "أم فتحي

 

هبة عبد العظيم نور

-   فتحي.. يا فتحي.. اصحى يا حبيب امك هتتأخر ع الشغل.. اصحى يا حبيبي الساعة عدت ستة

-   أيوة يا أمي خلاص صحيت يا حبيبتي. صباح الخير

-   يسعد صباحك يا عين امك. روح ياخويا اغسل وشك على ما احضرلك الفطار

-   ربنا يخليكي يا ست الحبايب

-   ويخليك يا حبيبي

 

-    على فكرة يا أمي، كنت عايز اخد رأيك في موضوع مهم

-   موضوع ايه يا حبيبي؟

-   في واحدة زميلتي معايا في الشغل وأخلاقها كويسة جدا وبنت ناس طيبين

-   مالها يعني يا ضنايا. عايزين صدقة ولا بيتهم وقع وعايزلهم بطانيتين

-   لا يا أمي. أصل بفكر اخطبها

-   تخطب مين ياواد. أنت مش عارف ان انا وخالتك متفقين نجوزك لنسمة بنتها. ولا انت ناوي تقصر رقبتي مع  اختي!

-   يا أمي نسمة مين بس اللي انا اخطبها!. أولاً أنا عمري مافكرت فيها كزوجة. بحسها تافهة وسطحية

-   اخص عليك الف اخص يا فتحي. دي بنت خالتك لحمك ودمك. ايه الكلام الوحش اللي بتقوله عليها ده. ال سطحية ال.. طب دي عمرها ما طلعت السطوح ولا عتبته وتتكسف من خيالها

-   ربنا يبعتلها ابن الحلال يا أمي. لكن انا مقتنع بمروة

-   بلا مروة بلا فروة ، أنا هنا اللي كلامي يمشي ومافيش جواز الا من نسمة بنت خالتك

-   على العموم يا أمي لما ارجع من الشغل نتفاهم

-   مستنياك ع الغدا اوعى تتأخر عشان خالتك وبنتها جايين يتغدوا معانا

-   كدة! طب اتغدي انتِ وهما بقى. أنا هتغدا مع اصحابي

-   ولا. واد يا فتحي. استنى ياواد... شباب طايشة مش عارفة مصلحتها

 

-    فتحي

-   نعم يا أمي

-   مالك يا حبيبي؟

-   مافيش

-   يوه !، مافيش ازاي يا ابني، هو انا تايهة عنك! ايه اللي مكدرك كدة يا حبيبي

-   قولتلك مافيش يا أمي

-   طب قوم اتعشى

-   ماليش نفس

-   طب خلاص، اتصل باحمد صاحبك واخرجوا اتفسحوا ورفهوا عن نفسكو شوية

-   ماليش نفس

-   لا حول ولا قوة إلا بالله، يا حبيبي طب فهمني يا نن عين امك، مالك

-   يا أمي انتِ واقفة في طريق سعادتي ومش عايزاني اخطب البنت اللي اختارتها

-   اه. بقى عشان كدة داخل مكشر وخارج مكشر... وهان عليك يا فتحي تقول إني واقفة في طريق سعادتك؟دي اخرتها يا ابني؟

-   يا أمي دي الحقيقة.أنا تعبت وأعصابي تعبت ومش عايز اخسر رضاكي

-   خلاص يا ابني، وانا ما يرضنيش انك تعمل كدة في نفسك ولا تشيل الهم، أنا موافقة على موضوع زميلتك، عشان تعرف أنا بحبك قد ايه وهخسر اختي عشانك

-   يا حبيبتي يا أمي، إيدك أبوسها فرحتي قلبي، عن إذنك هتصل بأبو مروة عشان احدد معاد نروح نزورهم

-   على بركة الله يا حبيبي

––––

-   يلا يا أمي انا لبست

-   استنى يا ضنايا لسة ماخلصتش 

-   طب يلا يا أمي هنتأخر ع الناس 

-   اديني خلصت اهو، انا عارفة ياخويا انت مستعجل على ايه!! 

 

-    يلا يا أمي وصلنا 

-   وصلنا فين ؟

-   وصلنا الشارع اللي فيه بيت العروسة 

-   يا لهوي !. ده شارع ده ولا زريبة !. ايه المنطقة المعفنة دي يا واد!

-   يا أمي ايه الكلام ده بس. يلا العمارة اهيه 

-   عمارة! هي دي تتسمى عمارة برضو!. دي مساكن الإيواء انضف منها 

-   استغفر الله العظيم. يلا ادخلي يا أمي 

-   بسم الله الرحمن الرحيم 

 

-    تررررررررررررررن تررررررررررررررن 

-   أهلاً أهلاً بالعريس والست والدته، اتفضلوا  يا جماعة 

-   أهلاً بيك يا عمي 

-   أهلاً يا إبني ، اتفضلوا 

-   يزيد فضلك يا ابو الجاموسة 

-   يا أمي  يا أمي  وطي صوتك هيسمعك. 

-   مايسمع ياخويا. انت هتخاف منه من أولها !

 

-    تعالي يا ام مروة الجماعة وصلوا 

-   أهلاً أهلاً بالأستاذ فتحي وأم الأستاذ فتحي 

-   أهلاً يا طنط ، ازي حضرتك 

-   أهلاً بيك يا حبيبي ...ازيك يا ست أم فتحي 

-   أهلاً

-   انتو نورتونا يا جماعة النهاردة 

-   دا نورك يا عمي..  اتفضلي علبة الشيكولاتة يا طنط

-   متشكرين قوي ..تشربوا ايه يا جماعة ؟

-   أي حاجة يا طنط 

-   أي حاجة يعني ايه يا واد. هاتولنا حاجة ساقعة شقتكو حر اعوذ بالله. أنا عارفة انتو عايشين هنا ازاي!!

-   يا أمي يا أمي هتفضحينا 

-   اديني سكت اهو ياخويا 

-   اصل التكييف باييظ يا حاجة ام فتحي 

-   سلامته 

-   يا ام مروة خلي  مروة تيجي تسلم على الأستاذ فتحي ووالدته

-   حاضر يا ابو مروة 

 

-    السلام عليكم 

-   أهلاً يا مروة ، عليكم السلام ورحمة الله

-   أهلاً يا فتحي 

-   أمي، سلمي على مروة 

-   مروة مين ؟

-   العروسة يا أمي 

-   هي دي بقى مروة !!. ومالقيتش اوحش من كدة يا عين امك! 

-   يا أمي وطي صوتك 

-   ازيك يا طنط 

-   أهلاً يا روح طنط 

-   تعالي أقعدي جنبي يا حبيبة ماما ..على فكرة يا حاجة ام فتحي مروة بنتي خريجة آداب وبناتي كلهم خريجين آداب 

-   يا مصيبتي!. إلحق ياواد. الولية بتقول بناتها كلهم استغفر الله العظيم  بتوع آداب ومش مكسوفة على دمها. يلا ياابني نمشي داحنا كنا هنقع وقعة سودة مع بتوع بوليس الآداب دول 

-   يا أمي يا أمي كلية الآداب مش بوليس الآداب. اقعدي بقى 

-   كلية !. طيب. وانا يختي ابني فتحي اسم الله عليه خريج تجارة 

-   ربنا يخليهولك يا ام فتحي 

-   طيب نخش في المفيد بقى يا أستاذ فتحي 

-   تحت أمرك يا عمي 

-   بص ياابني انا مش هضغط عليك في الطلبات، اللي ربنا يقدرك عليه هاته 

-   ربنا يخليك ياعمي 

-   بس يا ابني ما قولتليش شقتك فين 

-   والله يا عمي ان شاء الله هسكن مع والدتي 

-   اييييييييييييييييييييييييييييييييييييييه ! سامع يا ابو مروة !!

-   بس انت فاجئتنا يا إبني 

-   يا عمي أصل بعد جواز اخواتي والدتي قاعدة لوحدها وماينفعش اسيبها 

-   ايه رأيك يا ام مروة ؟

-   بصراحة انا مش موافقة ان بنتي تعيش مع حماتها 

-   احسن برضو. 

-   ليه بس كدة يا طنط !. دي حتى والدتي ست طيبة ولسانها بينقط سكر زي ماحضرتك شايفة 

-   قولّها يابني. ولا يمكن مش باين علية الطيبة وحنية القلب 

-   لالا ياست ام فتحي ماتقوليش كدة. ام مروة ماتقصدش 

-   ولا تقصد ياخويا 

-   ياطنط أؤكد  لحضرتك إنّي هشيل مروة في عنية وأمي هتكون أم تانية ليها ان شاء الله 

-   والله يابني مش عارفة اقولك ايه 

-   خلاص يا فتحي ياضنايا ماتضغطش عليهم هما مش موافقين يلا نمشي 

-   يا أمي أقعدي، أقعدي أبوس إيدك بنتفاهم مع الناس 

-   طيب ياحبيبي اديني قعدت 

-   خلاص يا إبني .. هنفكر ونرد عليك 

-   طيب ياعمي هترد امتى ؟ 

-   ياواد مدلوق عليهم الدلقة السودة دي ليه !. ان شالله ماردو 

-   يا أمي يا أمي 

-   خلاص سكِت اهو 

-   إن شاء الله يا إبني يومين واتصل بيك ابلغك بالرد 

-   أتمنى ياعمي يكون الرد بالموافقة 

-   إن شاء الله يا إبني  

-   طيب نستأذن احنا 

-   اتفضلوا 

 

-    ياحفيظ يارب. أعوذ بالله من ده مشوار. ركبي بتنأح علية 

-   ماقولتليش يا أمي إيه رأيك في العروسة 

-   ماعجبتنيش 

-   ليه بس يا أمي ! 

-   بت نشفانة كدة ومعرقبة وكارتة 

-   وعرفتي منين بس يا أمي انها كارتة وهي قابلتنا بالحجاب وماشوفتيش شعرها 

-   قلبي حاسس انها كارتة وانا قلبي دليلي 

-   على العموم يا أمي كفاية أخلاقها العالية 

-   عالية في الدور الكام ياخويا 

-   طيب ايه رأيك في أهلها ؟ 

-   ماعجبونيش خالص خالص وخصوصا امها 

-   مالها بس امها ؟

-   عاملة فيها نوغة وبنت اربعتاشر ولابسة عباية حمرا. عيب عليها عيب تلبس احمر المفروض تحترم سنها 

-   لا إله إلا الله. كان لازم أتوقع انك هتطلعي فيهم القطط الفاطسة. على العموم أنا مقتنع بيها وبأهلها 

-   اشربهم ياخويا اشربهم 

***********************************

-     ألو، أيوة يا أستاذ فتحي 

-   أيوة ياعمي خير طمني 

-   احنا موافقين يا إبني على خطوبتك من مروة 

-   ياااااااااااااااااااه ياعمي فرحت قلبي ربنا يخليك 

-   هات أسرتك الكريمة وتعالوا شرفونا الخميس الجاي عشان نتفق على التفاصيل 

-   إن شاء الله يا عمي 

-   مع السلامة يا إبني 

-   الله يسلمك يا عمي ...الحمدلله ياااااااااااااااااااااااااااااااااااه 

 

-    يا أمي ... يا أمي .. يا أمي 

-   ايه يا واد فيه ايه ؟

-   أبو مروة وافق 

-   يادي النيلة. وافق ليه !. دا ايه الآذية دي !

-   حضري نفسك يوم الخميس وانا هتصل باخواتي واعمامي عشان يحضروا الاتفاق 

-   اووووووووووووووف 

-   يا أمي افرحيلي، نفسي اشوف الفرحة في عنيكي 

-   مبروك 

-   الله يبارك فيكي يا حبيبتي 

-   اما اروح اتصل بخالتك اقولها. مش عارفة هودي وشي منها فين 

***************************

-    نعم نعم نعم يعني ايه ابنك خطب يا مديحة !

-   نعمل ايه بس يا سهير يختي النصيب 

-   يعني ايه نصيب يا مديحة. إنتِ مش وعدتيني انك هتاخدي نسمة لفتحي ؟ 

-   يختي والله ده كان منى عيني. بس نعمل ايه في شباب الأيام دي !

-   أنا غلطانة اني رفضت التلات عرسان اللي جم لنسمة الأسبوع اللي فات عشان خاطر ابنك 

-   يختي بلاش فشر انتِ كمان. تلات عرسان ايه اللي هيعبروا بنتك!. أنا كنت هاخدها شفقة 

-   كدة برضو يا مديحة! 

-   يختي كبري دماغك. بكرة يجيلها احسن منه ونفرح بيها 

-   بقولك ايه يا مديحة. أنا مش مسمحاكي ولا مسامحة ابنك 

-   ليه بس كدة يختي يا حبيبتي !

-   عشان انتِ وعدتيني ان الواد للبت وانا صدقتك، والبت يا عين امها قايلة لصاحباتها انها هتتخطب لابن خالتها 

-   وهي تتسحب من لسانها وتقول لصاحباتها ليه !

-   عندك حق. في الآخر طلعنا احنا الغلطانين 

-   خلاص يختي بقى لاغلطانين ولا حاجة. بكرة يجيلها اللي يعرف قيمتها 

-   إن شاء الله بكرة يجيلها عدلها ونكيد الأعادي 

-   هو احنا بقينا أعادي يا سهير يختي !

-   انسي ان انا اختك أصلاً وماتتصليش هنا تاني 

-   استني بس يا سهير نتفاهم ...قفلت السكة في وشي .اخص عليكي ياسهير يختي طول عمرك خلقك ضيق.. أما اتصل بغادة أقولها على موضوع فتحي اخوها

-   تررررررررررررررررررن ترررررررررررررررررررن 

-   السلام عليكم 

-   عليكم السلام ايوة يا غادة 

-   أهلاً ياماما، ازيك يا حبيبتي وحشاني 

-   ماتشوفيش وحش أبداً يا حبيبتي. ازي جوزك وعيالك 

-   كويسين يا ماما بخير الحمدلله 

-   أنا متصلة اقولك ان المحروس اخوكي لقى عروسة 

-   فتحي!

-   ايه العبط ده !. إنتِ ليكي كام أخ مش متجوز!. ممدوح اتجوز وفاضل فتحي 

-   الله. مبروك يا ماما ألف مبروك. ومين سعيدة الحظ بقى؟

-   بت زميلته في الشغل 

-   ماشاء الله. اسمها ايه العروسة ؟

-   ما اعرفش 

-   ماتعرفيش ازاي ياماما ! هو انتِ ما شوفتيهاش؟

-   شوفتها ونسيت اسمها 

-   أكيد أمورة. أنا عارفة ذوق فتحي 

-   ذوقه منيل من يومه. عمره ما اختار حاجة عدلة. كنت اخده عشان اشتريله أي حاجة كان يسيب كل الحاجات الحلوة ويشبط في أنتن حاجة 

-   هههههههههههههه ايه يا ماما انتِ هتبدئي شغل الحموات من دلوقتي !

-   اخص عليكي يا غادة. هو في أطيب من قلب امك يا بت !

-   لا طبعا مافيش ياست الحبايب. اتصلتي بهالة ودينا وقلتيلهم يا ماما؟

-   لأ لسة. هقفل معاكي واطلبهم 

-   طيب يا ماما، وانا هتصل بفتحي اباركله واعرف منه التفاصيل مع السلامة يا ماما 

-   الله  يسلمك يا حبيبة ماما 

******************************

-    قولي يا واد يا فتحي 

-   نعم يا أمي 

-   اتصلت باخوك ممدوح وقلتله  على خطوبتك؟

-   ايوة طبعا، وغادة اتصلت بيا وقالتلي انك قلتيلها وقلتي لهالة ودينا 

-   اتصلت بعمامك؟

-   ايوة طبعا وكلهم هيكونوا موجودين.. مافيش دعوة حلوة ياست الحبايب ولا ايه ؟

-   ربنا يكفيك شر بلاوي الدنيا يا ابني 

-   اللهم آمين. وعايزك تدعيلي ربنا يتمم بخير 

-   هحاول اعصر على نفسي لمونة وابقى ادعيلك 

-   ربنا مايحرمنيش منك يا أمي يا ست الكل 

-   يا خوفي منك يا فتحي 

-   خايفة من ايه بس يا أمي ؟

-   خايفة بعد ما تتجوز مراتك تاخدك مني وتقسي قلبك على امك 

-   يا أمي تاخدني منك فين بس اذا كنت انا هعيش معاكي !

-   اه ياني من العروسة واللي هنشوفه على ايد العروسة. ياخوفي لتطردوني من الشقة وتودوني دار مسنين 

-   لا حول ولا قوة إلا بالله، ليه بس كدة يا أمي !. أنا هشيلك فوق راسي يا غالية. هو انا انسى حنيتك علية وعلى اخواتي وكل اللي عملتيه علشانّا!! 

-   كلامك حلو يا واد. أما نشوف أفعالك بقى 

-   إن شاء الله يا أمي هنعيش مع بعض سعداء. بس انتِ اعتبري مروة زي بنتك 

-   أعتبرها زي بنتي ليه يا خويا!. هو انا عدمت بناتي!. ربنا يخليهوملي حبايب قلب امهم. ال زي بنتي ال 

******************************************

-    ترررررررررررررن ترررررررررررررررن 

-   افتح يا فتحي انا لسة بلبس. لازم اخواتك جم 

-   حاضر 

*********************************

-    مبروووووووووووووووووووووووووووووووووووووووووووك يا توحا 

-   مبروك يا عريس 

-   مبروك يا فتحي 

-   الله يبارك فيكو يا جماعة عقبال ولادكو 

-   فين ماما ؟

-   بتلبس جوا 

-   انتو جيتو ياولاد 

-   هو احنا نقدر نتأخر على فتحي 

-   طيب يلا يا جماعة عشان هنعدي على الحلواني نجيب الجاتوه 

-   ايه ايه ايه. جاتوه ايه اللي هتجيبه يا واد انت ياواد !

-   اومال يعني يا أمي هنخش بايدينا فاضية ع الناس! 

-   احنا ياواد مش ودينا علبة شيكولاتة حار ونار في جتتهم لما روحنا نشوف المخفية ؟؟

-   ايوة يا أمي بس النهاردة مختلف 

-   مختلف في ايه !. احنا يادوب رايحين نتفق ويمكن الكلام ما يعجبناش وما نتفقش وان شاء الله الكلام مش هيعجبنا 

-   يا أمي يا أمي حرام عليكي والله 

-   يا ماما مش كدة 

-   هو انا عملت حاجة يا اخواتي !. انتو كلكو عليا ولا ايه! 

-   ما فيهاش حاجة يا ماما لما فتحي يشتري جاتوه بالمناسبة دي 

-   أنا مالي يشتري ولا مايشتريش ولا يتفلق هو حر 

-   عارف يا فتحي، في محل حلواني تحفة فتح على أول الشارع والجاتوه بتاعه يجنن 

-   خلاص  يا غادة نتوكل على الله ونجيب منه 

-   والحتة بكام يا بت يا غادة ؟

-   حوالي خمسة جنيه يا ماما 

-   خمس عفريت لما ينططوكي. مش هنجيب منه خسارة فيهم 

-   اومال بس نجيب منين ياماما ؟

-   في محل حلواني ام اسماعيل بتجيب منه والحتة بخمسين قرش وبتقول عليه جميل قوي 

-   يا ماما في حتة جاتوه بخمسين قرش برضو! 

-   ايوة. حتى كل لما ام اسماعيل تشتري منه الاسعاف تيجي تشيلها هي وعيالها 

-   لا حول ولا قوة إلا بالله. لا يا أمي، أنا هشتري من اللي قالت عليه غادة 

-   اشتري مطرح ماتشتري جاتك القرف 

-   الله يبارك فيكي يا أمي. منورة 

-   يلا يا جماعة عشان عمامكو جم بعربياتهم تحت 

*************************************

-    أهلاً أهلاً أهلاً يا جماعة انتو شرفتونا 

-   الله يشرف مقدارك يا ابو العروسة 

-   منورة يا حاجة ام فتحي 

-   الله يخليك 

-   السلام عليكم، ازيك يا ست ام فتحي 

-   وعليكم السلام، ازيك يا ام العروسة 

-   بقولك ايه يلا نقعد في مكان تاني ونسيب الرجالة يتفقوا 

-   لأ يا حبيبتي انا مش هتنقل من هنا، أنا هحضر الاتفاق 

-   يا أمي  اسمعي الكلام وقومي مع طنط 

-   مابقومش مع طنطات انا. ولا عايزيهم يستفردوا بيك ويضحكو عليك !

-   خليكي يا أمي خليكي 

-   طب يا مروة خدي اخوات العريس القمرات دول واقعدوا في أوضتك يا حبيبتي 

-   حاضر يا ماما 

 

-    في الأول يا عمي أحب أعرّفك بالجماعة ..ده عمي مصطفى وده عمي محمود وده اخويا ممدوح

-   أهلاً وسهلاً نورتوا يا جماعة، أنا اسمي صابر عبد الكريم، والد مروة 

-   أهلاً وسهلاً يا أستاذ صابر 

-   والله إبننا فتحي شكرلنا في حضرتك وبنت حضرتك جداً ونسبكو يزيدنا شرف

-   الله يخليك يا أستاذ مصطفى. وانا والله سألت على الأستاذ فتحي في الشغل والكل بيشكر فيه جداً وفي أخلاقه 

-   ربنا يخليك يا عمي 

-   ندخل في التفاصيل يا جماعة 

-   اتفضل يا أستاذ صابر 

-   أولاً إن شاء الله أنا هقول الإلتزامات اللي عليا. إن شاء الله هجيب الأجهزة الكهربائية وهنجيب المطبخ بكل لوازمه 

-   يا سلام ومالك جاي على نفسك كدة !

-   أمي يا أمي استني 

-   استنيت، أما اشوف أخرتها 

-   طيب يا عمي أنا هجيب أوضة النوم وأوضة الصالون والسفرا والنجف والسجاد والستاير 

-   يا ريتني ما خلفتك يا فتحي 

-   خلاص على بركة الله 

-   استنى يا عم انت، هو انت ما صدقت!.على  بركة الله ايه!. انتو كدة هتغرقونا 

-   في ايه بس يا حاجة ام فتحي ؟

-   مش عاجبني الكلام الفاضي ده. انتو تشيلو اوضة من التلاتة وتجيبوا السجاد والستاير 

-   يا سلام. ليه ان شاء الله!! 

-   ما تتدخليش في الكلام يا ام مروة 

-   حاضر 

-   على العموم مش هنزعلك يا ست ام فتحي. أنا هجيب أوضة السفرا وهجيب الستاير 

-   زي بعضه 

-   شوفتي الراجل ذوق ازاي يا أمي ؟ 

-   طيب بالنسبة للشبكة يا أستاذ فتحي مقدرتك تجيب بكام دهب؟ 

-   مقدرته يجيب غويشتين نحاس 

-   استني يا أمي..انا ياعمي بصراحة مش هقدر اجيب شبكة بأكتر من ست الاف 

-   ليه ياابني حرام عليك يا حبيبي. ست الاف بحالهم تشبك بيها حتة السردينة دي! 

-   قليلين قوي قوي قوي يا أستاذ فتحي على بنتي حبيبتي 

-   أم مروة وبعدين !

-   حاضر اديني سكت  

-   سكت حسك يا بعيدة. ال قليلين ال. عايزين يضحكو ع الواد 

-   خلاص يا ابني اللي في مقدرتك هاته 

-   طيب بالنسبة للفرح يا ابو مروة ، ياريت تتفقوا هيبقى ازاي

-   طب مش قبل ما نتفق ع الفرح يا ام مروة نشوف أستاذ فتحي هيكون جاهز امتى بالعفش ؟

-   فتحي ابني هيكون جاهز بالعفش بعد سبع سنين من غير مقاطعة 

-   ايه يا أمي اللي بتقوليه ده !. إن شاء الله يا عمي كمان تلات شهور 

-   الله يكرمك يا ابني.اصل انا ضد فترة الخطوبة الطويلة 

-   عند حق يا أستاذ صابر. أنا بنتي الكبيرة قعدت مخطوبة سنتين وحصل مشاكل لاحصر لها 

-   ربنا مايجيبش مشاكل يا أستاذ محمود 

-   يعني فرح مروة بنتي حبيبتي بعد تلات شهور ان شاء الله ؟

-   ومالك يختي فرحانة قوي كدة انك لزقتيهالنا! 

-   يا أمي اسكتي الست هتسمعك 

-   هو انا غلطت في حاجة يا فتحي يابني !. أنا ساكتة اهو 

-   طيب هننزل نجيب شبكة بنتي حبيبتي إمتى يا أستاذ فتحي ؟

-   إن شاء الله الخميس الجاي يا طنط 

-   حار ونار فيكي وفي بنتك يا ام اويئ 

-   فين الشربات يا جماعة 

-   الف مبروك يا ام العروسة 

-   الله يبارك فيكو وعقبال ولادكو 

-   الف مليون مبروك يا ام العريس 

-   ييارك فيكو ويكفينا شر بلاويكو 

 

***********************

-   اه ياني يارجلي. لازم يابني تروح تخطب من آخر الدنيا!. مش قادر تخطب من الشارع اللي ورانا عشان خاطر رجل امك!

-   معلش يا أمي ، دعواتك بالتيسير

-   تيسير مين ؟. هي مش العروسة اسمها عفاف؟

-   عفاف مين يا أمي بس !. اسمها مروة مروة مروة

-   ياخويا وانا عقلي دفتر!. اتصلّي باخوك عشان انكد عليه وعلى مراته

-   استر يارب، حاضر

******************************

-    الو، ايوة يا ممدوح افندي

-   أهلاً يا أمي

-   انت ياواد انت واخدينك معانا عشان تقعد زي الكرسي وماتنطقش ولا ايه!

-   ايه يا أمي اللي حصل؟

-   ماحصلش حاجة ياخويا. قاعد زي ابو الهول وسايب الناس تضحك على اخوك وتاخد شقانا وعرقنا ويحطوه في شبكة وشوية خشب وانت ساكت

-   لا إله إلا الله. وانا هتكلم في ايه !. ماهو فتحي بيتكلم وعمامي بيتكلمو. وانتِ ماشاء الله عليكي غلبتي الكل في الكلام

-   اه وانت بقى جيت عشان تفرجنا ع الجزمة الجديدة ؟

-   معلش يا أمي، حقك عليا

-   وبعدين تعالى هنا.ست الحسن والجمال مرات جنابك ماجتش ليه؟

-   لإنها راحت عند مامتها زي كل أسبوع. وقالت ان وجودها مش مهم لان ده اتفاق رجالة

-   قصدك ايه ياواد. ان امك بشنب؟

-   أمي تصبحي على خير، أنا عندي شغل الصبح

-   وانت من أهله ياخويا. عيال تعل وتشل 

**************************************

-    مالك يا ماما ؟

-   مافيش حاجة يا مروة 

-   لأ بجد مالك يا ماما. إنتِ سرحانة وحاساكي مش طبيعية خالص 

-   بصراحة يا مروة انا قلقانة عليكي 

-   قلقانة  عليا! ليه ياماما ؟ 

-   ياحبيبتي السكن مع الحما مش حاجة سهلة وبيجيب مشاكل كتير 

-   ياماما وهتيجي منين المشاكل!. أنا هعاملها زي ماتكون أمي ومش هزعلها. يبقى هتيجي منين المشاكل! 

-   يابنتي الحما بتغير على ابنها، ومش هتكون مبسوطة لما تشوفه يهتم بيكي أو يحاول يسعدك 

-   ليه بس ياماما!.وليه ماتقوليش انها هتعاملني زي بنتها وتخاف عليا وتتمنالي السعادة! 

-   والله يابنتي اللي بشوفه من الناس اللي حواليا بيأكد ان الحموات طبعهم واحد ومهما عملتي مش هترضى عنك 

-   ياماما بس أنا مقتنعة بفتحي وهستحمل أي حاجة عشانه 

-   هو بصراحة فتحي إنسان مهذب يا مروة، وكفاية عنيه اللي مابتترفعش من على الأرض 

-   خلاص بقى ياماما فرفشي، وشوفي بقى هننزل نجيب أدوات المطبخ إمتى 

-   هقول ايه يابنتي!. ربنا يسعدك ويفرحك ويخلف ظني وتطلع حماتك كويسة 

-   إن شاء الله يا ماما 

**********************************

-    ماقولتليش ياغادة ايه رأيك في عروسة اخوكي ؟

-   امورة خالص ياماما وطيبة وحتة سكر 

-   بقى كدة!. طب وانتِ ياهالة ايه رأيك فيها ؟

-   ماارتحتلهاش ياماما. شكلها كدة بت سوسة وسهونة ومش ساهلة 

-   نفس احساسي يا حبيبة امك. وانتِ يا دينا ؟

-   وانا هحكم عليها ازاي من غير ما اعرفها يا ماما!. احنا لسة ماشوفناش منها حاجة ربنا يستر 

-   إن شاء الله يا ماما هتشوفي منها كل خير، دي باين عليها طيبة خالص 

-   وانتِ ياست غادة بتدافعي عنها قدام ماما قوي كدة ليه !

-   عشان شايفاكو واخدين منها موقف من أولها وناوينلها على نوايا سودة يا هالة 

-   بس يابت يللي اسمك غادة انتِ عشان كلامك بيقف في زوري 

-   ماانتِ عارفة غادة ياماما. بتشوف كل الناس طيبين 

-   أنا مش عارفة البت دي طالعة لمين!. ساعات بحس انها مش بنتي واتبدلت مني في المستشفى 

-   ™™™™

-   ترن ترررررررررررررررررررن ترن 

-   مين ؟

-   انا منال ياطنط 

-   اهلا يامنولة يا حبيبتي اتفضلي 

-   ألف مبروك لمروة يا طنط 

-   الله يبارك فيكي يا حبيبتي وعقبال ما افرح بيكي يارب 

-   ايوة يا طنط ادعيلي قوي هههههههههههههه

-   بدعيلك والله يا حبيبتي ربنا يعلم 

-   فين مروة الوحشة اللي كلت الجاتوه لوحديها من غيري 

-   ههههههههههه لأ ازاي بقى!. أنا شايلالك نصيبك من الجاتوه وهروح اجيبهولك. مروة في أوضتها يا حبيبتي ادخليلها وانا هحصلك بالجاتوه والحاجة الساقعة 

-   شكراً يا طنط 

-   تن تن تن 

-   اتفضل 

-   مبروك يا عروسة 

-   منووووووووووووولة حبيبتي، الله يبارك فيكي عقبالك يارب 

-   تعالي قوليلي واعترفي منين جيبتي العريس ده عشان اروح اجيب واحد 

-   هههههههههههه ده زميلي في الشغل 

-   اه قولتيلي. ده كان بينكو غراميات بقى 

-   اخص عليكي يا منولة. انتِ تعرفي عني كدة برضو!. ده أكتر حاجة عجبته فيا ان ماليش علاقة خالص بأي زميل من زمايلي غير في حدود الشغل، وحتى هو لما أعجب بيا وصارحني انه عايز يتقدملي ماكلمتوش ولا كلمة واديتله رقم بابا عشان يتصل بيه 

-   يامرمورة يا حبيبتي أنا عارفة أخلاقك كويس. أنا بهزر معاكي 

-   عقبالك يارب يا منولة 

-   بقولك ايه ماتشوفيلي شغلانة معاكو في الشركة يمكن اطلعلي بعريس انا كمان هههههههههههه

-   ياحبيبتي نصيبك مستنيكي وهيجيلك اللي يستاهلك ان شاء الله 

-   طيب هو عريسك مالوش اخوات عايزين عرايس ؟

-   للأسف عنده اخ واحد ومتجوز. بس انا مش هسكت. بعد الجواز هخليه يدورلك على عريس من اصحابه ولا قرايبه 

-   وانا مستنيا يا ست مروة. أما اشوف هههههههههههه

***********************************

-    أمي

-   يا أمي 

-   عايز ايه ؟

-   مالك بتردي عليا وحش كدة ليه !

-   ما وحش الا عمايلك يا سي فتحي 

-   ليه بس كدة يا ست الكل ؟

-   بقى يا واد تروح تنقي العفش وماتاخدش امك معاك !

-   يا أمي أنا عارف ان رجليكي وجعاكي وماحبتش اتعبك معايا 

-   وطبعا الهانم وامها ضحكو عليك ودفعوك دم قلبك 

-   لا والله ابداً، هما مالهومش ذنب. الأسعار هي اللي غالية جدا 

-   جبت الصالون بكام ؟

-   بخمستاشر ألف 

-   يا مصيبتي! ليه هو انت فاكر نفسك هتتجوز الملكة نازلي ولا الأميرة فوزية!. ايش حال ان ماكانت حتة بت معصعصة ومالهاش لزمة 

-   الله يسامحك يا أمي 

-   وجبت أوضة النوم بكام ؟

-   بتلاتاشر ألف 

-   جتك تلاتاشر ألف خيبة على خيبتك. مافاصلتش ليه في الأسعار عشان يخفضوهالك شوية ؟

-   بالعكس، أنا فاصلت ودي الأسعار بعد التخفيض 

-   يلا. هنقول ايه. كان ماله الصالون بتاعي اللي ماكملش خمسة واربعين سنة ولسة بشوكه. لكن انت اللي حكمت رأيك تبيع عفش امك وتجيب للهانم عفش جديد 

-   دي عروسة يا أمي ومن حقها عفش جديد 

-   طيب يا حنين يا ابو قلب طيب. انا هقوم البس عشان اروح اصالح خالتك واعزمها ع الفرح 

-   طيب ما تتصلي بيها 

-   كل اما اتصل بيها تكنسل علية وتقفل الموبايل. كله من عمايلك. كان فيها ايه لو كنت اتجوزت نسمة بدل ما اختي تزعل مني وتقاطعني! 

-   كله قسمة ونصيب يا أمي 

************************************

-    ترررررررررررررررن ترررررررررررررررررن 

-   مين بيرن الجرس ؟

-   افتحي يا سهير انا اختك مديحة 

-   أختي مديحة ماتت 

-   موتة لما تشيلك يا بعيدة.اسم الله عليا 

-   امشي يا ست انتِ من هنا احنا مش موجودين 

-   مش موجودين ازاي وانتِ بتردي من جوا !

-   موجودين ومش هنفتحلك 

-   كدة برضو يا سهير يختي ياحبيبتي يا بنت ابويا وامي!. داحنا راضعين لبن واحد 

-   بلا لبن بلا مورتة. الدم بقى مية خلاص 

-   يختي افتحي بلاش فضايح فرجتي عليا اللي طالع واللي نازل 

-   اديني فتحت. عايزة ايه ؟

-   طب خليني ادخل ارتاح من السلم 

-   اوف. اتفضلي 

-   اه يا رجلي ياني 

-   مين يا ماما اللي جه ؟ 

-   اهي بلاوي بتتحدف علينا يا نسمة يابنتي 

-   ازيك يا نسمة 

-   أهلاً

-   اخص عليكي دي مقابلة تقابلي بيها خالتك!.على العموم انا جاية اعزمكو على فرح فتحي 

-   تصدقي انك ست ماعندكيش ريحة الدم. انتِ  جاية تغيظينا وتحرقي دمنا يا ست انتِ!!!!!

-   على العموم انا عملت اللي عليا وجيت لحد عندك يا سهير، وان كنت انا اهون عليكي، انتِ ماتهونيش علية. ونسمة بنتي زي ما هي بنتك وربنا يفرحنا بيها.عن إذنك يختي 

***********************************

-    مبروك يا توحا 

-   الله يبارك فيكي ياغادة 

-   مبروك يا ماما 

-   الله يبارك فيكي يا غادة يا حبيبة ماما 

-   ماقولتليش يا ماما انتِ جبتي عباية جديدة تحضري بيها الفرح 

-   ايوة يا دينا انا جبت عباية حلوة قوي كلها ترتر 

-   ترتر ايه يا أمي! دي كدة هتبقى مخالفة شرعا 

-   بقولك ايه يا فتحي خليك في حالك يابني عشان قلبي ما يغضبش عليك 

-   صحيح يا جماعة انتو هتجيبو مين يغني في الفرح ؟

-   انا بقول نجيب نانسي وهيفا يا دينا

-   فكرة يا هالة، دول هيخلو الفرح يجنن. الواحد عنده كبت وعايز يطلعه 

-   اه ياولاد خلاص اتصلوا بيهم قولولهم خالتكو ام فتحي عايزاكو وهما هيجو يجروا 

-   بس متهيألي يا ماما مش هيرضو يجو عشان دول بياخدو فلوس كتيرة قوي قوي 

-   ما انا عارفة يا هالة يا حبيبتي. انا هراضيهم وادي كل واحدة خمسة جنيه في ايدها وهعشيهم كمان واروحهم مبسوطين 

-   وهتجيبو رقاصة يا ماما ؟

-   طبعا يا دينا، هو الفرح يبقى فرح من غير رقاصة برضو يابنتي !

-   ايه يا جماعة اللي بتقولوه ده. مغنيين ايه ورقاصة ايه. انا هعمل فرح اسلامي اسلامي اسلامي 

-   ايه يابني اسلامي اسلامي!. هو احنا قولنالك هنجيب كفار قريش يغنوا!. احنا هنجيب مسلمين موحدين بالله .وندر علية اجيب الرقاصة كمان مسلمة هي والصبي بتاعها ، اومال ايه يابني انا مايخلصنيش زعلك. هو انا عندي كام فتحي  !

-   حرام يا أمي حرام تجيبي رقاصة خليعة معرية جسمها وبترقص على أنغام الشيطان 

-   والله يابني انت اللي حرام عليك تخوض في عرض الولايا. طب دانا حاطة عيني على حتة رقاصة آخر أدب وآخر أخلاق ، كانت بترقص في فرح البت مشيرة. حتى من ادبها وأخلاقها كانت بترقص وهي باصة في الأرض وبتترعش من كسوفها، وام ابراهيم من كتر ما انبسطت من أخلاقها كانت عايزة تخطبها لابنها بس الرقاصة مارضيتش وقالت انا مااسيبش أكل عيشي عشان راجل 

-   يا أمي لو سمحتي أنا مش هبدأ حياتي بمعصية تغضب ربنا. وبعدين سبحان الله دانتِ حجيتي بيت ربنا ووقفتي عند الكعبة، ازاي تقبلي تعصيه !

-   انت ياواد هتكفرنا عشان حتة فرح!. طب ايه رأيك يا فتحي لو عملت فرح إسلامي مش هحضره. وكمان ليك عندي مفاجأة، مش هسكنك معايا، ابقى روح بقى اعمل فرح إسلامي وخلي المسلمين يلمو من بعض ويجيبولك شقة 

-   لا حول ولا قوة الا بالله 

-   معلش يا فتحي، أنا هقنعها ان شاء الله 

-   ربنا يخليكي ياغادة، دايماً واقفة جنبي 

*********************************************

-    منورين الفرح يا جماعة عقبال ولادكو 

-   مين الستات الجرابيع اللي دخلوا  القاعة دول يا هالة 

-   اكيد قرايب العروسة يا ماما 

-   اه والله يا بنتي عندك حق 

-   يا جماعة عيب كدة ما يصحش 

-   بس يا بت يللي اسمك غادة انتِ عشان انا مبقوقة ومتغاظة منك يا بتاعة الفرح الاسلامي انتِ واخوكي 

-   ماله بس ياماما ماهو جميل اهو 

-   اه يختي جميل قوي. وان شاء الله هيسمعونا اغاني ولا هيسمعونا  حاجة عن عذاب القبر عشان نتعظ 

-   لأ ياماما هيشغلوا اناشيد 

-   اناشيد ايه يعني يابنتي. انا حافظة نشيد بلادي بلادي، اقوم اقوله؟

-   لأ يا ماما اناشيد اسلامية 

-   اهي الاناشيد ابتدت 

 

-    ايه ياماما الفرح العجيب ده !

-   هنعمل ايه  يا دينا يابنتي حكم القوي ع الضعيف 

-   أفراح أفراااااح ، أفراح أفراح وورووود

-   والفرحة ماليها حدووود

-   ماما الحقي دول مشغلين نشيد بيقول افراح وقرود. قصدهم مين بقى بالقرود ؟ 

-   قصدهم ع العروسة واهلها يا حبيبة امك 

-   افراح وقرود ايه يا جماعة! اسمها افراح وورود 

-   لو سمحتو ممكن اقعد جنبكو 

-   إنتِ تبع مين ياست ؟

-   انا قريبة العروسة 

-   يبقى ارجعي ورا في اخر القاعة. 

-   ليه يعني 

-   هو كدة واللي مش عاجبه يروح بيتهم 

-   طب حضرتك بتزعقي ليه !

-   انا حرة. فرح ابني وازعق براحتي 

-   اه حضرتك مامت العريس. الف مبروك 

-   وانتِ مالك انتِ تباركيلي بصفتك ايه يعني !

-   خلاص حقك عليا 

-   مبروك يا مديحة 

-   لالالالالالالالالا مش ممكن. يا حبيبتي يا سهير، كنت عارفة اني مش ههون عليكي 

-   لا مش قوي كدة. انا جيت بس اشوف البت اللي هياخدها فتحي احسن من بنتي في ايه 

-   يختي لا احسن ولا اوحش كل واحد بياخد نصيبه 

-   مبروك يا خالتي 

-   الله يبارك فيكي يا نسمة عقبالك يا حبيبتي 

-   قريب. قريب قوي ان شاء الله ..بصي بصي يا ماما العروسة شكلها وحش قوي 

-   يع يع يع إخي إخي على ذوقك يا فتحي …هو ده بقى الفرح !

-   نعمل ايه يا سهير. فتحي حكم علينا نعمله اسلامي 

-   والله يا جماعة مافي احلى من الفرح الاسلامي اللي مافيهوش معصية لله 

-   قوموا البت دي من جنبي لاجيبها من شعرها 

-   حاضر يا ماما خلاص هروح اقعد في حتة تانية 

-   مبروك يا ام العريس 

-   الله يبارك فيكي يا ام العروسة 

-   خلي بالك من مروة 

-   وماله ياحبيبتي ، ابقي قوليلي على مواعيد الرضعة بتاعتها 

-   اااااه  الله يكون في عونك يا مروة يابنتي 

-   مبروك الف مبروك يا مروة 

-   الله يبارك فيكي يا غادة 

-   والله يا مروة فتحي محظوظ انه اتجوز عسولة زيك 

-   من ذوقك والله يا غادة. تعرفي، أنا حبيتك  خالص 

-   وانا والله يا مروة 

-   مبروك يا مرات اخويا 

-   الله يبارك فيكي يا هالة 

™™™™™

-   يلا يا جماعة المأذون كتب الكتاب والعريس هياخد عروسته على شهر العسل 

-   لولولييييييييييييييييييييييييييييييييييييييييييييي

 

-    رايحة فين يا ماما بس 

-   سيبيني يا غادة يا بنتي عشان الحق اركب مع اخوكي العربية واروح معاه هو والعروسة 

-   تروحي معاهم فين بس يا ماما ماينفعش 

-   اومال يا بنتي هبات في الشارع ولا ايه  !

-   لأ طبعا يا ماما يا حبيبتي، انتِ هتيجي تنوريني اسبوع 

-   اسبووووووووووووووووع ! انا اسيب بيتي اسبوع !. ليه!. عشان ايه!. هي البت العروسة هي اللي مسلطاكِ  ولا ايه ؟؟ 

-   يا ماما هي مالهاش دعوة. انا اللي نفسي تيجي عندي والولاد هيتجننو عليكي وكل شوية يقولوا عايزين تيتة عايزين تيتة. مش كدة يا ولاد؟

-   لااااااااااااااااااااااااااااااااااااااااااااااااااااااااااء 

-   اخص عليكو يا قلالات الأدب. شوفتي يا ماما هيتجننوا عليكي ازاي 

-   خلاص يا غادة عشان خاطرك وخاطر العيال هتنازل واجي معاكو وامري لله 

***********************************

-    مروة حبيبتي وحلم عمري خلاص بقت مراتي! انا مش مصدق 

-   ربنا يخليك ليا يا فتحي يا حبيبي 

-   نورتي مملكتك يا حبيبتي 

-   ربنا ما يحرمنيش منك ويقدرني اسعدك طول العمر يا حبيبي 

-   ويقدرني يا حبيبتي واكون ليكي الزوج اللي بتحلمي بيه. مروة  أأأ

-   انت عايز تقول حاجة يا فتحي ؟

-   حبيبتي أنا بس كنت عايز اقول ان أمي ممكن مثلا تقول كلمة تضايقك ولا حاجة فأنا عايزك ما تدقيش على كلامها وتفوتي لإن دي ست كبيرة ولازم نراضيها 

-   من غير ما تقول يا حبيبي. مامتك زي مامتي بالظبط وان شاء الله هتعامل معاها بما يرضي الله 

-   ترررررررررررررن تررررررررن ترررررررررررررررررن 

-   موبايلك بيرن يا فتحي 

-   يا ترى مين اللي هيتصل في وقت زي ده!. ايه ده!. دي امي. يا ترى خير 

-   ايوة يا أمي 

-   ايوة يا حبيب امك وحشتني يا واد يا فتحي 

-   ربنا يخليك يا أمي. هو انا لحقت اوحشك !

-   ازيك يا حبيبي عامل ايه ؟

-   كويس يا امي 

-   والبت اللي معاك عاملة ايه ؟

-   مروة كويسة الحمدلله 

-   اتعشيت يا حبيبي ؟

-   لسة يا أمي. نامي انتِ يا أمي وما تشيليش هم عشايا 

-   ماشيلش همك ازاي يا حبيبي! اومال اشيل هم مين! 

-   ربنا يخليكي ليا يا حبيبتي تصبحي على خير 

-   يا واد انت بتقفّل معايا في الكلام ليه !

-   يا أمي لازم اقفل دلوقتي 

-   ليه يا حبيبي وراك ايه؟

-   ورايا ايه!!!!!!!!

-   طب خلاص يا فتحي تصبح على خير يا حبيبي 

-   وانتِ من أهله يا أمي...أمي بتسلم عليكي يا مروة وبتقولي سلملي على مروة حبيبتي وروح قلبي 

-   الله يسلمها يارب ويخليها 

-   ها يا حبيبتي كنا بنقول ايه 

-   ترن ترررررررررررررررررررن ترررررررررررررررررررن 

-   مين تاني!... دي أمي برضو.. ايو يا أمي نعم 

-   اخص عليك يا فتحي، أنا قفلت معاك وقعدت اعيط يا حبيبي 

-   ليه بس يا أمي! هو انا زعلتك في حاجة ؟

-   اول مرة يا فتحي انام من غير ما تبوس ايدي وتقولي تصبحي على خير يا أمي اهئ اهئ  

-   يا حبيبتي أول ما اشوفك ههريكي بوس ايدين 

-   اتعشيت يا فتحي ؟

-   هو انا لحقت يا أمي!. انا لسة قافل معاكي 

-   الولية ام العروسة بعتتلكو عشا؟ 

-   ايوة طبعا بعتت عشا 

-   بعتت ايه ؟

-   مش عارف والله 

-   ما تسأل اسمها ايه اللي عندك 

-   مامتك بعتت عشا ايه يا مروة ؟

-   بعتت فراخ وحمام محشي وصنية بطاطس باللحمة ورز ومحشي ورق عنب ودكر بط

-   سمعتي يا أمي ؟ 

-   هو ده بس اللي هان عليها!. أعوذ بالله من البخل 

-   طيب عن اذنك يا أمي 

-   طب يا حبيبي اوعى تنسى تشرب كوباية لبن قبل ماتنام واتغطى كويس 

-   حاضر حاضر يا أمي 

-   والله انا خايفة الغطا يتشال من عليك وانت نايم ومش هتلاقي حد يغطيك زي امك ما بتعمل 

-   لا ماتخافيش مروة هتبقى تغطيني 

-   هتغطيك ازاي يا واد هي هتنام معاك في نفس الاوضة ولا ايه ؟

-   اومال يعني هتنام في الصالون يا أمي! 

-   اخص عليها قليلة الأدب. خلاص ما فيش حيا. ازاي تنام معاك في اوضة واحدة 

-   يا أمي دي مراتي 

-   ولو يابني. الأصول أصول 

-   في حاجة تاني يا أمي ؟

-   لأ يا حبيي مع السلامة 

-   مروة حبيبتي ونور عنيا 

-   فتحي حبيبي ونبض قلبي 

-   يلا يا حبيبتي قومي غيري هدومك بقى 

-   حاضر يا حبيبي 

-   تررررررررررررررررررررررن ترررررررررررررررررررن 

-   الو ايوة يا أمي 

-   ايوة يا فتحي يا حبيبي شربت اللبن ولا لسة ؟

-   يا أمي روحي نامي روحي نامي ابوس ايدك ماتشليش همي 

-   اخص عليك يا فتحي ، بطمن عليك يابني. ال على رأي المثل، قلبي على ولدي انفطر وقلب ولدي عليا حجر 

-   هي غادة فين يا أمي؟ 

-   غادة نامت هي وجوزها وولادها ومش لاقية حد اتكلم معاه 

-   تقومي تتصلي بيا انا برضو يا أمي!! 

-   خلاص يا حبيبي انا هصلي ركعتين وادخل انام وهكلمك الفجر عشان اصحيك تصلي واطمن عليك برضو 

-   ماشي يا أمي ماشي.. مافيش حل غير اني اقفل الموبايل عشان الليلة دي تعدي على خير 

 

************************

انتهت الحلقة الأولى، وستعرض الثانية حالاً .. انتظروني

 

لا تنسوا ذكر الله والصلاة على الحبيب عليه الصلاة والسلام

 

لا إله إلا الله ولا حول ولا قوة إلا بالله

 

اللهم صل وسلم وبارك على نبينا محمد